Hayando “un Perla di Gran Balor”

“E reino di shelo ta e meta cu hende ta forsa pa alcansa, y esnan cu ta haciendo esfuerso ta gar’e.”—MATEO 11:12, NW.

1, 2. (a) Ki cualidad poco comun Hesus a describi den un di su parabolanan di Reino? (b) Kico Hesus a conta den e parabola di e perla di gran balor?

TIN algo cu pa abo tin un balor asina grandi cu lo bo duna tur loke bo tin of sacrifica tur cos pa bo por hay’e? Aunke hende sa bisa cu nan ta dedica na nan empeño pa alcansa cierto meta—sea ta placa, fama, poder of posicion—ta masha poco biaha un hende ta haya algo cu e ta desea asina tanto cu e ta dispuesto pa entrega tur cos djis pa e por obten’e. Hesucristo a referi na e cualidad admirabel pero poco comun aki den un di su tantisimo comparacionnan tocante e Reino di Dios, comparacionnan cu el a conta cu ta pone bo pensa seriamente.

² E comparacion of parabola en particular aki cu Hesus a conta su disipelnan den priva, ta uno cu hopi bes hende ta referi na dje como e parabola di e perla di gran balor. Hesus a cont’e asin’aki: “E reino di shelo ta manera un comerciante cu ta busca perla bunita, y ora cu el a haya un perla di gran balor el a bai y a bende tur loke e tawatin y a cumpr’e.” (Mateo 13:36, 45, 46) Kico Hesus tawata kier pa su oyentenan siña for di e comparacion aki? Y con nos por beneficia di e palabranan di Hesus?

E Gran Balor di Perla

3. Dicon perla bunita tawata asina balioso den antiguedad?

³ For di antiguedad, perla tin gran balor como articulo di adorno. Un comentarista a bisa cu segun e autor Romano Plinio e Bieu, perla tawata ocupa e “rango mas halto entre tur cos di balor.” Distinto for di oro, plata of hopi piedra precioso, perla ta ser produci door di organismo bibo. Ta bon conoci cu cierto tipo di uster por comberti cos cu ta irita nan—manera por ehempel, fragmentonan chikito di piedra—den perla briyante door di cubri e cos cu ta irita nan cu varios capa di un producto cu yama nacar of parelmoer. Den tempo antiguo nan a saca e perlanan di mas bunita for di Lama Cora, Golfo Persico y Oceano Indio, pues leu for di e tera di Israel. Sin duda ta pesei Hesus a papia di “un comerciante [“biahero”, NW] cu ta busca perla bunita.” Pa haya perla cu ta realmente balioso, un persona mester a haci hopi esfuerso.

4. Kico ta e les principal di Hesus su parabola di e comerciante biahero?

⁴ Apesar cu for di hopi tempo perla bunita ta masha costoso, evidentemente e les principal  di Hesus su parabola, no ta encuanto nan balor monetario. Den e parabola aki, Hesus no a djis compara e Reino di Dios cu un perla di gran balor; el a hala atencion na “un comerciante cu ta busca perla bunita” y na su reaccion ora el a haya un perla asina. Distinto for di doño di un tienda comun y coriente, un dealer of comerciante biahero di perla tawata experto den e negoshi, un persona cu un wowo skerpi of cu e sensibilidad necesario pa discerni e cualidadnan estetico y e detayenan sutil cu ta haci un perla extraordinario. Lo el a sa ki ora un perla ta autentico y hende lo no por a nek e cu perla inferior of di imitacion.

5, 6. (a) Kico ta hopi remarcabel di e comerciante den Hesus su parabola? (b) E parabola tocante e tesoro scondi ta revela kico di e comerciante biahero?

⁵ Tin un cos mas relaciona cu e comerciante aki cu ta bon pa menciona. Kisas un comerciante comun y coriente lo a calcula prome e balor cu e perla lo tin riba mercado pa asina determina cuanto lo e paga p’e pa e por saca ganashi. Podise lo e pensa prome si tin demanda pa un perla asina, ya e por bend’e lihe. Cu otro palabra, lo e tawata interesa den rende su inversion mas lihe posibel, no den djis posee e perla. Pero esei no tawata e caso cu e comerciante den Hesus su parabola. Su interes no tawata den placa of ganashi material. De echo, e tawata dispuesto pa sacrifica “tur loke e tawatin”, kisas tur su bienesnan y propiedad personal, pa e por a obtene e perla cu e tawata busca pa basta tempo.

⁶ Den bista di mayoria comerciante, e cos cu e homber den Hesus su parabola a haci probablemente no tawata sabi. Un negoshante astuto lo no a pensa di tuma un decision riscante asina. Pero e comerciante den Hesus su parabola tawatin un otro sentido di balor. Su recompensa no tawata un of otro ganashi financiero, sino e goso y satisfaccion di posee algo di balor sin igual. Un comparacion paralelo cu Hesus a duna ta mustra esaki bon cla. El a bisa: “E reino di shelo ta manera un tesoro scondi den un cunucu, cual un hende a haya y a sconde; y yen di goso pa motibo di esei e ta bai y ta bende tur loke e tin, y ta cumpra e cunucu ei.” (Mateo 13:44) Si, e goso cu e homber a sinti di descubri y bira doño di e tesoro tawata suficiente pa e entrega tur loke e tawatin. Tin personanan asina awe? Tin un tesoro cu ta bal tal sacrificio?

Personanan Cu A Aprecia e Gran Balor di e Reino

7. Con Hesus a mustra cu e tawata bon na haltura di e gran balor di e Reino?

⁷ Ora Hesus tawata conta su parabola, e tawata papia tocante “e reino di shelo.” Hesus mes definitivamente a compronde e gran balor di e Reino. E relatonan di Evangelio ta duna testimonio hopi combencente di esei. Despues di Hesus su bautismo na aña 29 di nos era, el “a cuminsa predica y bisa: ‘Repenti, pasobra e reino di shelo ta serca.’” Durante tres aña y mei, el a siña multitud di hende tocante e Reino. El a biaha rond e pais, “di un stad y di un pueblito pa otro, proclamando y predicando e reino di Dios.”—Mateo 4:17; Lucas 8:1.

8. Kico Hesus a haci pa demostra loke e Reino lo logra?

⁸ Hesus a demostra tambe loke e Reino di Dios lo logra door di haci masha hopi milager den henter e pais. Entre otro, el a cura hende enfermo, alimenta esnan hambra, domina mal tempo y asta lanta hende morto. (Mateo 14:14-21; Marco 4:37-39; Lucas 7:11-17) Por ultimo, el a demostra su fieldad na Dios y na e Reino door di entrega su bida, muriendo como martir na un staca di tormento. Mescos cu e comerciante biahero tawata dispuesto pa entrega tur loke e tawatin  pa e “perla di gran balor”, Hesus tambe a biba y muri pa e Reino.—Huan 18:37.

9. Ki cualidad poco comun nos por a mira entre e prome disipelnan di Hesus?

⁹ Durante henter su bida Hesus no solamente a consentra riba e Reino, pero el a forma tambe un grupo chikito di siguido. E personanan aki tambe a compronde bon cla e gran balor di e Reino. Entre nan tawatin Andres, cu originalmente tawata un disipel di Huan Bautista. Ora cu Andres cu un otro disipel di Huan (muy probablemente un di e yiunan di Zebedeo cu tambe yama Huan) a tende Huan su testimonio cu Hesus tawata “e Lamchi di Dios”, nan a sinti nan mesora atrai na Hesus y a bira creyente. Pero esei no tawata fin di e asunto. Sin perde pa gana, Andres a bai serca su ruman homber Simon y a bis’e: “Nos a haya e Mesias.” Un poco despues, Simon (kende a bira conoci como Cefas of Pedro) y tambe Felipe y su amigo Natanael a reconoce Hesus como e Mesias. De echo, Natanael a ser conmovi pa bisa Hesus: “Abo ta e Yiu di Dios; abo ta e Rei di Israel.”—Huan 1:35-49.

Stimula na Accion

10. Con e disipelnan a reacciona ora Hesus a bin y yama nan poco tempo despues di nan prome encuentro?

¹⁰ Andres, Pedro, Huan y e otro disipelnan a keda hopi emociona ora cu nan a descubri e Mesias, y por compara nan emocion cu loke e comerciante biahero a sinti ora cu el a haya e perla di gran balor. Kico nan lo a haci awor? E Evangelionan no ta conta nos masha di loke nan a haci poco despues di nan prome encuentro cu Hesus. Aparentemente, mayoria di nan a regresa na nan rutina di bida. Sinembargo, mas o menos seis luna pa casi un aña despues, Hesus a bolbe topa Andres, Pedro, Huan y Santiago (e ruman homber di Huan) na nan negoshi di piscamento serca Lama di Galilea. * Ora Hesus a  mira nan, el a bisa: “Sigui mi, y lo mi haci boso piscado di hende.” Con nan a reacciona? E relato di Mateo ta bisa tocante Pedro cu Andres: “Mesora nan a laga e redanan para y a siguie.” Pa loke ta Santiago cu Huan, nos ta lesa: “Mesora nan a laga e boto y nan tata y a siguie.” E relato di Lucas ta agrega cu nan “a laga tur cos y a siguie.”—Mateo 4:18-22; Lucas 5:1-11.

11. Kico probablemente ta e motibo cu e disipelnan a reacciona asina rapido riba Hesus su yamada?

¹¹ E disipelnan su reaccion rapido tawata un decision impulsivo? Di ningun manera! Maske despues di nan prome contacto cu Hesus nan a regresa na e negoshi di piscamento di nan famia, no tawatin duda cu loke nan a mira y tende na e ocasion ei a haci un impresion profundo riba nan mente y curason. E periodo di casi un aña cu a pasa lo a duna nan suficiente tempo pa reflexiona riba e asuntonan ei. Awor a yega e momento pa tuma un decision. Nan lo ta manera e comerciante biahero kende su curason a ser conmovi asina tanto door di e descubrimento di e perla sumamente balioso cu, manera Hesus a describie, mesora “el a bai” y haci lo necesario pa cumpra e perla? Si. Loke nan a mira y tende a conmove nan curason. Nan a reconoce cu e momento pa actua a yega. Pues, manera e relato ta bisa nos, sin basila nan a laga tur cos para y a bira siguidonan di Hesus.

12, 13. (a) Den ki manera hopi hende cu a tende Hesus a reacciona? (b) Kico Hesus a bisa tocante su fiel disipelnan, y kico su palabranan ta indica?

¹² E disipelnan fiel aki tawata hopi distinto for di algun otro hende menciona mas despues den e relatonan di Evangelio! Ta hopi hende Hesus a cura of alimenta, pero nan simplemente a sigui cu nan cosnan di bida diario. (Lucas 17:17, 18; Huan 6:26) Tin hende asta a bula pipa ora Hesus a invita nan pa bira su siguido. (Lucas 9:59-62) Na contraste skerpi cu e hendenan ei, Hesus a bisa despues di su fiel disipelnan: “For di e dianan di Huan Bautista te awor e reino di shelo ta e meta cu hende ta forsa pa alcansa, y esnan cu ta haciendo esfuerso ta gar’e.”—Mateo 11:12, NW.

¹³ Kico e expresionnan “forsa” y “haciendo esfuerso” ta indica? Relaciona cu e verbo Griego for di cua e expresionnan aki ta deriva, Vine’s Expository Dictionary of Old and New Testament Words ta bisa: “E verbo ta indica un empeño diligente.” Anto e comentarista biblico Heinrich Meyer a declara relaciona cu e versiculo aki: “Di e manera aki ta describi e esfuerso y e lucha ansioso y iresistibel tras di e reino Mesianico cu ta yegando serca ... Asina intenso y ferviente (y no calmo y den expectativa mas) ta e interes pa cu e reino. [Esnan cu ta haci esfuerso] ta, pues anto, creyentenan [no atacadonan violento] cu ta lucha duro pa pose’e.” Mescos cu e comerciante biahero, e tiki personanan aki rapidamente a reconoce loke tawata realmente precioso, y di buena gana nan a entrega tur loke nan tawatin pa motibo di e Reino.—Mateo 19:27, 28; Filipensenan 3:8.

Mas Hende Ta Join e Buskeda

14. Con Hesus a prepara e apostelnan pa e trabou di predica e Reino, y kico tawata e resultado?

¹⁴ Segun cu Hesus a sigui den su ministerio, el a entrena y yuda mas hende pa busca pa alcansa e Reino. Prome, el a scohe 12 for di entre su disipelnan y a yama nan apostel, es decir, esnan manda door di dje. Hesus a duna e apostelnan aki instruccion detaya tocante con nan mester a efectua nan sirbishi y a spierta nan pa e retonan y dificultadnan cu tawatin nan dilanti. (Mateo 10:1-42; Lucas 6:12-16) Durante e siguiente dos añanan, nan a compaña Hesus riba su giranan di predicacion den henter e pais, y a disfruta di un relacion hopi pega cu ne. Nan a tende  su palabranan, mira su obranan poderoso y tambe su ehempel personal. (Mateo 13:16, 17) Tur esaki sin duda a conmove nan profundamente, asina tanto, cu mescos cu e comerciante biahero, nan a sigui tras di e Reino yen di celo y di henter nan alma.

15. Kico Hesus a bisa tawata e berdadero motibo cu su siguidonan tawatin pa alegra?

¹⁵ Fuera di e 12 apostelnan, Hesus “a nombra setenta otro, y a manda nan dos-dos su dilanti pa tur stad y luga, caminda e mes tawata pa bai.” Tambe el a conta nan tocante e pruebanan y dificultadnan cu lo a bin den futuro y a instrui nan pa bisa hende: “E reino di Dios a yega serca boso.” (Lucas 10:1-12) Ora cu e 70 hombernan a bolbe bek, nan tawata sumamente contento y a duna Hesus e informe aki: “Señor, asta e demoñonan ta someti na nos den bo nomber.” Pero kisas pa nan sorpresa, Hesus a revela cu un goso asta mas grandi tawata spera nan debi na nan celo pa e Reino. El a bisa nan: “No regociha den esaki, cu e spiritonan ta someti na boso, ma regociha cu boso nombernan ta skirbi den shelo.”—Lucas 10:17, 20.

16, 17. (a) Kico Hesus a bisa su fiel apostelnan riba e ultimo anochi cu el a pasa cu nan? (b) Ki goso y garantia e palabranan di Hesus a duna e apostelnan?

¹⁶ Finalmente, durante e ultimo anochi cu Hesus a pasa cu e apostelnan, 14 di nisan di aña 33 di nos era, el a institui loke a bira conoci como e Cena di Señor y el a manda nan conmemora e evento. Den transcurso di e anochi ei, Hesus a bisa e 11 apostelnan cu a keda: “Boso ta esnan cu a keda na mi lado den mi pruebanan; y mescos cu mi Tata a laga un reino pa mi, mi ta laga pa boso, pa boso come y bebe na mi mesa den mi reino, y boso lo sinta riba trononan pa husga e diesdos tribunan di Israel.”—Lucas 22:19, 20, 28-30.

¹⁷ E apostelnan su curason lo mester a yena cu gran goso y satisfaccion ora nan a tende Hesus bisa e palabranan ei! Hesus tawata ofrece nan e honor y privilegio di mas grandi cu cualkier hende lo por tin. (Mateo 7:13, 14; 1 Pedro 2:9) Mescos cu e comerciante biahero, nan a entrega hopi cos pa sigui Hesus y pa alcansa e Reino. Awor nan a haya e garantia cu e sacrificionan cu te asina leu nan a haci, no tawata en vano.

18. Ken mas, fuera di e 11 apostelnan, cu tempo lo a beneficia di e Reino?

¹⁸ E apostelnan cu tawata hunto cu Hesus e anochi ei lo no tawata e uniconan cu lo a beneficia di e Reino. Yehova su boluntad tawata pa un total di 144.000 hende drenta den e pacto di Reino como cogobernante cu Hesucristo den e glorioso Reino celestial. Ademas,  apostel Huan a mira den vision “un multitud grandi cu ningun hende no por a conta, ... para dilanti di e trono y dilanti di e Lamchi, ... bisando: ‘Salbacion ta di nos Dios, kende ta sinta riba e trono, y di e Lamchi.’” Esakinan ta e subditonan terenal di e Reino. *—Revelacion 7:9, 10; 14:1, 4.

19, 20. (a) Ki oportunidad tin habri pa hende di tur nacion? (b) Cua pregunta nos lo considera den e siguiente articulo?

¹⁹ Un poco prome cu Hesus a subi na shelo, el a ordena su fiel siguidonan: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso; y mira, mi ta cu boso semper, te na fin di mundo.” (Mateo 28:19, 20) Pues, hende for di tur nacion lo a bira disipel di Hesucristo. Nan tambe lo a fiha nan curason riba e Reino—sea ta pa un recompensa den shelo of riba tera—mescos cu e comerciante biahero a haci relaciona cu e perla bunita.

²⁰ E palabranan di Hesus ta indica cu e tarea di haci disipel lo a sigui te na “fin di mundo.” Pues anto, den nos tempo tin hende ainda cu mescos cu e comerciante biahero ta dispuesto pa entrega tur loke nan tin pa sigui tras di e Reino di Dios? Nos lo considera e pregunta aki den e siguiente articulo.

[Nota]

Bo Por Splica?

• Kico ta e les principal di e parabola di e comerciante biahero?

• Con Hesus a demostra cu el a compronde bon cla e gran balor di e Reino?

• Kico a pone Andres, Pedro, Huan y otro disipelnan reacciona mesora na momento cu Hesus a yama nan?

• Ki oportunidad maraviyoso tin dilanti di hende di tur nacion?

[Preguntanan di Estudio]

[Plachi na pagina 10]

‘Nan a laga tur cos y a sigui Hesus’

[Plachi na pagina 12]

Prome cu Hesus a subi na shelo, el a ordena su siguidonan pa haci disipel