Con Largo Hende Por Biba?

DIA 3 di maart 1513, e explorado Spaño Juan Ponce de León a cuminsa un expedicion remarcabel. El a hisa bela bai for di Puerto Rico cu e speransa di yega na e isla di Bimini. Segun leyenda, e tawata en busca di un fuente di awa milagroso—e Fuente di Hubentud. Pero el a bin resulta na loke awe ta conoci como e estado di Florida, Merca. Claro cu nunca e no a haya e fuente di awa, pasobra simplemente e no ta existi.

Awe, por lo general hende no ta biba mucho mas cu 70 of 80 aña. Aunke Bijbel ta papia di hende cu a biba hopi mas largo, e Guinness Book of World Records di aña 2002 ta bisa cu e persona cu a yega di alcansa e edad di mas halto a biba 122 aña y 164 dia. (Genesis 5:3-32) Sinembargo, e specialista den bio-etica, John Harris, a bisa: “Investigacion resien ta permiti nos tira un bista den un mundo den cua biramento bieu—y asta morto—kisas lo no ta inevitabel mas.” Varios investigado di siglo 21 ta bisa cu hende lo ta “practicamente inmortal”, cu “pa aña 2099 duracion di bida di e ser humano lo no tin limite”, cu “e capasidad t’ei pa celnan sigui multiplica pa semper”, y cosnan por estilo.

Mark Benecke ta remarca den su buki The Dream of Eternal Life (E Soño di Bida Eterno): “Casi henter e curpa ta ser renoba varios biaha durante bida. . . . Despues di mas o menos shete aña, nos ta un hende nobo den e sentido di mas completo di palabra.” Ma esaki no ta sigui pa tempo indefini pasobra despues di un par di biaha predetermina cu e celnan a dividi, nan ta stop di multiplica nan mes. Pero Benecke ta bisa cu si esaki no tawata e caso, “e curpa humano lo por a renoba su mes pa un tempo hopi largo—asta pa semper.”

Considera tambe e capasidad asombroso di e celebro humano, locual ta hopi mas grandi cu loke nos por uza durante nos bida relativamente cortico. Segun Encyclopædia  Britannica, e celebro humano “ta dota cu un potencial considerablemente mas grandi cu loke un persona por utilisa den su bida.” (Edicion di 1976, Volumen 12, pagina 998) E buki How the Brain Learns (Con e Celebro Ta Siña) di David A. Sousa ta bisa: “Practicamente, e capasidad di e celebro pa warda informacion ta sin limite.”—Pagina 78, Di Dos Edicion, derecho di autor 2001.

Dicon investigadonan no por haya den nos composicion di curpa e motibo pakico nos ta bira bieu y muri? Y pakico e celebro humano tin un capasidad asina enorme? Ta existi e posibilidad cu nos a ser diseña pa sigui gana conocemento pa semper? Ki mishi nos ta imagina nos mes un bida eterno?

Bijbel ta declara: “[Dios] a pone eternidad den nan curason, sin cu hende por haya sa e trabou cu Dios a haci for di principio te na fin.” (Eclesiastes 3:11) E palabranan aki ta indica cu Dios a hinca den nos e idea di biba pa semper. Es mas, semper nos lo tin algo cu nos por siña tocante Dios y su obranan. Si nos biba pa miyones y miyones di aña—si, pa eternidad—semper nos lo por siña mas di e maraviyanan di Dios su creacion.

E palabranan di Hesucristo tambe ta mustra cu hende por biba pa semper. El a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Kico di abo? Bo kier biba pa semper?

[Plachinan na pagina 3]

Juan Ponce de León a busca un fuente di hubentud

[Reconocemento]

Ponce de León: Harper’s Encyclopædia of United States History