Mantene un Punto di Bista Balansa di Uzo di Alcohol

“Biña ta un hacido di bofon, bebida sterki un borotado; y esun cu ta bou di su influencia no ta sabi.”—PROVERBIONAN 20:1.

1. Con e salmista a expresa su gratitud pa algun di e bon regalonan for di Yehova?

“TUR bon regalo y tur don perfecto ta for di ariba, y ta baha bin for di e Tata di lusnan”, disipel Santiago a skirbi. (Santiago 1:17) Gradicido pa e tantisimo bon regalonan di Dios, e salmista a canta: “E ta haci yerba crece pa bestia, y vegetacion pa hende cultiva, pa asina e por saca pan for di e tera, y biña cu ta haci curason di hende contento, azeta pa haci su cara lombra, y pan cu ta fortalece curason di hende.” (Salmo 104:14, 15) Biña y otro bebida alcoholico, mescos cu vegetacion, pan y azeta, ta regalo excelente for di Dios. Con nos mester uza nan?

2. Cua preguntanan nos lo considera tocante uzo di alcohol?

 ² Un regalo agradabel ta bon solamente si uz’e na e manera corecto. Por ehempel, honing of miel “ta bon”, pero “no ta bon pa come hopi miel.” (Proverbionan 24:13; 25:27) Pues, mientras cu bebemento di “un poco biña” por ta un cos agradabel, exceso di alcohol ta un problema serio. (1 Timoteo 5:23) Bijbel ta spierta: “Biña ta un hacido di bofon, bebida sterki un borotado; y esun cu ta bou di su influencia [of, “cu ta dual debi na dje”, NW] no ta sabi.” (Proverbionan 20:1) Pero kico kiermen dual debi na alcohol? * Ki cantidad di alcohol ta di mas? Kico ta un punto di bista balansa relaciona cu esaki?

Con un Hende Por “Dual” Debi na Alcohol?

3, 4. (a) Kico ta mustra cu Bijbel ta condena bebemento te na e punto di bira burachi? (b) Menciona algun sintoma di buracheria.

³ Den antiguo Israel, un yiu homber cu tawata un haragan golos y un burache cu no a repenti mester a wordo piedra mata. (Deuteronomio 21:18-21) Apostel Pablo a spierta cristiannan: “No asocia cu ningun hende cu ta ruman pa nomber, si e ta un hende inmoral, of golos pa placa, of un adorado di dios falso, of un blasfemado, of un burache, of un estafado—pa ni come mes hunto cu un hende asina.” Pues ta bisto cu e Scritura ta condena bebemento te na e punto di bira burachi.—1 Corintionan 5:11; 6:9, 10.

⁴ Describiendo e sintomanan di buracheria, Bijbel ta declara: “No wak biña ora cu e ta cora, ora cu e ta briya den copa, ora cu e ta baha suave asina; na final e ta morde manera colebra, y ta pica manera vibora. Bo wowonan lo mira cosnan straño, y bo curason lo expresa cosnan perverso.” (Proverbionan 23:31-33) Bebemento di mas ta morde manera un colebra venenoso, y ta causa enfermedad, confusion mental y asta ta manda hende leu. Un burache por mira “cosnan straño” den e sentido cu e por cuminsa halusina of imagina cosnan. Tambe e por bira mas liber den expresa pensamento- y deseonan perverso cu normalmente hende ta domina.

5. Den ki manera exceso di alcohol ta perhudicial?

⁵ Kico si un persona ta uza alcohol pero ta tene cuidou pa e no bebe te na e punto cu hende ta mira cu e ta burachi? Tin persona ta duna masha tiki señal di ta burachi maske nan a dal varios drinks. Sinembargo, pa pensa cu esei no tin nada malo aden ta un forma di gaña bo mes. (Yeremias 17:9) Pocopoco pero sigur un persona por cuminsa depende di alcohol y bira “esclabisa na biña.” (Tito 2:3) Relaciona cu e proceso di bira un alcoholico, autor Caroline Knapp a bisa: “E ta slow, gradual, sutil, dificil pa defini.” Exceso di alcohol ta realmente un trampa mortal!

6. Dicon un hende mester evita di come y bebe di mas?

⁶ Considera tambe e spiertamento di Hesus: “Tene cuidou pa boso curason no ta carga pa causa di paranda y buracheria [of, “comemento di mas y bebemento di mas”, NW] y e precupacionnan di bida, y e dia ei no bin diripiente riba boso manera un trampa; pasobra e lo bin riba tur esnan cu ta biba  riba superficie di henter mundo.” (Lucas 21:34, 35) Un hende no mester a bebe te bira burachi pa e cuminsa sinti su mes groggy y floho tanto den sentido fisico como spiritual. Kico si e dia di Yehova yega y hay’e den tal condicion?

Loke Mal Uzo di Alcohol Por Hiba na Dje

7. Dicon mal uzo di alcohol no ta na harmonia cu e instruccion cu tin na 2 Corintionan 7:1?

⁷ Uzo inmodera di alcohol ta hiba na hopi peliger, tanto fisico como spiritual. Algun di e malesanan causa door di exceso di alcohol ta entre otro, malesa di higra, hepatitis alcoholico y trastornonan di nervio manera agitacion, temblamento y halusinacion. Mal uzo prolonga di alcohol por hiba na cancer, diabetes y algun malesa di curason y di stoma. Ta obvio anto cu mal uzo di alcohol no ta na harmonia cu e instruccion biblico: “Laga nos purifica nos mes di tur impuresa di carni y spirito, y asina perfecciona nos santidad den e temor di Dios.”—2 Corintionan 7:1.

8. Segun Proverbionan 23:20 y 21, mal uzo di alcohol por hiba na kico?

⁸ Mal uzo di alcohol por nifica tambe dispidimento di placa, asta un hende por perde su empleo. Rei Salomon di antiguo Israel a spierta: “No anda cu esnan cu ta gusta dal nan biña, ni cu esnan cu ta golos pa come carni.” Dicon no? “Pasobra e burache y e hende golos lo bira pober, y cabishamento lo haci un hende bisti paña kibra.”—Proverbionan 23:20, 21.

9. Dicon ta sabi pa un persona no bebe alcohol si e tin cu core auto?

⁹ The Encyclopedia of Alcoholism ta señala un otro peliger. E ta bisa: “Estudionan a mustra cu alcohol ta pone un hende su habilidad di core auto bai atras, entre otro, e ta afecta su tempo di reacciona, cordinacion, atencion, alerta visual y sano huicio.” E consecuencianan di core auto bou di influencia di alcohol ta desastroso. Na Merca so, tur aña miles di hende ta muri y rond di mei miyon ta sufri lesion den accidentenan di trafico liga cu alcohol. Esnan mas vulnerable pa e peliger aki ta hobennan, ya cu nan tin menos experencia den coremento di auto y den bebemento. Acaso un hende por core auto despues di a dal varios drinks y na mesun tempo pretende cu e ta respeta bida como un regalo for di Yehova Dios? (Salmo 36:9) En bista di e echo cu bida ta sagrado, ta miho pa ora un persona tin cu core auto e no bebe alcohol mes. *

10. Con alcohol por afecta nos mente, y dicon esei ta peligroso?

¹⁰ Bebemento inmodera ta haci hende daño no solamente den sentido fisico sino tambe spiritual. Bijbel ta declara: “Biña y biña nobo ta kita comprondemento.” (Oseas 4:11) Alcohol ta afecta e mente. Un publicacion di e Instituto Nacional di Uzo di Droga (di Merca) ta splica: “Ora un hende dal un drinks, su circulacion di sanger ta absorba e alcohol via e sistema digestivo y e ta yega rapidamente na e celebro. E ta pone e partinan di e celebro cu ta controla pensamento y emocion cuminsa funciona mas slow. E persona ta sintie menos reserva, mas liber.” Den  tal condicion, tin mas chens cu nos ta “dual”, bira mucho familiar y haya nos cu hopi tentacion.—Proverbionan 20:1, NW.

11, 12. Uzo inmodera di alcohol por resulta den ki daño spiritual?

¹¹ Ademas, Bijbel ta manda: “Sea cu boso ta come of bebe of kico cu boso ta haci, haci tur pa e gloria di Dios.” (1 Corintionan 10:31) Bebemento di gran cantidad di alcohol a yega di trece gloria pa Dios? Un cristian definitivamente lo kier evita di tin e reputacion di ta un hende cu ta bebe pisa. Un reputacion asina lo trece reproche riba Yehova su nomber y no gloria.

¹² Kico si un cristian su falta di moderacion den bebemento ta pone un ruman den fe trompica, kisas un disipel nobo? (Romanonan 14:21) Hesus a spierta: “Ken cu haci un di e chikitonan aki, cu ta kere den mi, trompica, ta miho p’e cu un piedra di molina pisa wordo colga na su garganta, y cu e wordo hoga den profundidad di lama.” (Mateo 18:6) Bebemento di mas por resulta tambe den perdemento di privilegionan den congregacion. (1 Timoteo 3:1-3, 8) Un otro mal consecuencia cu no mester lubida ta e conflicto cu mal uzo di alcohol por causa den famia.

Con Por Evita e Peligernan?

13. Kico ta crucial ora di evita mal uzo di alcohol?

¹³ Un punto clave pa evita e peligernan di exceso di alcohol ta di no djis evita buracheria sino pa pone como nos meta pa no bebe di mas. Ken por determina cuanto alcohol lo ta un cantidad modera pa bo y cuanto lo ta cai bou di bebemento di mas? Como cu esaki ta encera hopi factor, no por tin un regla stricto tocante cuanto drinks ta mucho hopi. Cada persona individualmente mester sa su limite y keda denter di e limite ei. Kico lo yuda bo dicidi cuanto alcohol ta mucho hopi pa bo? Tin un principio cu por sirbi como guia?

14. Ki principio por guia bo pa distingui entre bebe modera y bebe di mas?

¹⁴ Bijbel ta declara: “Retene sabiduria sano y discrecion, asina nan lo ta bida pa bo alma y adorno na bo garganta.” (Proverbionan 3:21, 22) Pues, e principio pa guia nos ta esaki: Cualkier cantidad di alcohol cu ta afecta bo huicio indebidamente y ta mengua bo discrecion of habilidad di pensa, ta mucho hopi pa bo persona. Pero un cos si, bo mester ta honesto cu bo mes ora di reconoce kico ta bo limite personal!

15. Ki ora asta un solo drinks lo por ta di mas?

¹⁵ Den algun situacion, asta un solo drinks por ta di mas. Un hende mohe na estado por dicidi di no bebe mes en bista di e peliger pa e feto. Y lo no ta un bondad pa keda sin bebe den presencia di un persona cu tin problema cu alcoholismo of kende su consenshi no ta aproba bebemento? Tambe Yehova a duna ordo na personanan cu tawata haci tareanan sacerdotal na e tabernakel: “No bebe biña ni bebida sterki . . . ora boso ta bai den e tent di reunion, pa boso no muri.” (Levitico 10:8, 9) Pesei, evita di bebe bebida alcoholico un poco prome cu reunionnan cristian, prome cu sali den sirbishi di veld y ora di atende otro responsabilidadnan spiritual. Ademas, na luganan caminda consumo di alcohol ta prohibi of ta permiti solamente pa hende  riba cierto edad, cristiannan mester mustra debido respet pa e leinan di e pais.—Romanonan 13:1.

16. Con bo mester dicidi kico pa haci ora un hende pone un bebida alcoholico bo dilanti?

¹⁶ Ora un hende ofrece bo un drinks of pon’e bo dilanti, e prome pregunta cu bo tin cu haci ta: ‘Mester mi mester bebe?’ Si bo dicidi di bebe, tene bon cla na mente kico ta bo limite personal, y no surpasa e limite ei. No laga e generosidad di un anfitrion pone bo cambia di idea. Y tene cuidou ora cu tin open bar cu ta sirbi cuanto drinks cu bo kier na ocasionnan manera receptie di casamento. Na hopi luga, lei ta permiti mucha haya acceso na alcohol. Ta responsabilidad di mayornan pa instrui nan yiunan tocante uzo di alcohol y supervisa nan accionnan relaciona cu esaki.—Proverbionan 22:6.

Bo Por Trata cu e Problema

17. Kico por yuda bo saca afo si bo tin un problema of no cu mal uzo di alcohol?

¹⁷ Bo tin un problema cu mal uzo di biña y bebida sterki? Bo por tin sigur cu si mal uzo di alcohol bira un pica secreto, tardi of tempran lo e afecta bo. Pues, haci un examinacion critico y honesto di bo mes. Puntra bo mes: ‘Mi ta bebe cu mas frecuencia cu antes? Mi ta bebe bebida mas sterki cu antes? Mi ta bebe pa scapa di precupacion, stress of problema? Un miembro di famia of un amigo a expresa su precupacion tocante mi bebemento? Mi bebemento a causa problema den mi famia? Ta dificil pa mi pasa un siman, un luna of varios luna sin bebe alcohol? Mi ta sconde pa otro hende e cantidad di biña of bebida sterki cu mi ta bebe?’ Kico si bo a contesta “si” riba algun di e preguntanan aki? Wel, no sea manera un hende cu ‘ta wak su cara natural den spiel y e ta lubida mesora con e ta.’ (Santiago 1:22-24) Dal paso pa corigi e problema. Kico bo por haci?

18, 19. Con bo por stop di uza alcohol na un manera inmodera?

¹⁸ Apostel Pablo a spierta cristiannan: “No bebe biña bira burachi, pasobra esei ta libertinahe, ma sea yena cu e spirito.” (Efesionan 5:18) Dicidi kico ta mucho hopi alcohol pa bo, y fiha limitenan apropiado. Sea determina pa no surpasa nan; eherce dominio propio. (Galationan 5:22, 23) Bo tin amistadnan cu ta pone presion riba bo pa bebe di mas? Tene cuidou. Bijbel ta bisa: “Esun cu anda cu hende sabi lo ta sabi, ma un compañero di hende bobo lo sufri daño.”—Proverbionan 13:20.

¹⁹ Si bo ta uzando alcohol pa scapa di un problema, enfrenta e problema manera mester ta. Nos por trata cu problema door di aplica conseho for di e Palabra di Dios. (Salmo 119:105) No basila pa busca yudansa di un anciano cristian di confiansa. Haci bon uzo di e percuracionnan di Yehova pa edifica bo spiritualidad. Fortalece bo relacion cu Dios. Resa na dje cu regularidad, specialmente tocante bo debilidadnan. Pidi Dios ‘refina bo niernan y bo curason.’ (Salmo 26:2, NW) Manera nos a considera den e articulo anterior, haci bo sumo posibel pa cana den e caminda di integridad.

20. Ki medidanan kisas lo bo tin cu tuma pa vence un problema constante cu bebemento di mas?

²⁰ Kico si e problema di bebemento di mas  ta sigui apesar di bo esfuersonan? E ora ei bo tin cu aplica e conseho di Hesus: “Si bo man haci bo trompica, cort’e kit’afo; miho bo drenta bida mancaron, cu teniendo bo dos mannan bo bai den [“Gehena”, NW].” (Marco 9:43) E contesta ta: No bebe mes. Esei ta loke un señora cu nos lo yama Irene a dicidi firmemente pa haci. El a bisa: “Despues di no a bebe nada di alcohol pa casi dos aña y mei, mi a cuminsa pensa cu podise un drinks so lo no haci nada, djis pa mi wak con mi ta want’e. Pero cada bes cu mi sinti asina, mi ta cuminsa haci oracion na Yehova tocante e asunto. Mi ta dicidido pa no purba ni un bebida alcoholico mas te den sistema nobo, y ei mes ta kisas.” Abstinencia total lo no ta un sacrificio mucho grandi a cambio di bida den Dios su husto mundo nobo.—2 Pedro 3:13.

“Core di Tal Manera Anto pa Boso Por Gana”

21, 22. Ki obstaculo por stroba nos di alcansa e meta final den e careda pa bida, y con nos por evita e obstaculo ei?

²¹ Apostel Pablo a compara e curso di bida di un cristian cu un careda of competencia, y el a bisa: “Boso no sa cu esnan cu ta core un careda, ta tur ta core, ma cu ta un so ta ricibi e premio? Core di tal manera anto pa boso por gana. Y tur cu ta competi den e weganan ta eherce dominio propio den tur cos. Nan anto ta haci esaki pa ricibi un corona cu no ta dura, ma nos ta hacie pa ricibi un corona cu ta dura pa semper. Pesei mi no ta core manera un hende sin meta; mi no ta box manera un hende cu ta dal den bashi, ma mi ta golpia mi curpa y ta hacie mi esclabo, pa no sosode cu, despues cu mi a predica na otronan, mi mes wordo descualifica.”—1 Corintionan 9:24-27.

²² E premio ta bai solamente pa esnan cu termina e careda cu exito. Den e careda di bida, mal uzo di alcohol por stroba nos di yega e meta final. Nos tin cu eherce dominio propio. Pa core na un manera sigur ta necesario pa nos no entrega na exceso di alcohol of “buracheria.” (1 Pedro 4:3) Al contrario, nos tin cu eherce dominio propio den tur cos. Pa loke ta bebida alcoholico, ta sabi pa nos “renuncia impiedad [of, maldad] y deseonan mundano y pa biba huicioso, husto y santo.”—Tito 2:12.

[Nota]

Bo Ta Corda?

• Kico ta cai bou di mal uzo di alcohol?

• Mal uzo di alcohol ta resulta den ki daño?

• Con bo por evita e peligernan di mal uzo di alcohol?

• Con un hende por trata cu e problema di mal uzo di alcohol?

[Preguntanan di Estudio]

[Plachi na pagina 19]

Biña “ta haci curason di hende contento”

[Plachi na pagina 20]

Nos mester sa nos limite personal y keda denter di e limite ei

[Plachi na pagina 21]

Dicidi di antemano ki ora ta basta

[Plachi na pagina 22]

Resa na Yehova cu regularidad tocante bo debilidadnan

[Plachi na pagina 23]

Mayornan tin e responsabilidad di instrui nan yiunan tocante uzo di alcohol