Pregunta di Lector

Ora cu apostel Huan a skirbi cu “amor perfecto ta core cu miedo”, kico e tawata kiermen cu “amor perfecto”, y cua ta e “miedo” cu e ta core cu ne?

Apostel Huan a skirbi: “Amor no conoce miedo; ma amor perfecto ta core cu miedo, pasobra miedo tin di haci cu castigo, y esun cu tin miedo no a wordo haci perfecto den amor.”—1 Huan 4:18.

E contexto ta mustra cu Huan tawata papia di tin confiansa of frankesa di expresion, spesificamente di e relacion cu tin entre amor pa Dios y frankesa di expresion pa cu Dios. Nos por mira esaki for di loke nos ta lesa na versiculo 17: “Pa medio di esaki amor a wordo perfecciona den nos, pa nos por tin confiansa [“frankesa di expresion”, NW] den e dia di huicio.” E grado cu un cristian ta stima Dios y ta sinti cu Dios ta stim’e tin un efecto direct riba su frankesa di expresion—of falta di esei—ora e ta acerca Dios den oracion.

E expresion “amor perfecto” ta importante. E palabra “perfecto” manera e ta ser uza den Bijbel, no ta nifica tur biaha perfeccion den e sentido absoluto, es decir, na e grado total, mas bien e ta ser uza hopi bes den e sentido relativo. Por ehempel, den Hesus su Sermon Riba Sero, el a bisa: “Boso mester ta perfecto, mescos cu boso Tata celestial ta perfecto.” Einan Hesus tawata bisa su siguidonan cu si nan ta stima solamente hende cu stima nan, nan amor lo ta incompleto, deficiente, cu defecto. Nan mester a perfecciona nan amor, of hib’e na e grado completo, door di stima asta nan enemigonan. Di igual manera anto, ora Huan a skirbi tocante “amor perfecto”, el a referi na un amor pa Dios cu ta di henter alma, plenamente desaroya y cu ta encera tur aspecto di un hende su bida.—Mateo 5:46-48; 19:20, 21.

Ora un cristian ta papia cu Dios den oracion, e cristian ta bon conciente cu e ta pecaminoso y imperfecto. Sinembargo, si su amor pa Dios y su sintimento di cu Dios ta stim’e ta plenamente desaroya, miedo di ser condena of rechasa lo no strob’e. Al contrario, e tin frankesa di expresion pa bisa loke tin den su curason y pa pidi pordon a base di e sacrificio di rescate cu Dios amorosamente a percura mediante Hesucristo. E cristian tin confiansa cu Dios ta scucha su peticionnan faborablemente.

Con un persona por “wordo haci perfecto den amor” y asina ‘core cu e miedo’ di ser condena of rechasa? Apostel Huan a bisa: “Esun cu warda [Dios] su palabra, den dje e amor di Dios a wordo perfecciona berdaderamente.” (1 Huan 2:5) Pensa riba esaki: Si Dios a stima nos tempo cu nos tawata pecado ainda, lo e no stima nos mas tanto ainda si realmente nos a repenti y diligentemente ta “warda su palabra”? (Romanonan 5:8; 1 Huan 4:10) Si, tanten cu nos keda fiel, nos por tin e mesun confiansa cu apostel Pablo tawatin ora el a bisa tocante Dios: “Esun cu no a spar ni su mes Yiu, ma a entreg’e pa nos tur, lo e no duna nos tur-tur cos tambe hunto cu ne?”—Romanonan 8:32.