Con Bo Ta Dicidi Loke Ta Bon y Loke Ta Malo?

KEN tin e autoridad pa fiha e normanan di loke ta bon y loke ta malo? E pregunta ei a lanta for di cuminsamento di historia humano. Segun e buki biblico di Genesis, Dios a nombra un palo cu tawata creciendo den e hofi di Eden como “e palo di conocemento di bon y malo.” (Genesis 2:9) El a prohibi e prome pareha humano di come e fruta di e palo aki. Sinembargo, e enemigo di Dios, Satanas e Diabel, a insinua cu si nan a come for di e palo aki, nan wowo lo a “habri” y nan lo a bira “manera Dios, conociendo bon y malo.”—Genesis 2:16, 17; 3:1, 5; Revelacion 12:9.

Kico Adam cu Eva mester a haci? Acepta e normanan di Dios di loke ta bon y malo of sigui nan mes normanan? (Genesis 3:6) Nan a opta pa desobedece Dios y come di e palo. Kico nan a duna di conoce  cu e acto simpel aki? Door di nenga di respeta e limitenan cu Dios a pone pa nan, nan a pretende cu si nan fiha nan mes normanan di bon y malo, cos lo bai miho cu nan y nan yiunan. Cuanto exito humanidad tawatin den nan intento pa actua manera Dios, fihando nan mes normanan?

E Opinionnan Ta Varia

Despues di un analisis di e doctrinanan di filosofonan prominente di pasado, Encyclopædia Britannica ta declara cu for di tempo di e filosofo Griego Socrates te cu siglo 20, tawatin “hopi debate riba kico exactamente ta bondad y kico e norma di bon y malo lo por ta.”

Por ehempel, e sofistanan tawata un grupo prominente di maestro Griego den siglo 5 prome cu nos era. Nan a haya cu ta opinion di e mayoria mester determina loke ta e normanan di bon y malo. Un di e maestronan ei a bisa: “Tur loke ta parce husto y aceptabel pa un stad, ta husto y aceptabel pa e stad ei, tanten cu ta reina e pensamento cu ta asina mester ta.” Segun e norma aki, Jodie (menciona den e articulo anterior) lo mester a keda cu e placa ya cu mayoria hende den su comunidad, of “stad”, probablemente lo a haci mescos.

Immanuel Kant, un filosofo renombra di siglo 18, a bini cu un otro punto di bista. E revista Issues in Ethics ta bisa: “Immanuel Kant y otro hende mescos cu ne . . . a enfoca riba e derecho di cada hende pa scohe pa nan mes.” Segun e filosofia di Kant, tanten cu Jodie no trapa e derecho di otro hende, ta keda completamente na dje kico e ta haci. E no mester laga opinion di e mayoria determina su normanan.

Pues con Jodie a resolve su dilema? El a scohe un di tres opcion. El a aplica e siñansa di Hesucristo cu a contene normanan moral cu tanto cristian como no cristian a elogia. Hesus a siña: “Tur loke boso kier pa hende haci pa boso, haci mescos pa nan.” (Mateo 7:12) Pa sorpresa di su cliente, Jodie a entreg’e e 82.000 dollar. Ora a puntra Jodie pakico e no a keda cu e cen, el a splica cu e ta un Testigo di Yehova, y el a bisa: “E placa no tawata di mi.” Jodie a tuma e palabranan di Hesus skirbi den Bijbel na Mateo 19:18 masha na serio: “No horta.”

Opinion di e Mayoria Ta un Guia Confiabel?

Kisas algun hende lo bisa cu Jodie tawata basta kens pa ta asina honesto. Pero opinion di e mayoria no ta un guia confiabel. Por ehempel, si bo ta biba den un comunidad caminda mayoria hende ta haya cu sacrificio di mucha ta algo gewoon, manera algun sosiedad den pasado tawata pensa, esei lo hustifica e practica? (2 Reinan 16:3) Kico si bo a nace den un sosiedad cu ta mira canibalismo como algo bon? Esei lo nifica cu comemento di carni humano no ta dje malo ei? No ta pasobra un custumber ta popular, e ta bon. Hopi tempo pasa, Bijbel a spierta hende pa e  trampa ei, bisando: “No sigui e mayoria den hacimento di maldad.”—Exodo 23:2.

Hesucristo a mustra un otro motibo pakico nos mester tene cuidou cu adopta un opinion popular como guia di loke ta bon y loke ta malo. El a identifica Satanas como “e prins di e mundo aki.” (Huan 14:30; Lucas 4:6) Satanas ta uza su posicion pa gaña “henter mundo.” (Revelacion 12:9) Pesei, si bo basa bo normanan di bon y malo puramente riba loke ta popular, bo por ta adoptando Satanas su norma di moralidad, y esei sigur lo ta desastroso.

Bo Por Confia Bo Mes Manera di Pensa?

Ta cada hende anto mester dicidi pa su mes loke ta bon y loke ta malo? Bijbel ta bisa: “No depende riba bo mes comprondemento.” (Proverbionan 3:5) Pakico no? Pasobra tur hende a hereda un defecto fundamental cu por stroba nan di pensa sano. Ora Adam cu Eva a rebela contra Dios, nan a adopta e normanan di e traido egoista Satanas y a scohe e como nan tata spiritual. Despues nan a pasa pa nan yiunan un caracteristica tipico di nan famia—un curason traicionero cu tin e capasidad pa reconoce loke ta bon pero cu tin e tendencia di haci loke ta malo.—Genesis 6:5; Romanonan 5:12; 7:21-24.

Den su analisis tocante etica, Encyclopædia Britannica ta remarca: “No ta parce nada straño cu hende sa kico ta nan deber moral pero toch ta haci loke ta na nan propio interes. Un di e problemanan principal di e mundo Occidental ta con pa duna hende asina un motibo pa haci loke ta bon.” Bijbel ta bis’e corectamente den e forma aki: “E curason ta mas engañoso cu tur cos y ta totalmente corupto; ken por comprond’e?” (Yeremias 17:9) Lo bo confia un persona cu ta conoci como un hende engañoso y corupto?

Ta berdad cu asta hende cu no ta kere den Dios tin e capasidad pa comporta nan mes den un manera moralmente recto y desaroya etica of normanan moral cu ta practico y honorabel. Pero hopi bes, e principionan noble tras di esakinan ta djis un refleho di e normanan moral di Bijbel. Aunke kisas e personanan aki no ta kere cu ta existi un Dios, nan ideanan ta demostra cu di naturalesa nan tin e potencial pa refleha e personalidad di Dios. Esaki ta demostra cu manera Bijbel ta revela, hende a ser crea originalmente segun e “imagen di Dios.” (Genesis 1:27; Echonan 17:26-28) Apostel Pablo ta bisa: “Nan ta mustra e obra di lei cu ta skirbi den nan curason.”—Romanonan 2:15.

Naturalmente, ta bon pa bo sa kico ta corecto; pero loke ta conta ta pa bo tin e forsa moral pa haci loke ta corecto. Con bo por haya e fortalesa moral necesario? Ya cu ta bo curason ta motiva bo pa actua, algo cu por yuda bo desaroya e fortalesa ei ta di cultiva un amor pa e Autor di Bijbel, Yehova Dios.—Salmo 25:4, 5.

Con pa Haya e Forsa pa Haci Loke Ta Bon

E prome paso pa siña stima Dios ta pa nos mes mira con rasonabel y practico su mandamentonan ta. Apostel Huan ta bisa: “Esaki ta e amor di Dios, cu nos ta warda su mandamentonan; y su mandamentonan no ta pisa.” (1 Huan 5:3) Por ehempel, Bijbel ta contene conseho practico cu por yuda hobennan distingui bon for di malo ora nan tin cu dicidi si ta sabi pa bebe alcohol, uza droga, of tene relacion sexual prome cu nan casa. Bijbel por yuda parehanan casa discerni con pa resolve desacuerdo, y e por duna mayornan  guia pa lanta yiu. * Ora aplica e normanan moral di Bijbel, esei ta beneficia tanto hoben como bieu, sin importa ki nivel social, scol of cultura nan tin.

Mescos cu alimento nutritivo ta duna bo forsa pa bo traha, lesamento di e Palabra di Dios ta duna bo forsa pa bo biba segun su normanan. Hesus a compara e palabranan di Dios cu pan cu ta sostene bida. (Mateo 4:4) Tambe el a bisa: “Mi cuminda ta pa haci e boluntad di esun cu a manda mi.” (Huan 4:34) Hesus a alimenta su mes cu e palabra di Dios y esei a yud’e resisti tentacion y tuma decision sabi.—Lucas 4:1-13.

Na principio kisas bo ta haya ta dificil pa alimenta bo mente cu e Palabra di Dios y adopta su normanan. Pero corda cu tempo bo tawata chikito, podise bo no tawata gusta e smak di cuminda cu tawata bon pa bo. Pa crece bira fuerte, bo tawatin cu siña disfruta di tal alimento saludabel. Mescos tambe, por tuma tempo pa bo haya un smak pa e normanan di Dios. Si bo persisti, lo bo bin stima nan y bira spiritualmente fuerte. (Salmo 34:8; 2 Timoteo 3:15-17) Lo bo siña confia den Yehova y ser motiva pa “haci loke ta bon.”—Salmo 37:3.

Kisas nunca lo bo no haya bo den un situacion manera esun di Jodie. No obstante, tur dia bo ta tuma decision moral, sea chikito of grandi. Pesei Bijbel ta urgi bo: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” (Proverbionan 3:5, 6) Confiansa den Yehova no solamente lo beneficia bo awor sino tambe lo e duna bo e oportunidad di biba pa semper, pasobra e caminda di obediencia na Yehova Dios ta hiba na bida.—Mateo 7:13, 14.

[Nota]

[Comentario na pagina 6]

Opinion di e mayoria por ta bou di influencia di forsanan invisibel

[Plachinan na pagina 5]

Atrabes di historia, filosofonan a debati e cuestion di kico ta bon y kico ta malo

SOCRATES

KANT

CONFUCIO

[Reconocemento]

Kant: For di e buki The Historian’s History of the World; Socrates: For di e buki A General History for Colleges and High Schools; Confucio: Universidad di Sung Kyun Kwan, Seul, Corea

[Plachinan na pagina 7]

Bijbel no solamente ta yuda nos distingui bon for di malo sino tambe e ta motiva nos pa haci loke ta bon