Bo Conoce e Felicidad Cu Ta Bin di Duna?

UN RUMAN mohe cristian tawatin casi 50 aña activo den sirbishi cristian. Aunke e efectonan di biehes a hacie fisicamente debil, e tawata dicidido pa bishita e Salon di Reino resien construi. Gelen riba brasa di un ruman homber cristian servicial, el a drenta e salon y a cana bai pocopoco pero derechito riba su meta—e caha di contribucion. Eiden el a deposita e suma modesto cu el a spar pa e proposito aki. Aunke e no por a duna un man den construccion di e salon, e kier a yuda.

E señora cristian aki kisas ta laga bo corda riba un otro señora fiel—e “biuda pober” cu Hesus a mira tira dos cen den e caha di ofrenda di e tempel. Bijbel no ta conta nos di su circunstancia, pero den e tempo ei un mohe sin casa su situacion financiero lo no tawata dje bon ei. Hesus sigur a sinti p’e, pasobra e tawata hopi conciente con penoso e biuda su situacion tawata. Ora el a hala atencion na e biuda como un ehempel pa su disipelnan, el a remarca cu e biuda su donacion chikito a representa “tur loke cu e tawatin pa biba di dje.”—Marco 12:41-44.

Dicon un mohe den necesidad, manera e biuda pober aki, lo a haci tal sacrificio? Claramente, pasobra e tawata profundamente deboto na Yehova Dios, kende su centro di adoracion tawata na e tempel na Herusalem. Aunke e biuda tawata limita den loke e por a haci, e kier a promove sirbishi sagrado. Y lo e mester a sinti un berdadero goso den contribui cu loke e tawata por.

Duna pa Sostene e Obra di Yehova

Contribucion material y financiero tawata semper un parti necesario di adoracion puro, y tambe semper un fuente di gran goso. (1 Cronicanan 29:9) Den antiguo Israel, nan a uza e contribucion no solamente pa haci e tempel bunita, sino tambe pa percura cu tur aspecto di Yehova su adoracion den e tempel por a funciona diariamente. E Lei a bisa spesificamente pa e yiunan di Israel contribui un decimo parti (un diesmo) di nan productonan pa mantene e Levitanan, kendenan a efectua e servicionan di tempel. Pero e Levitanan tambe mester a duna Yehova un diesmo di e productonan cu nan a ricibi.—Numbernan 18:21-29.

Aunke cristiannan no ta bou di e rekisitonan di e pacto di Lei, e principio a keda mescos, sirbidonan di Dios mester contribui  materialmente pa sostene adoracion berdadero. (Galationan 5:1) Ademas, e cristiannan di prome siglo a haya cu tawata un goso pa nan por a contribui pa yuda alivia nan rumannan den necesidad. (Echonan 2:45, 46) Apostel Pablo a recorda cristiannan cu mescos cu Dios generosamente a duna nan cos bon, asina nan tambe mester a mustra generosidad na otro hende. Pablo a skirbi: “Instrui esnan cu ta rico den e mundo actual pa nan no ta soberbe y pa nan no fiha nan speransa riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan. Instrui nan pa haci bon, pa nan ta rico den bon obra, pa nan ta generoso y dispuesto pa comparti, pa nan montona pa nan mes e tesoro di un bon fundeshi pa futuro, pa nan gara loke ta bida berdadero.” (1 Timoteo 6:17-19; 2 Corintionan 9:11) Si, di experencia personal Pablo por a confirma e palabranan di Hesus: “Tin mas felicidad den duna cu tin den ricibi.”—Echonan 20:35, NW.

Dunamento Cristian Awe

Awe, sirbidonan di Yehova ta sigui uza nan pocesionnan material pa yuda otro y pa sostene e obra di Dios. Asta esnan di poco recurso ta contribui cu loke nan por. “E esclabo fiel y prudente” ta sinti cu e ta responsabel dilanti di Yehova pa haci e miho uzo posibel di tur e fondonan aki cu nan ta haya di contribucion. (Mateo 24:45) Ta uza algun fondo pa sucursalnan funciona, pa traduci y produci Bijbel y literatura biblico, pa organisa reunionnan cristian grandi, pa entrena y manda superintendentenan biahero y misioneronan, pa percura yudansa ora di desaster y tambe pa hopi otro proposito esencial. Laga nos enfoca riba un di e propositonan ei—pa yuda traha luganan di adoracion.

Testigonan di Yehova ta reuni varios biaha pa siman den nan Salonnan di Reino pa beneficia di educacion spiritual y asociacion sano. Sinembargo, den hopi pais e situacion economico no ta permiti Testigonan local financia construccion di Salonnan di Reino sin cu nan haya un yudansa financiero prome. Pesei na 1999, Testigonan di Yehova a cuminsa cu un programa pa uza fondo di paisnan mas rico pa yuda traha Salon di Reino den paisnan mas pober. Ademas, miles di boluntario a duna di nan tempo y talento, trahando hopi bes den areanan remoto di e  paisnan aki. Durante construccion, Testigonan local ta haya experencia den trabounan di construccion y mantencion, y e Fondo di Salon di Reino ta haci posibel cu por cumpra ekipo y materialnan necesario. E Testigonan cu awor ta uza e salonnan nobo aki ta sumamente gradicido cu nan rumannan den fe a duna di nan tempo y placa. Tambe e Testigonan local aki ta contribui tur luna pa por mantene e Salon di Reino nobo y cubri e gastonan di construccion, y asina nan ta yuda cu por construi mas Salon di Reino.

Ta traha e Salonnan di Reino uzando metodonan y materialnan local. Aunke e salonnan aki ta bastante simpel, nan ta nechi, practico y comodo. Tempo cu a cuminsa cu e programa di construccion na 1999, e tawata conta pa un 40 pais di poco recurso. Entretanto, a expande e programa di construccion y awor e ta abarca 116 pais di poco recurso, locual ta encera mas cu mitar di e congregacionnan di Testigonan di Yehova rond mundo. Den e ultimo cinco añanan, a construi mas cu 9.000 Salon di Reino bou di e areglo aki, un promedio di mas cu 5 salon nobo pa dia! Pero ainda tin mester di 14.500 Salon di Reino nobo den e 116 paisnan aki. Cu Yehova su bendicion y gracias na e disponibilidad y generosidad di Testigonan rond mundo, nos ta spera cu lo tin suficiente fondo pa satisface e necesidad aki.—Salmo 127:1.

Salonnan di Reino Ta Stimula Aumento

Ki impacto e tremendo esfuerso aki tawatin riba e Testigonan local y riba e obra di predica e Reino? Na hopi luga, tin un aumento drastico den asistencia na reunion despues cu traha un Salon di Reino nobo. Nos ta haya un ehempel tipico den e siguiente informe for di Burundi: “Asina cu caba cu un Salon di Reino, e ta yen yen. Por ehempel, nan a traha un Salon di Reino pa un congregacion cu tawatin un promedio di 100 persona na nan reunionnan. Nan Salon di Reino nobo ta carga 150 hende comodamente. Pa ora a caba e salon, 250 hende tawata asisti na reunion.”

Dicon tal aumento ta tuma luga? Un motibo ta cu hende tin biaha ta desconfia gruponan di publicado di Reino cu no tin un luga di reunion na drechi pero cu ta reuni bou di palo of riba un tereno habri. Den un cierto  pais, hende a cuminsa relaciona violencia etnico cu e tipo di gruponan religioso chikito ei, y awor lei ta exigi pa tur reunion religioso tuma luga den un cas di adoracion.

Un otro bentaha di tin nan propio salon ta cu esei ta yuda Testigonan di Yehova mustra e comunidad cu nan no ta disipel di un cierto pasto. E sucursal di Testigonan di Yehova na Zimbabwe a skirbi: “Den pasado, rumannan den e area aki tawatin custumber di reuni den casnan priva, y e hendenan local tawata identifica e congregacion cu e doño di e cas caminda nan tawata reuni. Nan tawata bisa cu e rumannan ta pertenece na e misa di fulano di tal. Tur esaki ta cambiando awor cu hende ta mira cada salon cu un borchi cu ta identifica nan bon cla como ‘Salon di Reino di Testigonan di Yehova.’”

Dunadonan Contento

Apostel Pablo a skirbi: “Dios ta stima esun cu ta duna cu alegria.” (2 Corintionan 9:7) Claro cu donacionnan grandi ta yuda bon. Pero e porcion mas grandi di fondo cu ta ser  contribui na e obra di Testigonan di Yehova ta bin di cahanan di contribucion cu tin den Salon di Reino. Tur contribucion, sea grandi of chikito, ta importante y no ta ser menosprecia. No lubida cu Hesus a cai sinta caminda e por a mira e biuda pober tira su dos cennan. E angelnan y Yehova tambe a mir’e. Nos no sa ni sikiera nomber di e biuda, pero Yehova a percura pa su acto noble keda registra den Bijbel pa semper.

Fuera di yuda cu construccion di Salon di Reino, nos contribucionnan ta sostene tur otro faseta di e obra sumamente importante di Reino. Nos cooperacion den e aspecto aki ta duna nos motibo pa alegra y pa “abunda tambe door di hopi gradicimento na Dios.” (2 Corintionan 9:12) Nos rumannan cristian na Benin a informa: “Tur dia Yehova ta haya hopi oracion di gradicimento pa e yudansa financiero cu nos a ricibi di e hermandad internacional.” Na mesun tempo, nos tur cu ta yuda sostene e obra di Reino financieramente ta experencia e felicidad cu ta bin di dunamento cristian.

[Cuadro/Plachi na pagina 22, 23]

Maneranan Cu Algun Hende Ta Scohe pa Duna

CONTRIBUCION PA E OBRA MUNDIAL

Hopi hende ta aparta, of hinca den nan presupuesto, un montante pa nan pone den e cahanan di contribucion marca: “Contribucion pa e Obra Mundial—Mateo 24:14.”

Tur luna congregacionnan ta manda e montantenan aki pa e sucursal di Testigonan di Yehova cu ta sirbi nan respectivo pais. Tambe por manda donacion boluntario di placa directamente na Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, of n’e oficina di sucursal cu ta sirbi bo pais. Si manda cheque, e mester ta na nomber di “Watch Tower.” Tambe por haci donacion di prenda of otro cos di balor. Un carta breve cu ta declara cu esakinan ta un regalo incondicional mester acompaña e contribucionnan aki.

AREGLO DI DONACION CONDICIONAL

Por haci donacion di placa via un areglo special den cua, riba peticion di e dunado, lo por debolbe e donacion na dje. Pa mas informacion, por fabor, tuma contacto cu e Office of the Secretary and Treasurer na e adres menciona ariba.

DONACION PLANIA

Ademas di regalo incondicional di placa, tin otro metodonan di duna na beneficio di e sirbishi di Reino mundial. Esakinan ta inclui:

Seguro: Por nombra Watch Tower como beneficiario di un polisa di seguro di bida of di un areglo di pension.

Cuenta di Banco: Por duna Watch Tower derecho di uza cuenta di banco, time deposit of cuenta di pension personal, of derecho di cobra nan despues di morto di nan doño, na harmonia cu rekisitonan bancario local.

Accion y Bono: Por haci donacion di accion y bono na Watch Tower como un regalo incondicional.

Propiedad: Por haci donacion di propiedad cu por ser bendi, sea como regalo incondicional of bou di e condicion cu e dunado por sigui biba den dje te na su morto. Tuma contacto cu e oficina di sucursal di bo pais prome cu traha e acta pa traspasa cualkier propiedad.

Testament y Trust: Por nombra Watch Tower como heredero di propiedad of placa via un testament legal, of por nombra Watch Tower como beneficiario di un areglo di trust. Un trust cu ta beneficia un organisacion religioso por duna cierto beneficionan fiscal.

Pa mas informacion, bo por tuma contacto cu Sosiedad Watch Tower, via carta of telefon, na e adres indica akibou, of na e oficina di Testigonan di Yehova cu ta sirbi bo pais.

Sosiedad Watch Tower P.O. Box 4708

Seroe Loraweg 142A

Curaçao, N.A.

Telefon: (599-9) 461-7528

[Plachinan na pagina 20, 21]

Luganan di reunion bieu y nobo di Testigonan di Yehova

Zambia

Republica Centroafricano