“Sea Fuerte den Señor”

“Sea fuerte den Señor, y den e forsa di su poder.”—EFESIONAN 6:10.

1. (a) Ki combate extraordinario a tuma luga un 3.000 aña pasa? (b) Dicon David a resulta victorioso?

UN 3.000 aña pasa, dos contrincante a enfrenta otro riba campo di bataya meimei di dos ehersito enemigo. Esun mas jong tawata un mucha homber wardado di carne cu yama David. Su dilanti tawatin para Goliat, un homber di un estatura y forsa extraordinario. Goliat su corasa tawata pisa rond di 57 kilo, y e tawatin un lansa inmenso y un spada grandi. David no tawatin ningun armadura bisti, y su unico arma tawata un slinger. E gigante Filisteo Goliat a sinti su mes ofendi ora el a mira cu su retado Israelita tawata un hoben. (1 Samuel 17:42-44) Pa e mirones di ambos ehersito, e resultado lo mester a parce inevitabel. Pero no ta semper ta esnan poderoso of e guereronan ta gana e bataya. (Eclesiastes 9:11) David a resulta victorioso pasobra el a bringa den e poder di Yehova. El a bisa: ‘E bataya ta di Yehova.’ E relato biblico ta bisa cu “David a prevalece riba e Filisteo cu un slinger y un piedra.”—1 Samuel 17:47, 50.

2. Den ki clase di lucha cristiannan ta participa?

² Cristiannan no ta participa den guera fisico. Aunke nan ta na pas cu tur hende, nan ta den un bataya spiritual contra contrincantenan masha poderoso. (Romanonan 12:18) Den e ultimo capitulo di Pablo su carta na e Efesionan, el a describi un pelea den cua tur cristian ta envolvi. Pablo a skirbi: “Nos lucha no ta contra carni y sanger, sino contra e gobernantenan, contra e podernan, contra e forsanan mundial di e scuridad aki, contra e forsanan spiritual di maldad den e luganan celestial.”—Efesionan 6:12.

3. Segun Efesionan 6:10, kico nos tin mester pa garantisa cu nos lo tin exito?

³ E “forsanan spiritual di maldad” ei ta Satanas y e demoñonan, kendenan kier destrui nos relacion cu Yehova Dios. Ya cu nan ta hopi mas fuerte cu nos, nos ta den un situacion paresido na esun di David, y nos no por tin exito a menos cu nos depende riba Dios pa fortalece nos. De echo, Pablo ta urgi nos pa ta “fuerte den Señor, y den e forsa di su poder.” (Efesionan 6:10) Despues di a duna e conseho ei, e apostel a describi e percuracionnan spiritual y e cualidadnan cristian cu lo yuda nos sali victorioso.—Efesionan 6:11-17.

4. Cua ta e dos puntonan principal cu nos lo considera den e articulo aki?

⁴ Laga nos ban analisa kico e Scritura ta bisa tocante e puntonan fuerte y e tacticanan di nos enemigo. Caba nos lo  considera ki strategia nos por uza pa defende y proteha nos mes. Si nos sigui Yehova su instruccion, nos por tin sigur cu nos enemigonan lo no prevalece contra nos.

Un Lucha Contra Forsanan Spiritual di Maldad

5. Con e manera cu nan a describi e lucha di Efesionan 6:12 den e idioma original ta yuda nos compronde Satanas su strategia?

⁵ Pablo a splica cu ‘nos lucha ta contra forsanan spiritual di maldad den e luganan celestial.’ Naturalmente e spirito malbado mas principal ta Satanas e Diabel, e gobernante of “prins di demoñonan.” (Mateo 12:24-26) Den e idioma original, Bijbel ta compara nos bataya cu lucha libre, esta, un bringamento man na man. Den e peleanan di lucha libre di antiguo Grecia, cada participante tawata purba pone su contrincante perde balansa pa asina e por a dal e abou. Di igual manera, Diabel kier pa nos perde nos balansa spiritual. Con e por pone nos haci esei?

6. Uza e Scritura pa mustra con Diabel por uza diferente tactica pa debilita nos fe.

⁶ Diabel por actua manera un colebra of un leon cu ta gruña of asta manera un angel di lus. (2 Corintionan 11:3, 14; 1 Pedro 5:8) E por uza hende pa persigui nos of descurasha nos. (Revelacion 2:10) Siendo cu Satanas tin henter mundo bou di su control, e por haci pleno uzo di e deseonan y atraccionnan di mundo pa cohe nos den trampa. (2 Timoteo 2:26; 1 Huan 2:16; 5:19) E por uza e manera di pensa di mundo of di apostatanan pa gaña nos mescos cu el a gaña Eva.—1 Timoteo 2:14.

7. Ki limitacionnan e demoñonan tin, y ki bentahanan nos tin?

⁷ Aunke e armanan y e poder di Satanas y su demoñonan por parce aplastante, nan tin nan limitacionnan. E spiritonan malbado aki no por obliga nos haci cosnan malo cu ta desagrada nos Tata celestial. Nos a ser crea cu boluntad liber, y nos por controla nos pensamentonan y accionnan. Es mas, no ta nos so ta bringa. Den nos tempo tambe, mescos cu tawata e caso den tempo di Eliseo, “esnan cu ta cu nos ta mas cu esnan cu ta cu nan.” (2 Reinan 6:16) Bijbel ta sigura nos cu si nos somete nos mes na Dios y resisti Diabel, lo e hui for di nos.—Santiago 4:7.

Sea Conciente di e Trikinan di Satanas

8, 9. Ki pruebanan Satanas a trece riba Job pa kibra su integridad, y ki peligernan spiritual nos ta confronta awe?

⁸ Satanas su trikinan no ta desconoci pa nos pasobra e Scritura ta revela su tacticanan basico. (2 Corintionan 2:11) Por ehempel, contra e homber husto Job, Diabel a uza problemanan economico severo, morto di su sernan keri, oposicion di famia, sufrimento fisico y critica infunda di amigonan falso. Job a bira deprimi y el a sinti cu Dios a bandon’e.  (Job 10:1, 2) Aunke awe Satanas kisas no ta causa e problemanan aki directamente, e tipo di dificultadnan ei ta afecta hopi cristian, y Diabel por uza nan pa su probecho.

⁹ Peligernan spiritual a aumenta den e tempo di fin aki. Nos ta biba den un mundo caminda metanan materialista ta haya mas prioridad cu metanan spiritual. Medionan di comunicacion constantemente ta presenta sex ilicito como un fuente di felicidad en bes di un fuente di dolor di curason. Y mayoria hende a bira ‘stimado di placer mas bien cu stimado di Dios.’ (2 Timoteo 3:1-5) E manera di pensa aki por ta un menasa pa nos balansa spiritual, a menos cu nos “lucha seriamente pa e fe.”—Hudas 3.

10-12. (a) Menciona un spiertamento cu Hesus a duna den su comparacion di e sembrado. (b) Ilustra con actividadnan spiritual por ser restringi.

¹⁰ Un di Satanas su tacticanan mas exitoso ta di pone nos bira totalmente envolvi den e mundo aki y su actividadnan materialista. Den Hesus su comparacion di e sembrado, el a spierta cu den algun caso “e precupacionnan di e mundo aki y e engaño di rikesa ta hoga e palabra [di e Reino].” (Mateo 13:18, 22) E palabra Griego traduci akinan cu “hoga” ta nifica “choca” of “strangula completamente.”

¹¹ Den selvanan tropical bo por haya e mata Ficus aurea, of ficus strangulado. E ta crece poco poco y ta lora rond di troncon di un palo anfitrion. Pocopoco e ficus cu ta rama aki ta lora rond di e palo anfitrion mientras cu su raiznan ta bira mas y mas fuerte. Cu tempo e tantisimo raiznan di e ficus strangulado ta absorba mayor parti di e nutricion cu tin den suela na pia di e palo anfitrion, mientras cu su blachinan ta kita lus di solo for di e anfitrion. Finalmente, e palo anfitrion ta muri.

¹² Den un manera similar, e precupacionnan di e mundo aki y e buscamento di rikesa y di un estilo di bida comodo, pocopoco por absorba mas y mas di nos tempo y energia. Unabes nos atencion desvia bai na e cosnan di mundo, facilmente nos lo por neglisha nos studio personal di Bijbel y tuma pa custumber pa perde reunionnan cristian, y asina nos ta ser corta for di nutricion spiritual. E ora ei metanan materialista ta remplasa actividadnan spiritual, y finalmente nos ta bira un victima facil pa Satanas.

Nos Tin Cu Para Firme

13, 14. Ki posicion nos tin cu tuma ora cu Satanas ta opone nos?

¹³ Pablo a urgi rumannan den fe pa “para firme contra e trampanan di Diabel.” (Efesionan 6:11) Ta mas cu claro cu nos no por derota Diabel y su demoñonan. Dios a duna Hesucristo e tarea ei. (Revelacion 20:1, 2) Sinembargo, tanten cu Satanas t’ei, nos tin cu “para firme” pa su atakenan no vence nos.

¹⁴ Apostel Pedro tambe a enfatisa e necesidad di para firme contra Satanas. Pedro a skirbi: “Sea sobrio, sea alerta. Boso adversario, e Diabel, ta cana rond manera un leon cu ta  gruña, buscando ken e por devora. Ma resistie, firme den boso fe, sabiendo cu boso rumannan den henter mundo ta pasando door di e mesun experencianan di sufrimento.” (1 Pedro 5:8, 9) De echo, e sosten di nos rumannan spiritual ta crucial pa nos por para firme ora cu Diabel ta ataca manera un leon cu ta gruña.

15, 16. Duna un ehempel biblico pa mustra con e sosten di rumannan den fe por yuda nos para firme.

¹⁵ Den sabana Africano, ora un leon gruña den bicindario, antilopnan ta reacciona door di sali na careda te ora nan ta fuera di peliger. Sinembargo, olifantinan ta un bon ehempel di duna sosten mutuo. E buki Elephants—Gentle Giants of Africa and Asia (Olifanti—Gigantenan Manso di Africa y Asia) a splica: “Un medio di defensa cu un trupa di olifanti normalmente ta uza ta di forma un circulo cu nan curpa. E adultonan ta para cu cara pafo contra e menasa y e olifantinan jong ta ser proteha paden dje circulo.” Ora leonnan topa tal manifestacion di poder y sosten, casi nunca nan no ta ataca, ni sikiera e olifantinan jong.

¹⁶ Ora nos ta ser menasa door di Satanas y su demoñonan, nos tambe tin cu keda hunto, scouder cu scouder hunto cu nos rumannan cu ta firme den fe. Pablo a reconoce cu cierto cristiannan a resulta di ta “un encurashamento” p’e durante su encarselacion na Roma. (Colosensenan 4:10, 11) E palabra Griego traduci “encurashamento” ta aparece un solo biaha den e Scritura Griego Cristian. Segun Vine su Expository Dictionary of New Testament Words, “un forma verbal di e palabra ta nifica remedi cu ta suavisa iritacion.” Mescos cu un crema refrescante, e sosten di adoradonan maduro di Yehova por alivia e dolor causa pa sufrimento emocional of fisico.

17. Kico por yuda nos keda fiel na Dios?

¹⁷ Encurashamento for di nos rumannan cristian djawe por fortalece nos determinacion pa sirbi Dios fielmente. Specialmente ancianonan cristian ta ansioso pa duna yudansa spiritual. (Santiago 5:13-15) Algun cos cu por yuda nos keda fiel ta entre otro, studia Bijbel cu regularidad y asisti na reunionnan cristian, y na asamblea- y congresonan. E amistad sera cu nos tin cu Dios tambe ta yuda nos keda fiel na dje. Si, sea cu nos ta come, bebe of kico cu nos ta haci, nos lo kier haci tur pa e gloria di Dios. (1 Corintionan 10:31) Naturalmente ta masha importante pa nos depende riba Yehova mediante oracion afin di por sigui den un rumbo cu ta agrad’e.—Salmo 37:5.

18. Dicon nos no mester entrega asta si circunstancianan angustioso ta debilita nos fortalesa?

¹⁸ Tin biaha Satanas su atakenan ta bin ora cu nos no ta sinti nos mes spiritualmente fuerte. Leon ta bula ataca bestia cu ta suak. Problema den famia, dificultadnan economico of malesa por debilita of caba cu nos fortalesa spiritual. Pero laga nos no cansa di haci loke ta agrada Dios, pasobra Pablo a  bisa: “Ora mi ta debil, e ora ei mi ta fuerte.” (2 Corintionan 12:10; Galationan 6:9; 2 Tesalonicensenan 3:13) Kico Pablo tawata kiermen? E tawata kiermen cu e poder di Dios por compensa nos debilidadnan humano, basta cu nos acudi na Yehova pa haya fortalesa. David su victoria riba Goliat ta mustra cu Dios por—y ta—fortalece su pueblo. Testigonan di Yehova den nos tempo por confirma cu den tempo di crisis extremo, nan a sinti Dios su man fortalecedor.—Daniel 10:19.

19. Duna un ehempel cu ta mustra con Yehova por fortalece su sirbidonan.

¹⁹ Un pareha casa a skirbi lo siguiente relaciona cu e sosten cu Dios a duna nan: “Den transcurso di añanan, nos a sirbi Yehova como esposo y esposa y a disfruta di hopi bendicion y a yega na conoce hopi hende maraviyoso. Pero tambe nos a ser entrena y fortaleci door di Yehova pa wanta contratiemponan cu exito. Mescos cu Job, no ta semper nos tawata compronde pakico cosnan a bai manera nan a bai, pero nos tawata sa si cu Yehova semper tawat’ei pa yuda nos.”

20. Con e Scritura ta mustra cu Yehova semper ta sostene su pueblo?

²⁰ Yehova su man no ta mucho cortico pa sostene y fortalece su pueblo fiel. (Isaias 59:1) Salmista David a canta: “SEÑOR ta sostene tur cu cai, y ta lanta tur cu ta abati.” (Salmo 145:14) Si, nos Tata celestial “dia tras dia ta carga nos carganan” y ta percura loke realmente nos tin mester.—Salmo 68:19.

Nos Tin Mester di “e Armadura Completo di Dios”

21. Con Pablo a enfatisa cu nos tin mester di un armadura spiritual?

²¹ Nos a considera algun di e metodonan di Satanas y nos a mira cu ta necesario pa para firme apesar di su atakenan. Awor nos tin cu considera un otro percuracion masha importante pa nos por defende nos fe cu exito. Dos biaha den e carta di apostel Pablo na e Efesionan, el a menciona un factor esencial pa por para firme contra e trampanan di Satanas y sali victorioso den nos lucha contra forsanan spiritual malbado. Pablo a skirbi: “Bisti e armadura completo di Dios, pa boso por para firme contra e trampanan di Diabel. . . . Tuma e armadura completo di Dios, pa boso por resisti den e dia malo, y despues di a haci tur cos, para firme.”—Efesionan 6:11, 13.

22, 23. (a) Kico nos armadura spiritual ta inclui? (b) Kico nos lo considera den e siguiente articulo?

²² Si, nos tin cu bisti “e armadura completo di Dios.” Tempo cu Pablo a skirbi su carta na e Efesionan, tawatin un solda Romano ta vigil’e, y kisas e solda aki a yega di bisti su armadura completo. Sinembargo, ta Dios a inspira e apostel pa papia tocante e armadura spiritual  cu ta sumamente necesario pa tur sirbido di Yehova.

²³ E armadura aki cu Dios ta duna ta inclui cualidadnan cu un cristian mester tin y tambe percuracionnan spiritual cu Yehova a haci. Den e siguiente articulo, nos lo analisa cada parti di e armadura spiritual. Esaki lo por yuda nos determina con bon ekipa nos ta pa nos guera spiritual. Na mesun tempo, nos lo mira con e maraviyoso ehempel di Hesucristo ta yuda nos pa nos por tin exito den resisti Satanas e Diabel.

Con Lo Bo Contesta?

• Ki lucha tur cristian tin?

• Describi algun tactica di Satanas.

• Con e sosten di nos rumannan den fe por fortalece nos?

• Riba ken su forsa nos tin cu depende, y dicon?

[Preguntanan di Estudio]

[Plachinan na pagina 11]

Cristiannan tin ‘un lucha contra forsanan spiritual di maldad’

[Plachi na pagina 12]

Precupacionnan di e mundo aki por hoga of strangula e palabra di e Reino

[Plachi na pagina 13]

Rumannan cristian por ta “un encurashamento”

[Plachi na pagina 14]

Bo ta pidi Dios forsa?