Pregunta di Lector

Unda e demoñonan lo ta durante Cristo su Reinado di Mil Aña?

Bijbel no ta duna un contesta spesifico riba e pregunta aki. Pero toch nos por yega na un conclusion logico tocante unda e demoñonan lo ta durante Cristo su Reinado di Mil Aña.

Ora apostel Huan tawata duna un bista adelanta di loke lo tuma luga na principio y fin di e Reino di Mil Aña aki, el a declara: “Mi a mira un angel ta baha for di shelo cu e yabi di e abismo y un cadena grandi den su man. Y el a gara e dragon, e colebra di antiguedad, kende ta Diabel y Satanas, y a mar’e pa mil aña, y a tir’e den e abismo, y a sera y seya esaki over di dje, pa e no gaña e nacionnan mas, te ora cu e mil añanan a keda cumpli; despues di e cosnan aki e mester wordo gelos pa un tempo cortico.” (Revelacion 20:1-3) E versiculonan aki ta menciona solamente e tiramento di Satanas den abismo y cu despues lo los e pa un tempo cortico. Aunke Huan no ta haci mencion di e demoñonan, ta parce rasonabel cu ora e angel cu e yabi di abismo—Hesucristo glorifica—ta gara Diabel y ser’e den abismo, lo e haci esei cu e demoñonan tambe.—Revelacion 9:11.

Ora cu Hesucristo a bira Rei den shelo na aña 1914, el a dal un paso cu tawatin un efecto profundo tanto riba Satanas como e demoñonan. Revelacion 12:7-9 ta bisa: “Tawatin guera den shelo, Miguel y su angelnan tawata haci guera contra e dragon. Y e dragon y su angelnan [e demoñonan] tawata haci guera, y nan no a prevalece, y no tawatin luga mas pa nan den shelo. Y e gran dragon a wordo tira abou, e colebra di antiguedad, kende ta wordo yama Diabel y Satanas, kende ta gaña henter mundo; el a wordo tira abou riba tera, y su angelnan a wordo tira abou hunto cu ne.” For di e tempo ei en adelante, Satanas y su demoñonan a keda restringi na e bicindario di tera. Logicamente nos por asumi cu na momento cu Hesucristo bai limita e actividad di Satanas mas ainda pa asina libra tera di su influencia malbado, lo E haci esei cu e demoñonan tambe.

Considera tambe e prome profecia di Bijbel. E ta bisa: “Lo mi [Dios] pone enemistad entre abo [Satanas] y e mohe [Yehova su organisacion celestial], y entre bo simiña [di Satanas] y su simiña [Hesucristo]; e lo herida bo cabes, y abo lo herida su hilchi di pia.” (Genesis 3:15) E causamento di herida na cabes di e colebra ta encera e seramento di Satanas den abismo durante Cristo su Reinado di Mil Aña. Ademas, e profecia ta bisa cu lo tin enemistad entre Esun cu ta causa e herida y e simiña di Satanas. E simiña aki, of organisacion, ta inclui un parti invisibel cu ta consisti di e angelnan malbado, esta, e demoñonan. Pesei ta rasonabel pa conclui anto cu ora Hesus tira Satanas den e abismo, e ta mara y tira e demoñonan tambe den e abismo. E echo cu e spiritonan malbado ei a mustra cu nan tin hopi miedo di e abismo ta indica cu nan ta conciente di e benidero restriccion aki.—Lucas 8:31.

 Pero, ta posibel cu Revelacion 20:1-3 no ta haci mencion di e demoñonan pasobra nan a ser destrui na Armagedon hunto cu e parti visibel di e simiña di Satanas? Bijbel ta mustra cu probablemente esaki lo no ta e caso. Bijbel ta declara tocante Satanas su destino final: “Y Diabel, kende a gaña nan, a wordo tira den e lago di candela y suafel, caminda e bestia y e profeta falso tambe ta; y nan lo wordo tormenta di dia y anochi pa semper y semper.” (Revelacion 20:10) E bestia y e profeta falso ta entidadnan politico y nan ta forma parti di Satanas su organisacion visibel. (Revelacion 13:1, 2, 11-14; 16:13, 14) Nan ta ser destrui na Armagedon, ora cu e Reino di Dios garna y pone un fin na tur e reinonan di mundo. (Daniel 2:44) Bijbel ta referi na “e candela eterno cu a wordo prepara pa Diabel y su angelnan.” (Mateo 25:41) Lo tira Satanas y su demoñonan den e mesun “lago di candela y suafel” cu e bestia y e profeta falso, locual ta nifica cu nan tambe lo ser destrui pa semper. Si tawata asina cu e spiritonan invisibel, e parti mas poderoso di e simiña di Satanas, a ser destrui na Armagedon, anto Bijbel sigur lo a menciona cu e demoñonan ta den e lago simbolico ei caba hunto cu e bestia y e profeta falso. E echo cu Revelacion 20:10 no ta haci mencion di nan ta indica cu e demoñonan no ta ser destrui na Armagedon.

Pero como cu Bijbel no ta bisa spesificamente cu e demoñonan ta ser tira den e abismo, tampoco e ta bisa spesificamente cu nan ta ser saca for di dje. Sinembargo, nan tin mesun destino cu Diabel. Despues cu e demoñonan sali for di e abismo hunto cu Diabel y coopera cu ne durante e prueba final cu lo bin riba humanidad na fin di e mil aña, nan tambe lo ser tira den e lago di candela y asina nan lo experencia destruccion eterno.—Revelacion 20:7-9.

Pues anto, maske Revelacion 20:1-3 ta papia solamente di e echo cu ta Satanas ta ser gara y tira den e abismo di inactividad, nos por conclui logicamente cu lo mara y tira su angelnan tambe den e abismo. Dios lo no permiti Satanas ni su demoñonan interferi cu e cumplimento di su proposito di transforma e tera den un paradijs y restaura humanidad na perfeccion durante Cristo su Reinado di Mil Aña.