Informe di Proclamadonan di Reino

Un Carta di Alejandra

SKIRBIMENTO DI CARTA, ya pa hopi tempo ta un manera efectivo pa duna testimonio. Aunke tin biaha bo no sa sigur ta ki resultado esei lo tin, esnan cu a persisti den uza e metodo aki a ser bendiciona ricamente. Nan ta corda e conseho sabi di Bijbel: “Sembra bo simiña mainta, y no keda sin haci nada atardi; pasobra bo no sa si sembramento di mainta of di atardi lo tin exito, of si nan tur dos lo ta bon.”—Eclesiastes 11:6.

Alejandra, un Testigo hoben cu tawatin 10 aña ta sirbi na e sucursal di Testigonan di Yehova na Mexico, tawata haya chemotherapie pa cancer. Su condicion a empeora, y el a bira mucho suak pa cumpli cu su rutina diario. Pero como cu Alejandra no kier a neglisha su sirbishi, el a dicidi di skirbi carta. Den e cartanan el a splica e areglo di haya un studio di Bijbel gratis na cas y a inclui e number di telefon di su mama. Anto el a duna su mama e cartanan pa e mama laga na cas di hende cu no tawat’ei ora e mama bai predica di cas pa cas.

Mientrastanto, Diojany, un hobensita di Guatemala, a bai traha como cria di cas na Cancún, Mexico. Einan el a bini den contacto cu Testigonan di Yehova y tawata gusta e consideracionnan biblico cu e tawatin cu nan. Despues Diojany su dunadonan di trabou a dicidi di muda pa Ciudad di Mexico y nan tawata kier pa e bai cu nan. Diojany a basila pa hacie pasobra esei lo a nifica cu lo e perde contacto cu e Testigonan.

Su dunadonan di trabou a sigur’e: “No worry, tin Testigo di Yehova tur caminda. Nos lo busca nan asina cu nos yega.” Cu e perspectiva felis ei, Diojany a bai cu nan. Unabes na Ciudad di Mexico, Diojany su dunadonan di trabou a trata di drenta den contacto cu e Testigonan. Pero pa un motibo of otro, nan no por a haya nan, apesar cu den e stad ei tawatin mas cu 41.000 Testigo di Yehova y 730 congregacion.

Diojany a cuminsa perde animo pasobra e no por a haya e Testigonan pa reanuda su consideracionnan biblico. Riba un dia, e señora di cas a bin serca dje y a bis’e: “Sorpresa! Bo Dios a scucha bo oracionnan.” El a duna Diojany un carta y a bisa: “E Testigonan a laga e carta aki pa bo.” Tawata un carta di Alejandra.

Diojany a drenta den contacto cu Alejandra su mama y su ruman mohe, Blanca, y a acepta un studio di Bijbel. Despues di algun siman, el a topa Alejandra y nan tawata masha contento di por a sera conoci cu otro. Alejandra a anima Diojany pa sigui haci su best cu su studio di Bijbel ya asina e por a haci progreso spiritual.

Un par di luna despues, na juli 2003, Alejandra a bin fayece, lagando atras un excelente ehempel di fe y curashi pa su rumannan den fe. Na su entiero, hopi hende a keda profundamente conmovi ora nan a topa Diojany y a tend’e bisa: “Alejandra cu su famia tawata un maraviyoso ehempel pa mi. Mi ta dicidido pa sirbi Yehova y pa batisa pronto. Mi ta anhela di mira Alejandra atrobe den e benidero Paradijs!”

Si, un carta por ta un cos chikito. Pero e por tin efectonan faborabel y duradero!