Molinanan Cu Ta Pone Pan Riba Mesa

HENDE a yega di yam’e “e cuminda basico di bida”, “e alimento principal”, y “e sosten principal y continuo di hende desde hopi tempo pasa.” Si, desde antiguedad pan ta un alimento basico. De echo, un di hende su necesidadnan mas urgente ta di percura pa su pan di cada dia.

E ingrediente basico di pan ta hariña. Y pa haya hariña mester mula grano. Pesei mulamento ta un ofishi masha bieu. Sin e facilidad di mashin, lo mester tawata un trabou inmenso pa comberti e grano den hariña fini. Den tempo biblico, tawata relaciona e zonido di molina di man cu un situacion normal y pacifico, lo contrario tawata un indicacion di desolacion.—Yeremias 25:10, 11, BPK.

Kico mulamento a encera atrabes di siglonan? Cua ta algun di e metodo- y obhetonan cu hende a uza pa mula grano? Y ki tipo di molina ta pone pan riba bo mesa awendia?

Dicon Nan Ta Necesario?

Yehova a bisa e prome pareha humano, Adam cu Eva: “Mira, mi a duna boso tur mata cu ta duna simiña riba superficie di henter tera y tur palo cu tin fruta cu ta duna simiña; esei lo ta cuminda pa boso.” (Genesis 1:29) Un di e alimentonan cu Yehova Dios a duna hende ta simiña di yerbanan di grano. E fuente di alimento aki tawata esencial pa hende su existencia, ya cu tur grano—incluso trigo, cebada grof, rogge, avena, aros, millet, sorghum y maishi—ta contene carbohidrato rico na zetmeel cu e curpa por comberti den su fuente principal di energia, esta, glucose.

Sinembargo, hende no por digeri grano grof y curu. Ta hopi mas facil pa hende come e granonan aki ora nan ta mula y cushina. E manera mas simpel pa comberti un cierto cantidad di grano den hariña ta door di batie den un pilon, mul’e entre dos piedra of uza un combinacion di e dos metodonan aki.

Molina Cu Ta Funciona cu Forsa di Hende

Estatuanan chikito di antiguo grafnan Egipcio ta ilustra e uzo di un di e prome tiponan di molina di grano, esun cu ta parce un siya. E molina a consisti di dos piedra; esun djabou tawata un poco hol y ta subi un tiki parti patras y e otro riba dje tawata mas chikito. E trahado, cu por lo general tawata un hende mohe, tawata riba su rudia tras di e obheto y tawata tene e piedra mas chikito cu ambos man. Caba e tawata pusha e piedra aki bai bin cu tur e forsa di e parti ariba di su curpa, y asina mula e grano entre e dos piedranan. Esta un obheto simpel pero efectivo!

Sinembargo, e echo cu hende tawata pasa oranan largo riba rudia tawatin su mal consecuencianan pa e curpa. E trahado tawatin cu pusha e piedra djariba te na e punta dilanti riba e piedra di molina cu forma di siya y despues hal’e bek.  Esei a causa un presion constante riba su lomba, brasa-, bel-, rudia- y dedenan di pia. Estudionan di deformacion di weso di skeletnan di antiguo Siria a pone expertonan riba tereno di fossiel yega na e conclusion cu uzo di molinanan similar a causa cu hende mohenan jong a haya lesion debi cu nan ta haci e mesun movecion constantemente. Por ehempel, buscuchi di rudia deforma, daño na e ultimo parti di e weso di lomba y artritis degenerativo na e duim di pia. Den Egipto di antiguedad, ta parce cu ta mucha mohe esclabo tawatin cu haci trabou di mula grano. (Exodo 11:5) * Tin experto ta kere cu ora e Israelitanan a sali for di Egipto, nan a hiba e tipo di molina cu tin forma di siya hunto cu nan.

Cu tempo e obhetonan di mula a bira mas eficiente door cu nan a haci e partinan cu ta raspa riba otro di ambos piedra grof. Tambe nan a traha un buraco den forma di un catuchi of cone den e piedra djariba di tal manera cu un hende por a basha grano aden, cu di mes tawata drenta meimei di e dos piedranan. Den siglo 4 of 5 prome cu nos era, Grecia a inventa un mashin di mula masha simpel. Nan a pega un bara of man horizontal na e piedra djariba. Door di drei e banda di e man aki cu no tawata pega bai bin den forma di un boog chikito, e piedra djariba cu ta fungi como trechter tawata raspa riba e otro piedra djabou.

Tur e molinanan ya menciona tawatin un limitacion cu no tawata facil pa soluciona. Nan tawata depende di e movemento di bai bin cu ningun bestia no por a siña haci. Pesei e molinanan aki mester a depende di forsa di hende. Mas despues tecnologia a produci algo nobo: molina cu ta drei. E ora ei si a bira posibel pa uza bestia.

Molinanan Cu Ta Drei Ta Facilita e Trabou

Maske fuentenan di informacion ta varia, ta posibel cu a inventa e molina cu ta drei den e paisnan rond di Lama Mediteraneo, mas o menos den siglo 2 prome cu nos era. Rond di e prome siglo di nos era, Hudiunan na Palestina ya tawata conoce e tipo di molina ei, pasobra Hesus a papia di “un piedra di molina tal como burico ta drei.”—Marco 9:42, NW.

A uza e molina cu bestia por a drei na Roma y na un gran parti di e Imperio Romano. Te ainda hopi di e molinanan aki ta existi na Pompei. Nan ta consisti di un piedra pisa djariba cu tin forma di zandloper y cu a fungi como un trechter y tambe di un piedra djabou cu tin forma di cone. Segun cu e piedra djariba tawata drei rond riba e piedra djabou, e pipitanan di grano tawata drenta meimei di e dos piedranan y tawata garna. E tipo di piedranan djariba aki cu ta existi ainda tin un diameter cu ta varia entre 45 pa 90 centimeter. E molinanan aki tawatin un haltura di asta 1,8 meter.

No ta sigur cu ta molinanan di man cu ta drei a desaroya for di molina di bestia of si ta viceversa. En todo caso, e molina di man cu ta drei tawatin e bentaha cu por a carg’e y e tawata facil pa uza. E tawata consisti di dos piedra rondo cu kisas tawatin un diameter di entre 30 pa 60 centimeter. E parti ariba di e piedra djabou tawata hol [forma di “U”] y e parti abou di e piedra djariba tawata bol, di manera cu e tawata pas net net den e piedra djabou. E piedra djariba tawata hinca den un shaft of penchi, anto cu un man di palo por a bir’e rond. Normalmente, dos hende mohe tawata sinta cara pa otro, cada un cu un man riba e man di palo pa drei e piedra djariba. (Lucas 17:35) Cu e otro man, un di e hende mohenan  tawata yena e grano tiki tiki den e buraco di e piedra djariba, y e otro hende mohe tawata saca e hariña cu tawata sali na banda y pon’e den un baki of riba un paña poni bou di e molina. E tipo di molina aki a satisface e necesidad di solda-, nabegante- of famianan chikito cu tawata biba leu di e establecimento di mula grano.

Molina di Awa of di Biento

Alrededor di aña 27 prome cu nos era, e ingeniero Romano Vitruvio a duna un descripcion di un molina di awa di su tempo. Awa cu tawata basha contra un wiel vertical cu tawata pega riba un shaft horizontal, tawata pone e wiel drei. E gearnan of djentenan di e wiel tawata pasa e movecion aki over pa un shaft vertical. En turno, e shaft aki tawata pone un piedra grandi di molina djariba drei.

Cuanto grano e molina di awa tawata produci na comparacion cu e otro molinanan? Ta ser calcula cu molina di man tawata mula menos cu 10 kilo di grano pa ora, y e molina di bestia mas eficiente tawata produci te cu 50 kilo. Di otro banda, e molina di awa di Vitruvio por a mula un 150 pa 200 kilo pa ora. Pa siglonan despues expertonan di molina a sigui uza e principio basico describi door di Vitruvio, aunke nan a cambi’e y mehor’e masha hopi mes.

Awa no tawata e unico fuente natural di energia cu hende a uza pa pone piedra di molina drei. Si hende a remplasa wielnan di awa cu paña di belanan na un molina di biento, nan lo por a logra e mesun meta. Probablemente nan a cuminsa uza molina di biento na Europa den siglo 12 di nos era. Na Alemania, Belgica, Hulanda y otro partinan a uza nan generalmente pa mula grano. A uza nan te ora cu gradualmente molinanan di stoom y otro fuentenan di energia moderno a remplasa tur e otro fuentenan di energia di antes.

“Nos Pan di Cada Dia”

Apesar di progreso, hopi metodo di mula grano di pasado ainda ta existi den algun parti di mundo. Te ainda nan ta uza pilon cu stamper den cierto parti di Africa y Oceania. Na Mexico y Centro America, nan ta uza e molina di man cu tin forma di siya pa mula maishi pa tortiya. Y aki aya tin varios molina di awa y di biento ta funciona ainda.

Sinembargo, den e mundo desaroya djawe, hende ta uza molinanan di cilinder completamente mecanisa y automatisa pa produci hariña pa traha pan. Gradualmente pipitanan di grano ta bira hariña segun cu nan ta pasa door di cilindernan di hero cu ta grof y cu ta drei riba otro na diferente velosidad. E sistema aki ta haci posibel pa produci diferente tipo di hariña na un prijs abou.

No cabe duda cu no ta necesario mas pa pasa tanto trabou manera antes pa haya hariña pa prepara cuminda cu ne. Toch, nos por ta gradicido na nos Creador pa e echo cu el a duna nos tanto grano como e creatividad pa combirtie den “nos pan di cada dia.”—Mateo 6:11.

[Nota]

[Plachi na pagina 23]

Molina Egipcio cu forma di siya

[Reconocemento]

Soprintendenza Archeologica per la Toscana, Firenze

[Plachi na pagina 23]

Den un molina cu bestia a drei, tawata pres oleifi pa haya azeta dushi

[Reconocemento pa Potret na pagina 22]

For di e Self-Pronouncing Edition of the Holy Bible, cu ta contene e version King James y e esun Revisa