Paradijs—Algo pa Bo?

‘Mi conoce un hende den Cristo cu a wordo hiba den paradijs.’—2 CORINTIONAN 12:2-4.

1. Ki promesanan di Bijbel ta atrae bo?

PARADIJS. Bo ta corda con bo a sinti ora bo a tende pa prome bes di e promesa di Dios di un paradijs riba tera? Kisas bo ta corda cu bo a siña cu ‘wowo di e ciegonan lo mira, horea di e sordonan lo tende, y e desierto lo grita’ di un bunitesa sin igual. Of kico di e profecia tocante e lobo cu ta biba hunto cu e lamchi y e mucha cu e leopardo? No tawata emocionante pa lesa di bo sernan keri cu lo lanta for di morto cu e perspectiva di biba pa semper den e Paradijs ei?—Isaias 11:6; 35:5, 6; Huan 5:28, 29.

2, 3. (a) Pakico nos por bisa cu bo speransa biblico no ta sin base? (b) Ki base adicional pa speransa nos tin?

² Bo speransa no ta sin base. Bo tin motibo pa kere e promesanan di Bijbel tocante e Paradijs ei. Por ehempel, bo tin confiansa den loke Hesus a bisa e malechor claba na staca: “Lo bo ta cu mi den Paradijs.” (Lucas 23:43, NW) Bo ta confia e promesa: “Segun su promesa nos ta sperando shelonan nobo y un tera nobo, den cua ta biba husticia.” Tambe bo ta confia e promesa cu Dios lo seca nos lagrimanan; cu lo no tin morto mas, y cu lo e caba cu tristesa, lamento y dolor. Esaki ta nifica cu lo bolbe existi un paradijs riba tera!—2 Pedro 3:13; Revelacion 21:4.

³ Pero un otro base pa e speransa di Paradijs aki ta algo cu cristiannan rond mundo ta formando parti di dje actualmente. Kico esei ta? Wel, Dios a produci un paradijs spiritual y a introduci su pueblo den dje. E expresion “paradijs spiritual” por parce algo abstracto of dificil pa compronde, pero Bijbel a papia di un paradijs asina, y e ta existi debidamente.

Un Vision di Paradijs

4. Ki vision 2 Corintionan 12:2-4 ta menciona, y ken probablemente a hay’e?

⁴ Relaciona cu e paradijs spiritual, mira kico apostel Pablo a skirbi: ‘Mi conoce un hende den Cristo cu a wordo hiba den e tercer shelo. Y mi sa con e hende aki—sea den curpa of pafo di curpa, mi no sa, Dios sa—a wordo hiba den paradijs y a tende palabranan cu no por wordo expresa, cuanan no ta permiti pa hende papia.’ (2 Corintionan 12:2-4) E pasashi ei ta bini un poco despues di e versiculonan den cua Pablo a defende su posicion como apostel. Ademas, Bijbel no ta papia di ningun otro persona cu tawatin un experencia asina, y Pablo ta esun cu ta conta nos di dje. Pues probablemente ta Pablo a haya e vision aki. Den e experencia sobrehumano aki, den ki ‘paradijs’ el a drenta?—2 Corintionan 11:5, 23-31.

5. Kico Pablo no a mira, y pesei tawata trata di ki sorto di ‘paradijs’?

⁵ No tin ningun indicacion den e contexto cu “e tercer shelo” ta referi na e atmosfer rond di nos planeta, of na e espacio exterior of na un otro universo, cu algun astronomo ta pensa cu ta existi. Hopi bes, Bijbel ta uza number tres pa representa enfasis, intensidad of forsa adicional. (Eclesiastes 4:12; Isaias 6:3; Mateo 26:34, 75; Revelacion 4:8) Pues, loke Pablo a mira den vision tawata algo hopi eleva. Tawata algo spiritual.

6. Ki desaroyo historico ta yuda nos compronde loke Pablo a mira?

⁶ Profecianan di Bijbel di mas prome ta yuda nos compronde un ke otro. Despues cu Dios su pueblo antiguo a bira infiel na dje, el a dicidi di laga e Babilonionan bini contra Huda y Herusalem. Segun cronologia di Bijbel,  esei a culmina den un destruccion na aña 607 prome cu nos era. E profecia a bisa cu e tera lo a keda bandona pa 70 aña; despues Dios lo a permiti e Hudiunan repenti bolbe na nan tera y reestablece adoracion berdadero. Esaki a tuma luga cuminsando na aña 537 prome cu nos era padilanti. (Deuteronomio 28:15, 62-68; 2 Reinan 21:10-15; 24:12-16; 25:1-4; Yeremias 29:10-14) Pero kico di e tera mes? Durante e 70 añanan ei, el a bira un mondi, yen di area seco habita pa chacal. (Yeremias 4:26; 10:22) No obstante, tawatin e promesa aki: “SEÑOR lo consola Sion; E lo consola tur su luganan desola. E lo haci su luganan desola bira manera Eden, y su desierto manera e hofi [of “Paradijs”, Septuaginta] di SEÑOR.”—Isaias 51:3.

7. Kico mester a sosode despues cu e 70 aña di desolacion a pasa?

⁷ Esei a sosode despues di e 70 añanan di desolacion. Cu e bendicion di Dios, cosnan a drecha. Purba visualisa e esena aki: “Tera seco y desierto lo ta contento, y Araba [esta, yanura di desierto] lo regociha y floria manera rosa. E lo floria abundantemente, y regociha cu goso y grito di alegria. . . . E cohonan lo bula manera bina, y lenga di e mudo lo grita di alegria. Pasobra awa lo basha den desierto, y coridanan di awa den Araba. Tera seco, kima door di solo, lo bira plas di awa, y e tera cu tin sed lo bira fuentenan di awa; den e luga pa chacal biba aden, esta, su luga di sosega, yerba ta bira richi y cabana.”—Isaias 35:1-7.

Un Pueblo Restaura y Transforma

8. Con nos por sa cu e enfoke di Isaias capitulo 35 tawata riba hende?

⁸ Esei si tawata un transformacion! Di desolacion pa paradijs. Sinembargo, tanto esaki como otro profecianan confiabel a mustra cu lo a bini tambe un cambio den hende, comparabel na e cambio di un tera bandona pa un tera productivo. Pakico nos por bisa esaki? Wel, e enfoke di Isaias tawata riba “esnan redimi di SEÑOR”, cu lo a bolbe nan tera “cu grito di goso” y cu lo a haya “alegria y goso.” (Isaias 35:10) Esei a aplica, no na e tera literal, sino na hende. Ademas, otro caminda tambe Isaias a profetisa tocante e pueblo restaura na Sion: “Nan lo wordo yama ‘eiknan di husticia’, e plantacion di SEÑOR . . . Pasobra manera tera ta haci mata nace, . . . Señor Dios lo haci husticia y alabansa spruit dilanti di tur e nacionnan.” Tambe Isaias a bisa di e pueblo di  Dios: “SEÑOR lo guia bo continuamente . . . , y duna forsa na bo wesonan; lo bo ta manera un hofi bon muha.” (Isaias 58:11; 61:3, 11; Yeremias 31:10-12) Pesei, mescos cu e medioambiente di e tera literal lo a drecha, asina tambe cambionan lo a tuma luga den e pueblo Hudiu restaura.

9. Ki “paradijs” Pablo a mira, y na ki tempo el a cumpli?

⁹ E patronchi historico aki ta yuda nos compronde kico Pablo a mira den vision. Esei lo tawatin di aber cu e congregacion cristian, locual el a yama “Dios su cunucu” y cu mester tawata fructifero. (1 Corintionan 3:9) Na ki tempo e vision ei mester a cumpli? Pablo a yama loke el a mira un ‘revelacion’, algo cu lo a tuma luga den futuro. E tawata sa cu despues di su morto lo a bini un gran apostasia. (2 Corintionan 12:1; Echonan 20:29, 30; 2 Tesalonicensenan 2:3, 7) Mientras e apostatanan a gana tereno y a parce di tira un sombra riba e cristiannan berdadero, e ultimonan aki sigur no tawata comparabel mas cu un hofi tur na flor. Sinembargo, e tempo lo a yega pa adoracion berdadero bolbe haya su luga eleva. E pueblo di Dios lo a ser restaura pa asina ‘e hustonan briya manera solo den e reino di nan Tata.’ (Mateo 13:24-30, 36-43) Esei ta loke realmente a sosode un par di aña despues cu e Reino di Dios a ser estableci den shelo. Y den transcurso di decadanan, ta bira masha bisto cu e pueblo di Dios ta disfruta di e paradijs spiritual cu Pablo a mira adelanta den e vision ei.

10, 11. Dicon nos por bisa cu nos ta den un paradijs spiritual apesar cu nos ta imperfecto?

¹⁰ Berdad, nos sa cu nos ta imperfecto, pesei no ta nada straño cu de bes en cuando ta surgi problema entre nos, mescos cu tawatin entre e cristiannan den tempo di Pablo. (1 Corintionan 1:10-13; Filipensenan 4:2, 3; 2 Tesalonicensenan 3:6-14) Ma pensa riba e paradijs spiritual cu nos ta disfruta di dje aworaki. Compara cu e mal condicion cu un tempo nos tawata aden, nos a ser cura spiritualmente. Y mira e contraste entre e hamber cu un tempo nos a sufri di dje y e alimento spiritual abundante cu nos ta gosa di dje actualmente. En bes di hiba un lucha como si fuera den un tera spiritualmente seco, e pueblo di Dios tin su aprobacion y ta ricibi un awasero di bendicion. (Isaias 35:1, 7) En bes di ta ciega den un scuridad spiritual manera cashot, nos ta mira e lus di libertad y di Dios su aprobacion. Hopi hende cu tawata manera sordo pa profecianan di Bijbel a bin tende cu comprondemento loke e Scritura ta bisa. (Isaias 35:5) Por ehempel, miyones di Testigo di Yehova rond  mundo a studia e profecia di Daniel, versiculo pa versiculo. Despues nan a haci un estudio profundo di cada capitulo di e buki di Isaias. E alimento spiritual refrescante ei no ta un prueba palpabel di nos paradijs spiritual?

¹¹ Pensa tambe riba e cambionan di personalidad cu hende sinsero di tur antecedente a pasa aden despues cu nan a haci esfuerso pa compronde y aplica e Palabra di Dios. Basicamente, nan a traha duro pa elimina e cualidadnan di animal cu antes tawata caracterisa nan. Kisas abo mes ta uno cu a haci esei cu tremendo resultado. Y bo rumannan spiritual tambe a haci mescos. (Colosensenan 3:8-14) Pesei, segun cu bo ta asocia cu un congregacion di Testigo di Yehova, bo ta hunto cu hende cu a bira mas pacifico y agradabel. No, nan no ta perfecto ainda, pero sigur nan no ta manera leon feros ni bestia salbahe. (Isaias 35:9) Kico e compañerismo spiritual pacifico aki ta indica? E ta indica bon cla cu nos ta disfrutando di un condicion spiritual cu nos ta yama corectamente un paradijs spiritual. Y nos paradijs spiritual ta prefigura un paradijs riba tera cu nos lo gosa di dje basta nos keda leal na Dios.

12, 13. Kico nos tin cu haci pa keda den nos paradijs spiritual?

¹² Pero tin algo cu nos no mester pasa por halto. Dios a bisa e Israelitanan: “Warda tur mandamento cu mi ta ordena boso awe, pa boso ta fuerte, y pa boso drenta y podera di e tera cu boso ta bai crusa pa podera di dje.” (Deuteronomio 11:8) Levitico 20:22 y 24 ta menciona e mesun tera ei: “Warda tur mi statutonan y tur mi ordenansanan y haci nan, pa e tera caminda mi ta hiba boso pa biba no scupi boso afo. Ma mi a bisa boso: ‘Boso mester podera di nan tera, y ami mes lo duna boso esaki pa boso podera di dje, un tera cu tin lechi y miel na abundancia.’” Si, ta e personanan cu tawatin un bon relacion cu Yehova Dios so lo por a podera di e Tera Priminti. Door cu e Israelitanan no a obedece Dios, el a permiti e Babilonionan conkista nan y saca nan for di nan luga di biba.

¹³ Tin hopi cos tocante nos paradijs spiritual cu nos por ta contento cu ne. E ambiente ta trankilisante y agradabel pa bista. Nos ta na pas cu cristiannan cu a lucha pa domina caracteristicanan bestial. Nan ta haci esfuerso pa ta bondadoso y servicial. Ma pa nos keda den nos paradijs spiritual nos tin cu bai mas aleu cu djis mantene un bon relacion cu e personanan aki. Nos mester tin un bon relacion cu Yehova y haci su boluntad. (Mikeas 6:8) Nos a drenta e paradijs spiritual aki di nos mes boluntad, pero si nos no haci esfuerso pa conserva nos relacion cu Dios, nos por drif bai of ser saca afo.

14. Kico lo yuda nos keda den e paradijs spiritual?

¹⁴ Un factor importante cu lo yuda nos ta pa nos sigui laga e Palabra di Dios fortifica nos. Tuma nota di e idioma simbolico na Salmo 1:1-3: “Bendiciona ta e hende cu no ta cana den e conseho di malbadonan . . . Ma su delicia ta den e lei di SEÑOR, y den su lei e ta medita di dia y anochi. Y e lo ta manera un palo, planta canto di coridanan di awa, cu ta duna su fruta na su tempo, y su blachi no ta marchita; y tur loke cu e haci ta prospera.” Ademas, e publicacionnan basa riba Bijbel di e esclabo fiel y discreto ta percura alimento spiritual den e paradijs spiritual.—Mateo 24:45-47.

Haci Bo Bista Riba Paradijs Mas Skerpi

15. Pakico Moises no por a guia e Israelitanan den e Tera Priminti, pero kico si el a mira?

¹⁵ Considera un otro bista adelanta di Paradijs. Despues cu Israel a dual 40 aña largo den desierto, Moises a guia nan na e Sabananan di Moab, oost di Riu Yordan. Pa motibo di un fayo cu Moises a comete den pasado, Yehova a dicidi di no laga Moises guia Israel pa crusa Yordan. (Numbernan 20:7-12; 27:12, 13) Moises a roga Dios: “Laga mi crusa y mira e tera bunita cu ta keda na e otro banda di Yordan.”  Aunke Moises lo no a drent’e, despues cu el a subi Sero Pisga y a mira varios parti di e tera ei, e mester a realisa cu e tawata un “tera bunita.” Con bo ta kere e tera ei tawata?—Deuteronomio 3:25-27.

16, 17. (a) Den ki sentido e Tera Priminti den tempo antiguo tawata diferente for di e tera den temponan mas resien? (b) Pakico nos por kere cu un tempo e Tera Priminti tawata manera un paradijs?

¹⁶ Si bo basa bo opinion riba loke gran parti di e region ei tawata te cu mas resien, bo por imagina bo un tera seco yen di santo, desiertonan yen di piedra y un calor sofocante. Pero tin motibo pa kere cu por lo general e region ei tawata bastante diferente den tempo biblico. Den e revista Scientific American, e experto den agricultura dr. Walter C. Lowdermilk a splica cu “mil aña di mal uzo a daña” e tera di e region aki. El a skirbi: “Ta hende, y no naturalesa, a pone cu e tera cu un tempo tawata masha productivo a bira ‘desierto.’” Por cierto, su estudionan a indica cu “un tempo e tera aki tawata un paradijs pa criado di bestia.” Ta obvio anto cu ta hende su mal uzo di e tera a daña loke tawata “un paradijs pa criado di bestia.” *

¹⁷ Ora bo medita riba loke bo lesa den Bijbel, bo por mira cu esei en berdad ta un conclusion logico. Corda loke Yehova a sigura e pueblo mediante Moises: “E tera cu boso ta bai crusa pa podera di dje, un tera di sero y vaye, ta bebe awa di yobida di shelo, un tera cu SEÑOR bo Dios ta percura p’e.”—Deuteronomio 11:8-12.

18. Con Isaias 35:2 lo mester a duna e Israelitanan exilia un idea di loke e Tera Priminti tawata?

¹⁸ E Tera Priminti tawatin un paisahe asina berde y productivo cu e solo mencion di cierto luganan a pone hende pensa riba condicionnan di paradijs. Nos por mira esei for di e profecia di Isaias capitulo 35, cu tawatin un cumplimento inicial ora e Israelitanan a bolbe bek for di Babilonia. Isaias a profetisa: “E lo floria abundantemente, y regociha cu goso y grito di alegria. E gloria di Libano lo wordo duna na dje, e mahestad [“splendor”, NW] di Carmelo y Saron. Nan lo mira e gloria di SEÑOR, e mahestad di nos Dios.” (Isaias 35:2) E referencianan na Libano, Carmelo y Saron lo mester a lanta un imagen masha bunita y satisfaciente den mente di e Israelitanan.

19, 20. (a) Describi e area di Saron di antiguedad. (b) Kico por yuda nos haya un speransa mas firme den Paradijs?

¹⁹ Tuma por ehempel Saron, un sabana na e  costa entre e seronan di Samaria y Lama Grandi, esta Lama Mediteraneo. (Mira e potret riba pagina 10.) E tawata conoci pa su bunitesa y productividad. Pa e echo cu e tawatin hopi awa, e tawata un bon luga pa bestia come yerba, pero tambe e tawatin mondi di palo di eik den e regionnan parti nort. (1 Cronicanan 27:29; Cantica di Salomon 2:1; Isaias 65:10) Asina Isaias 35:2 a profetisa e restauracion di un tera cu ta floria cu splendor, mescos cu un paradijs. Na harmonia cu loke Pablo a mira despues den vision, e profecia ei tawata señalando tambe na un paradijs spiritual agradabel. Finalmente, e profecia aki, hunto cu otro profecianan, ta fortalece nos speransa pa un paradijs riba tera pa humanidad.

²⁰ Segun cu nos ta biba den nos paradijs spiritual, nos por haya mas aprecio p’e y tambe un speransa mas firme di cu un dia e tera aki lo bira un Paradijs. Con? Door di haya un comprondemento mas profundo di loke nos ta lesa den Bijbel. Hopi bes e descripcion- y profecianan di Bijbel ta menciona luganan spesifico. Lo bo desea di compronde mas miho unda nan tawata y ki relacion nan tawatin cu otro regionnan? Den e siguiente articulo, nos lo considera con bo por haci esei na un manera beneficioso.

[Nota]

Bo Ta Corda?

• Ki ‘paradijs’ apostel Pablo a mira den vision?

• En conexion cu Isaias capitulo 35, con el a cumpli inicialmente, y ki relacion e tin cu loke Pablo a mira den vision?

• Con nos por haya mas aprecio pa nos paradijs spiritual y un speransa mas firme di cu un dia e tera aki lo bira un Paradijs?

[Preguntanan di Estudio]

[Plachi na pagina 10]

E Sabana di Saron, un area productivo den e Tera Priminti

[Reconocemento]

Pictorial Archive (Near Eastern History) Est.

[Plachi na pagina 12]

Moises a realisa cu e tawata un “tera bunita”