Bo Ta Anhela un Mundo sin Miedo?
Bo Ta Anhela un Mundo sin Miedo?
“Nos ta bibando den un ‘estado constante di maximo alerta y . . . impotencia’, causa pa un ‘peliger no mucho cla defini . . . cu por dal aden un ora pa otro y den cualkier forma sin previo aviso.’”
E PALABRANAN aki, cita aña pasa den e revista Newsweek, ta refleha e sintimentonan di hopi hende cu ta biba den e mundo turbulento djawe. Hesucristo a indica cu e sintimentonan ei lo bira mas intenso den futuro cercano. El a profetisa di un tempo cu lo tin un angustia asina grandi entre e nacionnan cu nan lo no sa e salida y cu hende lo desmaya di miedo y di e expectativa di loke ta tuma luga riba tera. Pero nos lo no tin nodi tene miedo ni sinti nos impotente pasobra Hesus a agrega: “Ora cu e cosnan aki cuminsa tuma luga, wak ariba y lanta boso cabes, pasobra boso redencion [liberacion] ta yegando serca.”—Lucas 21:25-28.
Yehova Dios a describi e condicion di bida di su pueblo riba tera despues di e liberacion ei, cu e siguiente palabranan: “Mi pueblo lo biba den un luga caminda pas ta reina, y den casnan sigur y den luganan caminda tin sosiego y trankilidad.” (Isaias 32:18) Y pa medio di su profeta Mikeas, Yehova a bisa: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan.”—Mikeas 4:4.
Esta un contraste cu e bida djawe! Ningun peliger desconoci lo menasa humanidad. En bes di ta constantemente den un estado di alerta y impotencia, lo reina condicionnan di pas y felicidad eterno.