‘Haci Oracion Asin’aki’

BO SA kico e Oracion di Nos Tata ta bisa? E ta un oracion modelo cu Hesucristo a siña hende. Ora Hesus tawata duna su famoso Sermon Riba Sero, el a bisa: “Haci oracion anto asin’aki.” (Mateo 6:9) Siendo cu ta Hesus a introduci e oracion aki, tin hende ta yam’e e Oracion di Nos Señor, pero e ta bon conoci como e Oracion di Nos Tata.—Latin, Paternoster.

Miyones di hende rond mundo a siña e Oracion di Nos Tata for di cabes y ta ripitie hopi bes, kisas tur dia. Hopi persona ta ripiti e oracion aki na scolnan y na eventonan publico. Dicon hende ta duna asina tanto balor na e Oracion di Nos Tata?

Cipriano, teologo di siglo 3 a skirbi: “Cua otro oracion lo por tin un nificacion spiritual mas profundo cu esun cu Cristo a duna nos . . . ? Cua otro oracion na e Tata por ta mas veridico cu esun cu e Yiu, kende ta e Berdad, mes a pasa over na hende?”—Huan 14:6.

Den su buki di catisashi, Iglesia Catolico Romano ta considera e Oracion di Nos Tata como “e oracion cristian fundamental.” The World Book Encyclopedia ta reconoce e luga importante cu e oracion aki tin den tur religion di cristiandad y ta yam’e un di e “declaracionnan basico di e fe cristian.”

 Sinembargo, nos mester reconoce si cu hopi hende cu ta ripiti e Oracion di Nos Tata no ta comprond’e plenamente. “Si bo tin cualkier background cristian probablemente lo bo por bisa e Oracion di Nos Tata lihe lihe, sin pausa pa cohe rosea” e corant di Canada, Ottawa Citizen ta bisa, “pero por ta lo bo tin dificultad pa bis’e na un manera trankil y compronde loke bo ta bisando.”

Ta realmente importante pa compronde e oracionnan cu nos ta haci na Dios? Dicon Hesus a duna nos e Oracion di Nos Tata? Kico e ta nifica pa bo? Laga nos ban considera e preguntanan aki.