Kico Ta Determina Bo Futuro?

“HENDE, mescos cu cualkier otro animal, no tin e habilidad pa determina nan futuro”, e evolucionista, John Gray, a skirbi. E autor, Shmuley Boteach, ta expresa un punto di bista net contrario den su buki An Intelligent Person’s Guide to Judaism (Guia di Hudaismo pa un Persona Inteligente). El a bisa: “Hende no ta un animal, y pesei semper e por tin control riba su futuro.”

Hopi hende ta pensa mescos cu Gray, y ta kere cu tin forsanan incontrolabel di naturalesa cu ta determina futuro di e famia humano. Otronan ta pensa cu hende ta un creacion di Dios y cu el a duna nan e habilidad di determina nan propio futuro.

Tin algun hende ta pensa cu nan futuro ta ser determina door di forsanan humano poderoso. Segun e autor Roy Weatherford, ‘mayoria hende na mundo—specialmente mayoria hende mohe den historia—no tin poder ni control riba nan propio bida pa e motibonan obvio di opresion y explotacion humano.’ (The Implications of Determinism) Hopi hende a mira con nan soñonan di un futuro felis a wordo ruina pa podernan politico of militar cu ta competi cu otro.

Atrabes di historia tawatin otro personanan cu a sinti nan inutil pasobra nan a pensa cu forsanan sobrenatural a determina nan destino. Segun Boteach: “Griegonan di antiguedad tawata obsesiona cu e idea cu tur speransa tawata en vano ya cu hende no por a vence nan destino cu a ser determina di antemano.” Nan a pensa cu cada hende su destino a ser dicidi door di diosanan  caprichoso. Nan a kere cu e diosanan aki a dicidi ki ora un persona lo a muri y tambe cuanto sufrimento y dolor lo e tawatin cu soporta durante su bida.

E creencia cu un persona su destino ta ser determina door di un poder sobrehumano ta masha comun awe. Por ehempel, hopi hende ta kere den kismet of destino. Nan ta bisa cu di antemano Dios a determina e resultado di tur actividad di hende y tambe e tempo cu hende lo muri. Tin tambe e doctrina di predestinacion, cu ta promove e punto di bista cu e Dios Todopoderoso “a determina di antemano pa cada persona individual si e lo haya salbacion of destruccion final.” Hopi hende cu ta yama nan mes cristian ta pega na e siñansa aki.

Kico abo ta pensa? Bo tin un destino fiho caba cu forsanan completamente fuera di bo control a determina? Of tin un berdad den e palabranan di e dramaturgo Ingles, William Shakespeare? El a skirbi: “Ta yega un momento cu hende ta doño di nan destino.” Wak kico Bijbel ta bisa di e asunto aki.