Entrena pa Duna Testimonio Cabal

“Boso lo ta mi testigonan na Herusalem y na henter Hudea y Samaria, y te na e parti mas aleha di mundo.”—ECHONAN 1:8.

1, 2. Kico tawata Pedro su encargo, y ken a dun’e?

“HESUS di Nazaret ... a manda nos predica pa e pueblo y pa duna testimonio [“cabal”, NW] cu esaki ta Esun cu Dios a nombra como hues di e bibonan y di e mortonan.” (Echonan 10:38, 42) Cu e palabranan ei apostel Pedro a splica Cornelio y su famia di e encargo cu el a ricibi pa ta un evangelisado.

² Ki tempo Hesus a duna e encargo ei? Probablemente, Pedro tawata pensa riba loke Hesus a bisa despues di su resureccion, un poco prome cu el a subi na shelo. Na e ocasion ei Hesus a bisa su disipelnan fiel: “Boso lo ta mi testigonan na Herusalem y na henter Hudea y Samaria, y te na e parti mas aleha di mundo.” (Echonan 1:8) Sinembargo, prome cu esei ya Pedro tawata sa caba cu como disipel di Hesus, lo e tawatin cu papia cu otro hende tocante su fe den Hesus.

Tres Aña di Entrenamento

3. Ki milager Hesus a haci, y ki invitacion el a duna Pedro cu Andres?

³ Varios luna despues di su bautismo na aña 29 di nos era, Hesus a predica caminda Pedro cu su ruman Andres tawata traha como piscado na Lama di Galilea. Nan a pisca henter anochi pero sin cohe nada. Pero toch Hesus a  bisa nan: “Bai caminda tin awa hundo y tira boso redanan pa boso cohe pisca.” Ora nan a haci loke Hesus a bisa, “nan a cohe un cantidad grandi di pisca; y nan redanan a cuminsa kibra.” Ora Pedro a mira e milager el a haya masha miedo, pero Hesus a calm’e, bisando: “No tene miedo, for di awor padilanti lo bo ta piscado di hende.”—Lucas 5:4-10.

4. (a) Con Hesus a prepara su disipelnan pa duna testimonio? (b) Con e ministerio di e disipelnan di Hesus lo tawata na comparacion cu esun di dje?

⁴ Mesora Pedro cu Andres—y tambe Santiago cu Huan, e yiunan di Zebedeo—a laga nan botonan y sigui Hesus. Pa casi tres aña, nan a compaña Hesus riba su giranan di predicacion y a ricibi entrenamento como evangelisado. (Mateo 10:7; Marco 1:16, 18, 20, 38; Lucas 4:43; 10:9) Na final di e periodo ei, dia 14 di nisan di aña 33, Hesus a bisa nan: “Esun cu kere den mi, e obranan cu mi ta haci e tambe lo haci; y obranan mas grandi cu esakinan e lo haci.” (Huan 14:12) E disipelnan di Hesus lo a duna testimonio cabal mescos cu Hesus a haci, pero na un escala mucho mas grandi. Manera nan a haya sa poco despues, tanto nan como tur futuro disipel lo a duna testimonio na “tur e nacionnan”, te na “fin” di e sistema di cosnan.—Mateo 28:19, 20.

5. Den ki maneranan nos por beneficia di e entrenamento cu Hesus a duna su siguidonan?

⁵ Nos ta bibando den e ‘tempo di fin.’ (Mateo 24:3) Pero distinto for di e prome disipelnan ei, nos no por compaña Hesus y observa con e ta predica na hende. Pero toch nos por beneficia di e entrenamento cu el a duna door di lesa den Bijbel con el a predica y ki instruccionnan el a duna su siguidonan. (Lucas 10:1-11) Ademas, e articulo aki lo trata un otro cos hopi importante cu Hesus a siña su disipelnan—e actitud corecto pa cu e trabou di predica.

Un Interes Profundo den Hende

6, 7. Ki cualidad di Hesus a haci su sirbishi efectivo, y con nos por imit’e den e aspecto aki?

⁶ Con bin Hesus su predicacion tawata asina efectivo? Un motibo ta cu e tawatin interes profundo den hende. E salmista a profetisa cu Hesus lo “tin compasion di e pober y di esun den necesidad.” (Salmo 72:13) Definitivamente el a cumpli cu e profecia ei. Bijbel ta bisa di un cierto ocasion: “Ora cu el a mira e multitudnan, el a sinti compasion pa nan, pasobra nan tawata cansa y plama, manera carne sin wardado.” (Mateo 9:36) Asta esnan cu a practica pica a ripara su interes intenso y a sinti nan atrai na dje.—Mateo 9:9-13; Lucas 7:36-38; 19:1-10.

⁷ Awe nos tambe lo ta efectivo si nos demostra e mesun interes intenso den hende. Prome cu bo sali den sirbishi, pakico bo no ta tuma un momento pa reflexiona cuanto necesidad hende tin di e informacion cu bo ta bai hiba pa nan? Pensa riba e problemanan cu podise nan tin y cu solamente e Reino lo resolve. Sea dicidido pa trata tur hende na un manera positivo, ya cu bo no sa ken lo reacciona faborabel riba e mensahe. Podise e proximo persona cu bo acerca a pidi den oracion pa un hende manera abo pasa serca dje y yud’e!

Motiva Door di Amor

8. Siguiendo Hesus su ehempel, kico ta motiva su siguidonan pa predica e bon nobo?

⁸ E bon nobo cu Hesus a proclama tawatin di aber cu e cuestionnan di mas importante cu tin dilanti humanidad: cumplimento di Yehova su boluntad, santificacion di Su nomber y vindicacion di Su soberania. (Mateo 6:9, 10) Como cu e tawata stima su Tata, Hesus a sintie motiva pa mantene integridad te na fin y duna testimonio cabal tocante e Reino cu lo resolve tur e cuestionnan ei. (Huan 14:31) Como cu e siguidonan di Hesus djawe tin e mesun motivacion, nan ta diligente ora nan ta participa den sirbishi. Apostel Huan a bisa: “Esaki ta e amor di Dios, cu nos ta warda su mandamentonan”, y esei ta encera tambe e mandamento di predica e bon nobo y haci disipel.—1 Huan 5:3; Mateo 28:19, 20.

9, 10. Fuera di amor pa Dios, amor pa ken mas ta motiva nos pa duna testimonio cabal?

 ⁹ Hesus a bisa su siguidonan: “Si boso ta stima mi, boso lo warda mi mandamentonan. Esun cu tin mi mandamentonan y ta warda nan, esei ta esun cu ta stima mi.” (Huan 14:15, 21) Pues, amor pa Hesus mester motiva nos pa predica tocante e berdad y haci e otro cosnan cu Hesus a manda. Durante un di e ocasionnan cu Hesus a aparece despues cu el a resusita, el a urgi Pedro: “Cuida mi lamchinan. ... Pastorea mi carnenan. ... Cuida mi carnenan.” Kico mester a motiva Pedro pa haci esei? Hesus a indica kico ta e contesta ora cu bes tras bes el a puntra Pedro: “Bo ta stima mi? ... Bo ta stima mi? ... Bo ta stima mi?” Si, Pedro su amor pa Hesus, su cariño p’e, lo a motiv’e pa duna testimonio cabal, haya e “lamchinan” di Hesus, y despues ser un wardado spiritual y pastorea nan.—Huan 21:15-17.

¹⁰ Awe, nos no conoce Hesus personalmente manera Pedro tawata conoc’e. Toch nos ta compronde e importancia di loke el a haci pa nos. Nos ta sinti nos conmovi pa e gran amor cu a pon’e “experencia morto pa tur hende.” (Hebreonan 2:9; Huan 15:13) Nos ta sinti mescos cu Pablo a sinti ora el a skirbi: ‘E amor di Cristo ta obliga nos ... El a muri pa tur, pa esnan cu ta biba no biba mas pa nan mes, ma pa esun cu a muri pa nan.’ (2 Corintionan 5:14, 15) Nos ta demostra cu nos ta tuma Hesus su amor pa nos na serio y cu nos na nos turno ta stim’e, door di tuma na serio e encargo pa duna testimonio cabal. (1 Huan 2:3-5) Nunca nos lo no kier adopta un actitud indiferente pa cu e trabou di predica, como si fuera nos ta considera Hesus su sacrificio como algo di poco balor.—Hebreonan 10:29, BPK.

Keda Consentra Riba Loke Ta Importante

11, 12. Pa ki proposito Hesus a bin na mundo, y con el a keda consentra riba esei?

¹¹ Ora cu Hesus tawata dilanti di Poncio Pilato, el a bisa: “Pa esaki mi a nace y pa esaki mi a bin den mundo, pa duna testimonio di e berdad.” (Huan 18:37) Hesus no a laga nada strob’e di duna testimonio di e berdad. Esei tawata e boluntad di Dios p’e.

¹² Satanas definitivamente a test Hesus den esaki. Un poco despues cu Hesus a batisa, Satanas a ofrece pa hacie un homber prominente den mundo, pa dun’e “tur e reinonan di mundo y nan gloria.” (Mateo 4:8, 9) Mas despues, e Hudiunan kier a hacie rei. (Huan 6:15) Kisas tin hende awe ta puntra nan mes si lo no tawata mas probechoso pa humanidad si Hesus a acepta e ofertanan ei. Podise nan ta rasona cu como rei humano, Hesus lo por a haci hopi cos bon pa humanidad. Pero Hesus mes a rechasa tal tipo di pensamento. El a consentra riba duna testimonio di e berdad.

13, 14. (a) Kico no a stroba Hesus di consentra riba loke ta importante p’e? (b) Aunke Hesus tawata pober den sentido material, kico el a logra?

¹³ Ademas, Hesus no a core tras di rikesa. Como resultado, e no a hiba un bida di luho. E no tawatin ni sikiera su propio cas. Na un ocasion el a bisa: “Zoro tin cueba y parha di shelo tin neishi, ma e Yiu di hende no tin ningun luga pa pone su cabes.” (Mateo 8:20) Ora Hesus a muri, e unico cos di balor cu Bijbel ta indica cu e tawatin ta e paña cu e soldanan Romano a tira lot riba dje. (Huan 19:23, 24) Acaso Hesus su bida tawata un fracaso? Absolutamente cu no!

¹⁴ Hesus a logra hopi mas cu cualkier hende rico cu ta haci obra di caridad hamas lo por a logra. Pablo a bisa: “Boso conoce e gracia di  nos Señor Hesucristo, cu aunke e tawata rico, sinembargo pa boso motibo el a bira pober, pa boso door di su pobresa por a bira rico.” (2 Corintionan 8:9; Filipensenan 2:5-8) Aunke Hesus tawata pober den sentido material, el a habri caminda pa hende humilde por gosa di bida eterno den perfeccion. Esta gradicido nos ta na dje! Tambe nos ta masha contento cu e recompensa cu el a ricibi pasobra el a consentra riba haci Dios su boluntad.—Salmo 40:8; Echonan 2:32, 33, 36.

15. Kico tin mas balor cu rikesa?

¹⁵ Cristiannan cu awe ta haci esfuerso pa imita Hesus, tambe ta nenga di core tras di rikesa. (1 Timoteo 6:9, 10) Nan ta reconoce cu rikesa por haci bida comodo, pero nan sa cu rikesa no por yuda nan haya bida eterno den futuro. Ora un cristian muri, su rikesa material no ta di ningun balor p’e, mescos cu e paña di Hesus no tawatin balor p’e ora el a muri. (Eclesiastes 2:10, 11, 17-19; 7:12) Ora un cristian muri, e unico cos di berdadero balor cu e tin ta su relacion cu Yehova y cu Hesucristo.—Mateo 6:19-21; Lucas 16:9.

Oposicion No A Descurasha Hesus

16. Con Hesus a reacciona riba oposicion?

¹⁶ Oposicion no a pone Hesus stop di consentra riba dunamento di testimonio di e berdad. Ni e echo cu e tawata sa cu su ministerio terenal lo a termina den un morto sacrificial, no a descurash’e. Pablo a bisa di Hesus: “Kende, pa motibo di e goso poni su dilanti, a soporta e sufrimento di [“staca di tormento”, NW], sin haci caso di berguensa, y a sinta na man drechi di e trono di Dios.” (Hebreonan 12:2) Tuma nota cu Hesus no a “haci caso di berguensa.” E no a precupa cu loke su oponentenan a pensa di dje. El a consentra riba haci e boluntad di Dios.

17. Kico nos por siña di Hesus su perseverancia?

¹⁷ Aplicando e les di Hesus su perseverancia, Pablo a anima cristiannan: “Considera esun cu a soporta tal hostilidad di pecadonan contra su mes, pa boso no cansa y perde animo.” (Hebreonan 12:3) Ta cierto cu nos por cansa di confronta oposicion of bofon dia aden dia afo. Tambe nos por cansa di e lucha constante pa resisti e atraccionnan di mundo. Y kisas esei ta pone cu nos tin cu wanta critica di nos famia cu ta curasha nos pa “logra algo” den bida. Sinembargo, mescos cu Hesus, nos ta acudi na Yehova pa sostene nos segun cu firmemente nos ta sigui pone e Reino na prome luga den nos bida.—Mateo 6:33; Romanonan 15:13; 1 Corintionan 2:4.

18. Ki les excelente nos por siña for di loke Hesus a bisa Pedro?

¹⁸ Un ocasion cu Hesus a demostra bon cla cu e no tawata kier pa nada strob’e di consentra riba loke ta mas importante, ta ora cu  el a cuminsa conta su disipelnan tocante su benidero morto. Pedro a anima Hesus pa ta “bondadoso” cu su mes y a sigur’e cu ‘absolutamente lo e no tin e destino aki.’ Hesus a nenga di scucha cualkier cos cu lo por a debilita su determinacion pa haci Yehova su boluntad. El a bira lomba pa Pedro y a bisa: “Bai tras di mi, Satanas! Bo ta un tropieso pa mi, pasobra bo no ta pensa pensamento di Dios sino esun di hende.” (Mateo 16:21-23, NW) Laga nos tambe ta semper mesun determina pa rechasa pensamento di hende. Mas bien, semper laga e pensamentonan di Dios guia nos.

E Reino Lo Trece Berdadero Beneficio

19. Aunke Hesus a haci hopi milager, kico tawata e parti mas importante di su ministerio?

¹⁹ Hesus a haci hopi milager pa demostra cu e tawata e Mesias. Asta el a lanta hende for di morto. E obranan ei a atrae e multitudnan, pero Hesus no a bin na tera djis pa haci trabou social. El a bin pa duna testimonio di e berdad. E tawata sa cu cualkier beneficio material cu e percura, lo tawata algo temporal. Asta e hendenan resusita lo a bolbe muri. Solamente door di duna testimonio di e berdad lo e por a yuda algun hende gana bida eterno.—Lucas 18:28-30.

20, 21. Con cristiannan berdadero ta mantene nan balansa den e asunto di bon obra?

²⁰ Awe, tin hende ta purba imita e bon obranan di Hesus door di traha hospital of door di yuda e pobernan rond mundo mediante otro servicionan social. Den algun caso nan ta haci hopi sacrificio personal, y nan sinseridad ta digno di elogio; pero cualkier alivio cu nan duna ta pa un tempo so. Ta e Reino so lo por trece alivio permanente. Pesei, mescos cu Hesus, Testigonan di Yehova ta consentra riba dunamento di testimonio di e berdad tocante e Reino ei.

²¹ Claro cu cristiannan berdadero ta haci bon obra tambe. Pablo a skirbi: “Mientras nos tin oportunidad, laga nos haci bon na tur hende, y specialmente na esnan cu ta di e famia di fe.” (Galationan 6:10) Den tempo di crisis of ora un hende ta den necesidad, nos no ta basila pa “haci bon” na nos prohimo of na nos rumannan cristian. No obstante, nos ta keda consentra riba loke Hesus a mira como lo mas importante—dunamento di testimonio di e berdad.

Siña for di Hesus Su Ehempel

22. Dicon cristiannan ta predica na nan prohimo?

²² Pablo a skirbi: “Ai di mi si mi no predica evangelio!” (1 Corintionan 9:16) E no tawata indiferente pa cu e evangelio pasobra predicacion di e bon nobo a nifica bida p’e y pa esnan  cu scuch’e. (1 Timoteo 4:16) Nos ta mira nos sirbishi di e mesun manera. Nos kier yuda nos prohimo. Nos kier mustra nos amor pa Yehova. Nos kier demostra nos amor pa Hesus y nos aprecio pa su gran amor pa nos. Pesei nos ta predica e bon nobo y asina nos ‘no ta biba mas conforme e pasionnan di hende, sino conforme e boluntad di Dios.’—1 Pedro 4:1, 2.

23, 24. (a) Ki les nos ta siña for di e milager di e piscanan? (b) Ken awe ta dunando testimonio cabal?

²³ Mescos cu Hesus, nos no ta stop di consentra riba nos trabou principal ora hende ta haci bofon di nos of na un manera rabia ta rechasa nos mensahe. Nos ta siña un les for di e milager cu Hesus a haci ora el a yama Pedro cu Andres pa siguie. Nos ta saca afo cu si nos obedece Hesus y, na moda di papia, tira nos redanan asta den awanan aparentemente improductivo, nos piscamento lo por duna resultado. Hopi piscado cristian a cohe bon pisca despues di a traha añanan den awanan aparentemente improductivo. Otro piscado tawatin chens di muda bai caminda e piscamento ta mas productivo y nan a coi bon pisca einan. Sea loke sea nos haci, nos lo no stop di tira nos redanan. Nos sa cu ainda Hesus no a declara cu e trabou di predica a caba den ningun parti di mundo.—Mateo 24:14.

²⁴ Actualmente, tin mas cu seis miyon Testigo di Yehova ta predica activamente den mas cu 230 pais. E Toren di Vigilancia di 1 di februari 2005 lo tin e raport mundial di nan actividad durante e aña di sirbishi 2004. E raport ei lo demostra cu Yehova su bendicion rico ta riba e trabou di predica. Den e tempo cu ta resta pa e sistema di cosnan aki, laga nos sigui tuma na pecho e palabranan stimulante di Pablo: “Predica e palabra, ocupa bo den dje urgentemente.” (2 Timoteo 4:2, NW) Laga nos sigui duna testimonio cabal te ora cu Yehova bisa cu e trabou a termina.

Cuminsando e aña aki, e Raport di Aña di Sirbishi di Testigonan di Yehova Mundialmente lo no sali den e edicion di 1 di januari di E Toren di Vigilancia. Na luga di esei lo e sali den e edicion di 1 di februari.

Bo Por Contesta?

• Con nos por beneficia di e entrenamento cu Hesus a duna su disipelnan?

• Ki actitud Hesus tawatin pa cu e hendenan cu el a predica na dje?

• Kico ta motiva nos pa duna testimonio cabal?

• Den ki maneranan nos por sigui consentra riba haci Dios su boluntad mescos cu Hesus a haci?

[Preguntanan di Estudio]

[Plachi na pagina 15]

Nos lo ta efectivo den nos sirbishi si nos mustra e mesun interes profundo den hende cu Hesus a demostra

[Plachi na pagina 16, 17]

Hesus a bin na tera principalmente pa duna testimonio di e berdad

[Plachi na pagina 17]

Testigonan di Yehova ta consentra riba duna testimonio cabal