Ora di Come​—No Ta Djis pa Come So!

TUR hende ta gusta saboria un bon cuminda. Si hunto cu e cuminda ei tin bon combersacion y asociacion caluroso cu hende cu bo ta stima, e comemento aki ta bira un evento gososo cu ta satisface mas cu nos hamber so. Hopi famia tin e custumber di reuni pa come hunto por lo menos un bes pa dia. Ora e famia ta come hunto nan ta haya e oportunidad di papia di cosnan cu a pasa durante dia of cu nan tin plania di haci. Mayornan cu ta scucha comentario- y expresionnan di nan yiunan ta haya un bista di loke nan yiunan ta pensa y sinti. Atrabes di tempo, e asociacion relaha y felis cu e famia a disfruta ora nan ta come hunto, ta edifica den e famia un sentido di siguridad, confiansa y amor, cu ta haci e famia mas stabil.

Door cu awendia hopi miembro di famia ta semper ocupa, nan ta haya cu ta dificil pa reuni pa come hunto. Den algun parti di mundo, cultura local no ta aproba pa famianan come hunto ni pa nan papia ora ta come. Otro famianan tin e custumber di sende television ora nan ta come, y esaki ta un manera eficas pa stroba cualkier comunicacion significativo.

Sinembargo, mayornan cristian si ta alerta semper pa busca oportunidad pa edifica nan famia. (Proverbionan 24:27) Hopi tempo pasa, Dios a bisa mayornan cu un di e miho oportunidadnan pa comunica e palabra di Dios na nan yiunan ta ora nan ta ‘sinta den nan cas.’ (Deuteronomio 6:7) Ora mayornan ta sinta regularmente pa come hunto cu nan yiunan, nan tin e chens unico pa edifica den nan yiunan un amor mas profundo pa Yehova y su principionan husto. Door di cultiva un atmosfera felis y relaha, bo por haci e ora di come un experencia dushi y edificante tambe pa bo famia. Si, laga boso ora di come no ta djis pa come so!