“Tene Tierno Cariño pa Otro”

“Den amor fraternal tene tierno cariño pa otro.”—ROMANONAN 12:10, NW.

1, 2. Ki relacion un misionero di nos tempo y apostel Pablo tawatin cu nan rumannan?

DURANTE e 43 añanan cu Don a sirbi como misionero den Lehano Oriente, e tawata conoci pa e cariño cu el a demostra pa esnan cu el a sirbi. Awor cu e tawata hiba su ultimo bataya cu malesa, algun di e personanan cu el a studia Bijbel cu ne a biaha miles di kilometer pa bin bishit’e na cama y pa bis’e: “Kamsahamnida, kamsahamnida!” (“Danki, danki!” na Coreano). Ta Don su tierno cariño a conmove nan curason.

² E ehempel aki di Don no ta unico. Den prome siglo, apostel Pablo a expresa cariño profundo pa esnan cu el a sirbi. Pablo a sacrifica su mes pa nan. Aunke Pablo tawata un homber di conviccion firme, e tawata tambe suave y cariñoso, “manera [ora] un menchi [mama di lechi] ta cuida su mes yiunan cu ternura.” El a skirbi e congregacion na Tesalonica: “Teniendo pues un amor grandi [“tierno cariño”, NW] pa boso, a agrada nos pa no solamente comparti e evangelio di Dios cu boso, ma tambe nos mes bida, pasobra boso a bira masha stima pa nos.” (1 Tesalonicensenan 2:7, 8) Despues, ora Pablo a bisa e rumannan di Efeso cu nan lo no mir’e mas, “nan a cuminsa yora duro y a brasa Pablo y a sunch’e bes tras bes.” (Echonan 20:25, 37) Ta bisto anto cu e relacion cu tawatin entre Pablo y su rumannan tawata mas profundo cu djis un amistad pasobra nan tawatin mesun creencia. Nan tawatin tierno cariño pa otro.

Tierno Cariño y Amor

3. Con e palabranan biblico pa cariño y amor ta liga cu otro?

³ Den e Scritura, tierno cariño, cariño fraternal y compasion ta estrechamente liga cu e  cualidad cristian di mas noble—amor. (1 Tesalonicensenan 2:8, NW; 2 Pedro 1:7) Mescos cu e fasetanan di un bunita djamanta, tur e cualidadnan aki cu ta agrada Dios ta traha hunto pa produci un bunita resultado. Nan no solamente ta hala cristiannan mas serca di otro, sino tambe mas serca di nan Tata celestial. Pesei apostel Pablo a urgi su rumannan den fe: “Laga boso amor ser sin hipocresia. . . . Den amor fraternal tene tierno cariño pa otro.”—Romanonan 12:9, 10, NW.

4. Kico e expresion “tierno cariño” ta nifica?

⁴ E palabra Griego cu Pablo a uza pa “tierno cariño” ta consisti di dos parti, un parti cu ta nifica amistad y e otro parti cu ta referi na cariño natural. Manera un experto biblico a splica, esaki ta nifica cu cristiannan “mester por ser identifica na un debocion cu ta caracterisa un famia amoroso, hopi uni y cu ta apoya otro.” Ta asina abo ta sinti pa cu bo rumannan cristian? Den e congregacion cristian mester reina un ambiente caloroso, un sintimento di ta famia di otro. (Galationan 6:10) Pesei Beibel na papiamentu koriente ta traduci Romanonan 12:10: “Stima otro di curason, cu amor di ruman.” Si, cristiannan no ta stima otro djis pasobra esei ta nan deber of pasobra esei ta logico. Cu “un amor sinsero”, nos mester “stima otro fervientemente di curason.”—1 Pedro 1:22.

“Dios Ta Siña Boso Stima Otro”

5, 6. (a) Con Yehova a uza congresonan internacional pa siña su pueblo tocante cariño cristian? (b) Con e banchi entre rumannan ta bira mas fuerte atrabes di tempo?

⁵ Aunke den e mundo aki “amor di hopi hende” ta friando, Yehova ta siña su pueblo di tempo actual pa nan “stima otro.” (Mateo 24:12; 1 Tesalonicensenan 4:9) Congresonan internacional di Testigonan di Yehova ta ocasionnan sobresaliente pa haya e entrenamento aki. Na e congresonan aki, Testigonan local ta topa rumannan di paisnan leu, y hopi a yega di habri nan cas pa delegadonan for di exterior. Na un congreso resien, algun ruman a bin di paisnan caminda hende no ta expresa nan emocion abiertamente. Un ruman cu a yuda cu acomodacion a conta: “Na prome instante ora e delegadonan aki a yega, nan tawata nervioso y timido. Pero solamente seis dia despues ora nan a bisa ayo, nan y nan anfitrionnan tawata brasa otro y yora. Nan a disfruta di un tipo di amor cristian cu nunca mas nan lo lubida.” Pues anto, mustra hospitalidad na nos rumannan, sin importa nan antecedente, por saca na cla lo miho di tanto e huespet como di e anfitrion.—Romanonan 12:13.

⁶ Pa emocionante cu tal experencianan di congreso ta, cristiannan ta desaroya un amistad asta mas intimo ora nan ta sirbi Yehova hunto atrabes di un periodo di tempo. Ta ora nos siña conoce nos rumannan bon, nos por aprecia nan cualidadnan atractivo mas plenamente, por ehempel, cu semper nan ta papia  berdad, ta digno di confiansa, leal, bondadoso, generoso, comprensivo, compasivo y sin egoismo. (Salmo 15:3-5; Proverbionan 19:22) Mark, kende a sirbi como misionero na Oost Africa, a bisa: “Trahando scouder cu scouder cu nos rumannan ta forma un banchi indestructibel.”

7. Kico ta necesario pa nos por disfruta di cariño cristian den congregacion?

⁷ Pa logra un banchi asina den congregacion y manten’e, e rumannan mester hala serca di otro. Nos ta fortalece e cariño ei cu nos tin pa nos rumannan door di asisti cu regularidad na nos reunionnan cristian. Tambe door di ta presente y asocia prome y despues di reunion y participa durante reunion, nos ta anima y stimula otro “pa stima y haci bon obra.” (Hebreonan 10:24, 25) Un anciano na Merca a conta: “Cu placer mi ta corda con tempo cu mi tawata mucha, mi famia semper tawata entre e ultimonan pa bai for di Salon di Reino, disfrutando mas largo posibel di e combersacion amistoso y significativo.”

Abo Lo Tin Cu ‘Hancha Bo Curason’?

8. (a) Kico Pablo tawata kiermen ora el a urgi e Corintionan pa ‘habri nan curason hancho’? (b) Kico nos por haci pa stimula cariño den congregacion?

⁸ Pa nos por demostra tal cariño plenamente, kisas nos tin cu ‘hancha’ nos curason. Apostel Pablo a skirbi e congregacion na Corinto: “Nos curason ta hancho habri. Boso no ta wordo limita door di nos.” Pablo a urgi nan pa nan na nan turno hancha of ‘habri nan curason hancho.’ (2 Corintionan 6:11-13) Abo tambe por ‘hancha’ den mustramento di cariño? Bo no tin nodi warda pa otro hende tuma e iniciativa. Den su carta na e Romanonan, Pablo a conecta e necesidad di tin tierno cariño cu e conseho aki: “Den mustra honor na otro hiba delantera.” (Romanonan 12:10, NW) Pa mustra honor na otro hende, bo por tuma e iniciativa pa cuminda nan na reunion. Kisas tambe bo por invita nan pa compaña bo den sirbishi di veld of pa prepara pa un reunion. Haciendo e cosnan ei ta habri caminda pa tierno cariño crece.

9. Kico algun ruman a haci pa bira amigo mas intimo cu nan compañeronan cristian? (Inclui ehempelnan local.)

⁹ Famianan y personanan individual den congregacion por ‘hancha nan curason’ door di bishita otro, kisas comiendo un cuminda simpel hunto y door di participa hunto den actividadnan sano. (Lucas 10:42; 14:12-14) Hakop sa organisa de bes en cuando picknick pa gruponan chikito. El a conta: “Rumannan di tur edad sa ta presente, y tambe mayornan soltero. Tur hende ta bai cas cu dushi recuerdo, y nan ta sinti nan mas uni cu otro.” Como cristian, nos mester haci esfuerso pa nos no ta solamente compañeronan den fe sino tambe berdadero amigo di otro.—3 Huan 14.

10. Kico nos por haci ora nos tin problema cu nos rumannan?

¹⁰ Sinembargo, tin biaha imperfeccion por forma un obstaculo pa cultiva amistad y cariño. Kico nos por haci? Na prome luga, nos por pidi den oracion pa nos tin bon relacion cu nos rumannan. Ta Dios su boluntad pa su sirbidonan bai bon cu otro, y lo e contesta tal oracion sinsero. (1 Huan 4:20, 21; 5:14, 15) Pero tambe nos tin cu actua di acuerdo cu nos oracion. Ric, un superintendente biahero na Oost Africa, ta corda un ruman homber cu tawatin un lenga skerpi y sin consideracion y pesei tawata dificil pa bai bon cu ne. Ric a splica: “En bes di evita e ruman, mi a dicidi di siña  conoc’e miho. A resulta cu e ruman su tata tawata un homber cu tawata duna disiplina severo. Unabes mi a compronde con duro e ruman a lucha pa supera su antecedente y cuanto progreso el a haci, mi a bin admir’e. Nos a bira bon amigo.”—1 Pedro 4:8.

Habri Bo Curason!

11. (a) Kico ta necesario pa cariño crece den congregacion? (b) Dicon nos por ser perhudica spiritualmente si nos no ta expresa nos emocion na otro hende?

¹¹ Awendia tin hopi hende cu ta hiba nan bida sin cu nunca nan tin un amistad pega. Esta tristo no! Esaki no tin nodi ni no mester ta e caso den e congregacion cristian. Berdadero amor fraternal no ta simplemente combersacion cortes y bon manera; tampoco e no ta nifica ser demasiado demostrativo den desplega emocion na otro hende. Mas bien, nos mester ta dispuesto pa habri nos curason, manera Pablo a haci pa cu e Corintionan, y demostra nos rumannan den fe cu nos ta berdaderamente interesa den nan bienestar. Aunke no ta tur hende di naturalesa ta social y expresivo, nos por ser perhudica si nos ta demasiado reserva. Bijbel ta spierta: “Esun cu isola su mes ta busca su mes deseo; su furia ta lanta contra tur sabiduria sano.”—Proverbionan 18:1.

12. Dicon bon comunicacion ta masha importante pa por tin amistadnan intimo den congregacion?

¹² Comunicacion honesto ta fundamental pa berdadero amistad. (Huan 15:15) Nos tur tin mester di bon amigonan cu nos por confia nos sintimentonan y pensamentonan di mas profundo. Ademas, mas miho nos conoce otro, mas facil ta pa nos satisface e necesidadnan di otro. Ora cu nos ta demostra interes den bienestar di otro di e manera aki, nos ta stimula mas tierno cariño den congregacion, y nos lo experencia cu Hesus tawatin rason ora el a bisa: “Ta mas bendiciona pa duna cu pa ricibi.”—Echonan 20:35; Filipensenan 2:1-4.

13. Kico nos por haci pa demostra cu nos tin berdadero cariño pa nos rumannan?

¹³ Pa nos cariño por logra haci mas tanto bon, nos tin cu expres’e. (Proverbionan 27:5) Ora nos cariño ta sinsero, nos cara probablemente ta refleha esaki, y esei lo por motiva e curason di otro hende pa reacciona. Un proverbio biblico ta bisa: “Wowo cu ta briya ta alegra curason.” (Proverbionan 15:30) Actonan atento tambe ta promove tierno cariño.  Aunke ningun hende no por cumpra berdadero cariño, un regalo duna di curason por ta masha significativo. Un carchi, un carta y “un palabra papia na ora apropia”, tur e cosnan aki por expresa profundo cariño. (Proverbionan 25:11; 27:9) Unabes nos a logra haya e amistad di otro hende, nos tin cu manten’e door di sigui demostra cariño sin egoismo. Vooral den tempo di necesidad, nos lo kier apoya nos amigonan. Bijbel ta bisa: “Un amigo ta stima tur ora bai, y un ruman ta naci pa tempo di adversidad.”—Proverbionan 17:17.

14. Kico nos por haci si un persona aparentemente no ta reacciona riba nos cariño?

¹⁴ Pero pa nos ta realista, nos no por spera cu nos lo tin amistad sera cu tur hende den congregacion. Di mes lo tin algun ruman cu nos ta sinti nos mes mas atrai na nan cu otronan. Pesei, si un persona aparentemente no ta pega cu bo manera lo bo tin gana, no sea lihe pa conclui cu mester tin algo robes cu bo of cu e persona. Y no purba fors’e pa sera un amistad intimo cu bo. Si simplemente bo ta amigabel cu e persona te asina leu cu e ta permiti, esei lo yuda bo tene e porta habri pa un amistad mas sera den futuro.

“Den Bo Mi Tin Goso”

15. Ki efecto elogio—of falta di elogio—tin riba otro hende?

¹⁵ Hesus lo mester a keda hopi contento ora cu na su bautismo, el a tende for di shelo e palabranan: “Den bo mi tin goso”! (Marco 1:11) E expresion aki di aprobacion lo mester a combence Hesus mas ainda cu su Tata stim’e. (Huan 5:20) Lamentablemente, tin hende cu nunca ta tende tal elogio for di personanan cu nan ta respeta y stima. Un mucha mohe cu yama Ann a bisa: “Hopi hoben manera mi no tin miembronan di famia cu ta comparti nan creencia cristian. Na cas ta critica so nos ta tende. Esei ta haci nos hopi tristo.” Sinembargo, ora nan bira parti di e congregacion, nan ta sinti e calor di un famia spiritual amoroso cu ta apoya nan; nan ta haya tata, mama, ruman homber y ruman mohe den fe.—Marco 10:29, 30; Galationan 6:10.

16. Dicon un actitud critico pa cu otro hende no ta bon?

¹⁶ Den algun cultura, mayornan, hende grandi y maestronan masha poco biaha ta expresa aprobacion sinsero na hobennan, pensando cu tal elogio lo por haci nan floho of susha nan cabes. Tal pensamento por afecta asta famianan cristian y e congregacion. Comentando riba un parti of cualkier esfuerso cu un hoben a haci, hende grandi kisas ta bisa: “E no tawata malo, pero bo por miho!” Of den un manera of otro nan por asta indica di ta malcontento cu un hoben. Hopi hende ta kere cu asina nan ta motiva e hobennan pa alcansa nan pleno potencial. Pero e metodo aki hopi bes ta logra net lo contrario, ya cu e hobennan lo por hala atras of sinti cu nan no por cumpli cu loke ta spera di nan.

17. Dicon nos mester busca oportunidad pa elogia otro hende?

 ¹⁷ Sinembargo, nos no mester uza elogio solamente como un introduccion pa duna conseho. Elogio sinsero ta promove tierno cariño den famia y den congregacion, y asina e ta stimula hobennan pa busca conseho serca rumannan cu experencia. Pues, en bes di laga cultura dicta con nos ta trata otro hende, laga nos “bisti e hende [of, personalidad] nobo, cu a wordo crea segun Dios den husticia y santidad berdadero.” Elogia otro hende mescos cu Yehova ta haci.—Efesionan 4:24.

18. (a) Hobennan, con boso mester mira conseho for di hende grandi? (b) Dicon hende grandi ta tene cuidou con nan ta duna conseho?

¹⁸ Di otro banda, boso cu ta hoben, ora rumannan grandi duna boso coreccion of conseho, no pensa cu esei kiermen cu nan no gusta boso. (Eclesiastes 7:9) Al contrario! Probablemente ta nan interes y cariño profundo pa boso ta loke a motiva nan. Si no ta asina, pakico nan ta molestia nan mes pa papia cu boso tocante e asunto? Hende grandi—specialmente ancianonan di congregacion—sa ki impacto palabra por tin, ta pesei hopi bes nan ta dedica basta tempo na pensa y haci oracion tocante e conseho cu nan lo bai duna, ya cu ta bon so nan kier haci.—1 Pedro 5:5.

“Yehova Ta Masha Tierno di Cariño”

19. Dicon cristiannan cu a sufri decepcion por acudi na Yehova pa haya sosten?

¹⁹ Mal experencia kisas a duna algun cristian e sintimento cu mustramento di tierno cariño ta hiba solamente na mas decepcion. Nan tin mester di curashi y fe firme pa bolbe habri nan curason pa otro hende. Pero nan no mester lubida nunca cu Yehova “no ta leu di cada un di nos.” E ta invita nos pa hala serca dje. (Echonan 17:27; Santiago 4:8) Tambe Yehova ta compronde nos miedo di wordo gehurt, y e ta priminti cu lo e sostene nos y yuda nos. Salmista David ta sigura nos: “SEÑOR ta serca di e hende di curason kibra, y ta salba esnan di spirito abati.”—Salmo 34:18.

20, 21. (a) Con bin nos sa cu nos por tin un relacion pega cu Yehova? (b) Kico ta ser rekeri pa nos por tin un amistad intimo cu Yehova?

²⁰ Un amistad intimo cu Yehova ta e relacion mas importante cu nos por cultiva. Pero ta realmente posibel pa tin un banchi asina cu Dios? Si. Bijbel ta conta di homber- y mohenan husto cu a sinti nan hopi serca di nos Tata celestial. Nan expresionnan caloroso a keda conserva pa duna nos e confiansa cu nos tambe por hala serca Yehova.—Salmo 23, 34, 139; Huan 16:27; Romanonan 15:4.

²¹ Yehova su rekisitonan pa nos por tin un amistad intimo cu ne ta na tur hende su alcanse. David a puntra: “O SEÑOR, ken por biba den bo tabernakel?” E mes a contesta: “Esun cu ta cana den rectitud y ta haci husticia, y ta papia berdad den su curason.” (Salmo 15:1, 2; 25:14) Segun cu nos ta mira cu sirbishi na Dios ta produci bon fruta y ta duna nos Yehova su guia y proteccion, nos lo bin sa cu “Yehova ta masha tierno di cariño.”—Santiago 5:11, NW.

22. Ki clase di relacion Yehova kier pa su pueblo tin?

²² Nos ta realmente bendiciona cu Yehova ta desea di tin un relacion personal asina cu hende imperfecto! Nos awor, no mester desplega tierno cariño na otro? Cu Yehova su yudansa, nos cada un por contribui na e tierno cariño cu ta un caracteristica di nos hermandad cristian y disfruta di dje. Bou di e Reino di Dios, tur hende riba tera lo ricibi y mustra e cariño aki pa semper.

Bo Por Splica?

• Ki clase di ambiente mester reina den e congregacion cristian?

• Con nos cada un por contribui na tierno cariño den congregacion?

• Con elogio sinsero ta stimula cariño cristian?

• Con Yehova su tierno cariño ta apoya nos y sostene nos?

[Preguntanan di Estudio]

[Plachi na pagina 15]

Amor entre cristiannan ta refleha mas cu simplemente deber

[Plachinan na pagina 17]

Abo por ‘hancha’ den mustramento di cariño?

[Plachi na pagina 18]

Bo ta un persona critico of animante?