Kico Bo Tin cu Lesa?—E Conseho Sabi di Salomon

“SKIRBIMENTO di hopi buki ta un cos sin fin, y debocion di mas na buki ta cansamento di curpa.” (Eclesiastes 12:12) Dia Salomon, e Rei sabi di Israel, a skirbi e palabranan ei rond di 3.000 aña pasa, su intencion no tawata pa desanima hende pa lesa. Mas bien, el a mustra riba e necesidad pa ta selectivo. Awe, den un era den cua tur aña ta sali miyones y miyones di pagina imprimi rond mundo cu material pa lesa, e recordatorio ei ta hopi oportuno!

Evidentemente, e ‘hopi bukinan’ na cua Salomon a referi no tawata edificante ni refrescante. Pesei, el a rasona cu un hende cu ta dedica su mes na nan ta ‘cansa su curpa’ sin haya nada positivo y duradero a cambio.

Pero acaso Salomon tawata kiermen cu no tin ni un buki cu ta duna conseho sano y confiabel cu por beneficia e lector? No, no ta esei e kier a bisa, pasobra el a skirbi tambe: “E palabranan di hende sabi ta manera punta di hero, y maestronan di e coleccionnan aki ta manera clabonan bon claba; nan ta duna door di un Wardador.” (Eclesiastes 12:11) Si, tin palabranan skirbi cu ta “manera punta di hero” cu por duna bo un bon motivacion. Nan por stimula bo pa sigui e caminda corecto. Ademas, mescos cu “clabonan bon claba”, nan por yuda fortalece bo determinacion y contribui na bo stabilidad.

Unda bo por haya e tipo di palabranan sabi ei? Segun Salomon, e palabranan di mas sobresaliente ta esnan cu a origina cu e Wardador, Yehova. (Salmo 23:1) Pesei e miho buki cu bo por lesa ta Bijbel, e buki inspira pa Dios. Ora bo lesa e palabranan inspira ei regularmente, nan por yuda bo bira “perfecto [“competente”, NW], ekipa pa tur bon obra.”—2 Timoteo 3:16, 17.