Pregunta di Lector

Ora Hesus a instrui su siguidonan pa “fia sin spera di haya nada bek”, e tawata kiermen cu nan no mag di pidi bek ni sikiera e suma inicial di e fiansa?

E miho manera pa compronde e palabranan ei di Hesus cu ta para skirbi na Lucas 6:35, ta door di tene e Lei di Moises na mente. Den e Lei ei, Dios a manda e Israelitanan pa duna fiansa sin cobra interes na paisanonan pober cu tawatin mester di yudansa financiero. (Exodo 22:25; Levitico 25:35-37; Mateo 5:42) E fiansanan aki no tawata pa proposito comercial, kiermen, pa haci ganashi. Mas bien, fiansa sin cobra interes tawata pa yuda alivia pobresa of calamidad. Con cu bai bin, lo ta un gran falta di amor pa probecha di e dificultadnan financiero di bo prohimo. Pero asina mes, esun cu a duna e fiansa tawatin derecho di haya bek e suma inicial, y tin biaha tawata tuma un garantia cu lo paga e fiansa bek.

Hesus a apoya e Lei, pero alabes el a dun’e un aplicacion mas amplio door di bisa cu esun cu ta duna yudansa no mester spera “di haya nada bek.” Mescos cu e Israelitanan, cristiannan tin biaha ta sufri di dificultadnan financiero of otro circunstancianan cu por laga nan den pobresa of asta desampara. Si un ruman cristian den tal situacion desesperante ta busca yudansa financiero, lo no ta un muestra di bondad pa yud’e? Si, amor berdadero lo motiva un cristian di kier yuda un ruman cu debi na factornan for di su control a hay’e den problema financiero serio. (Proverbionan 3:27) Podise ta posibel pa duna un ruman den necesidad un contribucion, maske e suma kisas ta menos di loke lo bo a duna como fiansa.—Salmo 37:21.

Den e prome siglo di nos era, apostel Pablo y Barnabas a keda encarga pa hiba contribucion for di e cristiannan na Asia Menor pa nan rumannan na Hudea caminda tawata reina un hamber. (Echonan 11:28-30) Di igual manera awe, ora un desaster tuma luga, cristiannan hopi biaha ta manda regalo y contribucion pa nan rumannan den necesidad. Door di haci esei, nan ta duna tambe un bon testimonio na otro hende. (Mateo 5:16) Claro cu mester tene cuenta cu e actitud y situacion di e persona cu ta busca yudansa. Con bin e ta den preta? Ta bon pa tuma nota di e palabranan aki di Pablo: “Si un hende no kier traha, no lag’e come tampoco.”—2 Tesalonicensenan 3:10.

Si un ruman cu ta pidi un fiansa no ta den necesidad serio sino simplemente e kier un yudansa temporal pa e por para bek riba su pia despues di un of otro contratiempo financiero, lo por ta apropiado pa dun’e un fiansa sin cobra interes. Si den tal circunstancia bo dun’e un fiansa cu e intencion cu lo e paga bek henter e suma, lo bo no ta actuando contrario na e palabranan di Hesus cu tin para na Lucas 6:35. Pero mester sera un acuerdo por escrito, y e persona cu haya e fiansa mester haci tur esfuerso pa pag’e bek manera a keda stipula den e acuerdo. De echo, amor cristian lo mester motiva esun cu a fia pa paga e fiansa bek mescos cu amor a motiva e otro pa duna e fiansa.

Esun cu tin pensa di duna e fiansa (of contribucion) lo tin cu analisa tambe e situacion di su propio famia. Por ehempel, si e duna e placa, esei lo strob’e di percura pa e necesidadnan di su famia, locual segun Bijbel ta un prioridad? (2 Corintionan 8:12; 1 Timoteo 5:8) Pero con cu bai bin, cristiannan ta busca oportunidad pa mustra amor na otro, expresando e amor ei den maneranan practico cu ta na harmonia cu principionan biblico.—Santiago 1:27; 1 Huan 3:18; 4:7-11.