E Berdad Ta Duna Fruta den e Hendenan Cu Bo Ta Siña?

ORA cu e hoben Eric a anuncia cu e no kier ta un Testigo di Yehova mas, su mayornan a keda kibra. Nan no a spera esei ni un momento so. Na mucha, Eric a participa den e estudio di Bijbel di famia, el a asisti na e reunionnan cristian y a sali predica hunto cu e congregacion. A parce cu e tawata den e berdad, na moda di papia. Pero awor cu el a bai for di cas, su mayornan a realisa cu e berdad di Bijbel si no tawata den dje. Ora nan a realisa esei, e tawata tanto un shock como un decepcion pa nan.

Otro rumannan tambe a sinti e mesun tristesa ora cu un studiante di Bijbel stop di studia diripiente. Na momentonan asina, hende hopi bes sa puntra nan mes: ‘Dicon mi no a mira e cos aki ta bin?’ Wel, acaso ta posibel pa determina prome cu un desaster spiritual tuma luga si e berdad ta dunando fruta den e personanan cu nos ta siña? De echo, con nos por ta sigur cu e berdad ta obrando den nos y tambe den e hendenan cu nos ta siña? Den Hesus su parabola bon conoci di e sembrado, el a bisa algun cos cu por yuda contesta e preguntanan aki.

E Berdad Mester Yega Curason

Hesus a bisa: “E simiña ta e palabra di Dios. Y e simiña [sembra] den bon tera ta esnan cu a tende e palabra cu un curason honesto y bon, y ta retene esaki, y ta duna fruta cu perseverancia.” (Lucas 8:11, 15) Pues prome cu berdad di Reino por produci resultado den nos studiantenan, e tin cu saca raiz den nan curason figurativo. Hesus ta sigura nos cu mescos cu bon simiña den bon tera, berdad dibino mesora ta cuminsa obra y duna fruta unabes el a touch un bon curason. Kico nos mester tuma nota di dje?

Nos mester tuma nota di cualidadnan di curason, no djis di aparencia externo. Un persona kisas ta mantene un rutina di adoracion, pero no ta semper esei ta revela loke realmente ta tuma luga den su curason. (Yeremias 17:9, 10; Mateo 15:7-9) Nos tin cu wak mas profundo. Mester tin un cambio definitivo den e persona su deseo-, motivacion- y prioridadnan. E mester ta desaroyando e personalidad nobo, cu ta conforme e boluntad di Dios. (Efesionan 4:20-24) Un ehempel: Pablo a bisa cu ora cu e Tesalonicensenan a tende e bon nobo, nan a acept’e mesora como e palabra di Dios. Pero ta e perseverancia, fieldad y amor cu nan a manifesta despues, a confirma pa Pablo cu e berdad tawata ‘obra tambe den nan.’—1 Tesalonicensenan 2:13, 14; 3:6.

Claro cu sea loke sea tin den curason di un studiante, tardi of tempran su comportacion lo revela esei, manera e ehempel di Eric ta ilustra. (Marco 7:21, 22; Santiago 1:14, 15) Desafortunadamente, te ora cu cierto mal caracteristicanan bira bisto den un persona su manera di anda, kisas ya ta mucho laat. Pues anto, e reto ta pa purba ripara debilidadnan spesifico prome cu nan bira piedra di tropieso den sentido spiritual. Nos tin mester di un manera pa wak den e curason figurativo. Con nos por haci esei?

Siña for di Hesus

Hesus, naturalmente, por a lesa curason sin faya. (Mateo 12:25) Ningun di nos por haci esei. Sinembargo, el a mustra nos cu nos tambe  por ripara un persona su deseo-, motivacion- y prioridadnan. Mescos cu un docter cualifica ta uza varios tecnica di diagnostica pa saca afo kico ta falta un pashent su curason literal, asina Hesus a uza e Palabra di Dios pa expone y “saca” afo kico ta e “pensamentonan y intencionnan di curason”, asta ora cu ainda nan tawata scondi pa bista di hende en general.—Proverbionan 20:5; Hebreonan 4:12.

Por ehempel, na un ocasion Hesus a yuda Pedro bira conciente di un debilidad cu despues a bira un piedra di tropieso. Hesus tawata sa cu Pedro stim’e. De echo, Hesus a caba di encarga Pedro cu “e yabinan di e reino.” (Mateo 16:13-19) Sinembargo, Hesus tawata sa tambe cu Satanas tawatin bista riba e apostelnan. Den e dianan nan dilanti, nan lo a bin bou di presion intenso pa compromete nan principionan. Evidentemente Hesus a ripara cu algun di su disipelnan tawatin cierto debilidad den nan fe. Pesei e no a basila pa bisa spesificamente kico nan mester a traha ariba. Ban considera con el a introduci e asunto pa haya chens di papia riba dje.

Mateo 16:21 ta bisa: “For di e tempo ei Hesucristo a cuminsa mustra su disipelnan cu e mester ... sufri ... y wordo mata.” Tuma nota cu Hesus a mustra nan, e no a djis bisa nan kico lo bai pasa cu ne. Muy probablemente el a uza versiculonan di Bijbel, manera Salmo 22:14-18 of Isaias 53:10-12, cu ta indica cu e Mesias lo mester a sufri y muri. En todo caso, door di lesa of cita directamente for di e Scritura, Hesus a duna Pedro y e otronan un chens di reacciona di curason. Con nan lo a reacciona riba e posibilidad di haya persecucion?

Sorprendentemente, maske Pedro semper a demostra curashi y celo, na e ocasion aki su reaccion impulsivo a revela un falta serio den su manera di pensa. El a bisa: “Sea bondadoso cu bo mes, Señor; abo absolutamente lo no tin e destino aki.” Pedro su manera di pensa tawata claramente mal dirigi, pasobra manera Hesus a señala, Pedro ‘no a pensa pensamento di Dios sino esun di hende’, un falta serio cu lo por a hiba na consecuencianan grave. Kico Hesus a haci e ora ei? Despues di a scual Pedro, Hesus a bis’e y tambe e resto di e disipelnan: “Si un hende kier bin mi tras, lag’e nenga su mes y tuma su staca di tormento y sigui mi continuamente.” Basando su palabranan riba pensamentonan cu nos ta haya den Salmo 49:8 y 62:12, el a recorda su disipelnan bondadosamente cu nan speransa pa bida eterno no tawata sinta serca hende, cu no por a percura salbacion, sino serca Dios.—Mateo 16:22-28, NW.

Aunke Pedro temporalmente a entrega na miedo y a nenga Hesus tres biaha, e combersacion aki y otronan mas sin duda a yuda prepar’e pa un recuperacion spiritual rapido. (Huan 21:15-19) Solamente 50 dia despues, Pedro cu curashi a lanta para dilanti di e multitud di hende na Herusalem pa duna testimonio di Hesus su resureccion. Den e simannan, lunanan y añanan cu a sigui, cu curashi el a confronta varios aresto, sota y encarselacion, poniendo asina un ehempel extraordinario di integridad sin miedo.—Echonan 2:14-36; 4:18-21; 5:29-32, 40-42; 12:3-5.

Kico nos ta siña di esaki? Bo a tuma nota di loke Hesus a haci pa expone y saca afo kico tawatin den Pedro su curason? Na prome luga, el  a scohe textonan apropiado pa enfoca Pedro su atencion riba e area spesifico di precupacion. Caba el a duna Pedro un chens pa reacciona di curason. Por ultimo, el a duna mas conseho biblico pa yuda Pedro ahusta su manera di pensa y sinti. Kisas bo ta sinti cu e nivel aki di siña hende ta mas aya di bo habilidad, pero laga nos considera dos experencia cu ta ilustra con preparacion y confiansa den Yehova por yuda cualkier un di nos sigui e ehempel di Hesus.

Con pa Saca Afo Kico Tin den Curason

Ora cu un tata cristian a haya sa cu su dos yiu hombernan den klas 1 y klas 2 a coi mangel for di lessenaar di e maestro, el a pone nan sinta y a rasona cu nan. En bes di djis ignora e asunto y bisa cu ta ‘co’i mucha’, e tata a conta: “Mi a purba saca afo kico den nan curason a motiva nan pa haci e cos malo aki.”

E tata a pidi e muchanan pa corda riba loke a sosode cu Acan, manera ta para skirbi den Hosue capitulo 7. Mesora e muchanan a capta e punto y a admiti nan fout. Nan consenshi tawata molestia nan caba. Anto e tata a laga nan lesa Efesionan 4:28, cu ta bisa: “Laga esun cu ta horta, no horta mas; ma mas bien, lag’e traha ... pa e por tin algo pa comparti cu esun cu ta den necesidad.” Loke a reforsa e conseho biblico mas ainda ta cu e tata a laga e muchanan compensa nan fout door di cumpra mangel y dun’e na e maestro.

E tata a bisa: “Asina cu nos tawata ripara cualkier mal inclinacion, nos a purba ranca nan cu raiz cu tur, y remplasa nan cu motivacionnan bon y puro door di rasona cu e muchanan.” Door di imita Hesus ora di siña nan yiunan, e mayornan aki definitivamente tawatin bon resultado den transcurso di tempo. Ambos yiu homber cu tempo a haya invitacion pa bira miembro di e personal di e oficina principal na Brooklyn Betel, caminda un di nan ainda ta sirbi despues di 25 aña.

Considera con un otro ruman mohe cristian a logra yuda su studiante di Bijbel. E studiante tawata asisti na reunion y participa den sirbishi y ya a expresa e deseo di batisa. Sinembargo, parce cu e tawata depende mucho riba su mes en bes di riba Yehova. E ruman mohe a conta: “Siendo un hende mohe soltero, el a bira mas independiente di loke el a realisa. Mi tawata precupa cu e tawata riba caminda pa haya un inzinking of un caida spiritual.”

Pues e Testigo a tuma e iniciativa pa rasona cu e studiante riba Mateo 6:33, y a anim’e pa ahusta su prioridadnan, pone e Reino na prome luga y confia den Yehova pa laga e asunto sali di e miho manera. E ruman a puntra e studiante francamente: “E echo cu bo ta biba riba bo mes tin biaha ta pone cu ta dificil pa bo depende riba otro persona, incluso riba Yehova?” E studiante a admiti cu casi el a stop di haci oracion. E publicado e ora ei a anim’e pa aplica e conseho cu tin na Salmo 55:22 y tira su carga riba Yehova pasobra, manera 1 Pedro 5:7 ta sigura nos, “e ta percura pa boso.” E palabranan ei a conmove su curason. E Testigo a bisa: “Esei tawata un di e poco biahanan cu mi a mir’e yora.”

Laga e Berdad Sigui Obra den Bo

Nos ta sinti gran goso ora nos mira e personanan cu nos ta siña reacciona faborabel riba e berdad biblico. Pero pa nos esfuersonan pa yuda hende por tin exito, nos mes mester ta un bon ehempel. (Hudas 22, 23) Nos tur tin cu  sigui “traha riba [nos] salbacion cu temor y temblamento.” (Filipensenan 2:12) Esei ta encera cu regularmente nos tin cu laga e lus di e Scritura briya riba nos propio curason, en busca di actitudnan, deseonan y cosnan cu nos gusta cu kisas nos mester corigi.—2 Pedro 1:19.

Por ehempel, bo celo pa actividadnan cristian a mengua ultimamente? Si ta asina, con bin? Un motibo lo por ta cu bo ta depende mucho riba bo mes. Con bo por sa si ta asina? Lesa Hageo 1:2-11, y reflexiona honestamente riba e manera cu Yehova a rasona cu e Hudiunan repatria. Caba puntra bo mes: ‘Mi ta demasiado precupa cu siguridad financiero y comodidad material? Realmente mi ta confia cu Yehova lo percura pa mi famia si mi duna asuntonan spiritual prioridad? Of mi ta sinti cu mi tin cu percura pa mi mes prome?’ Si bo tin cu haci ahuste den bo manera di pensa y sinti, no basila pa haci nan. Conseho biblico, manera loke nos ta haya na Mateo 6:25-33, Lucas 12:13-21 y 1 Timoteo 6:6-12, ta percura e base pa un punto di bista balansa di necesidadnan y pocesionnan material, un punto di bista cu ta garantisa nos Yehova su bendicion continuo.—Malakias 3:10.

E tipo di examinacion propio y honesto aki por laga bo mira con serio e situacion ta. Y emocionalmente e por ta duro pa admiti cu nos tin cierto debilidadnan ora hende hala nos atencion riba nan. Sinembargo, ora cu amorosamente bo tuma e iniciativa pa yuda bo yiu, bo studiante di Bijbel of asta bo mes—sin importa con personal of delicado e asunto kisas ta—por ta masha bon cu bo a dal e prome paso pa salba su bida of di bo mes.—Galationan 6:1.

Pero kico si ta parce cu bo esfuersonan no ta produciendo bon resultado? No sea lihe pa entrega. Ahusta un curason imperfecto por ta un asunto delicado, e por tuma hopi tempo y tin biaha ta frustrante. Pero tambe e por ta recompensador.

E hoben Eric, menciona na principio, cu tempo a recobra su sano huicio y a bolbe cuminsa “cana den berdad.” (2 Huan 4) Eric a bisa: “Ta te ora cu mi a realisa kico mi a perde, mi a bolbe bek na Yehova.” Cu yudansa di su mayornan, Eric awor ta sirbi Dios fielmente. Aunke un tempo e no tawata contento cu e esfuersonan continuo di su mayornan pa pon’e examina su propio curason, awor e ta aprecia profundamente loke nan a haci. E di: “Mi mayornan ta fantastico. Nunca nan no a stop di stima mi.”

Ta un expresion di bondad amoroso pa laga e Palabra di Dios briya riba curason di e personanan cu nos ta siña. (Salmo 141:5, NW) Sigui examina e curason di bo yiunan y di bo studiantenan di Bijbel pa wak si e personalidad cristian nobo di berdad ta sacando raiz den nan curason. Laga e berdad sigui obra den otro hende y den bo mes door di maneha “e palabra di berdad na un manera corecto.”—2 Timoteo 2:15.

[Plachi na pagina 29]

Hesus su palabranan a revela un debilidad den Pedro

[Plachi na pagina 31]

Uza e Bijbel pa saca afo kico tin den e curason