Con Balioso Bo Bida Ta?
Con Balioso Bo Bida Ta?
MIENTRAS cu nan tawata sacrifica cantidad di bida na Europa durante Prome Guera Mundial, tawata tumando luga un esfuerso increibel pa salba bida na Antartica. E explorado Ingles-Irlandes Ernest Shackleton y su tripulacion a sufri un catastrofe ora cu nan barco, Endurance (Perseverancia), a keda plecha door di un masa flotante di ijs y a sink. Shackleton te na cierto grado a logra hiba su hombernan na un refugio, e Isla Olifanti den Oceano Sur Atlantico. Pero ainda nan tawata den peliger extremo.
Shackleton a realisa cu nan unico speransa pa sobrevivi tawata di manda busca yudansa na un haf di piscado di bayena riba e isla Sur Georgia. Esei a keda 1.100 kilometer leu, y Shackleton tawatin solamente un boto di salbabida di shete meter largo cu el a logra los for di Endurance. Nan chens di yega e haf tawata pinta scur.
Sinembargo, dia 10 di mei 1916, despues di 17 dia sumamente angustioso, Shackleton y un grupo chikito a yega Sur Georgia, pero e
condicion teribel di lama a obliga nan baha na e banda robes di e isla. Pa por a yega nan destinacion final, nan tawatin cu haci un caminata trabahoso di 30 kilometer atrabes di seronan desconoci tapa cu sneu. Aunke e situacion a parce imposibel—cu temperatura extremadamente friu y sin e ekipo adecuado pa subi sero—Shackleton y su compañeronan a yega nan destinacion, y cu tempo el a rescata henter su tripulacion cu a naufraga. Dicon Shackleton a haci tanto esfuerso asina? Biografo Roland Huntford a skirbi: “Su unico ambicion [tawata] pa saca tur su hombernan na bida.”“Ningun di Nan No Ta Falta”
Kico a yuda e hombernan di Shackleton pa nan no sinti desesperacion total segun cu nan tawata gepak riba otro ta warda riba Isla Olifanti, un isla cu tawata djis “un pida area di baranca y ijs desola y inaccesibel cu a midi 20 miya [30 kilometer] di punta pa punta”? E confiansa cu nan lider lo a cumpli cu su promesa di rescata nan.
Awe humanidad su situacion ta hopi paresido na e hombernan desampara ei riba Isla Olifanti. Hopi hende ta biba den condicionnan increiblemente desfaborabel y ta lucha pa djis keda na bida. Sinembargo, nan por tin pleno confiansa cu Dios lo “libra e afliginan” di opresion y angustia. (Job 36:15) Bo por tin sigur cu Dios ta considera tur hende su bida balioso. Yehova Dios, e Creador, ta bisa: “Sclama na mi den e dia di angustia; lo mi rescata bo.”—Salmo 50:15.
Ta dificil pa bo kere cu e Creador ta considera abo personalmente balioso, un solo persona entre e miles di miyones di hende cu tin riba tera? Wel, tuma nota di loke profeta Isaias a skirbi tocante e miles di miyones di streyanan den e miles di miyones di galaxianan cu tin den e inmenso universo rond di nos. Nos ta lesa: “Hisa bo wowo wak ariba y mira ta ken a crea e streyanan aki; Esun cu ta guia nan ehersito segun nan cantidad, ta e ta yama nan tur na nan nomber; pa motibo di e grandesa di su forsa y su poder ningun di nan no ta falta.”—Isaias 40:26.
Abo ta capta loke esei ta nifica? Nos galaxia Via Lactea—di cua nos sistema solar ta djis un parti chikito—ta contene por lo menos 100 mil miyon streya. Anto cuanto galaxia mas tin? Ningun hende no sa sigur, pero algun experto ta calcula cu tin 125 mil miyon. Kiermen cu tin un cantidad increibel di streya! Sinembargo, Bijbel ta bisa nos cu e Creador di universo conoce cada streya na nan nomber.
“Asta e Drachinan di Cabei Riba Boso Cabes, Tur Ta Conta”
Pero kisas un hende ta argumenta: ‘Djis pasobra un persona sa e nomber di miles di miyones di streya—of miles di miyones di hende—no necesariamente kiermen cu e ta interesa den cada un di nan.’ Por ehempel, un computer cu suficiente memory lo por registra e nomber di miles di miyones di hende. Pero ningun hende lo bisa cu e computer ta interesa den cualkier un di nan. Sinembargo, Bijbel ta mustra cu Yehova Dios no solamente sa e nomber di miles di miyones di hende sino cu tambe e ta interesa den cada un di nan. Apostel Pedro a skirbi: ‘Tira tur boso precupacion riba dje, pasobra e ta percura [of, “interesa”, NW] pa boso.’—1 Pedro 5:7.
Hesucristo a declara: “Dos mofi no ta wordo bendi pa un cen? Y ni un di nan lo no cai na suela si no ta e boluntad di boso Tata. Y asta e drachinan di cabei riba boso cabes, tur ta conta. Pesei, no tene miedo; boso bal mas cu Mateo 10:29-31) Tuma nota cu Hesus no a bisa cu Dios simplemente lo ta na haltura di loke ta pasa cu mofi of cu hende. El a bisa: “Boso bal mas cu un cantidad di mofi.” Dicon bo ta bal mas? Pasobra bo ta traha “segun e imagen di Dios”, cu e capasidad pa cultiva y desplega cualidadnan moral, intelectual y spiritual cu ta refleha Dios su propio cualidadnan eleva.—Genesis 1:26, 27.
un cantidad di mofi.” (“E Producto di Actividad Inteligente”
No sea gaña pa e declaracionnan di hende cu ta nenga cu tin un Creador. Segun nan, ta forsanan ciego y impersonal di naturalesa a traha bo. Nan ta pretende cu leu di ser crea “segun e imagen di Dios”, bo ta mescos cu tur otro bida animal riba e planeta, incluso mofi.
Abo ta haya cu ta logico cu bida a yega di existi simplemente pa casualidad of mediante un forsa impersonal? Segun e biologo molecular Michael J. Behe, e “procesonan biokimico increiblemente complica” cu ta goberna bida ta haci e idea ei totalmente irasonabel. Tambe el a bisa cu e evidencia di biokimica ta hiba na e conclusion inevitabel cu “bida riba tera na su nivel mas fundamental ... ta e producto di actividad inteligente.”—Darwin’s Black Box—The Biochemical Challenge to Evolution (E Caha Preto di Darwin—E Reto Biokimico di Evolucion).
Bijbel ta bisa nos cu bida riba tera na tur nivel ta e producto di actividad inteligente. Y tambe e ta bisa nos cu e Fuente di tur e actividad inteligente aki ta Yehova Dios, e Creador di universo.—Salmo 36:9; Revelacion 4:11.
No laga e echo cu nos tin cu persevera den un mundo yen di dolor y sufrimento descurasha bo di kere cu e tera y tur bida cu tin riba dje tin un Creador y Diseñador. Tene na mente dos berdad fundamental. Uno ta cu Dios no a diseña e imperfeccion cu ta existi tur rond di nos. E otro ta cu nos Creador tin bon motibo cu el a permiti e imperfeccion aki temporalmente. Manera e revista aki a trata na varios ocasion, Yehova Dios a permiti maldad existi pa solamente un tempo limita afin di resolve unabes y pa semper e cuestionnan moral cu a surgi tempo cu hende pa prome bes a rechasa Dios su gobernacion supremo. *—Genesis 3:1-7; Deuteronomio 32:4, 5; Eclesiastes 7:29; 2 Pedro 3:8, 9.
‘Lo E Libra Esun den Necesidad Cu Ta Sclama pa Yudansa’
Claro cu maske hopi hende ta sufri di e condicionnan miserabel djawe, toch bida ta keda un regalo maraviyoso. Y nos ta haci tur loke ta na nos alcanse pa conserv’e. E bida den futuro cu Dios ta priminti ta hopi mas cu un lucha pa djis sobrevivi den condicionnan severo y doloroso, manera loke e hombernan di Shackleton a experencia riba Isla Olifanti. Dios su proposito ta pa rescata nos for di nos existencia actual di dolor y banidad, di manera cu nos por “gara loke ta bida berdadero”, e bida cu originalmente tawata e proposito di Dios pa su creacion humano.—1 Timoteo 6:19.
Dios lo haci tur esaki pasobra nos cada un ta balioso den su bista. El a haci areglo pa su Yiu, Hesucristo, percura e sacrificio di rescate necesario pa libra nos for di e pica, imperfeccion y morto cu nos a hereda for di nos mayornan Mateo 20:28) Hesucristo a bisa: “Dios a stima mundo asina tanto, cu el a duna su Yiu unigenito, pa ken cu kere den dje ... tin bida eterno.”—Huan 3:16.
original, Adam cu Eva. (Kico Dios lo haci pa e hendenan kende nan bida actualmente ta ser amarga door di dolor y opresion? Dios su Palabra inspira ta bisa relaciona cu su Yiu: “E lo libra esun den necesidad ora cu e sclama pa yudansa, esun afligi tambe y esun cu no tin ningun hende pa yud’e. E lo tin compasion di e pober y di esun den necesidad, y e lo salba bida di esnan den necesidad. E lo rescata nan bida for di opresion y violencia.” Dicon e lo haci esaki? Pasobra “nan sanger [of, nan bida] lo ta precioso den su bista.”—Salmo 72:12-14.
Pa siglonan humanidad ta lucha bou di e carga di pica y imperfeccion, y ta como si fuera nan ta “keha” di hopi dolor y sufrimento. E unico motibo pakico Dios a permiti esaki tawata pasobra e sa cu lo e por remedia cualkier daño cu esei lo a trece cu ne. (Romanonan 8:18-22) Denter di poco lo e trece e “restauracion di tur cos” mediante su gobernacion di Reino den man di su Yiu, Hesucristo.—Echonan 3:21; Mateo 6:9, 10.
Esei ta encera resureccion di hende cu a sufri y muri den pasado. Nan ta safe den Dios su memoria. (Huan 5:28, 29; Echonan 24:15) Djis aki nan lo ricibi bida “na abundancia”, bida eterno den perfeccion den paradijs riba tera, liber di dolor y sufrimento. (Huan 10:10; Revelacion 21:3-5) Tur hende na bida lo por disfruta plenamente di bida y cultiva e cualidadnan y habilidadnan maraviyoso cu ta identifica personanan crea “segun e imagen di Dios.”
Abo lo t’ei pa disfruta di e bida cu Yehova a priminti? Esei ta keda na bo. Nos ta urgi bo pa haci uzo di loke Dios a percura pa realisa tur e bendicionnan aki. E publicadonan di e revista aki gustosamente lo yuda bo haci esei.
[Nota]
^ par. 17 Pa un consideracion detaya di e punto aki, wak capitulo 8, “Pakico Dios Ta Permiti Sufrimento?” den e buki Conocimentu cu Ta Hiba na Bida Eterno, publica door di Testigonan di Yehova.
[Plachi na pagina 4, 5]
E hombernan naufraga tawatin confiansa cu Shackleton lo a cumpli cu su promesa di rescata nan
[Reconocemento]
© CORBIS
[Plachi na pagina 6]
“Boso bal mas cu un cantidad di mofi”