Siguiendo cu Empeño Tras di e “Perla di Gran Balor” Awe

“E evangelio aki di e reino lo wordo predica den henter mundo como un testimonio.”—MATEO 24:14.

1, 2. (a) Kico e Hudiunan den tempo di Hesus tawata pensa di e Reino di Dios? (b) Kico Hesus a haci pa comparti e comprondemento corecto di e Reino, y cu ki resultado?

E Reino di Dios tawata un topico di gran interes serca e Hudiunan tempo cu Hesus tawata na mundo. (Mateo 3:1, 2; 4:23-25; Huan 1:49) Sinembargo na principio, mayoria di nan no a compronde plenamente con extenso e gobernacion di e Reino lo ta ni con lo e eherce su autoridad; tampoco nan no a compronde cu lo e ta un gobierno celestial. (Huan 3:1-5) Asta algun Hudiu cu a bira siguido di Hesus no a compronde plenamente kico e Reino di Dios ta ni kico nan mester haci pa ricibi e bendicion di bira cogobernante cu Cristo.—Mateo 20:20-22; Lucas 19:11; Echonan 1:6.

² Segun cu tempo a pasa, Hesus cu pasenshi a siña su disipelnan hopi les, incluso e parabola di e perla di gran balor cu nos a considera den e articulo anterior. Hesus a mustra nan cu ta hopi importante pa nan haci esfuerso den nan empeño pa sigui tras di e Reino celestial. (Mateo 6:33; 13:45, 46; Lucas 13:23, 24) Esaki lo mester a conmove nan curason profundamente pasobra poco despues nan a bira proclamadonan incansabel y yen di curashi di e bon nobo di Reino te na partinan leu di mundo, algo cu e buki di Echonan ta duna testimonio amplio di dje.—Echonan 1:8; Colosensenan 1:23.

3. Relaciona cu nos tempo, kico Hesus a bisa tocante e Reino?

 ³ Pero kico di awe? E bendicionnan di un paradijs riba tera bou di e Reino ta ser predica na miyones di hende. Den Hesus su gran profecia tocante e “fin di tempo” esta, e conclusion di e sistema di cosnan aki, el a declara spesificamente: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:3, 14; Marco 13:10) Tambe el a splica cu e tarea monumental aki lo mester tuma luga apesar di obstaculo- y retonan inmenso, asta persecucion. Sinembargo, el a duna e garantia aki: “Esun cu persevera te na fin, esei lo ta salba.” (Mateo 24:9-13) Tur esaki ta rekeri e clase di sacrificio propio y dedicacion cu e comerciante biahero den Hesus su parabola a desplega. Acaso awe tin personanan cu ta demostra tal fe y celo den nan empeño pa sigui tras di e Reino?

E Goso di Descubri e Berdad

4. Ki efecto e berdad di Reino tin riba hende awe?

⁴ E comerciante den Hesus su parabola tawata supercontento ora cu el a haya loke el a ripara ta un “perla di gran balor.” E goso ei a motiv’e pa haci tur loke tawata na su alcanse pa obtene e perla. (Hebreonan 12:1) Awe tambe e berdad tocante Dios y su Reino ta atrae y motiva hende di e mesun manera. Esaki ta laga nos corda riba e comentarionan di Ruman A. H. Macmillan kende a skirbi tocante su buskeda personal di Dios y di Su proposito pa humanidad den e buki Faith on the March (Fe en Marcha). El a bisa: “Loke ami a haya, miles di hende ta hayand’e ainda tur aña. Y nan ta hende mescos cu ami of abo, pasobra nan ta bin di tur nacionalidad, rasa, nivel di bida y nan ta di tur edad. Berdad no ta respeta ningun persona. E ta atrae tur clase di persona.”

5. Ki excelente resultado nos por mira den e raport di aña di sirbishi 2004?

⁵ Nos ta mira cu e palabranan ei ta berdad ya cu aña tras aña e bon nobo di e Reino di Dios ta motiva cientos di miles di persona di curason honrado pa dedica nan bida na Yehova y haci su boluntad. E aña di sirbishi 2004 (cu a core di september 2003 pa augustus 2004) no tawata un excepcion. Den e 12 lunanan ei, 262.416 persona a simbolisa nan dedicacion na Yehova publicamente mediante bautismo den awa. Esaki a tuma luga den 235 pais, caminda Testigonan di Yehova ta conduciendo 6.085.387 estudio di Bijbel semanal cu hende for di tur nivel di bida y for di hopi nacion, tribu y lenga, cu e meta pa yuda nan siña for di e Palabra di Dios e berdad cu ta duna bida.—Revelacion 7:9.

6. Kico ta e motibo cu atrabes di añanan tin un aumento continuo?

⁶ Kico a haci tur esaki posibel? No tin duda cu ta Yehova ta hala e personanan aki di disposicion corecto pa bin serca dje. (Huan 6:65; Echonan 13:48, NW) Sinembargo, nos no tin cu minimisa e actitud sin egoismo y e esfuersonan incansabel di parti di rumannan cu a gasta nan mes den nan empeño pa sigui tras di e Reino. Na edad di 79 aña, Ruman Macmillan a skirbi: “For di e prome bista cu mi a haya di e promesanan cu tin dilanti di humanidad enfermo y moribundo, mi speransa den loke e mensahe ei di Bijbel a revela no a mengua. Mesora mi a determina cu lo mi busca pa sa mas tocante loke Bijbel ta siña pa asina mi por yuda otro hende cu mescos  cu mi ta busca pa conoce e Dios Todopoderoso, Yehova, y su bon proposito pa cu humanidad.”

7. Ki experencia ta un ehempel tipico di e goso y empeño di personanan cu haya e berdad biblico?

⁷ Awe tambe nos ta mira e empeño ei entre Yehova su sirbidonan. Tuma por ehempel Daniela di Viena, Austria. El a bisa: “For di mi infancia, Dios tawata mi miho amigo. Semper mi kier a sa su nomber pasobra pa mi ‘Dios’ tawata mucho impersonal. Pero mi mester a warda te cu mi 17 aña, ora cu Testigonan di Yehova a bin na mi porta. Nan a splica mi tur loke mi kier a sa tocante Dios. Porfin mi a haya e berdad, y e tawata maraviyoso! Mi tawata asina emociona cu mi a cuminsa predica na tur hende.” No a tarda hopi cu Daniela su entusiasmo a pone cu su compañeronan di scol a cuminsa haci cherche di dje. Daniela a sigui conta: “Pero pa mi, esei tawata como si fuera mi a mira profecia di Bijbel cumpli, ya cu mi a siña cu Hesus a bisa cu su siguidonan lo ser odia y persigui pa causa di su nomber. Mi tawata masha felis y asombra.” Poco despues Daniela a dedica su bida na Yehova, el a batisa y a cuminsa haci esfuerso pa alcansa e meta di sirbi como misionero. Despues cu Daniela a casa, e cu su casa, Helmut, a cuminsa predica na hendenan di Africa, China, Filipinas y India cu tawata biba na Viena. Aworaki Daniela cu Helmut ta sirbi como misionero den parti suitwest di Africa.

Nan No Ta Entrega

8. Menciona un manera recompensador cu hopi ruman a demostra nan amor pa Dios y nan lealtad na su Reino.

⁸ En berdad sirbishi di misionero ta un di e maneranan cu e pueblo di Yehova djawe ta demostra nan amor pa Dios y nan lealtad na su Reino. Mescos cu e comerciante den e parabola di Hesus, esnan cu drenta den e sirbishi aki ta dispuesto pa biaha bai luganan leu pa causa di e Reino. Claro cu e misioneronan aki no ta bai pa busca e bon nobo di Reino; nan ta bai hib’e na hendenan cu ta biba den partinan remoto di e tera, pa siña nan y yuda nan bira disipel di Hesucristo. (Mateo 28:19, 20) Den hopi pais, nan tin cu soporta dificultadnan extraordinario. Pero nan perseverancia ta ser recompensa ricamente.

9, 10. Ki experencianan emocionante misioneronan ta disfruta di dje na luganan leu manera Republica Centroafricano?

⁹ Tuma por ehempel e Republica Centroafricano, caminda aña pasa 16.184 persona a asisti na e Conmemoracion di Cristo su morto, rond di shete biaha e cantidad di publicado di Reino den e pais ei. Como cu gran parti di e pais ei no tin coriente, hende por lo general ta haci nan actividadnan diario  pafo di cas den sombra di un palo. Pues naturalmente e misioneronan ta haci nan trabou di predica den mesun manera, nan ta conduci estudio di Bijbel pafo bou di palo cu ta duna hopi sombra. Pafo no solamente ta mas cla y mas fresco, pero e tin un bentaha mas. E hendenan tin un amor natural pa Bijbel, y pa nan ta masha normal pa papia tocante topiconan religioso mescos cu den otro culturanan ta normal pa papia tocante deporte of weer. Hopi bes hende cu cana pasa ta tuma nota di loke ta sosode y nan simplemente ta join e estudio.

¹⁰ Asina a sosode cu ora un misionero tawata conduci un estudio di Bijbel bou di palo, un yoncuman cu tawata biba na otro banda di caya a bin serca nan y a bisa cu como cu nan no a pasa serca dje, e misionero mester bin su cas y studia cu ne tambe. Claro cu e misionero gustosamente a haci esei, y e yoncuman ta progresando lihe. Den e pais ei, hopi bes polis ta para e Testigonan riba caya, no pa duna nan proces verbal of boet, sino pa pidi nan e edicionnan mas resien di e revistanan Toren di Vigilancia y Spierta! of pa gradici nan pa un articulo spesifico cu nan a gusta masha.

11. Apesar di prueba, kico misioneronan di hopi tempo ta pensa di nan sirbishi?

¹¹ Hopi di e rumannan cu a drenta den sirbishi di misionero 40 of 50 aña pasa, ainda ta sirbi fielmente den e campo ei. Nan ta un tremendo ehempel di fe y perseverancia pa nos tur! Durante e ultimo 42 añanan, un pareha a sirbi hunto como misionero den tres diferente pais. E esposo a bisa: “Tawatin cosnan dificil. Por ehempel, 35 aña largo nos a lucha contra malaria. Sinembargo, nunca nos a lamenta nos decision di bira misionero.” E esposa a agrega: “Semper nos tawatin masha hopi motibo pa ta gradicido. Sirbishi di veld ta masha dushi, y ta facil pa cuminsa estudio di Bijbel. Ora bo mira e studiantenan bin reunion y siña conoce otro, ta como si fuera cada biaha bo tin un get-together di famia.”

Nan Ta ‘Considera Tur Cos Como Perdida’

12. Con un persona ta expresa berdadero aprecio pa e balor di e Reino?

¹² Ora cu e comerciante biahero a haya un perla di gran balor, “el a bai y a bende tur loke e tawatin y a cumpr’e.” (Mateo 13:46) E actitud dispuesto aki pa entrega loke otro hende kisas ta considera balioso ta un caracteristica di esnan cu di berdad ta aprecia e balor di e  Reino. Apostel Pablo, como un di esnan cu lo a participa den e gloria di Reino hunto cu Cristo, a bisa: “Mi ta considera tur cos como [perdida] compara cu e balor superior di conoce Cristo Hesus mi Señor, pa kende mi a sufri [perdida] di tur cos, y ta considera nan como basura, pa mi por gana Cristo.”—Filipensenan 3:8.

13. Con un persona na Republica Checo a demostra su amor pa e Reino?

¹³ Den mesun manera, tin hopi hende awe cu ta dispuesto pa haci cambionan grandi den nan bida pa nan por gana e bendicionnan di e Reino. Por ehempel, na october 2003, un cabes di scol di 60 aña na Republica Checo a haya e buki pa yuda hende studia Bijbel titula Conocimentu cu Ta Hiba na Bida Eterno. Despues di a les’e, el a tuma contacto mesora cu Testigonan di Yehova den su area pa e por haya un estudio di Bijbel. El a haci excelente progreso spiritual y poco despues a cuminsa asisti na tur reunion. Pero kico di su plannan pa presenta su mes como candidato pa bira alcalde y pa drenta den e careda electoral pa bira senador? El a scohe pa drenta den un otro careda—e careda pa bida, como proclamado di Reino. El a bisa: “Mi a logra laga hopi literatura biblico cu mi alumnonan.” El a simbolisa su dedicacion na Yehova mediante bautismo den awa na un congreso na juli 2004.

14. (a) E bon nobo di Reino a motiva miyones di hende pa haci kico? (b) Ki preguntanan serio nos cada un lo por puntra nos mes?

¹⁴ Miyones di otro hende rond mundo a reacciona na un manera similar riba e bon nobo di Reino. Nan a sali for di e mundo malbado, kita nan personalidad bieu, laga nan compañeronan di antes y laga nan empeñonan mundano. (Huan 15:19; Efesionan 4:22-24; Santiago 4:4; 1 Huan 2:15-17) Dicon nan ta haci tur esaki? Pasobra nan ta aprecia e bendicionnan di e Reino di Dios mas cu cualkier otro cos cu e sistema actual por ofrece. Abo tambe ta sinti mescos pa cu e bon nobo di Reino? E ta motiva bo pa haci e cambionan necesario pa pone bo estilo di bida, bo norma- y balornan y bo metanan na harmonia cu loke Yehova ta rekeri? Si bo haci esei, lo bo ricibi bendicionnan rico awor y den futuro.

E Cosecha Ta Yegando Su Culminacion

15. Segun profecia, kico e pueblo di Dios lo a haci den e ultimo dianan?

¹⁵ E salmista a skirbi: “Bo pueblo lo pone su mes disponibel den e dia di bo poder.” Entre esnan cu a ofrece nan mes tin ‘hobennan manera serena’ y “un ehersito grandi” di “hende mohe cu ta anuncia e bon nobo.” (Salmo 68:11, NW; 110:3) Kico tawata e resultado di e diligencia y sacrificio propio di parti di e pueblo di Yehova—homber y mohe, hoben y bieu—den e ultimo dianan aki?

16. Duna un ehempel di e manera cu sirbidonan di Dios ta tuma iniciativa pa yuda otro hende siña tocante e Reino.

¹⁶ Na India un proclamado di Reino di tempo completo, esta un pionero, tawata puntra su mes con lo por yuda e mas cu dos miyon hendenan sordo cu tin den e pais siña tocante e Reino. (Isaias 35:5) El a dicidi di inscribi na un instituto na Bangalore cu ta duna les di  idioma di seña. Einan el a logra comparti e speransa di Reino cu hopi persona sordo, y a forma gruponan di estudio di Bijbel. Den un par di siman, mas cu dies persona a cuminsa asisti na e reunionnan na Salon di Reino. Despues, na un receptie di casamento, e pionero a topa un yoncuman sordo di Calcutta cu tawatin hopi pregunta y cu tawata hopi interesa pa sa mas tocante Yehova. Sinembargo, tawatin un problema. E yoncuman mester a regresa Calcutta, cu a keda un 1.600 kilometer leu, pa cuminsa bai universidad, y ei no tawatin Testigo cu conoce idioma di seña. Cu hopi esfuerso, el a logra combence su tata pa lag’e bai scol na Bangalore pa asina e por a sigui cu su estudio di Bijbel. El a haci excelente progreso spiritual, y despues di un aña el a dedica su bida na Yehova. E na su turno, a studia Bijbel cu varios persona sordo, incluso cu un amigo di infancia. Awor e oficina di sucursal na India ta haciendo areglo pa pioneronan siña idioma di seña pa yuda den e campo ei.

17. Conta kico abo a haya specialmente animante tocante e raport di aña di sirbishi 2004 na pagina 19 pa 22.

¹⁷ Na pagina 19 pa 22 di e revista aki bo ta haya e raport mundial di e actividad di sirbishi di veld di Testigonan di Yehova di e aña di sirbishi 2004. Tuma un poco tempo pa analis’e, y mira pa bo mes e evidencia cu awe e pueblo di Yehova rond mundo ta intensamente enfoca riba sigui tras di e “perla di gran balor.”

Sigui “Busca Prome e Reino”

18. Ki informacion Hesus no a inclui den e parabola di e comerciante biahero, y dicon no?

¹⁸ Si nos bolbe considera Hesus su parabola di e comerciante biahero, nos ta ripara cu Hesus no a bisa nada tocante con e comerciante lo a bai mantene su mes despues di a bende tur loke e tawatin. Pa nos ta realista, tin hende kisas ta puntra: ‘Con e comerciante lo a haya cuminda, paña y un dak riba su cabes, awor cu e no tawatin nada reserva pa steun riba dje? Ki beneficio e perla precioso tin p’e?’ Desde un punto di bista carnal, eseinan lo ta preguntanan rasonabel. Pero Hesus no a urgi su disipelnan: “Busca prome e reino di Dios y su husticia, y tur e cosnan aki lo wordo añadi na boso”? (Mateo 6:31-33) E punto principal di e parabola ta e necesidad di demostra debocion completo na Dios y celo pa e Reino. Tin un les den esaki pa nos?

19. Ki les importante nos por siña for di Hesus su parabola di e perla di gran balor?

¹⁹ Sea cu nos a caba di siña tocante e maraviyoso bon nobo of nos tin decadanan ta sigui cu empeño tras di e Reino y ta conta otro hende tocante su bendicionnan, nos tin cu sigui consentra nos interes y atencion riba e Reino. Nos ta bibando den tempo dificil, pero nos tin motibonan solido pa kere cu loke nos ta sigui tras di dje cu empeño ta real y sin igual, mescos cu e perla cu e comerciante a haya. Susesonan mundial y profecianan di Bijbel cu a cumpli ta duna prueba combencente cu nos ta bibando den “e fin di tempo” esta, den conclusion di e sistema di cosnan aki. (Mateo 24:3) Mescos cu e comerciante biahero, laga nos demostra di henter nos curason nos celo pa e Reino di Dios y alegra den e privilegio di proclama e bon nobo.—Salmo 9:1, 2.

Bo Ta Corda?

• Atrabes di añanan, kico a contribui na e aumento den adorado berdadero?

• Ki actitud nos ta mira serca esnan cu ta sirbi como misionero?

• Ki cambionan personanan a haci pa causa di e bon nobo di Reino?

• Ki les balioso nos por siña for di Hesus su parabola di e perla di gran balor?

[Preguntanan di Estudio]

 [Tabel na pagina 19-22]

RAPORT DI AÑA DI SIRBISHI 2004 DI TESTIGONAN DI JEHOVA MUNDIALMENTE

 (Wak volumen)

[Plachi na pagina 14]

“Berdad ... ta atrae tur clase di persona.”—A. H. Macmillan

[Plachi na pagina 15]

Daniela cu Helmut a predica den e campo di idioma stranhero na Viena

[Plachi na pagina 16, 17]

Mescos cu e comerciante biahero, misioneronan djawe ta ser bendiciona ricamente

[Plachi na pagina 17]

“Bo pueblo lo pone su mes disponibel”