Dicon Hopi Hende Ta Duda Cu Religion Por Uni Humanidad

“STIMA bo prohimo.” (Mateo 22:39) Hopi religion ta aclama e regla basico di conducta aki. Si e religionnan ei tawata efectivo den siña nan miembronan pa stima nan prohimo, nan miembronan lo a uni y pega na otro. Sinembargo, ta esei ta loke bo a observa? Religionnan ta un influencia fuerte cu ta trece union? Un encuesta resien na Alemania a haci e pregunta: “Religionnan ta uni hende, of tin mas chens cu nan ta separa nan?” Di e personanan cu a contesta, 22 porshento tawata di opinion cu religion ta trece union, mientras cu 52 porshento a haya cu nan ta causa division den hende of ta separa nan. Podise den bo pais hende ta pensa casi mescos.

Dicon hopi hende tin tiki confiansa cu religion por uni humanidad? Podise ta debi na loke nan sa di historia. En bes di hala hende serca otro, religion hopi bes a pusha nan for di otro. Den algun caso, hende a uza religion como capa pa comete e atrocidadnan di mas horibel. Considera algun ehempel for di solamente e ultimo 100 añanan.

Influencia Door di Religion

Durante segundo guera mundial, Croatanan Catolico Romano y Serbionan Ortodox na paisnan di Balkan tawata den conflicto cu otro. Ambos grupo a pretende di ta sigui Hesus, kende a siña su siguidonan pa stima nan prohimo. Sinembargo, nan conflicto a hiba na “un di e masacrenan civil di mas horibel conoci den historia”, segun un investigado. Mundo a keda geshock pa e cantidad di 500.000 morto cu tawata consisti di homber, mohe y mucha.

Na 1947 e subcontinente di India tawatin alrededor di 400 miyon habitante—rond di un kinta parti di e poblacion mundial—principalmente di religion Hindu, Moslem y Sikh. Ora nan a parti India na dos, e nacion Islamico di Pakistan a nace. E tempo ei, cientos di miles di refugiado di ambos pais a ser kima, bati, tortura y fusila den un serie di masacrenan religioso.

Anto fuera di e ehempelnan inkietante menciona ariba, menasa di terorismo a resalta na principio di siglo 21. Awe, terorismo a pone cu henter mundo ta alerta, y hopi grupo terorista ta afirma di tin lasonan religioso. Hende  no ta mira religion como promotor di union. Mas bien, hopi bes nan ta asocia religion cu violencia y desunion. Pesei no ta nada straño cu e revista Aleman FOCUS a compara Budismo, Cristiandad, Confucianismo, Hinduismo, Islam, Hudaismo y Taoismo—e religionnan principal di mundo—cu polvo.

Disputanan Interno

Mientras cu algun religion ta na guera cu otro, otronan ta ser perturba pa disputanan interno. Por ehempel, ultimo añanan iglesianan di cristiandad a keda dividi door di debatenan constante riba asuntonan relaciona cu doctrina. Tanto clero como laico ta puntra: Ta permiti pa plania famia? Kico di aborto? Hende mohe tin mag di bira sacerdote? Con iglesia mester mira homosexualidad? Un religion tin mag di aproba guera? En bista di tal desunion, hopi hende ta puntra nan mes: ‘Con un religion por uni humanidad si e no por uni ni sikiera su propio miembronan?’

Pues ta bisto anto cu religion en general no a logra trece union. Pero ta tur religion ta ser caracterisa pa desunion? Tin un religion cu ta diferente, uno cu por uni humanidad?

[Plachi na pagina 3]

Polisnan herida durante bringamento entre gruponan religioso na India na 1947

[Reconocemento]

Potret di Keystone/Getty Images