Bo Por Tin Control Riba Bo Futuro?

NOS futuro definitivo ta predetermina? Loke nos ta scohe den bida no tin efecto riba nos futuro?

Supone cu hende ta doño di su propio futuro. Den un caso asina, un hende lo ta predetermina pa haci un tarea spesifico of haci cierto trabou? Y con Dios lo por a cumpli cu su boluntad pa e tera si hende ta liber pa forma nan propio futuro? Bijbel ta duna contesta satisfactorio pa e preguntanan aki.

Predestinacion y Boluntad Liber—Tur Dos Ta Corecto?

Considera e manera cu Yehova Dios a traha nos. “Segun e imagen di Dios el a crea hende; homber y mohe el a crea nan”, Bijbel ta bisa. (Genesis 1:27) Door cu nos a ser crea den e imagen di Dios, nos tin e habilidad di refleha su cualidadnan manera, amor, husticia, sabiduria y poder. Tambe Dios a duna nos e don di boluntad liber of e libertad di scohe. Esaki ta haci nos diferente for di tur loke el a crea riba tera. Nos por scohe si nos kier sigui Dios su guia moral of no. Ta pesei profeta Moises por a bisa: “Mi ta yama shelo y tera como testigo contra boso awe, cu mi a pone bida y morto boso dilanti, e bendicion y e maldicion. Pesei, scohe bida pa bo biba, abo y bo desendientenan, door di stima SEÑOR bo Dios, door di obedece su bos y door di tene duro na dje.”—Deuteronomio 30:19, 20.

Sinembargo, e echo cu nos tin libertad di scohe no ta nifica cu nos tin libertad absoluto.  E no ta libra nos di e leinan fisico y moral cu Dios a traha pa e stabilidad y pas di e universo. El a pone e leinan aki pa nos mes bon, y cualkier violacion di nan por hiba na consecuencianan serio. Djis pensa kico lo pasa si nos dicidi di ignora e lei di gravedad y bula for di dak di un edificio halto!—Galationan 6:7.

Tambe libertad di scohe ta duna nos cierto responsabilidad cu criaturanan cu no tin e libertad ei no tin. E autor Corliss Lamont a puntra: “Con nos por atribui responsabilidad moral na hende, y castiga nan pa malecho, si nos ta acepta . . . cu loke nan scohe y nan echonan ta determina di antemano?” Esei sigur no por. Animalnan cu ta sigui nan instinto no ta moralmente responsabel pa nan echonan ni no por tene computernan responsabel pa e funcionnan cu nan a ser programa pa ehecuta. Pesei anto, libertad di scohe ta pone un responsabilidad serio riba nos y ta haci nos responsabel pa nos echonan.

Yehova Dios lo tawata masha inhusto y sin amor si prome cu nos a nace, el a predetermina e manera cu nos lo hiba nos bida, y despues ta tene nos responsabel pa nos echonan! E no ta haci esaki pasobra “Dios ta amor”, y “tur su camindanan ta husto.” (1 Huan 4:8; Deuteronomio 32:4) E no a duna nos libertad di scohe y na e mesun tempo ‘determina for di eternidad ken lo e salba y ken lo e destrui’, manera esnan cu ta kere den predestinacion ta pretende. Libertad di scohe no ta laga luga pa predestinacion.

Bijbel ta mustra bon cla cu loke nos scohe tin influencia riba nos futuro. Por ehempel, Dios ta haci un apelacion na e hacidonan di maldad: “Cada un bira awor for di su mal caminda y for di e maldad di su echonan, . . . lo mi no haci boso daño.” (Yeremias 25:5, 6) E apelacion aki lo no tawatin sentido si Dios ya caba a fiha destino di cada persona individual. Ademas, e Palabra di Dios ta bisa: “Repenti anto y comberti, pa boso picanan wordo kita, pa temponan di refrescamento por bin for di e presencia di Señor.” (Echonan 3:19) Dios lo a pidi hende pa nan repenti y comberti, si e tawata sa di antemano cu nan lo no por haci absolutamente nada pa cambia nan futuro?

E Scritura ta papia di algun persona cu ta yama pa Dios pa goberna como rei den shelo hunto cu Hesucristo. (Mateo 22:14; Lucas 12:32) Sinembargo, Bijbel ta bisa cu nan lo perde e privilegio ei si nan no keda fiel te na fin. (Revelacion 2:10) Pakico Dios lo a yama  nan mes si el a dicidi caba cu nan lo no ser scohi? Considera tambe e palabranan cu apostel Pablo a declara na su compañeronan di fe. El a skirbi: “Si nos sigui peca boluntariamente despues di a ricibi e conocemento di e berdad, no ta keda sacrificio pa pica mas.” (Hebreonan 10:26) E spiertamento ei lo no tawatin balor si Dios a predetermina nan destino. Pero Dios no a predetermina por lo menos algun persona pa nan ta gobernante hunto cu Hesucristo?

Dios A Predetermina Personanan Individual of un Grupo?

Apostel Pablo a skirbi: “[Dios] a bendiciona nos, pa medio di nos union cu Cristo, cu tur beneficio spiritual di e regionnan celestial. Pasobra den Cristo el a scohe nos fo’i prome cu el a crea mundo . . . El a dicidi di antemano cu lo e adopta nos como su yiunan pa medio di Hesucristo.” (Efesionan 1:3-5, BPK) Kico Dios a predetermina of dicidi di antemano, y kico ta e nificacion di ser scohi “prome cu el a crea mundo”?

E textonan aki ta declara cu Dios a scohe algun desendiente di e prome homber, Adam, pa goberna hunto cu Cristo den shelo. (Romanonan 8:14-17, 28- 30; Revelacion 5:9, 10) Sinembargo, e idea cu ta miles di aña di antemano prome cu cierto personanan spesifico a nace Yehova Dios a dicidi cu nan lo a haya e privilegio ei, no ta cuadra cu e echo cu hende tin libertad di scohe. Loke Dios a predetermina tawata un grupo di hende, y no hende individual.

Pa ilustra esaki: Supone cu un gobierno ta dicidi di establece un cierto agencia. Di antemano e ta determina e funcionnan di e agencia, su autoridad y su tamaño. Finalmente e agencia ta cuminsa funciona algun tempo despues cu el a ser estableci, y su miembronan ta saca un declaracion cu ta bisa: “Varios aña pasa, gobierno a determina ki trabou nos lo haci. Awor nos ta cuminsa haci e trabou cu el a asigna na nos.” Abo lo yega na e conclusion cu e gobierno mester a determina algun aña prome ken lo bai ta e miembronan individual di e agencia ei? Siguramente cu no. Asina tambe Yehova a determina di antemano cu lo e establece un agencia special pa remedia e efectonan di e pica di Adam. El a predetermina e clase of grupo di hende cu lo sirbi den e agencia ei, pero no e hendenan individual. Nan lo a ser scohi despues, y e curso di bida cu nan lo a scohe lo determina si finalmente nan lo ser aproba of no.

Cua mundo Pablo tawatin na mente ora el a bisa: “[Dios] a scohe nos fo’i prome cu el a crea mundo”? E mundo cu Pablo ta referi na dje aki no ta e mundo cu Dios a cuminsa ora el a crea Adam cu Eva. E mundo ei tawata “masha bon”, completamente liber di pica y corupcion. (Genesis 1:31) E no tawatin mester di un “redencion” of liberacion for di pica.—Efesionan 1:7.

E mundo en particular cu Pablo a referi na dje tawata esun cu a bini na existencia despues cu Adam cu Eva a rebela den Eden, un mundo completamente diferente for di esun cu tawata e proposito original di Dios. E tawata e mundo cu a cuminsa cu e yiunan di Adam cu Eva. E mundo ei a consisti di hende aleha for di Dios y esclabisa na pica y corupcion. E tawata un mundo di hende cu, distinto di e pecadonan boluntario, Adam cu Eva, por a ser rescata.—Romanonan 5:12; 8:18- 21.

Mesora Yehova por a trata cu e situacion cu a presenta debi na e rebelion den Eden. Asina cu e necesidad a surgi, el a determina di antemano cu lo e bini cu un agencia special—e Reino Mesianico den man di Hesucristo—cu e lo bai uza pa rescata humanidad for di e pica di Adam. (Mateo 6:10) Dios a haci esaki ‘prome cu el a crea e mundo’ di humanidad cu por ser rescata, esta, prome cu e rebeldenan Adam cu Eva a haya yiu.

Hende en general tin mester di un plan di accion pa nan logra loke nan kier haci. Predestinacion tin di aber cu e idea cu Dios mester  tin un plan detaya pa e universo den cua tur cos ta predetermina. Roy Weatherford a skirbi: ‘Segun hopi filosofo, tur suseso cu ta na harmonia cu e Mahestad di Dios mester tin un spesificacion completo.’ Dios realmente tin cu spesifica cada suseso di antemano?

Como cu Yehova tin poder infinito y sabiduria incomparabel, e por trata cu cualkier emergencia of suseso imprevisto cu lo por presenta segun cu su criaturanan ta eherce nan boluntad liber. (Isaias 40:25, 26; Romanonan 11:33) E por haci esaki mesora sin cu el a plani’e delanta. Distinto for di hende imperfecto cu nan habilidadnan limita, e Dios Todopoderoso no tin mester di un plan completamente detaya cu ta bisa di antemano kico ta e futuro di cada persona individual riba tera. (Proverbionan 19:21) Den varios traduccion di Bijbel, Efesionan 3:11 ta menciona cu Dios tin un “proposito eterno”, y no un plan fiho.

Con Bo Por Influencia Bo Futuro

Yehova tin un proposito pa e tera, y e proposito ei si ta predetermina. Revelacion 21:3 y 4 ta declara: “Mira, e tabernakel di Dios ta meimei di hende, y e lo biba meimei di nan, y nan lo ta su pueblo, y Dios mes lo ta meimei di nan, y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” Si, e tera aki lo bira un paradijs, manera tawata Yehova su intencion originalmente. (Genesis 1:27, 28) Awor e pregunta ta: Abo lo t’ei? Esei ta depende di loke abo dicidi awor. Yehova no a fiha bo destino.

E sacrificio di rescate di Hesucristo, e Yiu di Dios, ta haci posibel pa tur hende cu eherce fe den dje ricibi bida eterno. (Huan 3:16, 17; Echonan 10:34, 35) Bijbel ta bisa: “Esun cu kere den e Yiu tin bida eterno; ma esun cu no obedece e Yiu lo no mira bida.” (Huan 3:36) Bo por scohe bida door di siña tocante Dios, su Yiu, y Su boluntad for di Bijbel y door di aplica loke bo ta siña. E persona cu ta actua na harmonia cu berdadero sabiduria registra den e Palabra di Dios por ta sigur cu “lo e biba confiadamente, y lo biba trankil, sin miedo di maldad.”—Proverbionan 1:20, 33.

[Plachi na pagina 5]

Distinto for di bestia, hende ta moralmente responsabel pa nan echonan

[Reconocemento]

Aguila: Potret: Cortesia di GREFA