E Oracion di Nos Tata Loke e Ta Nifica pa Bo

E Oracion di Nos Tata cu Hesucristo a siña hende den e Sermon Riba Sero, ta den Bijbel na Mateo capitulo 6, versiculo 9 te cu 13. Un poco prome cu el a siña hende e oracion aki, Hesus a bisa: “Ora bo ta haci oracion, no keda ripiti palabranan vano manera e paganonan ta haci, pasobra nan ta kere cu nan lo wordo tendi pa motibo di nan cantidad di palabra.”—Mateo 6:7.

Pues, sin duda Hesus su intencion no tawata pa hende ripiti e Oracion di Nos Tata palabra pa palabra. Ta berdad cu despues e mes a ripiti e oracion aki pa e beneficio di otro oyentenan. (Lucas 11:2-4) Pero e palabranan den e Evangelio di Mateo no ta mescos cu esnan menciona den Lucas. Ademas, ora Hesus y su disipelnan a haci oracion mas despues, nan no a uza precis e mesun palabranan di su oracion modelo.

Dicon e Oracion di Nos Tata ta den Bijbel? Mediante e modelo aki, Hesus ta siña nos con pa haci oracion di tal manera cu e por ta aceptabel pa Dios. Den e oracion aki nos ta haya tambe contesta pa cierto pregunta importante tocante bida. Pesei laga nos considera un pa un cada parti di e Oracion di Nos Tata.

Con Ta Dios Su Nomber?

“Nos Tata cu ta den shelo, bo nomber sea santifica.” (Mateo 6:9) E oracion modelo ta cuminsa cu e palabranan ei y ta yuda nos hala serca Dios door di yam’e “nos Tata.” Mescos cu un mucha cu di mes ta sintie atrai na un mayor amoroso y comprensivo, nos por acerca nos Tata celestial cu e confiansa cu e ta desea di tende nos. Rei David a canta: “Abo cu ta scucha oracion, serca bo tur hende ta bin.”—Salmo 65:2.

Hesus a siña nos resa pa Dios su nomber sea santifica of aparta como santo. Pero con  ta Dios su nomber? Bijbel ta contesta cu e siguiente palabranan: “Abo, kende su nomber ta Yehova, abo so ta e Haltisimo riba henter tera.” (Salmo 83:18, NW) Bo a yega di mira e nomber Yehova den Bijbel?

De echo, por haya e nomber di Dios, Yehova, casi 7.000 bes den e manuscritonan hopi bieu di Bijbel. Sinembargo, tin traductor a bai asina leu di saca e nomber aki for di nan versionnan di Bijbel. Pesei ta na su luga pa nos resa pa nos Creador santifica su nomber, of hacie santo. (Ezekiel 36:23) Un manera pa actua na harmonia cu e oracion ei ta door di uza e nomber Yehova ora nos ta resa na Dios.

Un señora cu yama Patricia a lanta como catolico y tawata conoce e Oracion di Nos Tata bon. Con el a reacciona ora un Testigo di Yehova a mustr’e Dios su nomber den Bijbel? “Mi no por a kere!” el a bisa tur emociona. El a sigui bisa: “Pesei mi a cohe mi mes Bijbel, y e tawata eiden tambe. Caba e Testigo a mustra mi Mateo 6:9 y 10, anto a splica mi cu e Oracion di Nos Tata indirectamente ta referi na Dios su nomber. Mi tawata echt emociona y a pidie pa studia Bijbel cu mi.”

E Boluntad di Dios Lo Sosode Riba Tera

“Cu bo reino bin. Cu bo boluntad sosode na tera mescos cu den shelo.” (Mateo 6:10) Di ki manera e parti aki di Hesus su oracion modelo lo cumpli? Mayoria hende ta imagina cu shelo ta un luga di pas y trankilidad. E Scritura ta menciona cu shelo ta Yehova su “habitacion santo y glorioso.” (Isaias 63:15) Ta pesei nos ta resa pa Dios su boluntad sosode na tera “mescos cu den shelo”! Pero esaki lo sosode un dia?

Yehova su profeta Daniel a predeci: “E Dios di shelo lo lanta un reino cu nunca lo no wordo destrui, y e reino ei lo no pasa pa ningun otro pueblo; e lo garna y pone un fin na tur e reinonan aki [riba tera], ma e mes lo dura pa semper.” (Daniel 2:44) Pronto e Reino of gobierno celestial aki lo tuma accion pa trece pas mundial mediante un gobernacion husto.—2 Pedro 3:13.

Pidi pa e Reino di Dios bin y pa su boluntad sosode riba tera ta un expresion di fe cu lo no hiba na decepcion. Apostel cristian Huan a skirbi: “Mi a tende un bos duro for di e trono, bisando: ‘Mira, e tabernakel di Dios ta  meimei di hende, y e lo biba meimei di nan, y nan lo ta su pueblo, y Dios mes lo ta meimei di nan, y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.’” Tambe Huan a agrega: “Y Esun cu ta sinta riba e trono a bisa: . . . ‘Skirbi, pasobra e palabranan aki ta fiel y berdadero.’”—Revelacion 21:3-5.

Oracion y Nos Necesidadnan Fisico

Hesus su palabranan den e oracion modelo a mustra cu ora nos ta resa nos mester ta mas interesa den cosnan cu tin di aber cu e nomber di Dios y su boluntad. Sinembargo, e oracion modelo ta sigui cu peticionnan personal cu ta apropiado pa haci na Yehova.

E prome di esakinan ta: “Duna nos awe nos pan di cada dia.” (Mateo 6:11) Esaki no ta un peticion pa rikesa material. Hesus a anima nos pa resa pidi pa “tur dia, duna nos nos pan di cada dia.” (Lucas 11:3, BPK) Na harmonia cu e Oracion di Nos Tata, nos por resa cu e confiansa cu Dios lo percura pa nos necesidadnan di tur dia si nos ta stim’e y obedec’e.

Ora nos ta precupa demasiado cu problemanan economico, esei lo por pone nos neglisha nos necesidad spiritual y di e manera ei keda sin haci loke Dios ta spera di nos. Pero si nos pone adoracion di Dios na prome luga den nos bida, nos por tin sigur cu nos peticionnan pa necesidadnan material manera por ehempel, cuminda y paña, lo wordo scucha faborablemente. Hesus a bisa: “Busca prome e reino di Dios y [Dios] su husticia, y tur e cosnan aki lo wordo añadi na boso.” (Mateo 6:26-33) No ta facil pa busca Dios su husticia, ya cu nos tur ta pecado y ta den necesidad di pordon. (Romanonan 5:12) E Oracion di Nos Tata ta trata e asunto ei tambe.

Nos Oracionnan y Pordon

“Pordona nos nos debenan, mescos cu nos tambe ta pordona nos debedonan.” (Mateo 6:12) Den e Oracion di Nos Tata menciona na Lucas, e “debenan” aki a wordo yama “picanan.” (Lucas 11:4) Yehova Dios realmente lo pordona nos picanan?

Maske Rei David di Israel di antiguedad a comete picanan serio, el a repenti y cu confiansa el a pidi den oracion: “Abo, Señor, ta bon, y cla pa pordona, y abundante den misericordia pa tur esnan cu ta sclama na bo.” (Salmo 86:5) Esei si ta un pensamento alentador! Nos Tata celestial ta “cla pa pordona” e picanan di esnan cu repenti y acudi na dje. Si, mescos cu un debe por wordo cansela completamente, asina Yehova Dios por pordona nos picanan completamente.

Sinembargo, Hesus a menciona cu tin un condicion: Pa Dios pordona nos, nos mester pordona otro hende. (Mateo 6:14, 15) Aunke tres amigo di Job a maltrat’e, el a pordona nan y asta a resa pa nan. (Job 42:10) Si nos pordona hende cu peca contra nos, nos lo agrada Dios y lo por beneficia di su misericordia.

E echo cu Dios ta dispuesto pa tende nos peticionnan mester conmove nos pa haci esfuerso pa busca su aprobacion. Y nos por haci esei maske nos ta imperfecto. (Mateo 26:41) Den esaki tambe Yehova por yuda nos, precis manera Hesus a indica den e ultimo peticion importante di e oracion modelo.

Yudansa pa Hiba un Bida Husto

“No hiba nos den tentacion, ma libra nos for di e malbado.” (Mateo 6:13) Yehova no ta keda sin yuda nos ora nos ta enfrenta tentacion ni e no ta pone nos cai den pica. Su Palabra ta bisa: “Pasobra Dios no por wordo tenta door di maldad, y e mes no ta tenta ningun hende.” (Santiago 1:13) Dios ta permiti pa nos wordo tenta, pero e por libra nos for di e Tentado Principal, esta, “e malbado” Satanas e Diabel.

Apostel Pedro a urgi compañeronan cristian: “Sea sobrio, sea alerta. Boso adversario, e Diabel, ta cana rond manera un leon cu ta gruña, buscando ken e por devora.” (1 Pedro 5:8) Figura bo, Satanas a tenta asta e homber  perfecto Hesucristo! Kico tawata e meta di Diabel? Pa kita Hesus for di e adoracion puro di Yehova Dios. (Mateo 4:1-11) Si bo ta haciendo esfuerso pa sirbi Dios, Satanas su meta ta pa devora abo tambe!

Uzando e mundo cu ta bou di su control, Diabel lo por purba tenta nos pa haci cosnan cu Dios no ta aproba. (1 Huan 5:19) Pesei ta hopi importante pa nos acudi regularmente na Dios pa yudansa, specialmente ora nos ta enfrenta un tentacion continuo. Y si nos adora Yehova na harmonia cu su Palabra inspira, Bijbel, e lo libra nos door di yuda nos resisti Diabel. Bijbel ta bisa nos: ‘Dios ta fiel, y cu lo e no permiti pa nos wordo tenta mas cu nos por soporta.’—1 Corintionan 10:13.

Fe den Dios Ta Esencial

Ta masha alentador pa sa cu nos Tata celestial ta interesa den cada un di nos! El a asta laga su Yiu, Hesucristo, siña nos con pa haci oracion. Esaki sigur ta duna nos e deseo pa agrada Yehova Dios. Pero con nos por haci esei?

Bijbel ta declara: “Sin fe ta imposibel pa agrad’e [Dios], pasobra esun cu bin serca Dios mester kere cu e ta, y cu e ta esun cu ta recompensa esnan cu ta busc’e.” (Hebreonan 11:6) Con un hende por logra haya e fe ei? Bijbel ta bisa: “Fe ta bin for di tendemento.” (Romanonan 10:17) Testigonan di Yehova ta keda masha contento pa papia tocante asuntonan biblico cu tur hende cu ta desea di sirbi Dios cu berdadero fe.

Nos ta spera cu e consideracion aki di e Oracion di Nos Tata a yuda bo compronde e nificacion di e oracion mas profundamente. Door di siña conoce Yehova mas miho y tambe su recompensa pa “esnan cu ta busc’e”, bo por fortalece bo fe den Dios. Ohala bo sigui siña mas tocante Dios y su propositonan pa asina bo por tin un relacion intimo cu bo Tata celestial pa semper.—Huan 17:3.

[Comentario na pagina 5]

“Nos Tata cu ta den shelo, bo nomber sea santifica. Cu bo reino bin. Cu bo boluntad sosode na tera mescos cu den shelo. Duna nos awe nos pan di cada dia. Y pordona nos nos debenan, mescos cu nos tambe ta pordona nos debedonan. Y no hiba nos den tentacion, ma libra nos for di e malbado.”—Mateo 6:9-13

[Plachi na pagina 7]

Yehova ta percura pa e necesidadnan di esnan cu ta stim’e

[Plachi na pagina 7]

Tambe Dios ta yuda nos resisti Diabel

[Plachi na pagina 7]

Si nos, mescos cu Job, pordona hende cu peca contra nos, nos lo por beneficia di Dios su misericordia