Un Caracteristica Unico di Hende

Jodie ta yuda un señora sortia cosnan di cas di su ruman mohe defunto pa bende. Esaki ta un di e servicionan cu Jodie su empresa ta ofrece. Ristando rond di un fogon bieu, e ta topa un par di cahita bieu cu cos di pisca aden. Ora e wak den un di nan, e no por kere su bista. E ta haya yen di paki di papel di 100 dollar lora den papel di foil, cu ta suma un total di 82.000 dollar! Jodie ta su so den e sala. Kico e mester haci? Keda keto y bai cu e cahita of informa su cliente di e placa cu el a haya?

E DILEMA di Jodie ta resalta un di e caracteristicanan cu ta distingui nos for di bestia. The World Book Encyclopedia ta declara: “Un di e caracteristicanan special di hende ta cu nos ta puntra nos mes kico nos mester haci y kico nos no mester haci.” Si un cacho cu tin hamber haya un pida carni riba un mesa di picknick, e no ta pensa mes si e tin mag di com’e of laga. Ma Jodie si tin e capasidad pa evalua si su decision ta contra normanan moral of no. Si e keda cu e placa, ta horta el a horta, pero no ta probabel cu lo e wordo gara. E placa no ta di dje; pero su cliente no sa mes di dje. Ademas, mayoria hende den e comunidad di Jodie lo haya cu e ta basta kens di duna su cliente e placa.

Si abo tawata den sapato di Jodie, kico lo bo a haci? Bo contesta riba e pregunta ei lo depende di ki etica of norma moral bo ta siguiendo den bida.

Kico Ta Nifica Etica?

“Etica” a keda describi como “e estudio di preguntanan tocante loke ta moralmente bon y moralmente malo.” (Collins Cobuild English Dictionary) Autor Eric J. Easton ta bisa: “‘Etica’ y ‘moralidad’ tin e  mesun nificacion basico. E prome ta basa riba un palabra Griego (ethikos) y e di dos riba un palabra Latin (moralis), y tur dos ta referi na loke custumber y tradicion ta prescribi.”

Pa hopi tempo religion por lo general tawata determina e normanan moral of di etica cu a dirigi bida di hende. Den hopi sosiedad e Palabra di Dios, Bijbel, a eherce un gran influencia. Sinembargo, mas y mas hende rond mundo ta rechasando normanan religioso door di bisa cu nan no ta practico y cu e codigo moral di Bijbel ta anticua. Kico a bin na nan luga? E buki Ethics in Business Life (Etica den Mundo Comercial) ta remarca cu “inteligencia no religioso a . . . caba cu e autoridad cu un tempo a pertenece na religion.” En bes di acudi na guianan religioso pa normanan di etica, hopi hende ta busca e guia di expertonan di mundo den e ciencia di etica. E profesor di bioetica Paul McNeill a bisa: “Mi ta kere cu e expertonan riba tereno di etica ta e pastonan no religioso. . . . Aworaki hende ta laga etica guia nan en bes di djis bai tras di religion manera tawata den pasado.”

Ora bo tin cu tuma un decision dificil, con bo ta dicidi loke ta bon y loke ta malo? Ken ta determina bo etica of normanan moral? Dios of abo mes?