Yehova Ta Nos Ayudante

‘Mi yudansa ta bin for di Yehova, Kende a traha shelo y tera.’—SALMO 121:2.

1, 2. (a) Pakico nos por bisa cu de bes en cuando nos tur tin mester di yudansa? (b) Ki tipo di Ayudante Yehova ta?

KEN por bisa cu nunca e no tin mester di yudansa? E berdad ta cu de bes en cuando nos tur tin mester di yudansa, por ehempel, pa trata cu un problema serio, pa wanta un perdida doloroso y pa soporta bou di un prueba dificil. Ora hende tin mester di yudansa, hopi bes nan ta acerca un amigo cu tin interes den nan. E solo echo cu bo por papia cu un amigo tocante un problema por hacie mas facil pa soporta. Pero otro hende tambe tin nan limitacionnan y no ta semper nan ta den un posicion pa yuda nos cu loke nos tin mester.

² Pero tin un Ayudante cu si tin poder y recurso sin limite. Ademas, e ta garantisa nos cu nunca lo e no laga nos desampara. E ta Esun cu e salmista a identifica y cu pleno confiansa a bisa di dje: “Mi yudansa ta bin for di [Yehova].” (Salmo 121:2) Con bin e salmista aki tawata combenci cu Yehova lo a yud’e? Pa contesta e pregunta ei, laga nos analisa Salmo 121. Esei lo permiti nos mira pakico nos tambe cu confiansa por acudi na Yehova como nos Ayudante.

Un Fuente di Yudansa Infalibel

3. Na cua seronan e salmista lo a halsa su wowonan, y pakico?

³ Pa cuminsa, e salmista a mustra cu e echo cu Yehova ta nos Creador ta duna nos confiansa: “Lo mi halsa mi wowonan na e seronan; for di unda mi yudansa lo bin? Mi yudansa ta bin for di [Yehova], Kende a traha shelo y tera.” (Salmo 121:1, 2) No ta cualkier sero e salmista a hisa wowo wak. Tempo cu e palabranan aki a ser skirbi, e tempel di Yehova tawata situa na Herusalem. E stad ei, situa na halto den e seronan di Huda, tawata Yehova su luga di biba simbolico. (Salmo 135:21) E salmista lo a hisa su wowonan y wak e seronan di Herusalem riba cua e tempel di Yehova a ser construi, buscando e yudansa di Yehova cu confiansa. Dicon e salmista tawata asina sigur cu Yehova por a yud’e? Pasobra ta E “a traha shelo y tera.” Na moda di papia, e salmista tawata bisando, ‘Definitivamente no tin nada cu por stroba e Creador todopoderoso di yuda mi!’—Isaias 40:26.

4. Con e salmista a mustra cu semper Yehova ta conciente di e necesidadnan di su pueblo, y pakico esei ta un consuelo pa nos?

⁴ Siguientemente, e salmista a splica cu  semper Yehova ta conciente di e necesidadnan di su sirbidonan. “E lo no permiti pa bo pia slip; esun cu ta warda bo lo no cabisha. Mira, esun cu ta cuida Israel lo no cabisha ni drumi.” (Salmo 121:3, 4) Simplemente Dios lo no permiti hende cu ta confia den dje “slip” of sufri un caida for di cua nan no por recupera mas. (Proverbionan 24:16) Pakico no? Pasobra Yehova ta manera un wardado di carne bon lanta cu ta cuida su bestianan. Esei no ta un consuelo pa nos? Na ningun momento lo e no sera wowo pa e necesidadnan di su pueblo. Di dia y anochi e ta vigila nan.

5. Pakico e salmista ta bisa cu Yehova ta na “man drechi”?

⁵ Cu e confiansa cu Yehova ta e Protector leal di su pueblo, e salmista a skirbi: “SEÑOR ta bo wardado; SEÑOR ta bo sombra na bo man drechi. Solo lo no fatiga bo di dia, ni luna anochi.” (Salmo 121:5, 6) Pa un biahero na pia den Medio Oriente, un luga di sombra lo duna e proteccion tan desea for di e solo cayente. Yehova ta manera un sombra pa su pueblo; e ta proteha nan for di e calor sofocante di calamidad. Ripara cu e salmista ta bisa cu Yehova ta na “man drechi.” Den e gueranan di antes, e man drechi di un solda no tawatin e proteccion completo di e escudo, cu e solda tawatin den su mas robes. Un amigo leal lo por duna proteccion door di para y bringa na man drechi di e solda. Mescos cu un amigo asina, Yehova ta para lealmente banda di su adoradonan, semper cla pa yuda nan.

6, 7. (a) Con e salmista ta sigura nos cu nunca Yehova lo stop di yuda su pueblo? (b) Pakico nos por tin e mesun confiansa cu e salmista?

⁶ Yehova lo stop di yuda su pueblo un dia? Na ningun momento so. E salmista a conclui: “SEÑOR lo proteha bo contra tur maldad; E lo warda bo alma. SEÑOR lo warda bo salida y bo entrada for di awor y pa semper.” (Salmo 121:7, 8) Ripara cu e escritor a cambia e enfasis for di presente pa futuro. Mas prome, den versiculo 5, e salmista a bisa: “SEÑOR ta bo wardado.” Pero den e versiculonan aki, e salmista a skirbi: “SEÑOR lo warda bo.” Pues e ta sigura e adoradonan berdadero cu Yehova su yudansa lo sigui te den futuro. Unda cu nan bai, ki calamidad cu bini riba nan, semper su man di yudansa lo ta disponibel pa nan.—Proverbionan 12:21.

⁷ En berdad, e escritor di Salmo 121 tawatin e confiansa cu e Creador todopoderoso ta warda su sirbidonan cu e suavidad di un wardado amoroso y cu e cuido di un vigilante atento. Nos tin tur motibo pa tin e mesun confiansa cu e salmista, pasobra Yehova no ta cambia. (Malakias 3:6) Esaki ta nifica cu semper nos lo ricibi proteccion fisico? No, pero tanten cu nos acudi na dje como nos Ayudante, lo e proteha nos contra tur loke por perhudica nos spiritualmente. E pregunta cu ta sigui logicamente ta: ‘Con Yehova ta yuda nos?’ Laga nos analisa cuater manera den cua e ta haci esei. Den e articulo aki nos lo considera con el a yuda su sirbidonan den temponan biblico. Den e siguiente articulo nos lo considera con e ta yuda su sirbidonan awe.

Yudansa di Angelnan

8. Pakico no ta un sorpresa cu e angelnan tin gran interes den e bienestar di Dios su sirbidonan riba tera?

⁸ Yehova tin miyones y miyones di angel na su disposicion. (Daniel 7:9, 10) E yiunan spiritual aki ta cumpli fielmente cu su boluntad. (Salmo 103:20) Nan ta bon conciente di e gran amor cu Yehova tin pa su adoradonan humano y cu e kier yuda nan. Pesei, no ta un sorpresa cu e angelnan tin gran interes den e bienestar di Dios su sirbidonan riba tera. (Lucas 15:10) Siguramente anto, e angelnan lo ta sinti nan masha contento cu Yehova ta uza nan pa yuda hende. Den ki maneranan Yehova a uza angelnan pa yuda su sirbidonan humano den antiguedad?

9. Duna un ehempel di con Dios a duna angelnan poder pa proteha hende fiel.

 ⁹ Dios a duna angelnan poder pa proteha y libra hende fiel. Dos angel a yuda Lot cu su yiu mohenan scapa di e destruccion di Sodoma y Gomora. (Genesis 19:1, 15-17) Un solo angel a mata 185.000 solda Asirio cu tawata menasa Herusalem. (2 Reinan 19:35) Ora Daniel a ser tira den un cueba di leon, Yehova a “manda su angel y a sera boca di e leonnan.” (Daniel 6:21, 22) Un angel a libra apostel Pedro for di prizon. (Echonan 12:6-11) Bijbel ta menciona hopi otro ehempel den cua angel a proteha hende, locual ta confirma loke Salmo 34:7 ta bisa: “E angel di SEÑOR ta kampeer rond di esnan cu ta tem’e, y ta rescata nan.”

10. Con Yehova a uza un angel pa anima profeta Daniel?

¹⁰ Na algun ocasion, Yehova a uza e angelnan pa anima y fortalece hende fiel. Den Daniel capitulo 10 nos ta haya un ehempel conmovedor di esei. Talbes e tempo ei Daniel tawatin mas o menos 100 aña di edad. E profeta tawata hopi desanima, evidentemente pa motibo di e condicion desola di Herusalem y e tardansa den reconstruccion di e tempel. Ademas, un vision spantoso cu el a mira tawatin e molestia. (Daniel 10:2, 3, 8) Amorosamente, Dios a manda un angel bai anim’e. Mas cu un biaha e angel a recorda Daniel cu e tawata “masha stima” den bista di Dios. Kico tawata e resultado? E profeta di edad a bisa e angel: “Bo a fortalece mi.”—Daniel 10:11, 19.

11. Menciona un ehempel cu ta mustra con Dios a uza angelnan pa dirigi e trabou di predica e bon nobo.

¹¹ Tambe Yehova a uza angel pa dirigi e trabou di predica e bon nobo. Un angel a dirigi Felipe pa predica tocante Cristo na un eunuco Etiope, cu despues a batisa. (Echonan 8:26, 27, 36, 38) Poco tempo despues tawata e boluntad di Dios pa e bon nobo ser predica na personanan no Hudiu insircuncida. Den un vision, un angel a aparece na Cornelio, un persona no Hudiu temeroso di Dios, y a bis’e pa e manda busca apostel Pedro. Ora e mensaheronan di Cornelio a haya Pedro, nan a bis’e: “Cornelio . . . a ricibi instruccion di un angel santo pa manda busca bo pa bin su cas pa e tende un mensahe for di bo.” Pedro a respond’e na e yamada aki, y asina e prome persona no Hudiu insircuncida a bira parti di e congregacion cristian. (Echonan 10:22, 44-48) Imagina bo con lo bo sinti bo ora bo haya sa cu ta un angel a yuda bo haya contacto cu un persona cu tin e disposicion corecto!

Yudansa pa Medio di Spirito Santo

12, 13. (a) Pakico Hesus su apostelnan tawatin bon motibo pa kere cu spirito santo por a yuda nan? (b) Den ki manera spirito santo a duna e cristiannan di prome siglo poder?

¹² Un poco prome cu Hesus a muri, el a garantisa su apostelnan cu nan lo no keda sin yudansa. E Tata lo a duna nan un “consolador, spirito santo.” (Huan 14:26) E apostelnan tawatin bon motibo pa kere cu spirito santo lo por a yuda nan. Al fin y al cabo, den e Scritura inspira tin hopi ehempel di con Yehova a uza spirito santo, e mayor forsa disponibel, pa yuda su pueblo.

¹³ Na hopi ocasion, Yehova a uza spirito santo pa duna hende e poder y autoridad pa haci su boluntad. Spirito santo a duna e Huesnan poder pa libra Israel. (Huesnan 3:9, 10; 6:34) E mesun spirito a duna e cristiannan di prome siglo poder pa sigui predica cu curashi apesar di tur forma di oposicion. (Echonan 1:8; 4:31) E bon resultadonan cu nan a haya den nan sirbishi a duna evidencia combencente di e funcionamento di spirito santo. Ki otro splicacion por tin pa e echo cu hombernan ‘cu no tawata educa ni siña’ por a plama e mensahe di Reino den henter e mundo conoci di e tempo ei?—Echonan 4:13; Colosensenan 1:23.

14. Con Yehova a uza su spirito santo pa ilumina su pueblo?

¹⁴ Tambe Yehova a uza su spirito santo pa ilumina su pueblo. Cu yudansa di Dios su spirito,  Yosef por a interpreta e soñonan profetico di Farao. (Genesis 41:16, 38, 39) Mediante su spirito, Yehova a laga su propositonan wordo revela na e humildenan pero a sconde nan pa hende orguyoso. (Mateo 11:25) Pesei, relaciona cu e cosnan cu Yehova ta percura “pa esnan cu ta stim’e”, apostel Pablo a bisa: “Na nos Dios a revela nan pa medio di [su] spirito.” (1 Corintionan 2:7-10) Ta unicamente cu yudansa di spirito santo un persona por a echt compronde e boluntad di Dios.

Yudansa di e Palabra di Dios

15, 16. Kico Dios a bisa Hosue haci pa e por a actua sabi?

¹⁵ Yehova su Palabra inspira ta “util pa siñansa”, y e ta haci Dios su sirbidonan “perfecto [“competente”, NW], ekipa pa tur bon obra.” (2 Timoteo 3:16, 17) Den Bijbel tin hopi ehempel cu ta mustra con cierto partinan di Dios su Palabra cu tawata skirbi caba a yuda su pueblo den tempo antiguo.

¹⁶ E Scritura a yuda duna guia sano na Dios su adoradonan. Ora Hosue a ser confia cu e responsabilidad di dirigi Israel, Dios a bis’e: “E buki di lei aki [skirbi door di Moises] lo no aparta for di bo boca, ma bo mester medita den dje di dia y anochi, pa bo percura di haci conforme tur loke ta para skirbi den dje; pasobra e ora ei lo bo haci bo caminda prospera, y e ora ei lo bo tin exito.” Ripara cu Dios no a priminti Hosue cu lo e dun’e sabiduria na un manera milagroso. Mas bien, ta si Hosue a lesa y medita riba e “buki di lei”, e ora ei lo el a actua sabi.—Hosue 1:8; Salmo 1:1-3.

17. Con e partinan di e Scritura cu tawata disponibel a yuda tanto Daniel como Rei Yosias?

¹⁷ Tambe e Palabra skirbi di Dios a yuda revela su boluntad y proposito. Por ehempel, Daniel a compronde for di loke Yeremias a skirbi cuanto tempo Herusalem lo a keda bandona. (Yeremias 25:11; Daniel 9:2) Considera tambe loke a sosode durante e reinado di Rei Yosias di Huda. Pa e tempo ei, e nacion a bira lomba pa Yehova, y tawata obvio cu e reinan no a traha un copia personal di e Lei y siguie. (Deuteronomio 17:18-20) Pero durante e trabounan di reparacion di e tempel, nan a haya “e buki di lei”, probablemente skirbi door di Moises. Kisas e tawata e texto original, cu a ser completa un 800 aña mas prome. Despues cu Yosias a laga lesa su contenido y a tende kico e ta bisa, el a realisa con leu e nacion a desvia for di Yehova su boluntad, y e rei a tuma medida drastico pa haci loke tawata skirbi den e buki. (2 Reinan 22:8; 23:1-7) No ta bisto cu e partinan di e Sagrado Scritura cu tawata disponibel e tempo ei a yuda e pueblo di Dios di antiguedad?

Yudansa pa Medio di Rumannan den Fe

18. Pakico nos por bisa cu ki ora cu un adorado berdadero yuda un otro, ta Yehova ta e fuente di e yudansa ei?

¹⁸ E yudansa cu Yehova ta percura ta bini hopi bes pa medio di rumannan den fe. En realidad, ki ora cu un adorado berdadero yuda un otro, ta Dios ta e fuente di e yudansa ei. Pakico nos por bisa esei? Pa dos motibo. Na prome luga, e tin di aber cu e spirito santo di Dios. E spirito ei ta produci fruta, manera amor y bondad, den esnan cu ta busca su influencia. (Galationan 5:22, 23) Pesei, ora un sirbido di Dios sinti su mes motiva pa yuda un otro, esei ta demostra cu e spirito di Yehova ta obrando. Na di dos luga, nos ta crea  den e imagen di Dios. (Genesis 1:26) Esaki ta nifica cu nos tin e capasidad pa refleha su cualidadnan principal, incluso su bondad y compasion. Pues ki ora cu un sirbido di Yehova saca un man pa un otro, e berdadero Fuente di e yudansa ei ta esun kende su imagen nos ta refleha.

19. Segun e registro di Bijbel, con Yehova a duna yudansa pa medio di rumannan den fe?

¹⁹ Den temponan biblico, con Yehova a duna yudansa pa medio di rumannan den fe? Hopi bes Yehova a laga un di su sirbidonan conseha un otro, manera ora Yeremias a duna Baruk un conseho cu a scapa su bida. (Yeremias 45:1-5) Tambe a yega di sosode cu adoradonan berdadero a sinti nan impulsa pa duna yudansa material na nan rumannan den fe, manera ora e cristiannan na Macedonia y Acaya a demostra cuanto interes nan tawatin pa yuda nan rumannan den necesidad na Herusalem. Apostel Pablo a remarca cu e generosidad ei corectamente a produci “gradicimento na Dios.”—2 Corintionan 9:11.

20, 21. Bou di ki circunstancianan e rumannan cu a bini di Roma a fortalece apostel Pablo?

²⁰ Vooral e relatonan cu ta mustra cuanto esfuerso Yehova su sirbidonan a haci pa fortalece y anima otro ta sumamente conmovedor. Considera un ehempel cu a envolve apostel Pablo. Ora e tawata riba caminda pa Roma como preso, el a biaha riba e caminda grandi Romano conoci como Caminda di Apio. E ultimo parti di e biahe tawata masha desagradabel, pasobra e biaheronan tawatin cu pasa door di un area plat yen di muras. * E rumannan di e congregacion na Roma tawata sa cu Pablo tawata biniendo. Kico nan a haci? Sinta warda comodamente na cas den e stad te ora Pablo a yega y despues sali bai salud’e?

²¹ Lucas, un escritor di Bijbel, kende a compaña Pablo riba e biahe, ta bisa nos loke a sosode:  “E rumannan, ora nan a tende di nos, a bin for di einan [Roma] te na e Foro di Apio y e Tres Posadanan pa contra cu nos.” Bo por imagina bo e esena? Sabiendo cu Pablo tawata biniendo, un delegacion di ruman a biaha bini for di Roma pa topa cu ne. Parti di e delegacion a keda warda na e Foro di Apio, un plasa publico bon conoci caminda biaheronan tawata descansa, rond di 74 kilometer pafo di Roma. E resto di e rumannan a bai ward’e na e Tres Posadanan, un otro sitio di descanso 58 kilometer pafo di e stad. Con Pablo a reacciona? Lucas ta informa: “Ora Pablo a mira nan, el a gradici Dios y a haya animo.” (Echonan 28:15) Djis imagina bo—e solo echo cu Pablo a mira e rumannan ei cu a haci e esfuerso di biaha tur e caminda ei tawata un fuente di fortalesa y consuelo p’e! Y ken Pablo a gradici pa e sosten balioso aki? El a gradici esun responsabel, Yehova Dios.

22. Kico ta nos texto di aña pa 2005 y kico nos lo considera den e siguiente articulo?

²² Nos ta mira anto cu e registro inspira di Dios su trato cu hende ta papia pa su mes. Dios ta un Ayudante sin igual. Pesei ta masha apropiado cu Testigonan di Yehova lo tin como nan texto di aña pa 2005 e palabranan di Salmo 121:2: ‘Mi yudansa ta bin for di Yehova.’ Pero con Yehova ta yuda nos awe? Nos lo considera esaki den e siguiente articulo.

[Nota]

Bo Ta Corda?

Den ki manera Yehova a duna yudansa:

• pa medio di e angelnan?

• pa medio di su spirito santo?

• cu su Palabra inspira?

• pa medio di rumannan den fe?

[Preguntanan di Estudio]

[Comentario na pagina 15]

E texto di aña pa 2005 lo ta: ‘Mi yudansa ta bin for di Yehova.’—Salmo 121:2.

[Plachi na pagina 16]

Pablo a gradici Dios pa e yudansa cu el a ricibi di e rumannan na Roma