Bo Ta Wardando Riba Yehova na e Manera Corecto?

MAYORIA hende den e mundo djawe ta perde pasenshi si nan tin cu warda riba un hende of riba algo. Sinembargo, e Scritura ta anima e pueblo di Dios pa cultiva un actitud di spera of “warda.” Na contraste cu e hendenan rond di dje, profeta Mikeas a declara: “Lo mi warda cu speransa riba SEÑOR; lo mi spera riba e Dios di mi salbacion.”—Mikeas 7:7; Lamentacion 3:26.

Pero kico kiermen warda riba Yehova? Con un cristian mester warda riba Dios? Tin maneranan corecto y incorecto di haci esaki? E experencia di profeta Yonas di siglo 9 prome cu nos era ta siña nos un les den e asunto aki.

Un Caso di Warda cu e Motibo Incorecto

Yehova Dios a manda Yonas bai y predica na e hendenan di Ninive, capital di e Imperio Asirio. Ninive tawata conoci como “e stad tur na sanger” debi na su crueldad y brutalidad flagrante, un echo bon confirma pa historiado y arkeologo. (Nahum 3:1) Na prome instante Yonas a purba bula pipa pa e asignacion aki, pero Yehova a percura pa finalmente e profeta bai Ninive toch.—Yonas 1:3–3:2.

“Yonas a cuminsa pasa door di e stad riba e prome dia di caminda; y el a predica y a bisa: ‘Aki cuarenta dia Ninive lo wordo destrui.’” (Yonas 3:4) E esfuerso di Yonas a causa un reaccion remarcabel: “E hendenan di Ninive a kere den Dios, y nan a proclama un yunamento y a bisti paña-di-saco, for di esun di mas halto te na esun di mas humilde.” (Yonas 3:5) Por lo tanto, Yehova, un Dios cu “no kier pa ningun hende bai perdi, ma pa tur bin na repentimento”, a spar e stad.—2 Pedro 3:9.

Con Yonas a reacciona? E relato ta bisa: “Ma esaki a disgusta Yonas masha, y el a rabia.” (Yonas 4:1) Dicon? Podise Yonas a sinti cu el a perde credibilidad como profeta, ya cu el a proclama e destruccion pa un cierto fecha y esei no a sosode. Evidentemente, Yonas a bira mas precupa cu su reputacion cu el a precupa cu misericordia y salbacion di otro hende.

Claro cu Yonas no a bai asina leu di bandona su trabou como profeta. No obstante, el a warda pa “mira kico lo a bai pasa den e stad.” Si, el a desaroya un tipo di actitud rencoroso y di ‘sinta mira.’ Ora el a realisa cu cosnan no a sosode manera el a verwacht, el a traha un ramada, cai sinta den e sombra y warda rabia pa mira kico lo a bai pasa. Pero Yehova no a  aproba Yonas su actitud, pesei amorosamente el a corigi e manera robes di pensa di su profeta.—Yonas 4:5, 9-11.

Dicon Yehova Tin Pasenshi

Aunke Ninive a repenti y a keda gespar, despues e stad a bolbe cai den maldad. Mediante profeta Nahum y Sofonias, Yehova a predeci su destruccion. Papiando di “e stad tur na sanger”, Yehova a declara cu lo e destrui Asiria y comberti Ninive den un desolacion. (Nahum 3:1; Sofonias 2:13) Na aña 632 prome cu nos era, Ninive a ser destrui pa semper.

Den un manera similar e mundo djawe ta culpabel di dramamento di sanger pa loco, anto na un escala hopi mas grandi cu antiguo Ninive. Pa e motibo aki y otronan mas, Yehova a decreta cu e mal sistema di cosnan actual lo yega na su fin den un “gran tribulacion” sin precedente.—Mateo 24:21, 22.

Pero te ainda Yehova a wanta e destruccion priminti di manera cu hende sinsero djawe por repenti y keda gespar, mescos cu esnan repenti di Ninive. Apostel Pedro a referi na Dios su pasenshi cu e siguiente palabranan: “Señor no ta tarda cu su promesa manera algun tin esaki pa tardansa, ma e tin pasenshi pa cu boso, y no kier pa ningun hende bai perdi, ma pa tur bin na repentimento.”—2 Pedro 3:9, 10, 13.

Warda na e Manera Corecto

Pedro ta sigui bisa: “Siendo cu tur e cosnan aki lo ser disolve asina, ki clase di persona boso mester ta den actonan santo di conducta y echonan di debocion na Dios, sperando y teniendo bon na mente e presencia di e dia di Yehova!” (2 Pedro 3:11, 12, NW) Tuma nota cu segun cu nos ta sperando e dia di Yehova, nos lo mester ta demostrando “actonan santo di conducta y echonan di debocion na Dios.” Pues, ta na su luga pa nos ta activo, no inactivo.

Si, ora nos ta warda cu e actitud corecto nos lo desplega pleno confiansa cu e dia di Yehova lo bin precis na e momento cu ta Yehova su proposito. E tipo di fe ei ta produci actonan santo y echonan di debocion na Dios, y un di esnan principal ta e predicacion di e bon nobo di e Reino di Dios. Hesus a pone un bon ehempel pa loke ta e predicacion, y el a instrui su siguidonan ungi: “Mira pa boso heup ta faha, y pa boso lampinan ta sendi. Y sea manera hombernan cu ta warda riba nan shon, pa ora cu e bolbe di e fiesta di casamento y e bin bati, nan por habri p’e mesora. Bendiciona ta e esclabonan ei cu e shon lo haya ta vigila ora cu e bin.”—Lucas 12:35-37.

Esclabonan di prome siglo tawatin custumber di ‘faha nan heup’ door di coi e puntanan di nan mantel y want’e bou di nan faha pa asina ta mas facil pa nan por haci trabou pisa. Pues, un cristian mester ta activo, celoso pa bon obra. E mester resisti cualkier tendencia pa “flakia” y bira inactivo den cosnan spiritual, kisas door cu e ta hinca  su energia den placer y actividadnan materialista. Mas bien, e mester tin hopi di haci, “abundando den e trabou di Señor”, segun cu e ta warda e dia grandi y temibel di Yehova.—Romanonan 12:11; 1 Corintionan 15:58.

Keda Activo Segun Cu Nos Ta Warda

Testigonan di Yehova a keda hopi activo segun cu nan ta warda riba e dia di Yehova. Por ehempel, durante aña di sirbishi 2003, nan a dedica un promedio di 3.383.000 ora pa dia na e predicacion di Yehova su palabra. Figura bo, un persona lo tin cu predica nonstop pa 386 aña pa logra loke nan a haci den un dia!

No obstante, ta bon pa nos puntra nos mes: ‘Ki clase di actitud di warda ami personalmente tin?’ Hesus a duna un comparacion cu ta describi e diligencia cu e ta spera di fiel cristiannan ungi. El a papia di tres esclabo: “Na esun [e shon] a duna cinco talento, na e otro dos, y na e otro un, cada un segun su capasidad; y despues el a bai haci un biahe. Mesora esun cu a ricibi e cinco talentonan a bai y a negosha cu nan, y a gana cinco talento mas. Di e mesun manera esun cu a ricibi e dos talentonan a gana dos mas. Ma esun cu a ricibi un talento a bai, a coba un buraco den tera, y a sconde e placa di su shon. Awor despues di hopi tempo e shon di e esclabonan ei a bolbe y a regla cuenta cu nan.”—Mateo 25:15-19.

Tur tres esclabo a warda riba regreso di nan shon. E dosnan cu a keda activo segun cu nan tawata warda riba nan shon, a tende ora el a yega: “Hopi bon, mi bon y fiel esclabo”! Sinembargo, esun cu a warda sin haci nada, a ricibi un otro trato. E shon a bisa: “Tira e esclabo cu no ta sirbi pa nada den e scuridad di pafo.”—Mateo 25:20-30.

Aunke e comparacion aki ta aplica na cristiannan ungi, e tin un les pa nos tur, sin importa nos speransa. E Shon, Hesucristo, ta spera cu nos cada un lo traha diligentemente den su sirbishi segun cu nos ta warda su yegada riba e gran dia di Yehova. E ta aprecia e labor di “cada un segun su capasidad” y circunstancia. Lo ta un gran goso pa tende e Shon bisa “hopi bon” ora cu porfin nos no tin cu warda mas!

 E Pasenshi di Nos Señor Ta Nifica Salbacion

Kico si e sistema di cosnan aki a dura mas largo di loke nos a pensa of spera cu lo el a dura? No ta pornada el a dura asina largo. Apostel Pedro a skirbi: “Considera e pasenshi di nos Señor como salbacion.” (2 Pedro 3:15) Conocemento exacto di Dios su proposito y reconociendo humildemente cu nos no ta dje importante ei compara cu e cumplimento di Dios su proposito, lo yuda nos tene pasenshi tanten cu Yehova mes ta haya ta bon pa tene pasenshi cu e sistema bieu aki.

Pa stimula cristiannan pa tene pasenshi, e escritor biblico Santiago a conta e ilustracion aki. El a skirbi: “At’e cunukero ta spera e producto precioso di e tera, teniendo pasenshi cu ne, te ora cu e haya e awaseronan tempran y laat. Boso tambe tene pasenshi; fortalece boso curason, pasobra e binida di Señor ta serca.”—Santiago 5:7, 8.

Yehova Dios no kier pa nos cansa of entrega segun cu nos ta warda. E tin trabou pa nos haci y e ta keda contento si nos ta uza e tempo di espera pa traha diligentemente den e trabou ei. E kier pa nos ta entre esnan cu apostel Pablo ta describi den su carta na e Hebreonan: “Nos ta desea cu cada un di boso lo mustra e mesun diligencia pa asina realisa e siguransa completo di speransa te na fin, pa boso no flakia, ma pa boso ta imitadonan di esnan cu pa medio di fe y pasenshi ta hereda e promesanan.”—Hebreonan 6:11, 12.

Pues anto, laga nos no cansa. Mas bien, laga nos relacion personal cu Yehova Dios, nos fe den e sacrificio di rescate di Hesus y nos speransa briyante den e sistema nobo di cosnan, ser e cosnan cu ta yena nos bida cu energia. Mescos cu e esclabonan “bon y fiel” di Hesus su comparacion, laga nos demostra di ta digno di elogio y recompensa door di keda activo den dunamento di alabansa na nos Dios, mescos cu e salmista cu a declara lo siguiente: “Pa loke t’ami, lo mi spera continuamente, y lo mi alaba bo ainda mas y mas.”—Salmo 71:14.

[Plachi na pagina 21]

Decepciona, Yonas a warda pa wak kico lo bai pasa cu Ninive

[Plachinan na pagina 22, 23]

Laga nos desplega debocion na Dios segun cu nos ta warda riba e dia di Yehova