“Mustra Hospitalidad”

FEBE, un cristian di prome siglo, tawatin un problema. E tawatin cu biaha di Sencrea (Grecia) pa Roma, pero e no tawata conoce e rumannan cristian den e stad ei. (Romanonan 16:1, 2) E traductor di Bijbel, Edgar Goodspeed, a bisa: “E mundo Romano [di e tempo ei] tawata un mundo malbado y cruel, y e posadanan sigur no tawata luganan di bon reputacion pa un hende mohe decente, y specialmente no pa un mohe cristian.” Pues unda Febe por a keda?

Den tempo di Bijbel e hendenan tawata biaha hopi. Por ehempel, Hesucristo y su disipelnan mes a bai di un luga pa otro pa predica e bon nobo rond Hudea y Galilea. Poco despues di esei, misioneronan cristian manera Pablo a hiba e mensahe pa varios area rond di Lama Mediteraneo. Pablo a bai te asta Roma, capital di e Imperio Romano. Ora e prome cristiannan tawata di biahe, sea paden of pafo di e teritorio Hudiu, unda nan tawata keda? Ki clase di dificultad nan tawatin pa haya luga di keda? Kico nos por siña di e hospitalidad cu nan a practica?

“Awe Mi Mester Keda na Bo Cas”

Hospitalidad ta nifica ricibi huespetnan na un manera generoso y cordial, y pa hopi tempo e tawata un caracteristica di Yehova su adoradonan berdadero. Por ehempel, Abraham, Lot y Rebeca tur tawata hendenan hospitalario. (Genesis 18:1-8; 19:1-3; 24:17-20) Ora e patriarca Job a describi su actitud pa cu stranhero, el a bisa: “E stranhero no a pasa nochi pafo, pasobra mi a habri mi portanan pa e biahero.”—Job 31:32.

Pa biaheronan a ricibi un trato hospitalario di nan prohimo Israelita, hopi bes nan mester a djis cai sinta riba e plenchi di un stad y warda un invitacion. (Huesnan 19:15-21) Por lo general, e anfitrion tawata laba pia di su huespetnan y tawata ofrece nan cos di come y bebe. Asta e bestianan di su bishitantenan tawata haya cuminda. (Genesis 18:4, 5; 19:2; 24:32, 33) Biaheronan cu no kier tawata un carga pa nan anfitrionnan tawata biaha cu nan mes provision, manera pan cu biña, y yerba seco y cuminda pa nan buriconan. Tur loke nan tawatin mester ta un luga pa pasa anochi.

Aunke masha poco bes Bijbel ta duna detaye di unda Hesus a haya luga di keda durante su giranan di predicacion, e cu su disipelnan mester a drumi un caminda. (Lucas 9:58) Dia Hesus a bishita Yerico, el bisa Zakeo simplemente: “Awe mi mester keda na bo cas.” Zakeo a ricibi su huespet “cu alegria.” (Lucas 19:5, 6) Na Betania, hopi bes Hesus tawata huespet di su amigonan Marta, Maria y Lazaro. (Lucas 10:38; Huan 11:1, 5, 18) Y aparentemente na Capernaum, Hesus tawata keda serca Simon Pedro.—Marco 1:21, 29-35.

 E instruccionnan cu Hesus a duna su 12 apostelnan relaciona cu e predicacion ta duna nos un bon idea di ki clase di acohida nan por a spera den Israel. Hesus a bisa nan: “No busca oro, ni plata, ni coper pa hiba den boso faha; ni saco pa biaha cu ne, ni dos tunica, ni sandalia, ni garoti; pasobra e trahado ta digno di su mantencion. Y den cualkier stad of pueblito cu boso drenta, busca pa haya sa ta ken ta digno den dje, y keda einan te ora boso bai.” (Mateo 10:9-11) Hesus tawata sa cu hende di bon curason lo a tuma su disipelnan den nan cas, y duna nan cuminda, luga di drumi y otro cosnan necesario.

Sinembargo, lo a yega tempo cu e disipelnan di Hesus cu tawata predicadonan biahero lo tawatin cu percura pa nan mes y cubri nan gastonan. En bista di e hostilidad cu su siguidonan lo a bin haya nan cu ne y e futuro expansion di e trabou di predica den teritorionan pafo di Israel, Hesus a bisa: “Esun cu tin un bolsa, lag’e bai cu ne, y tambe un saco.” (Lucas 22:36) Pa nan por a plama e bon nobo, nan mester a biaha y haya luga di keda.

‘Practica Hospitalidad’

E ambiente relativamente pacifico cu a reina y e red grandi di careteranan bon manteni den tur parti di e Imperio Romano den prome siglo a yuda forma un sosiedad den cua e hendenan tawata biaha hopi. * E gran cantidad di biahero a crea un demanda grandi pa luga di keda. Riba e camindanan principal tawatin posadanan na distancia di un dia di biahe for di otro, cu a cumpli cu e demanda aki. Sinembargo, The Book of Acts in Its Graeco-Roman Setting (E Buki di Echonan den Su Cuadro Griego-Romano) ta declara: “Loke ta conoci di e facilidadnan ei den literatura no ta mucho agradabel. E fuentenan literario y arkeologico cu tin disponibel generalmente ta papia di facilidadnan sushi y tur decai, bashi y sin mueble, cama yen di pieu, mal calidad di cuminda y awa di bebe, doño y trahado inconfiabel, clientenan di mal reputacion, y un ambiente generalmente inmoral.” Ta di compronde anto cu ki ora cu tawata posibel, un biahero decente lo a evita di keda na un posada asina.

Nada straño anto cu bes tras bes e Scritura a anima cristiannan pa mustra hospitalidad na otro. Pablo a urgi e cristiannan na Roma: ‘Contribui na e necesidadnan di e santonan, practica hospitalidad.’ (Romanonan 12:13) El a recorda e cristiannan Hudiu: “No laga di mustra hospitalidad na stranhero, pasobra door di haci esaki algun hende a entretene angelnan sin sa.” (Hebreonan 13:2) Pedro a anima su compañeronan di adoracion pa “duna posada na otro sin murmura.”—1 Pedro 4:9.

Sinembargo, a existi situacionnan den cua no tawata apropiado pa mustra hospitalidad. Relaciona cu un hende ‘cu a bai mucho leu y cu no ta permanece den e siñansa di Cristo’, apostel Huan a bisa pa “no ricibie den boso cas, y no yam’e bonbini; pasobra esun cu ta yam’e bonbini ta participa den su obranan malo.” (2 Huan 9-11) Relaciona cu pecadonan no arepenti, Pablo a skirbi: “No asocia cu ningun hende cu ta ruman pa nomber, si e ta un hende inmoral, of golos pa placa, of un adorado di dios falso, of un blasfemado, of un burache, of un estafado—pa ni come mes hunto cu un hende asina.”—1 Corintionan 5:11.

Gañado y otro hende casi sigur a purba probecha di e bondad di cristiannan berdadero. Un documento no biblico tocante e fe cristian di siglo 2 di nos era conoci como E Didache, of Siñansa di e Diesdos Apostelnan, ta recomenda pa ricibi un predicado biahero pa “un dia, of si ta necesario, un di dos dia tambe.” Despues di esei, ora e ta bai, no dun’e “nada otro cu no ta pan . . . Si e pidi placa, e ta un profeta falso.” E documento a bisa mas aleu: “Si e ta desea di keda serca bo y e tin un ofishi, lag’e traha pa su pan. Pero si e no tin un ofishi, percura pa su necesidadnan manera abo ta haya ta bon, pa ningun hende no keda biba serca bo sin ta  haci nada pasobra e ta un cristian. Pero si e no kier asina, e ta probechando di Cristo; cuidou cu e hendenan ei.”

Apostel Pablo a percura pa e no a pone un carga pisa riba su anfitrionnan durante su estadianan largo den cierto stad. E tawata traha tent pa sostene su mes. (Echonan 18:1-3; 2 Tesalonicensenan 3:7-12) Pa yuda e biaheronan merecedor entre nan, aparentemente e cristiannan di prome aya tawata uza carta di recomendacion. Un ehempel di esei ta e manera cu Pablo a introduci Febe. El a skirbi: “Mi ta recomenda na boso nos ruman mohe Febe . . . pa boso ricibie den Señor . . . y pa boso yud’e den cualkier asunto cu e por tin mester di boso.”—Romanonan 16:1, 2.

Mustra Hospitalidad Ta Trece Bendicion

E misioneronan cristian di prome siglo a confia cu Yehova lo percura pa tur nan necesidadnan. Pero nan por a spera cu nan rumannan den fe lo mustra hospitalidad na nan? Si. Por ehempel, Lidia a habri su cas pa Pablo y e otro rumannan. E apostel a keda serca Akila y Pricila na Corinto. Un wardado di preso na Filipos a pone mesa pa Pablo cu Silas. Tambe Pablo a haya un recepcion hospitalario serca Jason na Tesalonica, serca Felipe na Cesarea y serca Mnason riba caminda di Cesarea pa Herusalem. Na caminda pa Roma, e rumannan na Puteoli a ricibi Pablo. E ocasionnan aki lo mester tawata spiritualmente hopi edificante pa e hendenan cu a ricibie den nan cas!—Echonan 16:33, 34; 17:7; 18:1-3; 21:8, 16; 28:13, 14.

E comentarista biblico, Frederick F. Bruce, a remarca: “E unico motivacion tras di e bon yudansa cu e amigo- y colaboradonan—anfitrion- y anfitrionanan—aki a duna Pablo, ta e amor cu nan tawatin p’e y pa e Doño cu el a sirbi. Nan tawata sa cu door di sirbi esun nan a sirbi e otro tambe.” Esaki ta un excelente motivacion pa ser hospitalario.

Ainda tin necesidad pa mustra hospitalidad. Miles di representante biahero di Testigonan di Yehova ta ricibi hospitalidad di nan rumannan den fe. Algun proclamado di Reino ta biaha riba nan mes gasto pa bai predica den luganan caminda masha poco biaha sa hiba e bon nobo. E beneficionan cu nos ta haya door di habri nos cas—pa simpel cu e ta—pa e rumannan ei, ta grandi. E hospitalidad caluroso cu kisas ta encera un simpel cuminda por duna nos un tremendo oportunidad pa ‘curasha otro’ y mustra amor pa nos rumannan y pa nos Dios. (Romanonan 1:11, 12) E ocasionnan ei ta specialmente beneficioso pa e anfitrionnan, pasobra “ta mas bendiciona pa duna cu pa ricibi.”—Echonan 20:35.

[Nota]

[Plachi na pagina 23]

Cristiannan ‘ta practica hospitalidad’