Mas cu Wega

MUCHA gusta hunga. Pero e buki The Developing Child (Desaroyo di Mucha) ta splica cu “esaki no ta un actividad insignificante of sin sentido. Aparentemente esei ta e cos cu mas ta permiti e mucha siña for di loke e ta observa rond di dje.” Door di hunga, mucha ta siña uza su sentidonan, compronde su ambiente y anda cu otro hende.

For di cuater of cinco aña, mucha ta cuminsa imita hende grandi den nan weganan. Hesus a papia un biaha tocante mucha cu tawata hunga. Algun kier a hunga “casamento”, otronan kier a haci como si fuera nan ta dirigi un “entiero” y, manera muchanan sa haci hopi, nan cu nan tawata pleita pasobra algun no kier a participa. (Mateo 11:16, 17) E sorto di weganan aki por yuda graba rolnan significativo den mente di e mucha cu ta desaroyando.

E muchanan cu ta riba e potretnan aki ta hunga maestro y studiante di Bijbel. Nan no ta echt den un studio di Bijbel, pero e idea di siña otro hende e mensahe di Bijbel ta bon cla den nan mente. Y e les aki ta masha importante pasobra Hesus a manda tur su siguidonan haci disipel y siña hende warda tur e cosnan cu el a siña nan.—Mateo 28:19, 20.

Mayornan kende nan yiunan gusta hunga como si fuera nan ta dirigi studio di Bijbel, duna discurso of predica di cas pa cas tin motibo pa sinti nan orguyoso, pasobra di naturalesa yiunan ta imita loke nan ta mira hende grandi rond di nan haci. E weganan basa riba Bijbel cu nan ta hunga ta indica cu nan ta hayando “e clase di educacion y conseho cu Señor ta aproba.”—Efesionan 6:4, Charles B. Williams.

Yehova kier pa mucha tambe participa den adoracion berdadero. El a bisa Moises cu “mucha” tambe mester a tende ora e Lei a wordo lesa. (Deuteronomio 31:12) Si mucha jong sinti cu nan tambe ta toca parti den un cierto actividad, probablemente nan weganan lo refleha esei. Y e mucha cu ta hunga sirbido di Dios ta bezig ta dal e prome paso pa bira uno di berdad.