Busca Yehova, Esun Cu Ta Examina Curason
Busca Yehova, Esun Cu Ta Examina Curason
“Busca mi pa boso por biba.”—AMOS 5:4.
1, 2. Kico e Scritura kiermen ora e ta bisa cu Yehova “ta wak curason”?
YEHOVA DIOS a bisa profeta Samuel: “Hende ta wak aparencia di pafo, ma SEÑOR ta wak curason.” (1 Samuel 16:7) Kico ta nifica cu Yehova “ta wak curason”?
2 Den e Scritura, curason ta ser uza hopi bes pa simbolisa loke un persona ta di paden: su deseonan, su pensamentonan, su emocionnan y loke e ta gusta. Pues, ora Bijbel ta bisa cu Dios ta wak curason, esei ta nifica cu e ta mira mas aleu cu e aparencia di pafo y ta enfoca riba loke un persona ta di berdad.
Dios Ta Examina Israel
3, 4. Segun Amos 6:4-6, ki condicion tawata existi den e reino di dies tribu di Israel?
3 Ora Esun cu ta examina curason a observa e reino di dies tribu di Israel den e dianan di Amos, kico ta loke El a mira? Amos 6:4-6 ta papia di hombernan ‘cu tawata drumi riba cama di ivor y tawata rek curpa riba sofa.’ Nan tawata “come lamchi for di e tou y bishe for di e stal.” E hendenan ei a “compone cantica pa nan mes” (na e idioma original e ta bisa cu “nan a inventa instrumentonan di muziek”, NW), y tawata ‘bebe conchinan yen di biña.’
4 Na prome bista, esaki lo por parce di ta un esena masha placentero. Den e comodidad di nan cas luhoso, e riconan tawata disfruta di e cuminda y bebida mas exkisito, y a ser entreteni door di e miho instrumentonan musical cu tawatin. Tambe nan tawatin “cama di ivor.” Na Samaria, ciudad capital di e reino di Israel, arkeologonan a haya ivor masha bunita taya. (1 Reinan 10:22) Hopi di e ivor aki muy probablemente tawata labra den mueble of uza asta como decoracion riba muraya.
5. Dicon Dios tawata malcontento cu e Israelitanan den tempo di Amos?
5 Acaso Yehova Dios tawata contra cu e Israelitanan a biba comodo, disfruta di dushi cuminda, bebe bon biña y scucha musica bunita? Claro cu no! Ta e mes a percura tur e cosnan ei na abundancia pa hende disfruta di dje. (1 Timoteo 6:17) Loke Yehova no tawata contento cu ne ta e mal deseonan di e pueblo, nan curason malbado, nan actitud sin respet pa cu Dios y nan falta di amor pa nan paisanonan Israelita.
6. Den ki situacion spiritual Israel tawata durante e tempo di Amos?
6 Un sorpresa grandi tawata spera esnan cu tawata ‘rek curpa riba sofa, comiendo lamchi for di e tou, bebiendo biña y inventando instrumentonan di muziek.’ E hombernan ei a “pone e dia di calamidad tarda”, es decir, nan a haci manera cu e dia di calamidad ei ta masha leu. Eigenlijk, e cosnan cu tawata pasa den Israel mester a molestia nan, pero al contrario, ‘di e ruina di Hose[Yosef] nan no tawatin duele.’ (Amos 6:3-6) Apesar di e prosperidad economico di e nacion, Dios a mira cu den sentido spiritual, Yosef—esta, Israel—tawata den ruina. Sinembargo, e hendenan a dal bai cu nan actividadnan diario manera nada no a pasa. Hopi hende awe tin e mesun actitud. Kisas nan ta admiti cu nos ta bibando den tempo dificil, pero tanten cu nan no ta ser afecta personalmente, nan no ta worry masha cu e situacion dificil di otro hende y nan no ta mustra ningun interes den asuntonan spiritual.
Israel—Un Nacion den Deterioro
7. Kico lo a pasa si e pueblo di Israel no haci caso di Dios su spiertamentonan?
7 E buki di Amos ta describi un nacion den deterioro apesar cu su aparencia externo tawata di prosperidad. Ya cu e hendenan no a haci caso di Dios su spiertamentonan y corigi nan manera di pensa, Yehova lo a bandona nan den man di nan enemigonan. E Asirionan lo a bin y saca nan for di nan bunita cama di ivor y lastra nan hiba den cautiverio. Ayo tur comodidad!
8. Con Israel a bin resulta den un mal condicion spiritual?
8 Ta con e nacion di Israel a bin hay’e den e condicion aki? E situacion aki a cuminsa desaroya na aña 997 prome cu nos era, despues cu Rei Salomon a muri y su yiu Roboam a subi trono y dies tribu di Israel a separa for di e tribunan di Huda y Benjamin. E prome rei di e reino di dies tribu di Israel tawata Jeroboam I, “yiu homber di Nabat.” (1 Reinan 11:26) Jeroboam a combence e pueblo bou di su dominio cu tawata mucho molester pa nan bai te Herusalem pa adora Yehova. Sinembargo, e no tawata realmente interesa den e bienestar di e pueblo. Mas bien, su intencion tawata pa proteha su mes interes. (1 Reinan 12:26) Jeroboam tawatin miedo cu si e Israelitanan sigui bai na e tempel di Herusalem pa e fiestanan anual na honor di Yehova, cu tempo nan lo a bira fiel atrobe na Huda. Pues, pa evita esaki, Jeroboam a traha dos bishe di oro, un na Dan y e otro na Bet-el. Asina adoracion di bishe a bira e religion di Estado den e reino di Israel.—2 Cronicanan 11:13-15.
9, 10. (a) Ki tipo di celebracionnan religioso Rei Jeroboam I a organisa? (b) Con Dios a considera e fiestanan cu nan tawata tene na Israel den tempo di Rei Jeroboam II?
9 Jeroboam a purba duna e religion nobo un aparencia di algo respetabel. El a organisa eventonan religioso cu tawata casi mescos cu e fiestanan teni na Herusalem. Na 1 Reinan 12:32, nos ta lesa: “Jeroboam a institui un fiesta den e di ocho luna, riba e di diessinco dia di e luna, manera e fiesta cu tin na Huda, y a subi bai na e altar; asina el a haci na Bet-el, ofreciendo sacrificio.”
10 Yehova nunca a aproba e tipo di fiestanan religioso falso ei. Via Amos, Yehova a mustra esei bon cla mas cu un siglo despues durante e reinado di Jeroboam II, kende a bira rei di e reino di dies tribu di Israel rond di aña 844 prome cu nos era. (Amos 1:1) Segun Amos 5:21-24, Dios a bisa: “Mi ta odia, mi ta rechasa boso fiestanan; tampoco mi no tin delicia den boso asambleanan solem. Maske boso ofrece na mi ofrendanan kima y boso ofrendanan di maishi, lo mi no acepta nan; y ni wak lo mi no wak e ofrendanan di pas di boso bestianan gorda. Kita for di mi e boroto di boso canticanan; ni scucha lo mi no scucha e zonido di boso harpanan. Ma laga husticia core basha manera awa, y rectitud manera un corida di awa cu ta keda core constantemente.”
Similaridadnan den Nos Tempo
11, 12. Ki similaridadnan tin entre e adoracion di Israel di antiguedad y esun cu tin awe den cristiandad?
11 Ta bisto cu Yehova a examina curason di e hendenan cu tawata participa den e fiestanan pagano di Israel y el a rechasa nan celebracion- y ofrendanan. Awe tambe Dios ta rechasa e celebracionnan pagano di cristiandad, manera Pasco di Nacemento y Pasco di Resureccion. Pa adoradonan di Yehova, no por tin ningun asociacion entre husticia y maldad, ni comunion entre lus y scuridad.—2 Corintionan 6:14-16.
12 Tin mas similaridad entre e adoracion di cristiandad y e adoracion di bishe di e Israelitanan. Aunke algun persona cu ta declara di ta cristian ta acepta e berdad di e Palabra di Dios, e adoracion di cristiandad riba su mes no ta ser motiva pa berdadero amor pa Dios. Si tawata asina, anto lo el a para riba pa su miembronan adora Yehova “den spirito y berdad”, pasobra esei ta e clase di adoracion cu ta agrada Dios. (Huan 4:24) Ademas, cristiandad no ta “laga husticia core basha manera awa, y rectitud manera un corida di awa cu ta keda core constantemente.” Al contrario, consistentemente e ta minimisa e rekisitonan moral di Dios. E ta tolera fornicacion y otro picanan serio. Asta tin algun iglesia cu ta bai asina leu di bendiciona matrimonionan homosexual!
“Stima Bondad”
13. Dicon nos tin cu cumpli cu e palabranan di Amos 5:15?
13 Na tur esnan cu ta anhela pa adora Yehova den un manera aceptabel, e ta bisa: “Odia maldad, stima bondad.” (Amos 5:15) Stimacion y odio ta emocionnan hopi fuerte cu ta sali for di e curason figurativo. Siendo cu curason ta engañoso, nos mester haci tur loke ta na nos alcanse pa proteh’e. (Proverbionan 4:23; Yeremias 17:9) Si nos permiti nos curason cultiva mal deseo, nos lo por haya nos ta stima loke ta malo y odia loke ta bon. Y si nos sigui tras di e deseonan ei door di practica pica, ni sikiera e celo di mas grandi na mundo lo no laga nos haya e fabor di Dios bek. Pesei laga nos pidi Dios yuda nos pa nos ‘odia maldad y stima bondad.’
14, 15. (a) Menciona algun persona den Israel cu tawata haci loke ta bon. Pero con e pueblo a trata algun di nan? (b) Con nos por curasha cristiannan cu ta den sirbishi di tempo completo awe?
14 Sinembargo, no ta tur Israelita tawata haci loke ta malo den bista di Yehova. Por ehempel, Oseas y Amos a “stima bondad” y a sirbi Dios fielmente como profeta. Otronan a haci voto of promesa solem pa biba como Nazareo. Durante e periodo di nan voto como Nazareo, nan a abstene di uza productonan di mata di wendruif, specialmente biña. (Numbernan 6:1-4) Con e otro Israelitanan a mira e bida di sacrificio propio cu tal hacido di bondad a hiba? Na Amos 2:12 nos ta haya e contesta hopi sorprendente riba e pregunta aki. E contesta ta revela te con leu e nacion a degenera spiritualmente. E versiculo ei ta bisa: “Boso a haci e Nazareonan bebe biña, y boso a ordena e profetanan, bisando: ‘Boso no profetisa!’”
15 Mirando e ehempel di fieldad di e Nazareonan y di e profetanan, e Israelitanan ei lo mester a haya berguensa y sinti nan motiva pa cambia nan bida. En bes di esei, nan a demostra falta di amor door di busca manera pa descurasha esnan leal di duna gloria na Dios. Laga nos nunca curasha nos rumannan cristian cu ta pionero, misionero, superintendente biahero of miembro di e famia di Betel pa stop cu nan sirbishi di tempo completo djis pa nan por bai bek na un asina yama bida normal. Mas bien, laga nos anima nan pa sigui cu nan bon trabou!
16. Dicon e Israelitanan den tempo di Moises tawata miho para cu esnan den tempo di Amos?
16 Aunke hopi Israelita tawata disfruta di prosperidad material den e tempo di Amos, nan no tawata “rico pa cu Dios.” (Lucas 12:13-21) Nan antepasadonan tawatin mana so pa come den desierto durante 40 aña largo. Nan no tawatin bankete di toro gorda ni cama di ivor pa drumi y haci cos di floho ariba. Pero cu rason, Moises a bisa nan: “SEÑOR bo Dios a bendiciona bo den tur loke bo a haci. . . . SEÑOR bo Dios tawata cu bo durante e cuarenta añanan aki; bo no tawatin falta di nada.” (Deuteronomio 2:7) Si, e Israelitanan den desierto semper tawatin e cosnan cu di berdad nan tawatin mester. Y loke ta mas importante, nan tawatin Dios su amor, proteccion y bendicion!
17. Dicon Yehova a hiba e prome Israelitanan na e Tera Priminti?
17 Yehova a recorda e hendenan den tempo di Amos cu t’e a trece nan antepasadonan den e Tera Priminti y a yuda nan core cu tur nan enemigonan for di e pais. (Amos 2:9, 10) Pero pakico Dios a saca e prome Israelitanan ei for di Egipto y hiba nan na e Tera Priminti? Tawata pa nan por a hiba un bida di banidad y luho, y rechasa nan Creador? No! Mas bien, el a haci esei pa nan por a ador’e como un pueblo liber y spiritualmente limpi. Pero e habitantenan di e reino di dies tribu di Israel no a odia loke ta malo y stima loke ta bon. Na luga di esei, nan tawata duna gloria na imagennan graba, no na Yehova Dios. Esta un berguensa!
Yehova Ta Regla Cuenta cu Israel
18. Pakico Yehova a libra nos spiritualmente?
18 Dios no tawata bai pasa por halto di e comportacion bergonsoso di e Israelitanan. El a mustra nan bon cla kico ta su posicion, bisando: “Lo mi castiga boso pa tur boso inikidadnan.” (Amos 3:2) E palabranan ei mester pone nos reflexiona riba nos propio liberacion for di sclabitud di e Egipto di tempo moderno, esta, e actual sistema di cosnan malbado. Yehova no a libra nos spiritualmente pa nos bai core tras di metanan egoista. Mas bien, el a libra nos pa nos por dun’e alabansa di curason como un pueblo liber cu ta participa den adoracion puro. Anto nos cada un lo tin cu duna cuenta pa e manera cu nos ta uza e libertad cu Dios a duna nos.—Romanonan 14:12.
19. Segun Amos 4:4 y 5, kico mayoria Israelita tawata stima?
19 Lamentablemente, mayoria habitante di Israel no a haci caso di e mensahe poderoso cu Amos a entrega na nan. E profeta a saca na cla e mal condicion spiritual di nan curason cu e siguiente palabranan cu ta para skirbi na Amos 4:4 y 5: “Drenta Bet-el y transgresa [es, decir, kibra lei]; multiplica transgresion na Gilgal! . . . Pasobra asina boso gusta haci, boso yiunan di Israel.” E Israelitanan no a cultiva deseonan corecto. Nan no a proteha nan curason. Como resultado, mayoria di nan a cuminsa stima loke ta malo y odia loke ta bon. E personanan cabesura ei, adorado di bishe, no a cambia. Yehova lo a regla cuenta cu nan, y nan lo mester muri den nan picanan!
20. Con un persona por sigui un proceder cu ta na harmonia cu Amos 5:4?
20 Lo no tawata facil pa ningun hende cu a biba den Israel e tempo ei pa keda fiel na Yehova. Na moda di papia, ta dificil pa landa contra coriente, es decir, bai contrario na e tendencianan popular, y esei ta algo cu cristiannan djawe, hoben y bieu, ta bon conciente di dje. Pero amor pa Dios y e deseo pa agrad’e a motiva algun Israelita pa practica adoracion berdadero. Yehova a extende na nan e caloroso invitacion cu nos ta haya na Amos 5:4: “Busca mi pa boso por biba.” Awe tambe Dios ta mustra misericordia na hende cu repenti y cu ta busc’e door di gana conocemento exacto di su Palabra y despues ta haci su boluntad. No ta facil pa sigui e proceder aki, pero haciendo esei lo hiba na bida eterno.—Huan 17:3.
Prosperidad Apesar Cu Ta Reina Hamber Spiritual
21. Ki sorto di hamber ta afecta hende cu no ta practica adoracion berdadero?
21 Kico tawata spera esnan cu no a apoya adoracion berdadero? E hamber di mas malo cu tin—hamber spiritual! “Mira, dianan ta bin”, Señor Soberano Yehova a bisa, “cu lo mi manda hamber riba e tera; no hamber pa pan ni sed pa awa, ma mas bien pa tende e palabranan di [Yehova].” (Amos 8:11) Cristiandad ta sufriendo di un hamber spiritual asina. Pero esnan di curason honrado den cristiandad por mira e prosperidad spiritual di e pueblo di Dios y nan ta basha bin na Yehova su organisacion. E contraste entre e situacion den cristiandad y e situacion cu ta reina serca cristiannan berdadero a keda aptamente expresa den e palabranan aki di Yehova: “Mira, mi sirbidonan lo come, ma boso lo pasa hamber. Mira, mi sirbidonan lo bebe, ma boso lo tin sed. Mira, mi sirbidonan lo regociha, ma boso lo wordo brongosa.”—Isaias 65:13.
22. Dicon nos tin motibo pa alegra?
22 Acaso nos, como sirbido di Yehova, ta aprecia personalmente loke nos tin den sentido di percuracionnan y bendicionnan spiritual? Si, ora nos ta studia Bijbel y publicacionnan cristian y ta asisti na nos reunionnan, asambleanan y congresonan, nos ta echt sinti gana di grita di goso pa motibo di e bon condicion di nos curason. Nos ta hopi contento cu nos tin un bon comprondemento di e Palabra di Dios, incluso di e profecia inspira di Amos.
23. Kico esnan cu duna gloria na Dios ta disfruta di dje?
23 Pa tur hende cu ta stima Dios y cu kier dun’e gloria, e profecia di Amos ta contene un mensahe di speransa. Sin importa den ki situacion economico nos ta actualmente of ki pruebanan nos tin cu confronta den e mundo yen di problema aki, nos cu ta stima Dios ta gosa di bendicionnan dibino y di e miho alimento spiritual. (Proverbionan 10:22; Mateo 24:45-47) Tur gloria ta bai anto pa Dios, kende ta percura tur cos na abundancia pa nos beneficio. Pesei laga nos ta dicidido pa dun’e nos alabansa sinsero pa semper. Y esei lo ta nos privilegio gososo si nos busca Yehova, Esun cu ta examina curason.
Con Lo Bo Contesta?
• Ki situacionnan a existi na Israel den tempo di Amos?
• Ki similaridadnan tin entre e situacion djawe cu esun den e reino di dies tribu di Israel?
• Ki sorto di hamber cu a ser profetisa ta reina awor, pero ken e no ta afecta?
[Preguntanan di Estudio]
[Plachinan na pagina 21]
Hopi Israelita a biba den luho pero nan no tawatin prosperidad spiritual
[Plachi na pagina 23]
Anima sirbidonan di tempo completo pa sigui cu nan bon trabou
[Plachinan na pagina 25]
No tin hamber spiritual den Yehova su pueblo felis