Nos Lo Biba Algun Dia den Berdadero Siguridad?

KEN lo no keda encanta pa mira yiunan hunga contento di nan hunto cu nan mayornan amoroso? Yiunan ta sinti nan completamente sigur den compania di mayornan cu ta stima nan. Sinembargo, pa hopi mucha, e momentonan ei di felicidad casi no ta existi. Na luga di esei, algun tin cu pasa trabou tur dia pa haya un luga pa drumi anochi. Tin speransa pa muchanan asina cu no tin ni un dak riba nan cabes y tambe pa otro muchanan cu ta bibando den insiguridad awe?

Aunke futuro por ta pinta scur, e Palabra di Dios ta duna speransa. Profeta Isaias a predeci cu lo yega e dia cu tur hende lo biba den siguridad total. El a skirbi: “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come.”—Isaias 65:21, 22.

Pero e speransa aki tin base solido? Esei ta un bon pregunta pasobra “speransa” no ta nifica tur biaha cu algo lo cumpli sigur. Por ehempel, den algun pais hopi bes bo ta tende e expresion, “Speransa ta e ultimo cos cu bo ta perde.” Esaki ta nifica cu hopi hende ta keda carga speransa asta ora no tin un bon base pa esei. Ma e speransa cu e Dios bibo ta pone nos dilanti ta diferente. Apostel Pablo a skirbi: “Ningun hende cu pone su fe den [Dios] lo keda desapunta.” (Romanonan 10:11, NW) Profecianan di Bijbel cu a cumpli caba ta duna nos e confiansa cu tur otro promesa cu Yehova Dios a haci, tambe lo ser realisa. Ora e promesanan ei bira realidad, e situacionnan cu ta obliga muchanan biba riba caya lo pasa pa historia.

Pero for di awor caba e conseho practico cu nos ta haya den Bijbel por yuda e personanan cu no tin speransa pa nan por bai dilanti den bida y haya berdadero siguridad. Con esei ta posibel? Gustosamente Testigonan di Yehova den bo comunidad lo yuda bo haya e contesta riba e pregunta aki.