E Palabra di Yehova Ta Bibo

Puntonan Sobresaliente di e Buki di Huesnan

CON Yehova ta reacciona ora su propio pueblo bira lomba p’e y cuminsa adora dios falso? Kico si cada bes nan ta desobedec’e y ta busca su yudansa solamente ora nan ta den preta? Yehova ta percura un escape pa nan asta na momentonan asina? E buki di Huesnan ta contesta e preguntanan aki y tambe otro mas di sumo importancia. Profeta Samuel ta esun cu a skirbi e buki rond di aña 1100 prome cu nos era, y e susesonan cu e ta relata ta abarca un periodo di 330 aña, esta, for di e morto di Hosue te na entronisacion di e prome rei di Israel.

Como parti di e palabra of mensahe poderoso di Dios, e buki di Huesnan ta di gran balor pa nos. (Hebreonan 4:12) E relatonan excitante registra den dje ta yuda nos compronde e personalidad di Dios mas miho. E lesnan cu nos ta siña for di nan ta fortalece nos fe y ta yuda nos haya un gara firme riba e ‘berdadero bida’, esta, bida eterno den e mundo nobo cu Dios a priminti. (1 Timoteo 6:12, 19; 2 Pedro 3:13) Yehova su actonan di salbacion na fabor di su pueblo ta duna nos un bista adelanta di e liberacion mas grandi cu su Yiu, Hesucristo, lo bai efectua den futuro.

PAKICO TAWATIN MESTER DI HUES?

(Huesnan 1:1–3:6)

Despues cu e reinan di e tera di Canan a wordo derota bou di e liderato di Hosue, e tribunan individual di Israel a bai na nan herencia y a tuma e tera den nan poder. Sinembargo, e Israelitanan no a saca tur e habitantenan for di e tera. E fayo aki a bira un berdadero trampa pa Israel.

E generacion cu a bini despues di e dianan di Hosue “no tawata conoce SEÑOR, ni e obra cu el a haci pa Israel.” (Huesnan 2:10) Ademas, e pueblo a cuminsa casa cu e Cananeonan y adora nan diosnan. Door di esei Yehova a entrega e Israelitanan den man di nan enemigonan. Ma ora e opresion tawata bira hopi fuerte, e yiunan di Israel tawata invoca e Dios berdadero pa yudansa. Ta den e ambiente religioso, social y politico aki e relato di un serie di hues cu Yehova a lanta pa salba su pueblo for di nan enemigonan, ta desaroya.

Contesta Riba Pregunta Biblico:

1:2, 4—Dicon Yehova a apunta Huda como e prome tribu pa tuma e tera asigna na dje den su poder? Normalmente, e privilegio aki lo a bai pa e tribu di Ruben, prome yiu di Yacob. Pero ora Yacob tawata na su cama di morto, el a profetisa cu Ruben lo no a sobresali pasobra el a perde su derecho como primogenito. Anto Simeon y Levi, kendenan a actua cu crueldad, mester a wordo plama den Israel. (Genesis 49:3-5, 7) Pesei, e siguiente yiu cu a bini na remarca tawata Huda, e di cuater yiu di Yacob. Simeon, cu a subi bai hunto cu Huda, a ricibi areanan chikito di tereno tur plama den e teritorio grandi di Huda. *—Hosue 19:9.

1:6, 7—Pakico nan tawata kap duim y dede grandi di pia di e reinan derota kita afo? Aparentemente un hende cu a perde su duimnan y dede grandinan di pia no tawata capas mas pa bai guera. Con un solda lo por a maneha un spada of lansa sin su duimnan? Y e perdida di e dede grandi di pia lo a strob’e di mantene su ekilibrio na un manera adecuado.

Les pa Nos:

2:10-12. Pa nos ‘no lubida Yehova su echonan’, nos mester tin un programa regular di estudio di Bijbel. (Salmo 103:2, NW) Mayornan  tin cu inculca e berdad di e Palabra di Dios den curason di nan yiunan.—Deuteronomio 6:6-9.

2:14, 21, 22. Yehova ta permiti mal cosnan sosode cu su pueblo desobediente pa un proposito—pa disiplina, refina y motiva nan pa bolbe bek na dje.

YEHOVA TA LANTA HUESNAN

(Huesnan 3:7–16:31)

E relato excitante di e hazañanan di e huesnan ta cuminsa ora Otoniel a pone fin na Israel su sumision di ocho aña na un rei di Mesopotamia. Hues Aod a mata Eglon, e rei Moabita gordo, pa medio di un strategia cu a exigi curashi. E balente Samgar, su so a mata 600 Filisteo cu un palo pa suta baca. Cu e animacion di Debora, kende a sirbi como profeta mohe, y cu e respaldo di Yehova, Barak cu su ehersito di dies mil homber levemente arma a aplasta e ehersito poderoso di Sisara. Tambe Yehova a lanta Gideon y a duna e cu su 300 hombernan victoria riba e Madianitanan.

Pa medio di Jefte, Yehova a libra Israel for di e Amonitanan. Den e 12 hombernan cu a sirbi como hues den Israel tawatin tambe Tola, Jair, Ibzan, Elon y Abdon. E periodo di e huesnan a termina cu Samson, kende a bringa contra e Filisteonan.

Contesta Riba Pregunta Biblico:

4:8—Pakico Barak a insisti pa profeta Debora bai cu ne na e campo di bataya? Aparentemente, Barak a sinti cu su so e no tawata suficiente fuerte pa enfrenta e ehersito di Sisara. E echo cu e por tawatin e profeta hunto cu ne a sigura tanto e como su hombernan cu nan tawatin e guia di Dios y esei lo a duna nan confiansa. Pues e insistencia di Barak pa Debora compañ’e no tawata un señal di debilidad sino di fe firme.

5:20—Con e streyanan a lucha for di shelo na fabor di Barak? Bijbel no ta bisa si esaki tawatin di aber cu yudansa di angel, of yobida di meteorit cu e sabionan di Sisara a mira como un señal di calamidad, of talbes pronosticacion astrologico pa Sisara cu a resulta di ta incorecto. Ma un cos ta sigur, di un of otro manera Dios a interveni.

7:1-3; 8:10—​Pakico Yehova a bisa cu e 32.000 hombernan di Gideon tawata mucho hopi contra e forsa enemigo di 135.000 solda? Esaki ta pasobra ta Yehova tawata bai duna Gideon y su hombernan e victoria. Dios  no tawata kier pa nan pensa cu nan a derota e Madianitanan riba nan mes forsa.

11:30, 31—Ora Jefte a haci su promesa, e tawatin un sacrificio humano na mente? Jefte lo no a pensa mes riba algo asina, pasobra e Lei a stipula: “Entre boso no mag wordo haya ningun hende cu ta haci su yiu homber of su yiu mohe pasa door di candela.” (Deuteronomio 18:10) Sinembargo, loke si Jefte tawatin na mente ta un persona y no un bestia. E Israelitanan lo no a tene bestianan adecuado pa uza como sacrificio na cas. Y ofrenda di un bestia lo no tawata nada excepcional. Jefte tawata conciente cu e persona cu lo a sali for di su cas pa bin top’e lo por tawata su mes yiu mohe. Lo e mester a ofrece esaki como “un ofrenda kima” den sentido cu lo el a dedica e persona ei na e sirbishi exclusivo di Yehova en conexion cu e santuario.

Les pa Nos:

3:10. Exito den actividadnan spiritual no ta depende di sabiduria humano, sino di Yehova su spirito.—Salmo 127:1.

3:21. Aod a uza su spada di un manera habil y cu curashi. Nos mester bira habil den uza “e spada di e spirito, cual ta e palabra di Dios.” Esaki ta nifica cu nos mester uza e Scritura cu curashi den nos ministerio.—Efesionan 6:17; 2 Timoteo 2:15.

6:11-15; 8:1-3, 22, 23. E modestia di Gideon ta siña nos tres les importante: (1) Ora nos haya un privilegio di sirbishi, nos mester reflexiona riba e responsabilidad cu esaki ta encera en bes di riba e prominencia of prestigio cu esei lo por trece cu ne. (2) Ora nos ta trata cu hende cu ta gusta pleita, ta sabi pa nos ta modesto. (3) Modestia ta yuda nos evita di precupa mucho cu puesto.

6:17-22, 36-40. Nos tambe mester ta cauteloso y “no kere tur expresion inspira.” En bes di esei, nos tin cu pone nan “na prueba pa mira si nan ta origina di Dios.” (1 Huan 4:1, NW) Pa un anciano cristian nobo haci sigur cu e conseho cu e tin plania pa duna ta basa firmemente riba e Palabra di Dios, ta sabi pa e consulta cu un anciano cu tin mas experencia.

6:25-27. Gideon a uza discrecion pa asina e no a pone su opositornan rabia innecesariamente. Ora nos ta predica e bon nobo, nos mester tene cuidou pa e manera cu nos ta papia no ofende otro hende innecesariamente.

7:6. Relaciona cu nos sirbishi na Yehova, nos mester ta manera e 300 hombernan di Gideon—atento y vigilante.

9:8-15. Ta hopi bobo di nos parti pa actua cu orguyo y ambiciona posicion of poder!

11:35-37. Sin duda, e bon ehempel di Jefte a contribui hopi na yuda su yiu mohe desaroya  un fe firme y un spirito di sacrificio propio. Awe mayornan por pone un ehempel asina pa nan yiunan.

11:40. Ora bo nota cu un ruman ta manifesta un spirito dispuesto den Yehova su sirbishi, elogi’e [NW]; esei ta anim’e.

13:8. Ora mayornan ta siña nan yiunan, nan mester pidi Yehova su guia y sigui su instruccion.—2 Timoteo 3:16.

14:16, 17; 16:16. Algo cu por daña bo relacion cu un hende ta ora bo ta pone presion riba dje door di yora y teima den su cabes.—Proverbionan 19:13; 21:19.

OTRO VIOLACIONNAN DI LEI DEN ISRAEL

(Huesnan 17:1–21:25)

E ultimo parti di e buki di Huesnan ta contene dos relato sobresaliente. E prome tin di aber cu un homber cu yama Mikaia, kende a pone un dios falso den su cas y a uza un Levita pa fungi como sacerdote p’e. Despues di destrui e stad di Lais (of Lesem), e Danitanan a construi nan mes stad y a yam’e Dan. Uzando e dios falso di Mikaia y su sacerdote, nan a establece un otro forma di adoracion na Dan. Evidentemente, Lais a wordo captura prome cu Hosue a muri.—Hosue 19:47.

E di dos suseso a tuma luga no hopi tempo despues di e morto di Hosue. Un crimen sexual grave cu algun homber di e stad Benjaminita di Gabaa a comete casi a hiba na e destruccion di henter e tribu di Benjamin; 600 homber so a sobrevivi. Sinembargo, un areglo practico a permiti nan haya esposa, y pa tempo di e reinado di David, ya nan cantidad a aumenta te casi 60.000 guerero.—1 Cronicanan 7:6-11.

Contesta Riba Pregunta Biblico:

17:6; 21:25—Si ‘cada hende tawata haci loke ta bon den nan mes bista’, esaki no a fomenta un situacion di anarkia? No necesariamente, pasobra Yehova a haci varios areglo pa guia su pueblo. El a duna nan e Lei y e sacerdocio pa educa nan den su caminda. Pa medio di e Urim y e Tumim, e sumo sacerdote por a busca e guia di Dios riba asuntonan importante. (Exodo 28:30) Ademas, tur stad tawatin ancianonan capas pa duna conseho sano. Ora un Israelita a haci uzo di e areglonan aki, e tawatin un guia sano pa su consenshi. Si el a “haci loke tawata bon den su mes bista” den e manera aki, lo a bai bon cu ne. Di otro banda, si un persona a ignora e Lei y a tuma su mes decisionnan tocante conducta y adoracion, e resultado tawata malo.

20:17-48—Pakico Yehova a laga e Benjaminitanan derota e otro tribunan dos bes, maske e Benjaminitanan mes mester a ser castiga? Door di laga e tribunan fiel sufri derotanan grandi na principio, Yehova a test nan pa wak con determina nan tawata pa caba cu maldad den Israel.

Les pa Nos:

19:14, 15. E echo cu e pueblo di Gabaa no tawata dispuesto pa mustra hospitalidad tawata un indicacion di deficiencia moral. Bijbel ta manda cristiannan pa ‘practica hospitalidad.’—Romanonan 12:13.

Liberacion Ta Serca

Ta falta masha poco pa e Reino di Dios den man di Cristo Hesus destrui e mundo malbado aki y trece un gran liberacion pa hende recto y sin culpa. (Proverbionan 2:21, 22; Daniel 2:44) ‘Tur Yehova su enemigonan lo perece, ma esnan cu ta stim’e lo ta manera solo cu ta sali den tur su forsa.’ (Huesnan 5:31) Laga nos resulta di ta entre e personanan cu ta stima Yehova door di aplica loke nos a siña for di e buki di Huesnan.

E berdad fundamental cu ta keda demostra bes tras bes den e relatonan di Huesnan ta esaki: Obediencia na Yehova ta hiba na bendicion rico, desobediencia na consecuencianan calamitoso. (Deuteronomio 11:26-28) Pues anto, ta masha importante pa nos bira “obedecido di curason” na e boluntad di Dios cu el a revela na nos.—Romanonan 6:17; 1 Huan 2:17.

[Nota]

[Mapa na pagina 25]

(Pa e texto den su formato completo , wak e publicacion)

‘Yehova a lanta huesnan cu a libra nan for di man di esnan cu tawata plunder nan.’​—Huesnan 2:16

HUESNAN

1. Otoniel

2. Aod

3. Samgar

4. Barak

5. Gideon

6. Tola

7. Jair

8. Jefte

9. Ibzan

10. Elon

11. Abdon

12. Samson

DAN

MANASES

NEFTALI

ASER

ZABULON

ISACAR

MANASES

GAD

EFRAIN

DAN

BENJAMIN

RUBEN

HUDA

[Plachi na pagina 26]

Ki les bo a siña for di e echo cu Barak a insisti pa Debora bai na e campo di bataya?