El A Comparti Su Creencia cu e Muchanan di Su Klas

ABO lo desea di yuda e muchanan den bo klas haya un miho comprondemento di bo creencianan basa riba Bijbel? Magdalena, un alumno di 18 aña di scol secundario na Polonia, hopi bes sa papia cu e muchanan di su klas tocante su creencianan como un Testigo di Yehova. Debi na esei e muchanan hopi biaha tawata hacie preguntanan manera: ‘Kico kiermen ser un Testigo di Yehova?’ y ‘Boso no ta kere den Hesucristo?’ Con e por a yuda e muchanan den su klas? Magdalena a haci oracion pa pidi Yehova gui’e, anto el a haci esfuerso pa logra loke el a pidi den oracion.—Santiago 1:5.

Un dia Magdalena a pidi un docente cu a respeta su creencianan, si e tawatin mag di mustra e klas e video Testigonan di Jehova—E Organisacion Tras dje Nomber. * E docente a bai di acuerdo cu esaki. Magdalena e ora ei a bisa e muchanan di su klas: “Mi ta haciendo areglo pa un amigo bin presenta un programa di 90 minuut pa e klas. Lo e tin un presentacion di video y un discusion riba Testigonan di Yehova. Boso lo kier bin?” Tur hende a bisa si. Magdalena cu Wojciech, un predicado experencia di tempo completo, a cuminsa prepara pa e proyecto.

E plan tawata pa habri e presentacion cu un discurso di 20 minuut basa riba e foyeto Testigonan di Jehova—Ken Nan Ta? Kico Nan Ta Kere? * sigui pa un discusion a base di pregunta y contesta. Despues nan lo a pasa e video den biblioteca di scol. Cada alumno den e klas lo a ricibi un regalo—un envelop grandi cu a contene un par di foyeto, e buki Loke hovenan sa puntra—Contesta práctica * y algun tratado y revista.

Riba e dia di e presentacion, tawatin presente den e biblioteca 14 mucha di su klas, e docente y 4 otro alumno cu pa casualidad tawata den biblioteca. Prome, Wojciech a splica cu varios poeta y escritor Polaco a uza e nomber di Dios, Yehova, den nan obranan. El a menciona tambe cu algun buki bieu di catisashi catolico tawatin e nomber di Dios. Ora di splica e actividad di Testigonan di Yehova den tempo moderno, el a mustra foyetonan di varios sucursal y potret di algun Salon di Asamblea.

Despues a sigui un discusion anima. Magdalena cu Wojciech a uza Bijbel pa contesta e preguntanan. Esaki a impresiona e auditorio y a combence nan cu Testigonan di Yehova no ta predicando nan propio ideanan. Cua tawata algun pregunta cu nan a haci, y con nan a ser contesta?

Pregunta: Bijbel tin hopi expresion vago y idioma figurativo, cosnan cu bo por interpreta den varios manera. Con ta posibel pa biba na harmonia cu Bijbel?

Contesta: Tin hende ta bisa cu Bijbel ta manera un violin riba cua bo por toca ki melodia cu bo kie. Pero pensa un rato: Si bo kier haya sa kico e declaracionnan di un escritor ta nifica, e miho cos no ta pa djis puntr’e? Distinto for di escritornan morto di bukinan humano, e  Autor di Bijbel, Yehova Dios, si ta na bida. (Romanonan 1:20; 1 Corintionan 8:5, 6) E contexto di un texto biblico por indica kico ta e interpretacion corecto. Ademas, Bijbel hopi bes ta trata cu e mesun topico den varios luga, pesei ta bon pa compara e pasashinan ei cu otro. Asina nos por laga Dios guia nos pensamento, y ta como si fuera e mes ta splicando nos e texto biblico. Door di haci esei, nos por haya sa su boluntad y biba na harmonia cu ne manera el a ser revela den Bijbel, no ta asina?

Pregunta: Kico ta e diferencia entre cristiannan y Testigonan di Yehova?

Contesta: Nos ta cristian! Pero en bes di djis bisa cu nan ta cristian, Testigonan di Yehova ta haci esfuerso pa biba na harmonia cu loke nan ta kere y cu loke Dios ta siña nan pa nan propio beneficio. (Isaias 48:17, 18) Ya cu tur nan siñansanan ta basa riba Bijbel, nan sa cu nan tin e berdad.—Mateo 7:13, 14, 21-23.

Pregunta: Dicon boso ta aborda hende cu boso no conoce mes, y ta insisti pa papia cu nan? Boso no ta obligando hende asina di acepta boso creencia?

Contesta: Kiermen, boso ta haya cu no ta bon ora un hende riba caya papia cu bo cortesmente y puntra bo kico bo ta pensa di algo? (Yeremias 5:1; Sofonias 2:2, 3) (Wojciech cu Magdalena e ora ei a demostra con nan ta puntra un hende riba caya si Dios ta interesa den e personanan cu a sufri den un inundacion resien cu tawatin na Polonia.) Despues di scucha e persona su opinion, nos ta mustr’e kico Bijbel ta bisa. Si un hende no kier papia, nos ta bis’e ayo y sigui. (Mateo 10:11-14) Boso ta haya cu haciendo esaki nos ta obliga hende pa combersa cu nos? Of hende no tin mag di combersa cu otro mas?

Pregunta: Dicon boso no ta celebra dianan di fiesta?

Contesta: Nos ta celebra e unico acontecemento cu Bijbel ta manda nos conmemora—e Memorial di e morto di Hesucristo. (1 Corintionan 11:23-26) Pa loke ta dianan di fiesta, boso por haya informacion tocante nan origen door di consulta enciclopedianan y otro fuentenan fidedigno. Si boso haci esei, boso lo compronde mesora dicon nos no ta celebra nan.—2 Corintionan 6:14-18.

E auditorio a haci hopi pregunta mas y a haya contesta riba nan tur. E discusion a dura asina largo cu nan mester a pospone presentacion di e video.

Con e alumnonan a reacciona? Laga Magdalena conta nos: “Mi a keda sorprendi cu algun alumno cu normalmente ta haci co’i kens y bofon di otro hende, a haci preguntanan serio. Aunke nan tawata pretende di ta ateista, durante e discusion nan a expresa fe den Dios!” Esnan presente gustosamente a acepta e regalonan, y en total a laga 35 buki, 63 foyeto y 34 revista cu nan.

Esei si tawata resultadonan maraviyoso di un proyecto di scol! Magdalena no solamente a yuda e muchanan den su klas siña conoce y compronde Testigonan di Yehova mas miho, sino tambe cu esei a stimula hopi di e hobennan pa pensa riba e proposito di bida. Dicon abo no ta purba yuda e muchanan den bo klas pa siña mas tocante loke bo ta kere?

[Nota]

[Plachi na pagina 31]

Magdalena cu Wojciech preparando pa e presentacion