Con Nos Mester Recorda Hesucristo?

Hesucristo “sigur sigur tawata un di e hombernan di mas influencia cu a yega di biba.”—“The World Book Encyclopedia.”

HENDE hopi bes ta recorda personahenan importante pa loke nan a haci. Pues, dicon hopi hende ta recorda Hesus pa su nacemento y no pa su obranan? Den henter cristiandad, mayoria hende por conta kico ta loke a sosode durante e temporada di su nacemento. Pero cuanto hende ta corda su excelente siñansanan di e Sermon Riba Sero y ta haci esfuerso pa aplica nan den nan bida?

Ta berdad cu Hesus su nacemento tawata algo remarcabel, pero su prome disipelnan a considera loke el a siña y haci hopi mas importante. Claro cu nunca tawata Dios su intencion  pa e nacemento di Cristo bira mas importante cu su bida como adulto. Sinembargo, Pasco di Nacemento a logra sconde Cristo como persona tras di un cantidad di leyenda confuso.

Un otro pregunta inkietante cu ta lanta tin di aber cu e manera cu hende ta celebra Pasco di Nacemento. Si Hesus bolbe bin aworaki riba tera, kico lo e pensa di e manera asina abierto cu hende a comercialisa Pasco? Dos mil aña pasa, Hesus a bishita e tempel na Herusalem. El a rabia cu e cambiadonan di placa y cu e bendedonan pasobra nan tawata probecha di un fiesta religioso Hudiu pa nan gana placa. El a bisa: “Kita e cosnan aki for di einan; stop di haci e cas di mi Tata un cas di negoshi”! (Huan 2:13-16) Ta bisto anto cu Hesus no tawata di acuerdo pa hende mescla religion cu comercio.

Hopi catolico Spaño sinsero ta expresa nan precupacion pa e echo cu cada bes Pasco di Nacemento ta bira mas y mas comercial. Sinembargo, en bista di e origen di hopi custumber di Pasco, probablemente e tendencia ei ta inevitabel. E periodista Juan Arias ta indica: “E hendenan, den cristianismo, cu ta critica e manera cu Pasco di Nacemento a para bira ‘pagano’ y ta mas dedica na festehamento y cumpramento di cos cu na religion, por lo general no ta conciente cu desde su origen e celebracion di e nacemento di Hesus . . . ya tawatin hopi di e caracteristicanan di e festival Romano pagano [di solo].”—El País, 24 di december 2001.

Den añanan resiente, hopi periodista Spaño y enciclopedia a comenta tanto riba e origen pagano di festividadnan tradicional di Pasco di Nacemento, como riba nan caracteristicanan comercial. Pa loke ta trata e fecha pa e celebracion di Pasco di Nacemento, e Enciclopedia de la Religión Católica ta bisa francamente: “E motibo cu Iglesia Romano a dicidi di celebra e fiesta riba e fecha aki aparentemente tin di aber cu su tendencia di remplasa fiestanan pagano cu fiestanan cristian. . . . Nos sa cu e tempo ei na Roma, e paganonan a consagra 25 di december como celebracion di natalis invicti, nacemento di ‘e solo invencibel.’”

Similarmente, e Enciclopedia Hispánica ta comenta: “A scohe e fecha di 25 di december como e dia pa celebra Pasco di Nacemento no a base di e fecha exacto di e nacemento, pero mas bien, pa motibo cu nan kier a cristianisa e fiestanan di e solsticio di winter cu hende tawata celebra na Roma.” Con e Romanonan tawata celebra e salimento di solo durante winter? Door di come na grandi, dibirti na un manera desenfrena y duna otro regalo. Pa motibo cu autoridadnan di iglesia no tawatin masha gana di aboli un fiesta popular asina, nan a “cristianisa” e fiesta door di yam’e e nacemento di Hesus en bes di e nacemento di solo.

Na principio, durante siglo 4 y 5, no tawata facil pa kita e hendenan for di adoracion di solo y custumbernan relaciona cu ne. E catolico “San” Agustin (di aña 354-430 di nos era) a sinti cu e mester a urgi otro creyentenan pa no celebra 25 di december manera e paganonan tawata haci na honor di solo. Te awe e festividadnan di antiguo Roma ta parce di tin mas tanto influencia.

 E Fiesta Ideal pa Dibirticion y Comercio

Atrabes di siglonan, varios factor a pone cu Pasco di Nacemento a bira e fiesta internacional mas popular pa dibirticion y comercio. Ademas, e custumbernan di otro fiestanan di winter, principalmente esnan cu hende tawata celebra den e parti nort di Europa, gradualmente a incorpora custumbernan festivo den esun cu a cuminsa na Roma. * Y den siglo 20, salesman y experto riba tereno di propaganda cu entusiasmo a promove cualkier custumber cu por a genera ganashi considerabel.

Kico tawata e resultado? E celebracion di e nacemento di Cristo a bira mas importante cu e nificacion di su nacemento. Den hopi caso, ora hende ta celebra Pasco di Nacemento, nan no ta menciona ni Cristo mas. E corant Spaño El País a remarca: “[Pasco di Nacemento] ta un fiesta cu hende ta celebra rond mundo, y di un indole familiar, y cada hende ta celebr’e na su manera.”

E comentario aki ta refleha un tendencia creciente cu tin na Spaña y na hopi otro pais rond mundo. E celebracionnan di Pasco di Nacemento ta bira mas y mas extrabagante, mientras cu e conocemento di Cristo ta bai atras. En realidad, pa un gran parti festividadnan di Pasco a bolbe bira loke nan tawata originalmente den tempo di e Romanonan—dibirticion desenfrena, comemento na grandi y intercambio di regalo.

Un Yiu A Nace pa Nos

Si Pasco di Nacemento tradicional no tin masha di aber cu Cristo, ta con berdadero cristiannan mester recorda e nacemento y bida di Cristo? Shete siglo prome cu Hesus a nace, Isaias a profetisa di dje: “Un yiu a nace pa nos, un yiu homber ta duna na nos, y e gobernacion lo ta riba su scouder.” (Isaias 9:6) Dicon Isaias a indica cu Hesus su nacemento y su papel  mas despues lo ta asina importante? Pasobra Hesus lo a bira un gobernante poderoso. Lo el a wordo yama Prins di Pas, y lo no tin fin na pas ni na su gobernacion. Ademas, Hesus su gobernacion lo wordo manteni pa medio di “huicio y husticia.”—Isaias 9:7.

Angel Gabriel a ripiti Isaias su proclamacion ora el a anuncia na Maria cu Hesus lo bai nace. El a predeci: “E lo ta grandi y lo wordo yama Yiu di e Haltisimo; y Señor Dios lo dun’e e trono di su tata David; y e lo reina riba e cas di Yacob pa semper, y su reino lo no tin fin.” (Lucas 1:32, 33) Pues, ta bisto cu e motibo principal di Hesus su nacemento tawatin di aber cu e trabou cu Cristo lo haci como e Rei nombra di e Reino di Dios. Cristo su gobernacion por beneficia tur hende, abo cu bo sernan keri tambe. De echo, e angelnan a indica cu su nacemento lo trece ‘pas na tera meimei di hende cu ta agrada Dios.’—Lucas 2:14.

Ken no ta desea di biba den un mundo caminda tin pas y husticia? Pero pa nos por gosa di e pas cu e gobernacion di Cristo lo trece, nos mester agrada Dios y nos mester tin un bon relacion cu ne. Hesus a bisa cu e prome cos cu un hende tin cu haci pa logra forma e relacion ei ta di siña tocante Dios y Cristo. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”—Huan 17:3.

Unabes cu nos conoce Hesus bon, nos lo no tin cu puntra nos mes mas ta con Hesus lo kier pa nos record’e. Lo ta door di come, bebe y intercambia regalo riba e mesun fecha cu un fiesta pagano di antiguedad? Probablemente cu no. E anochi prome cu Hesus a muri, el a bisa su disipelnan loke el a prefera. El a bisa: “Esun cu tin mi mandamentonan y ta warda nan, esei ta esun cu ta stima mi; y esun cu ta stima mi lo wordo stima door di mi Tata, y ami lo stim’e.”—Huan 14:21.

Loke a yuda Testigonan di Yehova compronde kico ta e mandamentonan di Dios y Hesus ta e echo cu nan a studia e Santo Scritura extensamente. Cu mucho gusto nan lo yuda bo compronde e mandamentonan vital ei pa bo por recorda Hesus manera mester ta.

[Nota]

[Cuadro/Plachi na pagina 6, 7]

Bijbel Ta Descurasha Hende di Tene Comemento y Duna Regalo?

Dunamento di Regalo

Bijbel ta aproba dunamento di regalo y ta yama Yehova mes e Dunador di “tur bon regalo y tur don perfecto.” (Santiago 1:17) Hesus a indica cu bon mayornan lo duna nan yiunan regalo. (Lucas 11:11-13) Job su amigonan y miembronan di famia a duna Job regalo ora el a bira bon di salu. (Job 42:11) Sinembargo, den ningun di e casonan aki nan no a duna un regalo djis pasobra tawata un dia di fiesta; el a sali for di nan curason.—2 Corintionan 9:7.

Encuentronan Familiar

Encuentronan familiar por echt uni miembronan di famia, specialmente si nan no ta biba den e mesun cas mas. Hesus y su disipelnan a bai na un fiesta di casamento na Cana; sin duda hopi famia y amigo a topa cu otro einan. (Huan 2:1-10) Y den Hesus su ilustracion di e yiu perdi, e tata a celebra e echo cu su yiu a bolbe bek cu un bankete pa e famia, acompaña pa musica y baliamento.—Lucas 15:21-25.

Disfruta di Bon Cuminda

Frecuentemente Bijbel ta papia di ocasionnan cu sirbidonan di Dios a disfruta di bon cuminda cu famia, amigo- of rumannan den fe. Ora cu tres angel a bishita Abraham, el a prepara un bankete pa nan cu a inclui carni, lechi, manteca y pan. (Genesis 18:6-8) Salomon a describi ‘comemento, bebemento y ser alegre’ como un regalo di Dios.—Eclesiastes 3:13; 8:15.

Claramente, Dios kier pa nos disfruta di bon cuminda den compania di famia y amigonan, y e ta aproba di dunamento di regalo. Nos tin hopi oportunidad pa haci esei na cualkier momento y durante henter aña.