Beneficia Door di Busca pa Alcansa Balornan Spiritual

“Esun cu ta stima placa lo no keda satisfecho cu placa, ni esun cu ta stima abundancia, cu su entrada.”—Eclesiastes 5:10.

DEMASIADO trabou por hiba na stress, y stress por causa problemanan di salu cu tin biaha ta hiba na morto. Den hopi pais, famianan ta kibra pa motibo di diborcio. Hopi biaha e motibo pa tal tragedia ta cu hende ta demasiado precupa cu cos material. En bes di disfruta di loke e tin, un persona cu ta absorba den buscamento di pocesion material semper kier haya mas, sin importa si esei ta bai a costo di su bienestar. Un buki pa desaroyo personal a declara: “Un pasatempo nacional ta cu hende ta competi cu nan biciña pa nan no keda atras, asta si Shon Biciña ta adicto na su trabou y a punto di haya un atake di curason na edad di 43 aña.”

Tin biaha un persona ta sigui busca mas cos sin nunca keda satisfecho, y esaki ta strob’e di disfruta di cualkier goso cu di otro manera lo e tawatin. Tin un forsa potente cu hopi bes ta probecha di nos debilidadnan humano relaciona cu esaki—propaganda! Propagandanan na radio cu television constantemente ta urgi bo pa  cumpra cos cu probablemente bo no tin mester y cu kisas ni sikiera bo por afford. Tur esaki por hiba na bastante daño.

E buskeda desenfrena pa haya satisfaccion propio por tin un efecto sutil pero devastador riba nos, tanto den sentido fisico como moral. Por ehempel, Rei sabi Salomon a remarca: “Un curason trankil ta bida pa e curpa.” (Proverbionan 14:30) Na contraste, nos por caba cu nos salu y felicidad door di forsa nos mes di mas, door di demasiado precupacion y door di e presion pa acumula rikesa material. Ora metanan materialista ta domina nos bida, nos relacion cu otro hende tambe ta sufri daño. Anto ora un persona su bida social y di famia bai atras, su calidad di bida en general tambe ta bai atras.

E Superioridad di Balornan Spiritual

“No sea conforme e mundo aki”, apostel Pablo a spierta siglonan pasa. (Romanonan 12:2) Mundo stima esnan cu ta biba conforme su norma- y balornan. (Huan 15:19) Mundo ta purba haci un apelacion riba bo sentidonan—bo bista, tacto, smak, olfato y oido—si, e ta purba combence bo pa sigui un estilo di bida materialista. E enfasis ta riba “e deseo di wowo” ya asina abo y otro hende lo busca pa alcansa ganashi material.—1 Huan 2:15-17.

Pero tin cos di balor cu ta surpasa placa, prominencia y rikesa material. Siglonan pasa, Rei Salomon a acumula tur loke mundo tawatin di ofrece materialmente. El a traha cas y tawatin cantidad di hardin, hofi, esclabo, crio di bestia, cantante femenino y masculino, y tambe masha hopi oro y plata. Prome cu Salomon no tawatin ningun hende cu asina tanto rikesa. E tawata masha, masha rico mes. Salomon tawatin casi tur cos cu un hende por a desea. Sinembargo, ora el a wak e cosnan cu el a logra, el a bisa: “Tur tawata banidad y coremento tras di biento.”—Eclesiastes 2:1-11.

Cu e sabiduria special cu Yehova a dun’e, Salomon tawata sa cu hende ta haya mas satisfaccion door di busca pa alcansa balornan spiritual. El a skirbi: “E conclusion di tur loke cu a wordo tendi, ta: teme Dios y warda su mandamentonan, pasobra esaki ta aplicabel na cada persona.”—Eclesiastes 12:13.

Loke tin mas balor cu oro of plata ta e tesoro cu nos por haya den e paginanan di e Palabra di Dios, Bijbel. (Proverbionan 16:16) Den Bijbel tin berdadnan profundo pa bo descubri cu ta mescos cu hoya. Abo lo busca y coba pa haya nan? (Proverbionan 2:1-6) Nos Creador, e Fuente di cosnan di berdadero balor, ta urgi bo pa haci esei, y lo e yuda bo. Con asina?

Yehova ta percura berdadnan precioso mediante su Palabra, su spirito y su organisacion. (Salmo 1:1-3; Isaias 48:17, 18; Mateo 24:45-47; 1 Corintionan 2:10) Door di examina e hoyanan precioso aki cu ta di balor incalculabel, bo  ta haya e oportunidad di scohe inteligentemente e estilo di bida di mas miho y cu ta duna mas recompensa. Anto lo no ta dificil pa scohe esei pasobra Yehova, nos Creador, sa kico nos mester pa nos ta berdaderamente felis.

Bijbel Ta Promove e Balornan di Mas Eleva

E bon conseho cu tin disponibel den Bijbel ta practico y incomparabel. E normanan moral cu e ta curasha nos pa sigui ta sin igual. Su conseho semper ta probechoso, y a demostra di ta berdad y practico atrabes di siglonan. Algun bon conseho cu Bijbel ta duna ta entre otro pa traha duro, ser honesto, uza bo placa na un manera sabi y no ser floho.—Proverbionan 6:6-8; 20:23; 31:16.

Na harmonia cu esei, Hesus a bisa: “No montona tesoro pa boso mes riba tera, caminda mot y frusto ta destrui nan, y caminda ladron ta kibra drenta y horta; ma montona tesoro pa boso mes den shelo, caminda ni mot ni frusto no ta destrui nan, y caminda ladron no ta kibra drenta ni horta.”—Mateo 6:19, 20.

E spiertamento oportuno ei ta mesun aplicabel awe cu e tawata 2.000 aña pasa. En bes di bira completamente absorba den un buskeda pa rikesa material, nos por beneficia awor door di busca pa alcansa un estilo di bida superior. E factor crucial ta pa montona tesoro spiritual, locual ta hiba na un bida di berdadero felicidad y satisfaccion. Con nos por haci esei? Door di lesa Dios su Palabra, Bijbel, y door di aplica loke e ta siña.

Balornan Spiritual Ta Duna Recompensa

Ora nos aplica balornan spiritual na e manera corecto, nan ta beneficia nos den sentido fisico, emocional y spiritual. Mescos cu e capa di ozon cu ta cubri e tera ta proteha nos contra e rayonan dañino di solo, asina principionan moral sano ta yuda proteha nos door di haci nos conciente di e efectonan peligroso di materialismo. Apostel cristian Pablo a skirbi: “Esnan cu kier bira rico ta cai den tentacion y den trampa y den hopi deseonan loco y dañino, cualnan ta hundi hende den ruina y destruccion. Pasobra amor pa placa ta raiz di tur sorto di maldad, y algun hende, door di desea esaki, a desvia for di e fe, y a traspasa nan mes cu hopi dolor.”—1 Timoteo 6:9, 10.

Amor pa rikesa ta tenta hende pa busca mas placa, posicion y poder. Hopi bes nan ta uza medionan tramposo y deshonesto pa alcansa e metanan aki. Coremento tras di cos material por pone nos malgasta nos tempo, forsa y habilidadnan. E por asta stroba nos di drumi bon anochi. (Eclesiastes 5:12) Algo cu sigur e buskeda pa mas cos material ta stroba ta progreso spiritual. Hesucristo, e homber mas importante cu hamas a biba, a mustra claramente cua ta e miho manera: “Felis ta esnan cu ta conciente di nan necesidad spiritual.” (Mateo 5:3, NW) E tawata sa cu rikesa spiritual ta hiba na recompensanan permanente y ta hopi mas importante cu ganashi material temporal.—Lucas 12:13-31.

Busca Rikesa Spiritual Realmente Ta Beneficia Nos?

“Mi mayornan a haci hopi esfuerso pa combence mi cu balornan spiritual no ta practico”, segun Greg. “Sinembargo, mi a gana un tremendo pas mental door di sigui tras di metanan  spiritual ya cu mi no tin e stress cu bo ta haya ora bo ta competi pa rikesa.”

Balornan spiritual ta yuda promove miho relacionnan personal tambe. Amigonan berdadero ta ser atrai na bo pa e clase di persona cu bo ta, no pa loke bo tin. Bijbel ta recomenda: “Esun cu anda cu hende sabi lo ta sabi.” (Proverbionan 13:20) Ademas, un bon bida di famia ta funda riba sabiduria y amor, no riba pocesionnan material.—Efesionan 5:22–6:4.

Nos no ta nace conciente di kico ta realmente balioso. Nos tin cu siña esei for di nos pareunan of for di un fuente superior. Ta pesei un educacion basa riba Bijbel por transforma henter nos manera di mira cosnan material. Don, un exbankero, a bisa: “Esei a yuda mi reconsidera loke mi tawata haya ta balioso, y mi a siña keda contento cu e cosnan basico.”

Busca pa Alcansa Rikesa Spiritual Duradero

Balornan spiritual ta pone enfasis riba recompensanan di plaso largo, no riba e satisfaccion di termino cortico. Pablo a skirbi: “Pasobra e cosnan [material] cu ta wordo mira ta temporal, ma e cosnan [spiritual] cu no ta wordo mira ta eterno.” (2 Corintionan 4:18) Ta berdad cu actividadnan materialista kisas ta satisface deseonan momentaneo, pero ser golos pa cos lo no beneficia un persona permanentemente. Balornan spiritual ta eterno.—Proverbionan 11:4; 1 Corintionan 6:9, 10.

Bijbel ta condena e manera cu hende ta enfoca solamente riba cos material den e tempo aki. E ta siña nos con pa frena e deseo constante pa haya mas cos, door di mantene nos wowo simpel, enfocando riba e cosnan mas importante,  esta, rikesa spiritual. (Filipensenan 1:10, NW) Bijbel ta revela kico golosidad realmente ta—adoracion di bo mes. Segun cu nos ta aplica loke nos ta siña for di e Palabra di Dios, nos ta haya mayor felicidad. Nos ta transforma nos manera di pensa for di kier haya so y ta cuminsa consentra riba duna. Esaki ta un insentivo fuerte pa remplasa satisfaccion di bo mes cu balornan spiritual!

Ta berdad cu te na cierto grado, placa por sirbi como un proteccion. (Eclesiastes 7:12) Pero Bijbel realisticamente ta declara: “Rikesa siguramente ta cria hala pa su mes, manera un aguila cu ta bula bai laira.” (Proverbionan 23:5) Hende a sacrifica hopi cos importante—salu, famia, asta un bon consenshi—pa nan por haya mas cos material, anto cu resultadonan desastroso. Di otro banda, si nos tin un interes den asuntonan relaciona cu Dios, esei ta satisface nos necesidadnan di mas importante: e necesidad di amor, e necesidad di tin un proposito y e necesidad di adora e Dios amoroso, Yehova. Tambe esei ta mustra nos e caminda pa haya bida eterno den perfeccion humano den un paradijs riba tera. Esaki ta e speransa cu Dios ta ofrece nos.

Pronto e prosperidad cu humanidad ta soña cu ne lo ser realisa completamente den Dios su mundo nobo. (Salmo 145:16) E tempo ei henter e tera lo ‘ta yen di e conocemento di Yehova.’ (Isaias 11:9) Balornan spiritual lo aumenta. Materialismo y su efectonan dañino lo keda completamente elimina. (2 Pedro 3:13) E ora ei e cosnan cu ta haci bida hopi mas balioso—manera salu perfecto, trabou cu ta duna satisfaccion, actividadnan sano di recreo, relacionnan caloroso di famia y amistad duradero cu Dios—lo duna humanidad berdadero felicidad pa semper.

[Cuadro/Plachi na pagina 6]

Uza Bo Placa na un Manera Sabi!

Determina bo necesidadnan. Hesus a siña nos resa: “Duna nos awe nos pan di cada dia.” (Lucas 11:3) No cuminsa mira cos cu bo tin gana di dje como cos cu bo mester tin. Corda cu no ta e cosnan cu bo tin ta duna bo bida.—Lucas 12:16-21.

Traha un presupuesto of budget. No cumpra cos sin pensa of riba impulso. Bijbel ta declara: “E plannan di hende balente siguramente ta conduci na abundancia, ma tur esnan cu tin pura, siguramente ta resulta den pobresa.” (Proverbionan 21:5) Hesus a conseha su oyentenan pa calcula e gasto prome cu nan cuminsa cualkier proyecto financiero.—Lucas 14:28-30.

No haci debe innecesario. Ki ora cu ta posibel, spar pa bo por cumpra un cos en bes di cumpr’e na credito. E proverbio ta expres’e asin’aki: “E fiado ta bira esclabo di esun cu ta fi’e.” (Proverbionan 22:7) Door di eherce dominio propio y keda denter di bo presupuesto, bo por asta plania compranan grandi cu exito.

No dispidi. E cosnan cu bo tin caba, laga nan dura mas largo door di cuida nan bon, y asina bo ta dispidi menos. Hesus tawata un ehempel den conserva loke el a uza.—Huan 6:10-13.

Duna prioridad na loke ta mas importante. Un persona sabi lo haci ‘bon uzo di su tempo’ pa purba alcansa metanan mas importante.—Efesionan 5:15, 16.

[Cuadro/Plachi na pagina 7]

Tin un Miho Manera Cu Siña di Experencia

Experencia personal—tanto bon como malo—por siña nos lesnan balioso. Pero ta berdad cu experencia ta mama di sabiduria, manera hende sa bisa? No, tin un fuente superior di guia. E salmista a identifica e fuente ei ora el a bisa den oracion: “Bo palabra ta un lampi pa mi pia y un lus pa mi caminda.”—Salmo 119:105.

Dicon ta mucho mas miho pa siña for di Dios su instruccion cu di experencia personal? Un motibo ta cu siña solamente di experencia—door di cai y lanta—por ta costoso y tambe doloroso. Tambe esei ta innecesario. Dios a bisa e Israelitanan di pasado: “Mara bo a pone atencion na mi mandamentonan! E ora ei bo pas lo tawata manera un riu, y bo husticia manera ola di lama.”—Isaias 48:18.

Un motibo cu e Palabra di Dios ta sobresali como fuente di instruccion ta pasobra e tin e relato mas bieu y mas exacto di experencia humano. Probablemente bo ta realisa cu ta preferibel pa siña sin dolor for di e exitonan y fracasonan di otro hende, cu comete e mesun erornan cu nan. (1 Corintionan 10:6-11) Mas importante ainda, den Bijbel, Dios ta duna nos leinan magnifico y principionan pa guia nos cu ta totalmente confiabel. “E lei di Yehova ta perfecto . . . E recordatorio di Yehova ta digno di confiansa, e ta haci hende sin experencia sabi.” (Salmo 19:7, NW) Definitivamente anto, e miho manera pa siña ta for di e sabiduria di nos amoroso Creador.

[Plachinan na pagina 4]

Mundo kier pa bo sigui su estilo di bida materialista

[Plachi na pagina 5]

E tesoro cu tin den Bijbel ta mas balioso cu oro of plata