Visionnan di e Reino di Dios Ta Bira Realidad

“Boso ta haci bon di pone atencion [na e palabra profetico], como na un lampi cu ta lusa den un luga scur.”—2 PEDRO 1:19.

1. Ki contraste nos ta haya den e mundo djawe?

CRISIS tras di crisis—esei ta un di e topiconan principal di e mundo djawe. Sea ta desasternan ecologico of terorismo mundial, ta parce cu e problemanan di humanidad ta saliendo completamente for di man. Ni e religionnan di mundo no por yuda. Es mas, hopi bes nan ta empeora e situacion door di fomenta e prehuicio, odio y nacionalismo cu ta dividi hende. Si, manera Isaias a profetisa, “scuridad profundo” a tapa “pueblonan.” (Isaias 60:2) Sinembargo, na mes momento tin miyones di hende ta wak futuro cu confiansa. Dicon? Wel, pasobra nan ta presta atencion na e palabra profetico di Dios manera “na un lampi cu ta lusa den un luga scur.” Nan ta permiti e “palabra”, of mensahe, di Dios cu nos por haya den Bijbel, guia nan pasonan.—2 Pedro 1:19.

2. Segun e profecia di Daniel tocante “e tempo di e fin”, ken so lo compronde cosnan spiritual?

² Relaciona cu “e tempo di e fin”, profeta Daniel a skirbi: “Hopi hende lo core pariba-pabou, y conocemento lo aumenta. Hopi lo wordo limpia, purifica y refina; ma e malbadonan lo haci maldad, y ningun di e malbadonan lo compronde, ma esnan cu tin discernimento lo compronde.” (Daniel 12:4, 10) Unicamente e hendenan cu realmente ta “core pariba-pabou” den e Palabra di Dios, esta, cu ta studia esaki diligentemente, somete nan mes na Dios su normanan y haci esfuerso pa cumpli cu su boluntad, ta compronde cosnan spiritual.—Mateo 13:11-15; 1 Huan 5:20.

3. Durante decada di 1870, ki berdad importante e studiantenan di Bijbel di e tempo ei a discerni?

³ For di decada di 1870, prome cu “e ultimo dianan” a cuminsa, Yehova Dios a cuminsa aclara “e secretonan sagrado di e reino di shelo.” (2 Timoteo 3:1-5; Mateo 13:11, NW) E tempo ei un grupo di studiante di Bijbel a discerni—contrario na e opinion general cu a reina—cu Cristo lo a bin bek na un manera invisibel. Despues cu e ser entronisa den shelo,  Hesus lo a bin bek den sentido cu lo el a dirigi su atencion na tera como e Rei di tera. Un señal visibel, consistiendo di un combinacion di cosnan, lo a alerta su disipelnan cu su presencia invisibel a cuminsa.—Mateo 24:3-14.

Ora un Vision Bira Realidad

4. Con Yehova a fortalece e fe di su sirbidonan di actualidad?

⁴ E vision di e transfiguracion tawata un bista briyante di Cristo den su futuro gloria di Reino. (Mateo 17:1-9) E vision ei a fortalece e fe di Pedro, Santiago y Huan na un tempo cu hopi hende a stop di sigui Hesus pa motibo cu e no a cumpli cu nan expectativanan sin base biblico. Mescos awe den e tempo di fin aki, Yehova a fortalece e fe di su sirbidonan di actualidad door di laga nan haya un miho comprondemento di e vision impresionante ei y hopi profecia relaciona cu ne. Laga nos considera awor algun di e realidadnan spiritual aki cu ta fortalece nos fe.

5. Ken a resulta di ta e Streya di Marduga, y na ki tempo y con el a “sali”?

⁵ Referiendo na e transfiguracion, apostel Pedro a skirbi: “Asina nos tin e palabra profetico pa mas siguransa, na cual boso ta haci bon di pone atencion, como na un lampi cu ta lusa den un luga scur, te ora dia habri y e streya di marduga sali den boso curason.” (2 Pedro 1:19) E Streya di Marduga figurativo ei, of “e streya briyante di marduga”, ta Hesucristo glorifica. (Revelacion 22:16) El a “sali” na 1914 ora e Reino di Dios a nace den shelo, marcando e aurora di un era nobo. (Revelacion 11:15) Den e vision di e transfiguracion, Moises y Elias a aparece banda di Hesus ta combersa cu ne. Ken nan ta prefigura?

6, 7. Ken Moises y Elias ta representa den e transfiguracion, y ki detayenan importante e Scritura ta revela tocante e personanan cu nan ta representa?

⁶ Siendo cu Moises y Elias tambe tawata parti di e gloria di Cristo, e dos testigonan fiel aki mester ta representa e personanan cu ta goberna cu Hesus den su Reino. E comprondemento cu tin otro personanan ta goberna cu Hesus ta cuadra cu e vision cu profeta Daniel a haya di e Mesias entronisa. Daniel a mira “manera un yiu di hende” ricibi ‘un reino eterno’ for di “e Anciano di Dianan”, Yehova Dios. Pero ripara kico Daniel ta mira un poco despues. El a skirbi: “E soberania, e dominio y e grandesa di tur e reinonan bou di henter shelo lo wordo duna na e pueblo di e santonan di e Haltisimo.” (Daniel 7:13, 14, 27) Si, mas cu cinco siglo prome cu e transfiguracion, Dios a revela cu cierto “santonan” lo a participa den e grandesa real di Cristo.

⁷ Ken ta e santonan den e vision di Daniel? En conexion cu e personanan ei apostel Pablo a bisa: “E spirito mes ta duna testimonio hunto cu nos spirito cu nos ta yiu di Dios, y si nos ta yiu, nos ta heredero tambe, heredero di Dios y coheredero cu Cristo, si di berdad nos ta sufri hunto cu ne, pa nos wordo glorifica tambe hunto cu ne.” (Romanonan 8:16, 17) Pues anto, e santonan ta Hesus su disipelnan ungi cu spirito. Den e buki di Revelacion, Hesus a bisa: “Esun cu vence, lo mi permitie sinta hunto cu mi riba mi trono, mescos cu ami tambe a vence y a sinta hunto cu mi Tata riba su trono.” Hesus hunto cu e ‘vencedonan’ resusita aki cu en total ta 144.000, lo goberna riba henter tera.—Revelacion 3:21; 5:9, 10; 14:1, 3, 4; 1 Corintionan 15:53.

8. Con Hesus su disipelnan ungi a haci e mesun trabou cu Moises y Elias a haci, y cu ki resultado?

⁸ Pero pakico a uza Moises y Elias pa representa e cristiannan ungi? E motibo ta cu mientras e cristiannan ei ta den carni ainda,  nan ta haci e mesun trabou cu Moises y Elias a haci. Por ehempel, nan ta sirbi como testigo di Yehova asta ora nan ta wordo persigui. (Isaias 43:10; Echonan 8:1-8; Revelacion 11:2-12) Mescos cu Moises y Elias, cu curashi nan ta desenmascara religion falso mientras nan ta urgi hende sinsero pa duna Dios debocion exclusivo. (Exodo 32:19, 20; Deuteronomio 4:22-24; 1 Reinan 18:18-40) Nan trabou a duna fruta? Sigur cu si! Ademas di yuda completa e cantidad di unginan cu tawata falta, nan a yuda miyones di ‘otro carne’ somete nan mes boluntariamente na Hesucristo.—Huan 10:16; Revelacion 7:4.

Cristo Ta Completa Su Victoria

9. Con Revelacion 6:2 ta describi Hesus manera e ta awe?

⁹ Aworaki Hesus ta un Rei poderoso, no djis un hende sinta riba lomba di un yiu di burico. E ta ser describi como coriendo riba un cabai, y den Bijbel cabai ta un simbolo di guera. (Proverbionan 21:31) Revelacion 6:2 ta bisa: “Ata un cabai blanco, y esun cu tawata sinta riba dje tawatin un boog; y un corona a wordo duna na dje, y el a sali conkistando, y pa conkista [of, “completa su victoria”, NW].” Ademas, e salmista David a skirbi relaciona cu Hesus: “SEÑOR lo extende bo scepter poderoso for di Sion, bisando: ‘Goberna meimei di bo enemigonan.’”—Salmo 110:2.

10. (a) Con Hesus su careda di victoria a cuminsa na un manera glorioso? (b) Con e prome victoria di Cristo a afecta humanidad en general?

¹⁰ Hesus su prome victoria tawata riba su enemigonan di mas poderoso, esta, Satanas y su demoñonan. El a saca nan for di shelo y tira nan riba tera. Sabiendo cu nan tempo ta cortico, e spiritonan malbado aki a baha tur nan rabia violento riba humanidad, causando gran sufrimento. Den e buki di Revelacion e sufrimento aki ta ser simbolisa pa tres hinete mas. (Revelacion 6:3-8; 12:7-12) Na harmonia cu Hesus su profecia relaciona cu “e señal di [su] binida y di e fin di tempo”, e careda di e hinetenan aki a resulta den guera, hamber y plaga mortal. (Mateo 24:3, 7; Lucas 21:7-11) Sin duda, e “dolornan di parto” aki lo sigui bira mas fuerte te ora Cristo “completa su victoria” door di destrui tur rastro di e organisacion visibel di Satanas. *—Mateo 24:8.

11. Con e historia di e congregacion cristian ta duna testimonio di e autoridad cu Cristo tin como Rei?

¹¹ Hesus su autoridad como Rei ta bisto  tambe den e echo cu el a proteha e congregacion cristian pa esaki por cumpli cu su encargo di predica e mensahe di Reino rond mundo. Apesar di oposicion cruel di parti di Babilonia e Grandi—e imperio mundial di religion falso—y di parti di gobiernonan hostil, e trabou di predica no solamente a continua sino a alcansa tambe un escala nunca bisto den historia di mundo. (Revelacion 17:5, 6) Esaki ta un testimonio poderoso cu Cristo su reinado ta un realidad!—Salmo 110:3.

12. Pakico mayoria hende no ta discerni e presencia invisibel di Cristo?

¹² Pero lamentablemente, mayoria hende, incluso miyones di esnan cu ta bisa cu nan ta cristian, no ta discerni e realidadnan invisibel tras di e susesonan historico cu ta tumando luga riba tera. Nan ta asta haci bofon di esnan cu ta proclama e Reino di Dios. (2 Pedro 3:3, 4) Con bin? Pasobra Satanas a ciega nan mente. (2 Corintionan 4:3, 4) En realidad, for di hopi siglo pasa el a cuminsa tira e velo di scuridad spiritual riba supuesto cristiannan, y asta a pone nan bira lomba pa e speransa precioso di Reino.

Hende Ta Bira Lomba pa e Speransa di Reino

13. Na kico e velo di scuridad spiritual a hiba?

¹³ Hesus a profetisa cu apostatanan, mescos cu yerba shimaron sembra entre trigo, lo a penetra den e congregacion cristian y desvia hopi miembro. (Mateo 13:24-30, 36-43; Echonan 20:29-31; Hudas 4) E supuesto cristiannan aki cu tempo a tuma over fiesta-, custumber- y siñansanan pagano y asta a cataloga nan como “cristian.” Por ehempel, Pasco tin su origen den ritonan cu tin di aber cu adoracion di e diosnan falso Mitra y Saturno. Pero kico a pone e supuesto cristiannan aki bin riba e idea pa tuma e celebracionnan no cristian aki over? The New Encyclopædia Britannica (1974) ta bisa: “A establece Pasco, fiesta di nacemento di Hesucristo, pa motibo cu e gran expectativa cu Cristo lo a bolbe pronto a baha considerablemente.”

14. Con e siñansanan di Origenes y Agustin a troce e berdad di Reino?

¹⁴ Considera tambe con nan a troce e nificacion di e palabra “reino.” E buki The Kingdom of God in 20th-Century Interpretation (E  Reino di Dios Segun Interpretacion di Siglo 20) ta declara: “Ta Origenes [un teologo di siglo 3] a cambia e manera cu cristiannan tawata uza e palabra ‘reino’ pa e nifica cu Dios ta reina den curason di hende.” Riba kico Origenes a basa su siñansa? No riba e Scritura, sino riba “filosofia y punto di bista di mundo cu ta bastante diferente for di e pensamento di Hesus y e prome iglesia.” Agustin di Hipo (di aña 354-430 di nos era) a declara den su obra De Civitate Dei (E Stad di Dios) cu e iglesia mes ta e Reino di Dios. E pensamento no biblico ei a duna e iglesianan di cristiandad un base teologico pa asumi poder politico. Y nan a eherce e poder ei pa varios siglo, hopi bes na un manera cruel.—Revelacion 17:5, 18.

15. Con Galationan 6:7 a cumpli riba hopi di e iglesianan di cristiandad?

¹⁵ Sinembargo, awe iglesianan ta cosechando loke nan a sembra. (Galationan 6:7) Hopi di nan aparentemente ta perdiendo tanto nan poder como nan parokianonan. E tendencia ei ta bastante notabel na Europa. E revista Christianity Today a bisa: “Awor e catedralnan grandi di Europa no [ta] fungi mas como luga di adoracion sino como museo. Turista so ta bishita nan.” Na otro partinan di mundo por nota e mesun tendencia. Kico esaki ta nifica pa religion falso? Lo e simplemente caba na nada pa falta di apoyo? Y ki efecto esei lo tin riba adoracion berdadero?

Prepara pa e Gran Dia di Dios

16. Pakico e creciente enemistad contra Babilonia e Grandi ta significativo?

¹⁶ Ora un volcan inactivo cuminsa saca huma cu shinishi, esei ta un spiertamento cu un ora pa otro e por explota. Asina tambe e enemistad creciente contra religion den hopi parti di mundo ta un indicacion cu e dianan di religion falso ta conta. Pronto, Yehova lo pone e elementonan politico di mundo uni forsa pa desenmascara y destrui e prostituta spiritual, Babilonia e Grandi. (Revelacion 17:15-17; 18:21) Cristiannan berdadero mester tin miedo di e suseso ei y di e otro cosnan cu e “gran tribulacion” lo trece cu ne? (Mateo 24:21) No! Al contrario, nan lo tin motibo pa alegra ora Dios actua contra e malbadonan. (Revelacion 18:20; 19:1, 2) Considera e ehempel di Herusalem di prome siglo y di e cristiannan cu tawata biba aya.

17. Pakico Yehova su fiel sirbidonan por enfrenta e fin di e sistema di cosnan aki cu confiansa?

¹⁷ Ora e trupanan Romano a sitia Herusalem na aña 66 di nos era, esei no a cohe e cristiannan spiritualmente alerta di sorpresa, ni nan no a spanta. Como bon studiante di e Palabra di Dios, nan tawata sa ‘cu su desolacion tawata serca.’ (Lucas 21:20) Nan tawata sa tambe cu Dios lo a habri caminda pa nan hui bai na un luga sigur. Ora esei en berdad a sosode, e cristiannan a hui. (Daniel 9:26; Mateo 24:15-19; Lucas 21:21) Mescos awe tambe, hende cu conoce Dios y cu ta obedece su Yiu por enfrenta e fin di e sistema di cosnan aki cu confiansa. (2 Tesalonicensenan 1:6-9) De echo, ora e gran tribulacion cuminsa, cu goso nan lo stret nan curpa y ‘lanta nan cabes, pasobra nan redencion ta yegando serca.’—Lucas 21:28.

18. Kico lo ta e resultado di Gog su atake final direct contra Yehova su sirbidonan?

¹⁸ Despues di e destruccion di Babilonia e Grandi, Satanas, den su papel di Gog di Magog, lo lansa un atake final direct contra e Testigonan pacifico di Yehova. E trupanan di Gog cu ta pasa “manera un nubia cu ta tapa tera” lo kere cu nan por haya un victoria facil. Wel, nan lo dal nan dede duro! (Ezekiel 38:14-16, 18-23) Apostel Huan a skirbi: “Mi a mira shelo habri; y ata un cabai blanco, y esun cu tawata sinta riba dje ta wordo yama Fiel y Berdadero . . . For di su boca ta sali un spada skerpi pa e dal e nacionnan cu ne.” E “Rei di Reinan” invencibel aki lo rescata Yehova su adoradonan leal y caba cu tur nan  enemigonan. (Revelacion 19:11-21) Esei lo ta e gran culminacion di e cumplimento di e vision di e transfiguracion!

19. Ki efecto e victoria total di Cristo lo tin riba su disipelnan leal, y kico nan mester purba haci awor?

¹⁹ “Riba e dia ei, [Hesus lo] wordo admira door di tur esnan cu a kere.” (2 Tesalonicensenan 1:10) Abo lo kier ta entre e personanan cu lo tin un respet profundo y admiracion pa e Yiu di Dios victorioso? Awel sigui fortalece bo fe y ‘sea prepara, pasobra e Yiu di hende lo bin na un ora cu bo no ta pensa.’—Mateo 24:43, 44.

Mantene Bo Huicio

20. (a) Con nos por mustra nos aprecio pa e echo cu Dios a percura “e esclabo fiel y prudente”? (b) Kico nos tin cu puntra nos mes?

²⁰ “E esclabo fiel y prudente” ta spierta e pueblo di Dios regularmente pa keda spiritualmente alerta y pa mantene nan sano huicio. (Mateo 24:45, 46; 1 Tesalonicensenan 5:6) Abo ta aprecia e recordatorionan oportuno aki? Bo ta uza nan pa fiha prioridad den bida? Puntra bo mes: ‘Mi ta reconoce bon cla e nificacion spiritual di susesonan na mundo y e echo cu e Yiu di Dios ta gobernando den shelo? Mi ta mir’e cla pa ehecuta huicio dibino contra Babilonia e Grandi y e resto di e mundo di Satanas?’

21. Pakico algun persona a permiti nan vision spiritual bira dof, y kico nan tin cu haci urgentemente?

²¹ Algun persona cu ta asociando aworaki cu e pueblo di Yehova a laga nan vision spiritual bira dof. Por ta pa falta di pasenshi of perseverancia, manera a sosode cu algun disipel di Hesus di prome siglo? Ta precupacionnan di bida, materialismo of persecucion a afecta nan? (Mateo 13:3-8, 18-23; Lucas 21:34-36) Podise algun a haya cierto informacion cu “e esclabo fiel y prudente” a publica dificil pa compronde. Si bo ta den un di e situacionnan aki, nos ta anima bo fuertemente pa studia e Palabra di Dios cu un celo renoba y suplica Yehova pa bo por bolbe haya un relacion intimo y fuerte cu ne.—2 Pedro 3:11-15.

22. Ki efecto e consideracion di e vision di e transfiguracion y profecianan relaciona cu ne tawatin riba bo?

²² Hustamente na momento cu e disipelnan di Hesus tawatin mester di animo, nan a haya e vision di e transfiguracion. Awe, nos tin algo mucho mas grandi pa fortalece nos—e cumplimento di e vision espectacular ei y hopi profecia relaciona cu ne. Segun cu nos ta contempla e realidadnan glorioso aki y nan futuro nificacion, laga nos tambe expresa di henter nos curason e sintimentonan di apostel Huan ora el a bisa: “Amen. Bin, Señor Hesus.”—Revelacion 22:20.

[Nota]

Bo Ta Corda?

• Den decada di 1870, kico un grupo chikito di studiante di Bijbel a bin compronde tocante Cristo su regreso?

• Con e vision di e transfiguracion a cumpli?

• Ki efecto Hesus su careda di victoria tin riba mundo y riba e congregacion cristian?

• Kico nos mester haci pa ta entre esnan cu lo sobrevivi ora Hesus completa su victoria?

[Preguntanan di Estudio]

[Plachi na pagina 16, 17]

Un vision ta bira un realidad

[Plachi na pagina 18]

Bo sa kico a pasa ora Cristo a cuminsa su victoria?