Sirbidonan Felis di Yehova

“Felis ta esnan cu ta conciente di nan necesidad spiritual.”—MATEO 5:3, NW.

1. Kico ta berdadero felicidad, y kico e ta indica?

YEHOVA su pueblo ta duna gran balor na nan condicion felis. E salmista David a declara: “Felis ta e pueblo kende su Dios ta Yehova!” (Salmo 144:15, NW) Felicidad ta un sintimento di bienestar, di sinti bo bon. E felicidad di mas profundo—esun cu ta yega te den fondo di nos curason—ta bin di ser conciente cu Yehova ta bendiciona nos. (Proverbionan 10:22) Tal felicidad ta indica cu nos tin un relacion intimo cu nos Tata celestial y cu nos sa cu nos ta haciendo su boluntad. (Salmo 112:1; 119:1, 2) Un cos interesante ta cu Hesus a numera nuebe motibo pa cua nos por ta felis. Den e articulo aki y esun siguiente nos lo analisa e nuebe motibonan aki pa ta felis, y nan lo yuda nos realisa con felis nos por ta si nos ta sirbi “e Dios felis”, Yehova, fielmente.—1 Timoteo 1:11, NW.

Conciente di Nos Necesidad Spiritual

2. Na ki ocasion Hesus a papia tocante felicidad, y kico tawata su palabranan di introduccion?

² Na aña 31 di nos era, Hesus a duna un di e discursonan mas famoso di henter historia. E ta ser yama e Sermon Riba Sero pasobra Hesus a dun’e na bahada di un sero cu bista riba Lama di Galilea. E Evangelio di Mateo ta conta: “Ora [Hesus] a mira e multitudnan el a subi e sero; y despues cu el a sinta, su disipelnan a yega serca dje; y el a habri su boca y a cuminsa siña nan, bisando: ‘Felis ta esnan cu ta conciente di nan necesidad spiritual, ya cu e reino di shelo ta pertenece na nan.’” * Literalmente  traduci, Hesus su palabranan di introduccion ta bisa: “Bendiciona ta esnan pober di spirito.”—Mateo 5:1-3; BS.

3. Con un caracter humilde ta contribui na nos felicidad?

³ Den Hesus su Sermon Riba Sero, el a indica cu un persona ta hopi mas felis si e ta conciente di su necesidad spiritual. Cristiannan humilde, plenamente conciente di nan condicion pecaminoso, ta roga Yehova pa pordon a base di Cristo su sacrificio di rescate. (1 Huan 1:9) Anto asina nan ta haya pas mental y berdadero felicidad. “Bendiciona ta esun, kende su transgresion ta pordona, kende su pica ta tapa!”—Salmo 32:1; 119:165.

4. (a) Den ki maneranan nos por mustra cu nos ta conciente di nos necesidad spiritual y di esun di otro hende? (b) Kico ta aumenta nos felicidad ora nos ta conciente di nos necesidad spiritual?

⁴ Ser conciente di nos necesidad spiritual ta motiva nos pa lesa Bijbel tur dia, pa saca pleno beneficio di e cuminda spiritual cu “e esclabo fiel y prudente” ta percura “na su debido tempo”, y pa asisti cu regularidad na reunionnan cristian. (Mateo 24:45; Salmo 1:1, 2; 119:111; Hebreonan 10:25) Amor pa prohimo ta haci nos conciente di e necesidad spiritual di otro hende y ta motiva nos pa predica y siña hende e bon nobo di Reino cu entusiasmo. (Marco 13:10; Romanonan 1:14-16) Nos ta haya felicidad door di comparti berdadnan biblico cu otro hende. (Echonan 20:20, 35) Ademas, nos felicidad ta bira aun mas profundo ora nos medita riba e maraviyoso speransa di e Reino y e bendicionnan cu e Reino ei lo trece. Pa e “tou chikito” di cristiannan ungi, e speransa di Reino ta bida inmortal den shelo como parti di Cristo su gobernacion di Reino. (Lucas 12:32; 1 Corintionan 15:50, 54) E “otro carnenan” ta spera di haya bida eterno den un paradijs riba tera bou di e gobernacion di Reino ei.—Huan 10:16; Salmo 37:11; Mateo 25:34, 46.

Con Hende Cu Ta Lamenta Por Ta Felis

5. (a) Kico Hesus tawata kiermen cu e expresion “esnan cu ta lamenta”? (b) Con personanan asina ta ser consola?

⁵ E palabranan cu Hesus a menciona relaciona cu e siguiente motibo pa ta felis por parce contradictorio. El a bisa: “Felis ta esnan cu ta lamenta, ya cu nan lo ser consola.” (Mateo 5:4) Con un persona por ta tristo y alabes felis? Pa nos compronde kico Hesus su declaracion ta nifica, nos tin cu considera ta ki clase di lamentacion Hesus tawata papia di dje. Disipel Santiago a splica cu nos propio condicion pecaminoso mester ta un motibo pa lamenta. El a skirbi: “Limpia boso mannan, boso pecadonan; y purifica boso curason, boso di curason dobel. Sea afligi y lamenta y yora; laga boso harimento cambia den yoramento, y boso goso den tristesa. Humilia boso mes den e presencia di Señor, y e lo halsa boso.” (Santiago 4:8-10) Hende cu realmente ta tristo debi na nan condicion pecaminoso ta ser consola ora cu nan siña cu nan por haya pordon pa nan picanan si nan kere den Cristo su sacrificio di rescate y mustra berdadero repentimento door di haci Yehova su boluntad. (Huan 3:16; 2 Corintionan 7:9, 10) Di e manera ei nan por tin un relacion precioso cu Yehova y tambe carga e speransa di biba pa semper pa sirbie y alab’e. Esaki ta laga nan sinti un profundo felicidad.—Romanonan 4:7, 8.

6. Den ki sentido tin hende ta lamenta, y con nan ta ser consola?

⁶ Hesus su declaracion ta encera tambe hende cu ta lamenta debi na e  condicionnan teribel cu ta reina riba tera. Hesus a aplica Isaias 61:1 y 2 na su mes. E profecia ei ta bisa: “E spirito di Señor DIOS ta riba mi, pasobra SEÑOR a ungi mi pa hiba bon nobo na esnan afligi; el a manda mi pa cura hende di curason kibra, . . . pa consola tur esnan cu ta yora.” E encargo ei ta aplica tambe na cristiannan ungi cu ainda ta riba tera, y nan ta cumpli cu ne cu yudansa di nan compañeronan, e “otro carnenan.” Nan tur hunto ta participa den e trabou cu den un forma simbolico ta marca frenta di “e hombernan cu ta suspira y keha pa motibo di tur e abominacionnan cu ta wordo haci den [Herusalem apostata, cu a representa cristiandad].” (Ezekiel 9:4) E evangelio of ‘bon noticia di reino’ ta consola e personanan ei cu ta lamenta. (Mateo 24:14) Nan ta keda contento di siña cu pronto Yehova su husto mundo nobo lo remplasa e sistema malbado di Satanas.

Felis Ta Esnan di Genio Suave

7. Kico e expresion “genio suave” no kiermen?

⁷ Hesus a sigui cu su Sermon Riba Sero bisando: “Felis ta esnan di genio suave, ya cu nan lo hereda e tera.” (Mateo 5:5) Tin biaha hende ta pensa cu un genio suave ta indicacion di un caracter debil. Sinembargo, esei no ta e caso. Splicando e sentido di e palabra traduci como “genio suave”, un comentarista biblico a bisa: “E caracteristica supremo  di e homber cu tin [un genio suave] ta cu e ta un homber di gran dominio propio. Genio suave no ta e gentilesa di un hende cu no tin forsa di boluntad, ni un cariño sentimental ni un trankilidad pasivo. E ta un poder bou di control.” Hesus a declara tocante su mes: “Mi ta manso [of, “di genio suave”, NW] y humilde di curason.” (Mateo 11:29) Sinembargo, cu curashi Hesus a defende principionan husto.—Mateo 21:12, 13; 23:13-33.

8. Genio suave ta estrechamente liga cu kico, y dicon nos mester tin e cualidad aki den nos relacion cu otro hende?

⁸ Pues anto, genio suave ta estrechamente liga cu dominio propio. Si, apostel Pablo a menciona suavidad (of, mansedumbre) hunto cu dominio propio ora el a describi e “fruta di e spirito.” (Galationan 5:22, 23) Nos mester cultiva un genio suave cu yudansa di e spirito santo. E ta un cualidad cristian cu ta contribui na pas cu hende pafo y paden di e congregacion. Pablo a skirbi: “Bisti un curason di compasion, cariño, humildad, mansedumbre y pasenshi. Y boso soporta otro y pordona otro.”—Colosensenan 3:12, 13.

9. (a) Dicon no ta solamente den nos relacion cu otro hende nos mester tin un genio suave? (b) Con hende di genio suave ta “hereda e tera”?

⁹ Sinembargo, no ta solamente den nos relacion cu otro hende nos mester tin un genio suave. Door di somete nos mes di buena gana na Yehova su soberania, nos ta demostra cu nos ta di genio suave. E ehempel principal den esaki ta Hesucristo, kende tempo cu e tawata aki riba tera a desplega un genio suave y sumision completo na e boluntad di su Tata. (Huan 5:19, 30) Hesus ta esun principal cu ta hereda e tera, pasobra e ta e Gobernante nombra di e tera. (Salmo 2:6-8; Daniel 7:13, 14) E ta comparti e herencia aki cu 144.000 “coheredero”, scohi “for di entre hende” pa “reina riba tera.” (Romanonan 8:17; Revelacion 5:9, 10; 14:1, 3, 4; Daniel 7:27) Cristo y su cogobernantenan lo reina riba miyones di hende semehante di carne, hendenan riba ken e salmo profetico aki lo haya su cumplimento felis: “E humildenan lo hereda e tera, y lo deleita nan mes den pas abundante.”—Salmo 37:11; Mateo 25:33, 34, 46.

Felis Ta Esnan Cu Tin Hamber pa Husticia

10. Menciona un manera den cua hende cu tin “hamber y sed pa husticia” por ser sacia.

¹⁰ E siguiente motibo pa felicidad cu Hesus a describi ora e tawata papia riba e sero na Galilea tawata: “Felis ta esnan cu tin hamber y sed pa husticia, pasobra nan lo ser sacia.” (Mateo 5:6) Pa cristiannan, ta Yehova ta fiha e norma pa husticia. Pues, hende cu tin hamber y sed pa husticia de echo tin hamber y sed pa e guia di Dios. E personanan ei ta plenamente conciente di nan pica y imperfeccion y nan ta anhela un posicion aceptabel dilanti di Yehova. Nan ta bira masha felis ora nan siña for di e Palabra di Dios cu si nan repenti y busca pordon a base di Cristo su sacrificio di rescate, nan tin chens di alcansa un posicion husto dilanti Dios.—Echonan 2:38; 10:43; 13:38, 39; Romanonan 5:19.

11, 12. (a) Con cristiannan ungi ta alcansa husticia? (b) Con lo satisface e sed di e compañeronan di e unginan?

¹¹ Hesus a bisa cu personanan asina lo ta felis ya cu “Dios lo satisface nan.” (Mateo 5:6, BPK) Cristiannan ungi cu a haya e yamada pa “reina como rei” cu Cristo den shelo ta ser declara “husto pa bida.” (Romanonan 5:1, 9, 16-18, NW) Yehova ta ungi nan, y asina ta adopta nan como yiu spiritual. Nan ta bira coheredero cu Cristo, yama pa bira rei y sacerdote den su gobierno celestial di Reino.—Huan 3:3; 1 Pedro 2:9.

¹² E compañeronan di e unginan ainda no  a ser declara husto pa bida. Sinembargo, den bista di Yehova nan tin un cierto grado di husticia pa medio di nan fe den Cristo su sanger drama. (Santiago 2:22-25; Revelacion 7:9, 10) Nan ta ser conta como amigo di Yehova cu ta bin na remarca pa haya liberacion na momento di “e gran tribulacion.” (Revelacion 7:14) Nan sed pa husticia lo keda sacia aun mas ora cu bou di e “shelonan nobo” nan bira parti di e tera nobo “den cual ta biba husticia.”—2 Pedro 3:13; Salmo 37:29.

Felis Ta Esnan Misericordioso

13, 14. Den ki maneranan practico nos mester mustra cu nos ta misericordioso, y con esei ta beneficia nos?

¹³ Siguiendo cu su Sermon Riba Sero, Hesus a bisa: “Felis ta esnan misericordioso, ya cu nan lo ser mustra misericordia.” (Mateo 5:7) Den leinan humano, misericordia ta referi na ora un hues mustra clemencia y no duna un malechor tur e castigo cu lei ta permiti. Sinembargo, den Bijbel e palabra original traduci pa “misericordia” ta referi principalmente na mustra consideracion bondadoso of mustra duele cu ta trece alivio pa hende menos privilegia. Pues, personanan misericordioso ta demostra cu accion cu nan tin compasion. Hesus su comparacion di e bon Samaritano ta un ehempel excelente di un persona cu “a mustra misericordia” na un hende den necesidad.—Lucas 10:29-37.

¹⁴ Pa nos experencia e felicidad cu ta bin di ser misericordioso, nos tin cu haci obranan positivo di bondad pa cu hende den necesidad. (Galationan 6:10) Hesus a sinti duele di e hendenan cu el a mira. “El a sinti compasion pa nan, pasobra nan tawata manera carne sin wardado; y el a cuminsa siña nan hopi cos.” (Marco 6:34) Hesus a realisa cu humanidad su necesidad di mas grandi ta pa cos spiritual. Nos tambe por demostra cu nos tin compasion y misericordia door di comparti cu hende loke mas nan tin mester di dje—‘e bon noticia di reino.’ (Mateo 24:14) Tambe nos por ofrece yudansa practico na rumannan cristian di mas edad, na biuda- y huerfanonan y “curasha esnan cu ta falta animo.” (1 Tesalonicensenan 5:14; Proverbionan 12:25; Santiago 1:27) Esaki no solamente lo haci nos felis, sino tambe lo habri caminda pa nos haya Yehova su misericordia.—Echonan 20:35; Santiago 2:13.

Curason Puro y Hacido di Pas

15. Con nos por ta di curason puro y hacido di pas?

¹⁵ Hesus a describi e di seis y di shete motibo pa felicidad como lo siguiente: “Felis ta esnan di curason puro, ya cu nan lo mira Dios. Felis ta e hacidonan di pas, ya cu nan lo ser yama ‘yiunan di Dios.’” (Mateo 5:8, 9) Un curason puro ta un curason cu no solamente ta moralmente limpi sino tambe spiritualmente limpi y uni den su debocion na Yehova. (1 Cronicanan 28:9; Salmo 86:11) Hacidonan di pas ta biba na pas cu nan rumannan cristian y—te asina leu cu ta depende di nan—na pas cu nan prohimo. (Romanonan 12:17-21) Nan ta “busca pas y siguie.”—1 Pedro 3:11.

16, 17. (a) Dicon e unginan ta ser yama “yiunan di Dios”, y con nan ta “mira Dios”? (b) Con e “otro carnenan” ta “mira Dios”? (c) Con y na ki tempo e “otro carnenan” lo bira “yiunan di Dios” den e sentido mas completo di palabra?

 ¹⁶ E hacidonan di pas cu ta di curason puro ta haya e promesa cu nan “lo ser yama ‘yiunan di Dios’” y “lo mira Dios.” Yehova ta engendra cristiannan ungi pa medio di spirito y adopta nan como ‘yiu’ mientras nan ta riba tera ainda. (Romanonan 8:14-17) Ora nan haya resureccion pa ta hunto cu Cristo den shelo, nan lo sirbi den Yehova su presencia y lo mira Yehova di berdad.—1 Huan 3:1, 2; Revelacion 4:9-11.

¹⁷ E “otro carnenan” hacido di pas ta sirbi Yehova bou di e Bon Wardador, Cristo Hesus, kende ta bira nan “Tata Eterno.” (Huan 10:14, 16; Isaias 9:6) Yehova lo adopta como su yiu terenal esnan cu despues di Cristo su Reinado di Mil Aña pasa e prueba final cu exito, y nan lo haya “e libertad glorioso di e yiunan di Dios.” (Romanonan 8:21; Revelacion 20:7, 9) Mientras nan ta den expectativa di esaki, nan ta yama Yehova nan Tata, ya cu nan a dedica nan mes na dje, y ta reconoc’e como nan Dunador di Bida. (Isaias 64:8) Mescos cu Job y Moises di pasado, nan por “mira Dios” cu wowo di fe. (Job 42:5; Hebreonan 11:27) Cu ‘e wowonan di nan curason’ y mediante un conocemento exacto di Dios, nan ta distingui Yehova su cualidadnan maraviyoso y ta purba imit’e door di haci su boluntad.—Efesionan 1:18; Romanonan 1:19, 20; 3 Huan 11.

18. Di acuerdo cu e prome shete motibonan pa felicidad cu Hesus a describi, ken ta esnan cu ta haya berdadero felicidad awe?

¹⁸ Nos a mira cu hende conciente di nan necesidad spiritual, esnan cu ta lamenta, esnan di genio suave, esnan cu tin hamber y sed pa husticia, esnan misericordioso, esnan di curason puro y e hacidonan di pas ta haya berdadero felicidad den sirbi Yehova. Sinembargo, e personanan ei semper a haya oposicion, asta persecucion. Acaso esei ta daña nan felicidad? Nos lo considera e pregunta ei den e siguiente articulo.

[Nota]

Como Repaso

• Ki felicidad hende conciente di nan necesidad spiritual ta sinti?

• Den ki maneranan hende cu ta lamenta ta ser consola?

• Con nos ta mustra cu nos tin un genio suave?

• Dicon nos mester ta misericordioso, di curason puro y hacido di pas?

[Preguntanan di Estudio]

[Plachi na pagina 10]

“Felis ta esnan cu ta conciente di nan necesidad spiritual”

[Plachinan na pagina 10]

“Felis ta esnan misericordioso”

[Plachi na pagina 10]

“Felis ta esnan cu tin hamber y sed pa husticia”