Cana den e Caminda di Integridad

“Ma pa loke t’ami, lo mi cana den mi integridad.”—SALMO 26:11.

1, 2. (a) Dicon hende su integridad ta un parti importante di e cuestion di Dios su soberania? (b) Con criaturanan inteligente por demostra cu nan ta apoya Yehova su soberania?

ORA Satanas a rebela den e hofi di Eden, el a lanta e cuestion universal di Dios su soberania, esta, si Dios tin derecho di goberna riba tur Su criaturanan. Poco tempo despues, Satanas a pretende cu hende lo a sirbi Dios tanten cu esei a cumbini nan. (Job 1:9-11; 2:4) Pues, hende su integridad a bira un parti importante di e cuestion di Yehova su soberania universal.

² Maske ta asina cu Dios su soberania no ta depende di e integridad di su criaturanan, hende y yiunan spiritual di Dios por demostra na ki banda di e cuestion aki nan ta para. Con? Door di scohe pa sigui un bida di integridad of no. Pues anto, un base solido pa por husga un persona ta su integridad.

3. (a) Kico Job y David tawata kier pa Yehova examina y husga? (b) Ki preguntanan tocante integridad ta lanta?

³ Job a bisa cu confiansa: “Laga [Yehova] pisa mi cu balansa exacto, y laga Dios conoce mi integridad.” (Job 31:6) Rei David di antiguo Israel a pidi Yehova examina su integridad ora el a resa: “Vindica mi [of, “husga mi”, NW], o SEÑOR, pasobra mi a cana den mi integridad; y mi a confia den SEÑOR sin titubia.” (Salmo 26:1) Ta masha importante anto pa nos tambe cana den e caminda di integridad! Pero kico ta integridad, y kico kiermen cana den su caminda? Kico lo yuda nos keda riba e caminda di integridad?

“Mi A Cana den Mi Integridad”

4. Kico ta integridad?

⁴ Integridad ta nifica ser integro of recto, sin culpa, husto y intachabel. Sinembargo, integridad ta encera mas cu djis haci loke ta corecto. E ta puresa moral of sintimento di pleno debocion na Dios den bo curason. Satanas a cuestiona Job su motivacion ora el a bisa Dios: “Saca bo man awor y mishi cu [Job] su weso y cu su carni; e lo maldiciona bo den bo cara.” (Job 2:5) Pues, fuera di e accion corecto, integridad ta rekeri e motivacion corecto di curason.

5. Kico ta mustra cu pa warda integridad nos no mester ta perfecto?

⁵ Sinembargo, pa warda integridad un hende no mester ta perfecto. Rei David tawata imperfecto y el a comete varios eror grave durante su bida. Toch Bijbel ta papia di dje como un homber cu a cana “den integridad di curason.” (1 Reinan 9:4) Dicon? Pasobra David a stima Yehova. Su curason tawata deboto na Dios. Di buena gana el a reconoce su erornan, acepta reprendemento y corigi su caminda. En berdad nos por mira David su integridad den su amor y debocion di henter su curason pa su Dios, Yehova.—Deuteronomio 6:5, 6.

6, 7. Kico cana den integridad ta encera?

⁶ Integridad no ta limita na un cierto aspecto di comportacion humano, manera por ehempel debocion religioso. E ta abarca henter nos manera di biba. David “a cana” den su integridad. Segun The New Interpreter’s Bible, “e verbo ‘cana’ ta transmiti e idea di un hende su ‘manera di biba’ of ‘estilo di bida.’”  Papiando di personanan cu “nan caminda ta sin mancha”, e salmista a canta: “Bendiciona ta esnan cu ta warda [Dios] su testimonionan, cu ta busc’e cu henter nan curason; tampoco nan no ta haci inhusticia; nan ta cana den su camindanan.” (Salmo 119:1-3) Pa nos ta integro, constantemente nos mester sigui haci Dios su boluntad y cana den su caminda.

⁷ Cana den integridad ta rekeri fiel debocion na Dios, asta den circunstancianan desfaborabel. Nos integridad ta bira bisto ora nos ta soporta prueba, ta keda firme apesar di contratiempo of ta resisti tentacion for di e mundo malbado. Nos ta ‘haci Yehova su curason contento’ pasobra e por contesta esun cu ta reproch’e. (Proverbionan 27:11) Cu bon motibo anto nos por tin e mesun determinacion cu Job: “Te na mi morto lo mi no bandona mi integridad”! (Job 27:5) Salmo 26 ta mustra kico lo yuda nos cana den integridad.

“Refina Mi Niernan y Mi Curason”

8. Kico bo ta siña for di David su suplica pa Yehova samina su niernan y su curason?

⁸ David a pidi den oracion: “Scudriña mi, o SEÑOR, y pone mi na prueba; samina mi mente [“refina mi niernan”, NW ] y mi curason.” (Salmo 26:2) Niernan ta te paden aya di e curpa. Den sentido figurativo, niernan ta representa un persona su pensamento- y emocionnan di mas profundo. Y curason ta representa henter e persona interno, su motivacion, sintimentonan y intelecto. Ora David a pidi Yehova samin’e, e tawata kier pa Yehova analisa y scudriña su pensamento- y sintimentonan di mas intimo.

9. Den ki manera Yehova ta refina nos niernan y curason?

⁹ David a suplica Dios pa refina su niernan y su curason. Con Yehova ta refina e persona cu nos ta di paden? David a canta: “Lo mi bendiciona SEÑOR, kende a duna mi conseho; tambe mi curason [“niernan”, NW] ta instrui mi den oranan di anochi.” (Salmo 16:7) Kico esaki ta nifica? E ta nifica cu Dios su conseho a yega te den e partinan mas profundo di David y a keda einan, corigiendo su pensamento- y emocionnan di mas intimo. Esei tambe por sosode den nos caso si nos reflexiona cu gratitud riba e conseho cu nos ta ricibi mediante Dios su Palabra, su representantenan y su organisacion, y permiti e conseho ei keda profundo den nos. Pidiendo Yehova cu regularidad den oracion pa refina nos den e manera aki lo yuda nos cana den integridad.

‘Bo Misericordia Ta Mi Dilanti’

10. Kico a yuda David cana den Dios su berdad?

¹⁰ David a continua: “Bo misericordia ta dilanti  di mi wowo, y mi a cana den bo berdad.” (Salmo 26:3) David tawata bon na haltura di Dios su obranan di misericordia, y cu aprecio el a medita riba nan. El a canta: “Bendiciona SEÑOR, o mi alma, y no lubida ni un di su beneficionan [of, “echonan”, NW].” Cordando riba un di Dios su “echonan”, David a sigui bisa: “SEÑOR ta haci husticia y huicio pa tur esnan cu ta wordo oprimi. El a haci su camindanan conoci na Moises, su echonan na e yiunan di Israel.” (Salmo 103:2, 6, 7) Kisas David tawata pensa riba e manera cu e Egipcionan a oprimi e Israelitanan den tempo di Moises. Si ta asina, David su curason probablemente a keda conmovi ora cu el a reflexiona riba e manera cu Yehova a duna di conoce na Moises con e ta bai libra nan, y esaki a fortalece David su determinacion pa cana den Dios su berdad.

11. Kico por yuda nos cana den e caminda di integridad?

¹¹ Studia e Palabra di Dios cu regularidad y medita riba loke nos ta siña for di dje lo yuda nos tambe cana den e caminda di integridad. Por ehempel, ora nos ta corda cu Yosef a hui for di e proposicionnan inmoral di e casa di Potifar, esei siguramente lo anima nos pa hui for di proposicionnan similar cu nos ta haya na trabou, scol of otro caminda. (Genesis 39:7-12) Kico si nos ta ser tenta door di oportunidadnan pa haya prosperidad material of prominencia y poder den mundo? Wel, nos por medita riba e ehempel di Moises, kende a rechasa e glorianan di Egipto. (Hebreonan 11:24-26) Si nos tene na mente e perseverancia di Job, esei indudablemente lo yuda nos bira mas determina pa keda fiel na Yehova apesar di malesa of calamidad. (Santiago 5:11) Kico si nos haya nos cu persecucion? Wel, cordando riba Daniel su experencia den e cueba di leon lo yena nos cu curashi!—Daniel 6:16-22.

“Mi No Ta Sinta Hunto cu Hombernan Gañado”

12, 13. Ki clase di asociacion nos tin cu evita?

¹² Referiendo na un otro factor mas cu a fortifica su integridad, David a bisa: “Mi no ta sinta hunto cu hombernan gañado, tampoco lo mi no anda cu hipocritanan. Mi ta odia e asamblea di hacidonan di maldad, y lo mi no sinta hunto cu e malbadonan.” (Salmo 26:4, 5) David a nenga redondamente di sinta cu e malbadonan. E tawata odia mal asociacion.

¹³ Ke tal di nos? Nos ta nenga di sinta cu hombernan gañado via programa di  television, video, pelicula, Internet of otro medionan? Nos ta keda leu for di hende hipocrita, hende cu ta sconde ken nan ta? Tin hende na scol of na nos trabou cu kisas ta fingi di ta nos amigo pa propositonan tramposo. Di berdad nos kier tin amistad pega cu hende cu no ta cana den Dios su berdad? Apostatanan tambe por pretende di ta sinsero, mientras cu nan ta sconde nan berdadero intencion di kita nos di sirbi Yehova. Kico si tin personanan den e congregacion cristian cu ta hiba un bida dobel? Nan tambe ta purba sconde ken nan ta realmente. Jayson, kende awor ta sirbi como sirbido ministerial, tawatin amigonan asina den su hubentud. El a bisa di nan: “Un dia un di nan a bisa mi: ‘No ta importa kico nos ta haci awor pasobra ora e sistema nobo yega, gewoon nos lo ta morto. Nos lo no sa mes cu nos a perde algo.’ E cos ei cu el a bisa a manera lanta mi for di soño. Mi no kier ta morto ora e sistema nobo yega.” Jayson a haci cos di sabi y a stop di asocia cu personanan asina. Apostel Pablo a spierta: “No laga hende gaña boso: ‘Mal compania ta daña bon custumber.’” (1 Corintionan 15:33) Pues, ta masha importante pa nos evita mal asociacion!

‘Lo Mi Declara Tur Bo Maraviyanan’

14, 15. Con nos por ‘atende Yehova su altar’?

¹⁴ David a sigui bisa: “Lo mi laba mi man den inocencia, y lo mi atende bo altar, o SEÑOR.” Dicon? “Pa mi proclama cu bos di gradicimento y declara tur bo maraviyanan.” (Salmo 26:6, 7) David kier a keda moralmente limpi pa asina e por a adora Yehova y proclama su debocion na Dios.

¹⁵ Tur cos relaciona cu adoracion berdadero na e tabernakel y despues na e tempel tawata “un copia y sombra di e cosnan celestial.” (Hebreonan 8:5; 9:23) E altar a representa Yehova su boluntad pa acepta e sacrificio di Hesucristo pa salbacion di humanidad. (Hebreonan 10:5-10) Nos ta laba nos mannan den inocencia y ‘atende Yehova su altar’ door di eherce fe den e sacrificio ei.—Huan 3:16-18.

16. Con nos ta beneficia ora nos ta declara Dios su obranan maraviyoso na otro hende?

¹⁶ Ora nos pensa riba tur loke e rescate ta haci posibel, nos curason no ta yena cu gratitud pa Yehova y pa su Yiu unigenito? Pues anto, cu gradicimento den nos curason laga nos informa otro hende di Dios su obranan maraviyoso, cuminsando for di e creacion di hende den e hofi di Eden te na e restauracion completo di tur cos den Dios su mundo nobo. (Genesis 2:7; Echonan 3:21) Y definitivamente e trabou di predica e Reino y haci disipel ta un gran proteccion spiritual pa nos. (Mateo 24:14; 28:19, 20) Door di ta ocupa den e trabou ei, nos speransa pa futuro ta keda briyante, nos fe den e promesanan di Dios ta keda fuerte y nos amor pa Yehova y pa hende ta keda bibo.

“Mi Ta Stima e Cas Caminda Bo Ta Biba”

17, 18. Ki actitud nos mester tin pa cu reunionnan cristian?

¹⁷ E tabernakel, cu su altar pa ofrece sacrificio, tawata e centro di Yehova su adoracion na Israel. David a expresa den oracion su placer den e luga ei cu e palabranan: “O SEÑOR, mi ta stima e cas caminda bo ta biba y e luga caminda bo gloria ta keda.”—Salmo 26:8.

¹⁸ Nos tambe stima reuni na luganan caminda nos ta siña tocante Yehova? Tur Salon di Reino cu nan programa continuo di instruccion spiritual ta fungi como centro di adoracion berdadero den comunidad. Ademas, tur aña nos tin nos congresonan, asambleanan di sircuito y dianan special di asamblea. Na e reunionnan ei, nos ta considera Yehova su “testimonionan” of recordatorionan. Si nos siña “stima nan masha hopi mes”, nos lo ta ansioso pa asisti na reunion y nos lo paga bon tino ora nos ta presente. (Salmo 119:167) Ta masha refrescante ora nos ta  den compania di rumannan den fe cu ta interesa den nos bienestar personal y cu ta yuda nos sigui cana den e caminda di integridad.—Hebreonan 10:24, 25.

‘No Tuma Mi Bida’

19. David no kier tawata culpabel di cua pica?

¹⁹ Como cu David tawata bon conciente di e consecuencianan di desvia for di Dios su berdad, el a roga: “No tuma mi alma hunto cu pecadonan, ni mi bida hunto cu hombernan cu ta drama sanger, den kende nan man tin plan di maldad [of, “conducta desenfrena”, NW], y nan man drechi ta yen di placa pasa bou di mesa.” (Salmo 26:9, 10) David no tawata kier ser conta hunto cu hende malbado culpabel di conducta desenfrena of soborno.

20, 21. Kico por hiba nos den e caminda di e malbadonan?

²⁰ Den e mundo djawe tin un avalancha di practicanan inmoral. Television, revistanan y peliculanan ta promove conducta desenfrena, “sensualidad.” (Galationan 5:19) Tin hende a bira adicto na pornografia, locual hopi bes ta hiba na conducta inmoral. Vooral hobennan tin mas chens di ser afecta door di tal influencia. Den algun pais, ta un custumber pa dos hende di sexo opuesto traha cita pa sali cu otro, y teenagernan ta ser presiona pa pensa cu nan tambe mester haci esei. Hopi hoben ta busca relacionnan romantico, maske nan ta mucho jong pa casa. Y pa satisface e deseonan sexual cu ta acumula den nan, no ta dura mucho cu nan ta haya nan den conducta inmoral cu ta hiba na fornicacion.

²¹ Adultonan di ningun manera no ta immuun pa mal influencia. Practicanan deshonesto den negoshi y e tendencia di tuma decision a base di motibonan egoista ta indica falta di integridad. Cana den e camindanan di mundo lo solamente distancia nos for di Yehova. Laga nos “odia maldad [y] stima bondad” y sigui cana den e caminda di integridad.—Amos 5:15.

 “Redimi Mi y Tene Misericordia di Mi”

22-24. (a) Ki animacion bo ta haya den e palabranan final di Salmo 26? (b) Ki trampa nos lo analisa den e siguiente articulo?

²² David a conclui su palabranan na Dios, bisando: “Ma pa loke t’ami, lo mi cana den mi integridad; redimi mi y tene misericordia di mi. Mi pia ta para riba un luga lizo; den e congregacionnan lo mi bendiciona SEÑOR.” (Salmo 26:11, 12) David su determinacion pa warda su integridad ta estrechamente liga cu su suplica pa ser redimi of libra. Esta un gran animacion! Apesar di nos condicion pecaminoso, Yehova lo yuda nos si nos ta determina pa cana den e caminda di integridad.

²³ Laga nos manera di biba mustra cu nos ta respeta y aprecia Dios su soberania den tur faseta di nos bida. Nos cada un por pidi Yehova den nos oracionnan pa samina y refina nos pensamento- y sintimentonan di mas intimo. Nos por tene su berdad constantemente nos dilanti door di studia su Palabra diligentemente. Anto di tur manera, laga nos evita mal asociacion y mas bien bendiciona Yehova den congregacion. Participa tambe cu entusiasmo den e trabou di predica e Reino y haci disipel, y nunca no laga mundo pone nos relacion precioso cu Yehova na peliger. Segun cu nos ta haci nos best pa cana den e caminda di integridad, nos por tin confiansa cu Yehova lo mustra nos misericordia y fabor.

²⁴ Ya cu integridad ta encera tur aspecto di bida, nos mester ta conciente di un trampa mortal—mal uzo di alcohol. Den e siguiente articulo nos lo trata esaki.

Bo Ta Corda?

• Dicon corectamente por husga criaturanan inteligente a base di nan integridad?

• Kico ta integridad, y kico cana den e caminda di integridad ta encera?

• Kico lo yuda nos cana den e caminda di integridad?

• Pa warda integridad, cua peligernan nos mester ta conciente di dje y evita?

[Preguntanan di Estudio]

[Plachi na pagina 14]

Bo ta pidi Yehova regularmente pa samina bo pensamentonan di mas intimo?

[Plachi na pagina 14]

Bo ta tene Yehova su echonan di misericordia dilanti di bo wowo?

[Plachi na pagina 15]

Ora nos warda integridad bou di prueba, nos ta haci Yehova su curason contento

[Plachinan na pagina 17]

Bo ta haci bon uzo di Yehova su percuracionnan pa yuda bo cana den e caminda di integridad?