Un Herencia Cu Bo Por Conta cu Ne

“SI BO ricibi un notificacion via post cu bo ta bini na remarca pa haya un herencia cu ningun otro hende no a reclama, tene cuidou. Bo por ta victima di un estafado.”

Asina e Servicio di Inspeccion Postal di Merca ta spierta riba su website. Dicon? Pasobra miles di hende a ricibi un notificacion via post di cu ‘un famia di bo a muri y a laga un herencia pa bo.’ Esei a pone cu hopi hende a manda un suma di 30 dollar of mas pa nan por a haya copia di un ‘acta’ cu supuestamente lo a indica unda e herencia tawata situa y con lo e por a ser reclama. Nan a keda completamente desapunta. Tur hende cu a responde a ricibi copia di e mesun acta—y e chens pa un hende hereda algo tawata practicamente nulo.

E trikinan ei ta specialmente diseña pa probecha di hende su deseo natural pa haya un herencia. Sinembargo, Bijbel ta papia faborablemente di hende cu ta laga un herencia atras, bisando: “Un bon hende ta laga un herencia pa yiunan di su yiunan.” (Proverbionan 13:22) De echo, Hesucristo mes ta esun cu a haci e siguiente declaracion bon conoci y tan gusta den su Sermon Riba Sero: “Bendiciona ta esnan humilde, pasobra nan lo hereda e tera.”—Mateo 5:5.

Hesus su palabranan ta pone nos pensa riba loke Rei David di Israel di antiguedad a skirbi bou di inspiracion siglonan mas prome: “E humildenan lo hereda e tera, y lo deleita nan mes den pas abundante.”—Salmo 37:11.

“Hereda e tera”—ki un expectativa excitante! Pero nos por ta sigur cu esaki no ta djis un otro trampa pa ranca cos for di hende? Sigur cu si. Pensa riba esaki. Siendo cu tera ta parti di Yehova su creacion maraviyoso, e como e Creador y Doño tin e derecho legal pa lag’e como herencia pa ken cu e kie. Pa medio di Rei David, Yehova a haci e promesa profetico aki na Su Yiu stima, Hesucristo: “Pidi mi, y siguramente lo mi duna bo e nacionnan como bo herencia, y e finnan di tera como bo pocesion.” (Salmo 2:8) Pa e motibo aki, apostel Pablo a describi Hesus como esun “kende [Dios] a nombra como heredero di tur cos.” (Hebreonan 1:2) Pesei, nos por tin pleno confiansa cu ora Hesus a bisa cu e humildenan “lo hereda e tera”, el a haci esei di buena fe, y e tin e debido autoridad tambe pa cumpli cu su promesa.—Mateo 28:18.

E pregunta crucial anto ta: Con e promesa ei lo cumpli? Unda cu nos mira awe, ta parce cu ta net e hendenan agresivo y arogante ta mas exitoso y ta bai cu tur loke nan kie.  Kico ta sobra pa e humildenan? Ademas, tera tin problema serio di polucion, y hende golos y esnan cu no tin cu nes cu mañan ta haciendo mal uzo di su rikesa natural. Acaso lo tin un tera cu ta bale la pena hereda? Nos ta invita bo pa lesa e siguiente articulo pa bo haya contesta riba e preguntanan aki y otronan importante.

[Plachi na pagina 3]

Bo ta bini na remarca pa un berdadero herencia?