En Busca di un Bon Lider

“Mi ta pidi bo pa bai, y nos ta cla cu bo. Den nomber di Dios, bai!”—Oliver Cromwell; cita door di Leopold Amery, miembro di Parlamento Britanico.

Pa ocho luna caba Segundo Guera Mundial tawata causando bastante destruccion, y cos no tawata bayendo bon pa Gran Bretania ni su aliadonan. Leopold Amery y mas hende den gobierno tawata haya cu mester a bin un cambio di liderato. Pesei, dia 7 di mei 1940, den e Camara di Comunnan, Amery a dirigi e palabranan menciona ariba na Prome Minister Neville Chamberlain. Tres dia despues, Chamberlain a baha como Prome Minister y Winston Churchill a tuma su puesto.

HENDE tin un necesidad basico di bon liderato, pero no ta ken cu ta por ta lider. Asta den un famia, e esposa y yiunan lo ta felis solamente si e tata tin e capasidad pa dirigi e famia. Imagina bo anto kico ta e exigencianan pa ser un lider nacional of mundial! No ta nada straño cu ta masha dificil pa haya bon lider.

Consecuentemente, pa miles di aña masha hopi coronacion, revolucion, golpi di estado, nombramento, eleccion, asesinato y cambio di regimen a tuma luga. Masha hopi rei, prome minister, prins, presidente, secretario-general y dictado a subi na poder y despues baha. Cambionan inespera a core cu asta gobernantenan poderoso. (Wak e cuadro “Diripiente for di Poder”, na pagina 5.) No obstante, ta masha dificil pa haya liderato competente y duradero.

“Nos Tin Cu Keda Contento cu Loke Tin”—Of No?

No ta nada straño anto cu hopi hende a perde speransa di haya un bon lider. Den algun pais, e indiferencia y desesperacion cu ta biba entre e hendenan ta sali na cla specialmente den tempo di eleccion. Geoff Hill, un reportero na Africa, a comenta: “Ora hende ta sinti nan impotente pa trece cambio den e miseria cu nan ta biba, mayoria ta keda sin [bai vota] y no ta interesa mes den politica. . . . Na Africa, ora hende keda sin bai vota, esei no necesariamente kiermen cu nan ta satisfecho. Mayoria  biaha, esei ta representa un grito di ausilio di parti di esnan cu ta sinti cu nan no ta hayando oido.” Mescos tambe, un columnista di corant na Merca a skirbi relaciona cu un eleccion cu tawata den curpa: “Mare tawatin un candidato perfecto den e contienda electoral.” Anto el a agrega: “No tin un candidato asina. Nunca sa tin tampoco. Nos tin cu keda contento cu loke tin.”

Ta moda di haci mes no tin? Humanidad tin cu “keda contento” cu lidernan imperfecto? E echo cu lidernan humano no por a cumpli cu e necesidadnan di nan subditonan ta nifica cu hamas nos lo por haya un bon lider? No, pasobra e miho liderato ta disponibel. E siguiente articulo lo considera ken ta e lider ideal di humanidad y con su servicio por beneficia miyones di hende di tur gremio—abo tambe.

[Plachinan na pagina 3]

Man robes ariba: Neville Chamberlain

Man drechi ariba: Leopold Amery

Abou: Winston Churchill

[Reconocemento]

Chamberlain: Potret ta di Jimmy Sime/Central Press/Getty Images; Amery: Potret ta di Kurt Hutton/Picture Post/Getty Images; Churchill: The Trustees of the Imperial War Museum (MH 26392)