Loke Yehova Su Humildad Ta Nifica pa Nos

DAVID aki si a yega di haya su mes cu contratiempo. El a sufri maltrato na man di su suegro yalurs, Rei Saul. Tres biaha Saul a purba mata David cu lansa y pa añanan el a persiguie sin stop, obligando David di biba como fugitivo. (1 Samuel 18:11; 19:10; 26:20) Sinembargo, Yehova a resulta di ta cu David. Yehova no solamente a salb’e for di Saul sino tambe for di otro enemigonan. Pues, nos por compronde e sintimentonan cu David a expresa den su cantica: “[Yehova] ta mi baranca y mi baluarte, y mi Libertador . . . Bo a duna mi e escudo di bo salbacion, y bo gentilesa [“humildad”, NW] ta haci mi grandi.” (2 Samuel 22:2, 36) En berdad David a bira un homber grandi den Israel. Pero kico esei tawatin di aber cu Yehova su humildad?

Ora e Scritura ta bisa cu Yehova ta humilde, e no kiermen cu Yehova tin un ke otro limitacion of cu e ta someti na otro persona. Mas bien, e bunita cualidad aki ta indica cu e tin un gran compasion pa hende cu sinseramente ta haci esfuerso pa haya su aprobacion y cu e ta extende misericordia na nan. Na Salmo 113:6 y 7 nos ta lesa: “[Yehova] ta humilia su mes pa mira e cosnan cu ta den shelo y riba tera . . . E ta lanta hende pober for di stof.” E echo cu Yehova “ta humilia su mes pa mira” ta nifica cu e ta baha su mes of “buig pa mira.” (Today’s English Version) Pues for di shelo Yehova mes a “buig”, of “humilia su mes”, pa e por a presta atencion na David, un homber imperfecto pero humilde cu tawatin e deseo di sirbi Dios. Pesei David ta sigura nos: “Aunke SEÑOR ta halsa, toch e ta atende e hende humilde.” (Salmo 138:6) E misericordia, pasenshi y compasion cu Yehova tawatin cu David mester ta un animacion pa tur hende cu ta trata na haci e boluntad di Dios.

Aunke Yehova como Soberano ta ocupa e puesto di mas eleva den universo, e ta dispuesto pa trata cu cada un di nos. Esaki ta duna nos e confiansa cu nos por conta cu su yudansa infalibel den asta e circunstancianan di mas dificil. Nos no tin nodi teme cu lo e lubida nos. Relaciona cu su pueblo di antiguo Israel, Bijbel ta papia aptamente di  Yehova como esun “kende a corda riba [nan] den [nan] humiliacion, pasobra su misericordia ta pa semper.”—Salmo 136:23.

Como Yehova su sirbidonan di tempo actual, nos tambe mescos cu David por haya nos cu hopi contratiempo. Podise hende cu no conoce Dios ta haci bofon di nos, of kisas nos ta luchando cu nos salu of nos a perde un ser keri. Sea cual sea nos situacion, si nos curason ta sinsero, nos por acerca Yehova den oracion, y apela na su misericordia. Yehova lo “buig” pa tuma nota di nos y scucha nos oracionnan. E salmista inspira a skirbi: “E wowonan di SEÑOR ta riba e hustonan, y su horeanan ta atento pa scucha nan sclamacion.” (Salmo 34:15) Ora bo reflexiona riba Yehova su bunita cualidad di humildad, bo no ta keda conmovi?

[Plachinan na pagina 30]

Mescos cu Yehova a scucha e oracionnan di David, asina e ta dispuesto pa scucha nos oracionnan awe