Ken Awe Ta Duna Gloria na Dios?

“Digno bo ta, nos Señor y nos Dios, pa ricibi gloria y honor y poder.”—REVELACION 4:11.

1, 2. (a) Ki ehempelnan ta ilustra e campo di ciencia cu yama biomimetica? (b) Ki pregunta ta surgi, y kico ta e contesta?

UN DIA den decada di 1940, e ingeniero Suiso George de Mestral a bai cana cu su cacho. Ora el a yega cas bek, el a ripara cu su paña y tambe lana di e cacho tawata yen di pegasaya. Pa curiosidad, el a examina e pegasayanan bou di microscop y a keda fasina cu e haknan chikito cu tawata pega na tur cos cu tawatin un renchi. Cu tempo, el a imita e diseño di pegasaya pa traha un tipo nobo di tape re-uzabel cu por a pega tela of cos hunto rapidamente—Velcro of klittenband. De Mestral no tawata e unico persona cu a copia diseño for di naturalesa. Na Merca, e ruman hombernan Wright a diseña un avion despues di a studia con parhanan grandi ta bula. E ingeniero Frances Alexandre-Gustave Eiffel a diseña e toren na Paris cu ta carga su nomber, uzando e principionan basico cu ta haci posibel cu hende su weso di bil di pia por carga e peso di e curpa.

² E ehempelnan aki ta ilustra bon loke nan ta yama biomimetica, esta, e campo di ciencia cu ta purba imita diseñonan cu tin den naturalesa. * Sinembargo, un pregunta rasonabel cu ta surgi ta: Cuanto biaha inventornan ta duna merito na Esun cu a diseña pegasaya, parhanan grandi, weso di bil di pia humano y tur e otro creacionnan original briyante riba cua hopi invento humano ta basa? Ta tristo pero berdad, den e mundo djawe rara bes hende ta duna Dios e merito of gloria cu e merece.

3, 4. Kico e palabra Hebreo traduci como “gloria” ta indica, y na kico e mester ta referi ora uz’e pa Yehova?

³ Pero kisas tin hende ta puntra nan mes: ‘Pakico ta necesario pa duna gloria na Dios? Dios no ta glorioso caba?’ Ta berdad cu Yehova ta e Personahe mas glorioso den universo, pero esei no kiermen cu e ta glorioso den bista di tur hende. Den Bijbel, e palabra Hebreo traduci como “gloria” ta referi na cualkier cos cu ta laga un persona parce importante y prominente den bista di otro hende. Ora uza e palabra ei pa Dios, e ta referi na loke ta haci Dios impresionante den bista di hende.

⁴ Ta masha poco hende awe ta tuma nota di loke ta haci Dios impresionante. (Salmo 10:4;  14:1) De echo, asta si figuranan prominente den comunidad ta kere den Dios, hopi bes nan a influencia hende pa trata e glorioso Creador di universo sin respet. Den ki maneranan nan a haci esei?

“Nan No Tin Excuse”

5. Ki splicacion hopi cientifico ta duna pa e maraviyanan di creacion?

⁵ Hopi cientifico ta para ariba cu Dios no ta existi. Con anto nan ta splica e maraviyanan di creacion, entre nan hende? Nan ta bisa cu e creacionnan maraviyoso ei ta producto di evolucion, esta, un forsa impersonal cu pa casualidad a crea cos. Por ehempel, evolucionista Stephen Jay Gould a skirbi: “Nos ta akinan pasobra tawatin un grupo di pisca straño cu un tipo di hala masha peculiar cu por a transforma den pia pa criaturanan riba tera . . . Kisas nos ta anhela pa haya un contesta mas ‘eleva’, pero no tin.” Asina tambe evolucionistanan Richard E. Leakey y Roger Lewin a skirbi: “Talbes e rasa humano ta djis un fayo biologico grandi.” Asta algun cientifico cu ta elogia e beyesa y diseño cu tin den naturalesa no ta duna e merito na Dios.

6. Kico ta descurasha hopi hende di duna Dios e merito cu e merece como Creador?

⁶ Ora hende educa ta declara cu siguransa cu evolucion ta un echo, nan ta indica indirectamente cu ta hende ignorante so no kier kere den evolucion. Con hopi hende ta reacciona riba tal declaracion? Algun aña pasa un homber versa den evolucion a entrevista hende cu a acepta e teoria di evolucion. El a bisa: “Mi a descubri cu mayoria hende cu ta kere den evolucion, ta kere den dje pasobra a bisa nan cu tur persona inteligente ta kere den esei.” Si, ora cu personanan educa expresa nan punto di bista ateista, nan ta descurasha otro hende di duna Dios e merito cu e merece como Creador.—Proverbionan 14:15, 18.

7. Segun Romanonan 1:20, kico nos por mira claramente pa medio di e creacion visibel, y dicon?

⁷ Acaso cientificonan a yega na e conclusion cu tur cos a bin di evolucion pasobra echo y evidencia ta proba esei? Definitivamente cu no! Tur caminda rond di nos tin prueba di un Creador. Apostel Pablo a skirbi tocante e Creador: “Desde creacion di mundo [di humanidad] su atributonan invisibel, su poder eterno y naturalesa dibino, a wordo mira claramente, siendo comprendi door di loke a wordo traha, asina cu nan [esnan cu no kier kere] no tin excuse.” (Romanonan 1:20) E Creador a laga su marca bon cla riba su creacion. Pues Pablo tawata kiermen cu for di principio di humanidad, tawata posibel pa hende ‘mira’ evidencia cu Dios ta existi pa medio di e creacion visibel. Unda e evidencia aki ta?

8. (a) Con e shelo literal ta confirma Dios su poder y sabiduria? (b) Ki indicacion tin cu universo tawatin un Prome Causa?

⁸ Nos ta mira evidencia di Dios den e shelo yen di streya. Salmo 19:1 ta bisa: “E shelonan ta conta di e gloria di Dios.” “E shelonan”—solo, luna y streya—ta confirma Dios su poder y sabiduria. E cantidad inmenso di streya so caba ta yena nos cu respet profundo. Y tur e cuerponan celestial aki no ta move pa loco den espacio, sino segun leinan fisico masha exacto. * (Isaias  40:26) Ta rasonabel pa atribui tal precision na puro casualidad? Un punto interesante ta cu hopi cientifico ta bisa cu universo tawatin un comienso repentino. Splicando e implicacionnan di esaki un profesor a skirbi: “Un universo cu semper a existi ta mucho mas aceptabel pa un [punto di bista] ateista of agnostico. Asina tambe, un universo cu tawatin un comienso ta exigi aparentemente un prome causa; pasobra ken lo por imagina un efecto asina grandi sin suficiente causa?”

9. Con Yehova su sabiduria ta bisto den mundo di animal?

⁹ Riba tera tambe nos ta mira evidencia di Dios. E salmista a declara: “O SEÑOR, ki numeroso bo obranan ta! Cu sabiduria bo a traha tur; tera ta yen di loke bo a crea.” (Salmo 104:24) E loke Yehova a “crea”—cu ta encera mundo animal—ta duna evidencia di su sabiduria. Manera nos a menciona na principio, e diseño di cosnan bibo ta di calidad asina halto cu hopi bes cientificonan ta purba imita nan. Considera algun ehempel mas. Investigadonan ta studiando cacho di bina, cu e meta pa traha helm mas fuerte; nan ta analisando especienan di muskita cu tin oido skerpi, pa por mehora aparatonan di oido; y nan ta samina e plumanan di hala di shoco, cu e idea di mehora avionnan cu no ta ser detecta pa radar. Pero maske cuanto hende purba, nan no por realmente duplica e originalnan perfecto cu tin den naturalesa. E buki Biomimicry—Innovation Inspired by Nature (Biomimetica—Inovacion Inspira pa Naturalesa) ta bisa: “Cosnan bibo a haci tur loke nos tin gana di haci, pero sin uza demasiado combustibel natural, sin contamina e planeta of hipoteca nan futuro.” Esei ta sabiduria!

10. Dicon no ta logico pa nenga cu ta existi un Gran Diseñador? Ilustra esei.

¹⁰ Sea cu bo hisa bo cara wak na shelo of fiha bo atencion riba creacion aki riba tera, tin evidencia bon cla di e Creador. (Yeremias 10:12) Nos lo mester ta completamente di acuerdo cu e criaturanan celestial cu ta declara: “Digno bo ta, nos Señor y nos Dios, pa ricibi gloria y honor y poder; pasobra abo a crea tur cos.” (Revelacion 4:11) Sinembargo, tin hopi cientifico cu no ta mira e evidencia aki cu ‘e wowonan di nan curason’, maske podise nan ta keda impresiona pa e diseño cu nan ta mira cu nan wowonan literal. (Efesionan 1:18) Nos por ilustra e situacion asin’aki: Admira e beyesa y diseño cu tin den naturalesa anto caba nenga cu ta existi un Gran Diseñador ta mesun ilogico cu admira un cuadra masha bunita y toch nenga cu tawatin un artista cu a transforma e cuadra bashi den un obra maestra. Pesei no ta un sorpresa cu Bijbel ta bisa di esnan cu ta nenga di kere den Dios “cu nan no tin excuse”!

“Guiado Ciego” Ta Pone Hopi Hende Dual

11, 12. E doctrina di predestinacion ta basa riba ki suposicion, y kico ta mustra cu e doctrina aki no ta glorifica Dios?

¹¹ Hopi hende religioso sinseramente ta kere cu nan forma di adora ta duna gloria na Dios. (Romanonan 10:2, 3) Sinembargo, religion en general ta forma un otro sector di sosiedad humano cu eigenlijk, a stroba miyones di hende di glorifica Dios. Con asina? Laga nos considera dos manera.

¹² Na prome luga, religionnan ta kita gloria for di Dios door di nan siñansanan falso. Tuma por ehempel e siñansa di predestinacion. E doctrina aki ta basa riba e suposicion cu como cu Dios tin e poder pa sa futuro, e mester sa di antemano e resultado di tur cos. Pues e doctrina di predestinacion ta sugeri cu for di hopi tempo pasa caba Dios a predestina e futuro di delaster un persona, sea cu e futuro lo ta bon of malo. Segun e concepto aki, ta Dios ta responsabel pa tur sufrimento y maldad cu ta sosode awe na mundo. Definitivamente hende no ta glorificando Dios ora nan ta culp’e pa loke eigenlijk Satanas ta responsabel p’e! Satanas ta Dios su Adversario principal, y t’e Bijbel ta yama e gobernante of “prins di e mundo aki.”—Huan 14:30; 1 Huan 5:19.

13. Dicon ta bobo pa pensa cu Dios no por frena su capasidad di sa futuro? Ilustra esei.

¹³ Predestinacion ta un siñansa no biblico cu  ta calumnia Dios. E siñansa ei ta bruha dos cos den otro, esta, loke Dios por haci y loke en realidad e ta haci. Bijbel ta declara bon cla cu Dios por sa di antemano kico ta bai pasa. (Isaias 46:9, 10) Sinembargo, ta ilogico pa pensa cu Dios no por frena su mes di sa kico ta bai pasa den futuro of cu e ta responsabel pa tur cos cu sosode. Un ehempel: Supone cu bo tawatin masha hopi forsa. Esei lo duna bo gana di hisa delaster un obheto pisa cu bo mira? Claro cu no! Mescos tambe, e echo cu Dios tin e capasidad di sa futuro no ta pon’e bou di obligacion pa predestina of busca pa sa tur cos di antemano. E ta uza su capasidad di sa futuro na un manera selectivo y cu discrecion. * Ta bisto anto cu siñansanan falso, entre nan esun di predestinacion, no ta glorifica Dios.

14. Den ki manera religion organisa a deshonra Dios?

¹⁴ Un di dos manera cu religion organisa ta deshonra Dios ta mediante e conducta di su fielnan. Ta ser spera di cristiannan cu nan ta sigui e siñansanan di Hesus. Hesus a siña su siguidonan pa entre otro cos, nan “stima otro” y pa nan ‘no ta parti di mundo.’ (Huan 15:12; 17:14-16) Kico di e miembronan di clero di cristiandad? Nan realmente a sigui e siñansanan aki?

15. (a) Ki registro clero tin pa loke ta guera di e nacionnan? (b) Ki efecto e conducta di clero tawatin riba miyones di hende?

¹⁵ Considera clero su registro pa loke ta guera. Nan a apoya, despensa y asta hiba delantera den hopi guera di e nacionnan. Nan a bendiciona tropanan y a hustifica e matansanan. Nos no por keda sin puntra nos mes: ‘Nunca no a dal den mente di e cleronan ei cu otro clero di nan religion cu ta di e contrapartida ta haciendo e mesun cos?’ (Wak e cuadro “Na Ken Su Banda Dios Ta?”) Miembronan di clero no ta glorifica Dios ora nan ta pretende cu Dios ta apoya nan den gueranan sangriento; ni nan no ta glorific’e ora nan ta declara cu normanan di Bijbel ta anticua, y nan ta sera wowo pa cualkier tipo di inmoralidad sexual. Nan ta laga nos corda riba e lidernan religioso cu Hesus a yama “guiado ciego” y hende cu a “haci inikidad” of maldad! (Mateo 7:15-23; 15:14) E conducta di clero a pone miyones di hende su amor pa Dios fria.—Mateo 24:12.

Ken Ta Esnan Cu Si Ta Duna Gloria na Dios?

16. Dicon nos tin cu bai den Bijbel pa contesta e pregunta ta ken si ta duna gloria na Dios?

¹⁶ Ya cu personanan prominente y di hopi influencia den mundo por lo general no a duna gloria na Dios, ta ken ta haciendo esei anto? Pa contesta e pregunta ei, nos tin cu bai den Bijbel. Ta logico cu Dios tin derecho di bisa con e kier ser glorifica, y el a fiha e normanan den su Palabra, Bijbel. (Isaias 42:8) Laga nos considera tres manera pa glorifica Dios, y den cada caso nos ta  trata tambe e pregunta ta ken awe realmente ta haciendo esei.

17. Con Yehova mes a indica cu glorificacion di su nomber ta un aspecto importante di su boluntad, y ta ken awe ta alabando Dios su nomber rond mundo?

¹⁷ Na prome luga, nos por glorifica Dios door di alaba su nomber. Un cos cu ta indica bon cla cu esei ta un aspecto importante di e boluntad di Dios ta loke Yehova a bisa Hesus. Un par di dia prome cu Hesus a muri, el a pidi den oracion: “Tata, glorifica bo nomber.” E ora ei un bos a contesta: “Mi a glorific’e, y lo mi bolbe glorific’e.” (Huan 12:28) No tin duda, ta Yehova mes a papia. For di su contesta ta bisto cu glorificacion di su nomber ta importante p’e. Pues, ken awe ta glorifica Yehova door di haci su nomber conoci y door di alab’e rond mundo? Ta e Testigonan di Yehova, y nan ta haciendo esei den 235 pais!—Salmo 86:11, 12.

18. Con nos por identifica esnan cu ta adora Dios cu “berdad”, y cua ta e grupo cu tin mas cu un siglo ta siña hende berdadnan biblico?

¹⁸ Na di dos luga, nos por glorifica Dios door di siña hende e berdad tocante Dios. Hesus a bisa cu adoradonan berdadero lo a ‘adora Dios den berdad.’ (Huan 4:24) Con nos por identifica esnan cu ta adora Dios cu “berdad”? Wel, nan mester rechasa doctrinanan cu no ta basa riba Bijbel y cu ta duna informacion robes tocante Dios y su boluntad. Anto mas bien, nan mester siña hende e berdadnan puro di e Palabra di Dios, entre otro: Yehova ta e Dios Haltisimo, y ta e so ta merece e gloria di ta e Haltisimo (Salmo 83:18); Hesus ta e Yiu di Dios y e Gobernante nombra di Dios su Reino Mesianico (1 Corintionan 15:27, 28); e Reino di Dios lo santifica Yehova su nomber y cumpli cu su proposito pa cu e tera aki y pa cu e hendenan riba dje (Mateo 6:9, 10); e bon noticia tocante e Reino aki tin cu ser predica den henter mundo. (Mateo 24:14) Pa mas cu un siglo caba tin un solo grupo cu fielmente ta siña hende e berdadnan precioso ei—Testigonan di Yehova!

19, 20. (a) Dicon un cristian su bon conducta por duna gloria na Dios? (b) Ki preguntanan por yuda nos determina ken awe ta glorifica Dios door di mantene bon conducta?

¹⁹ Na di tres luga, nos por glorifica Dios door di biba na harmonia cu su normanan. Apostel Pedro a skirbi: “Laga boso conducta ta excelente meimei di e paganonan, asina cu ora nan calumnia boso como malechor, nan por, pa medio di boso bon obranan cu nan ta observa, glorifica Dios den e dia di bishitacion.” (1 Pedro 2:12) E conducta di un cristian ta honra of deshonra su religion. Ora observadonan haci e conexion ei—esta, ora nan mira cu un cristian su bon conducta ta un resultado direct di su religion—esei ta duna gloria na Dios.

²⁰ Ken awe ta glorifica Dios door di mantene bon conducta? Wel, ta cua grupo religioso a haya elogio serca hopi gobierno pasobra nan ta ciudadanonan pacifico cu ta cumpli cu lei y paga nan belasting? (Romanonan 13:1, 3, 6, 7) Ta cua pueblo ta conoci rond mundo pa nan union cu nan rumannan den fe—un union cu ta surpasa diferencianan racial, nacional y etnico? (Salmo 133:1; Echonan 10:34, 35) Ta cua grupo ta ser reconoci mundialmente pa nan trabou di duna educacion biblico, un trabou cu ta stimula respet pa lei, pa norma y balor den famia y pa moralidad biblico? Tin un solo grupo kende su bon conducta den e asuntonan aki y riba otro tereno ta papia pa su mes—Testigonan di Yehova!

 Abo Ta Dunando Gloria na Dios?

21. Dicon nos mester analisa si nos personalmente ta dunando gloria na Yehova?

²¹ Nos cada un ta haci bon di puntra nos mes: ‘Ami personalmente ta dunando gloria na Yehova?’ Segun Salmo 148, gran parti di creacion ta duna gloria na Dios. E angelnan, e shelo literal, tera y mundo di animal—tur ta alaba Yehova. (Versiculo 1-10) Ta masha tristo cu mayoria hende awe si no ta hacie! Door di hiba bo bida na un manera cu ta duna Dios gloria, bo ta pone bo mes na harmonia cu e resto di creacion cu ta alaba Yehova. (Versiculo 11-13) No tin un miho manera pa uza bo bida.

22. Den ki maneranan bo ta ser bendiciona door di duna gloria na Yehova, y kico bo mester ta dicidido pa haci?

²² Door di duna gloria na Yehova, bo ta ser bendiciona den hopi manera. Segun cu bo ta eherce fe den Cristo su sacrificio di rescate, bo ta ser reconsilia cu Dios y door di esei bo ta gosa di un amistad pacifico y productivo cu bo Tata celestial. (Romanonan 5:10) Segun cu bo ta busca motibonan pa duna gloria na Dios, bo ta bira mas positivo y gradicido. (Yeremias 31:12) E ora ei lo bo ta den posicion pa yuda otro hende hiba un bida felis y di satisfaccion, y consecuentemente abo mes lo haya mayor felicidad. (Echonan 20:35) Nos ta spera cu bo ta entre esnan cu ta dicidido pa duna gloria na Dios, awor y pa semper!

[Nota]

Bo Ta Corda?

• Dicon nos por bisa cu cientificonan en general no a yuda hende glorifica Dios?

• Menciona dos manera cu religion organisa a stroba hende di duna gloria na Dios.

• Den ki maneranan nos por glorifica Dios?

• Dicon bo mester analisa si abo personalmente ta dunando gloria na Yehova?

[Preguntanan di Estudio]

[Cuadro na pagina 12]

“Na Ken Su Banda Dios Ta?”

Segun un homber cu a sirbi den Forsa Aereo di Alemania durante Segundo Guera Mundial, pero cu despues a bira un Testigo di Yehova:

“Loke mas a molestia mi durante e añanan ei di guera tawata di mira miembronan di clero di casi tur denominacion—catolico, luterano, anglicano, etcetera—bendiciona e avionnan y nan tripulacion prome cu nan sali riba nan mision pa benta nan carga mortal. Hopi bes mi tawata pensa: ‘Na ken su banda Dios ta?’

Soldanan Aleman tawata bisti un faha cu un hesper riba cua tawatin skirbi e palabranan Gott mit uns (Dios ta cu nos). Pero mi tawata puntra mi mes: ‘Dicon Dios lo no ta cu e soldanan di e otro banda cu tawata di e mesun religion y cu tawata resa na e mesun Dios?’”

[Plachi na pagina 10]

Rond mundo, Testigonan di Yehova realmente ta duna gloria na Dios