Yehova Semper Ta Haci Loke Ta Corecto

“SEÑOR ta husto den tur su camindanan.”—SALMO 145:17.

1. Con bo ta reacciona ora cu un hende saca un conclusion robes tocante bo, y ki les nos por siña di tal experencia?

HENDE a yega di saca conclusion robes tocante bo, kisas door di cuestiona bo accionnan of motibonan, sin cu nan tawata na haltura di tur echo? Si ta asina, probablemente bo a sinti bo ofendi, y ta di compronde. For di esaki nos por siña un les importante: Ta sabi pa nos no bula saca conclusion ora nos no tin e cuadro completo di e asunto.

2, 3. Con algun hende ta reacciona riba relatonan biblico cu no tin suficiente detaye pa contesta tur pregunta, ma sinembargo kico Bijbel ta bisa nos di Yehova?

² Ta bon pa nos tene e les aki na mente ora ta trata di saca conclusion tocante Yehova Dios. Dicon? Pasobra tin cierto relatonan biblico cu na prome instante por parce straño of incomprendibel. E relatonan aki—podise tocante loke algun adorado di Dios a haci of tocante Dios su huicionan di pasado—kisas no ta contene suficiente detaye pa contesta tur nos preguntanan. Lamentablemente, tin hende ta critica tal relato, y asta ta cuestiona si Dios ta husto y recto. Sinembargo, Bijbel ta bisa nos cu Yehova “ta husto den tur su camindanan.” (Salmo 145:17) Su Palabra tambe ta sigura nos cu e “no ta actua na manera inhusto.” (Job 34:12; Salmo 37:28) Pues imagina bo, con Dios lo mester ta sinti ora cu hende ta saca conclusion robes tocante dje!

³ Laga nos considera cinco motibo pakico nos mester acepta e huicionan di Yehova. Anto caba, cu e motibonan ei na mente, nos lo analisa dos relato biblico cu algun hende ta haya dificil pa compronde.

Pakico Acepta e Huicionan di Yehova?

4. Dicon nos mester ta humilde ora nos ta considera e accionnan di Dios? Ilustra esei.

⁴ Na prome luga, nos mester ta humilde ora nos ta considera e accionnan di Dios ya cu Yehova sa tur e echonan envolvi y nos si no sa nan. Por ehempel: Imagina bo cu un hues cu tin un registro sobresaliente di ta tuma decisionnan imparcial, a dicta un sentencia den un caso. Kico lo bo pensa di un persona cu ta critica e hues su decision sin cu e ta na haltura di tur echo of sin cu realmente e ta compronde e leinan envolvi? Lo ta bobo pa un hende critica un asunto sin cu e tin tur informacion relaciona cu ne. (Proverbionan 18:13) Lo ta mas bobo ainda pa simpel ser humano critica “e Hues di henter mundo”!—Genesis 18:25.

5. Kico nos no mester lubida ora nos ta lesa relatonan biblico tocante huicionan cu Dios a ehecuta riba cierto personanan?

⁵ Un di dos motibo pa acepta e huicionan di Dios ta pasobra distinto for di hende, Dios por lesa curason. (1 Samuel 16:7) Su Palabra ta declara: “Ami, SEÑOR, ta scudriña curason, mi ta samina mente, pa duna cada un segun su conducta, segun e fruta di su echonan.” (Yeremias 17:10) Pues, ora nos ta lesa relatonan biblico tocante Dios su huicio riba cierto personanan, laga nos no lubida cu como cu Dios ta mira tur cos, el a tuma na cuenta pensamentonan, motibonan y intencionnan scondi cu no ta ser menciona den su Palabra.—1 Cronicanan 28:9.

6, 7. (a) Con Yehova a demostra cu e ta fiel na su normanan recto y husto asta si esei ta nifica un sacrificio grandi p’e? (b) Kico nos mester corda si nos lesa algo den Bijbel cu ta pone nos puntra nos mes si Dios a actua den un manera husto of corecto?

 ⁶ Tuma nota di un di tres motibo pa acepta e huicionan di Yehova: E ta fiel na su normanan husto asta si esei ta nifica un sacrificio grandi p’e. Considera un ehempel. Na momento cu Yehova a duna su Yiu como rescate pa libra humanidad obediente for di pica y morto, Yehova a satisface su propio normanan husto y recto. (Romanonan 5:18, 19) Sinembargo, pa para mira su Yiu stima sufri y muri riba un staca di tormento mester a causa Yehova e dolor di mas grandi cu e por a sinti. Kico esaki ta conta nos di Dios? Relaciona cu e “rescate cu Cristo Hesus a paga”, Bijbel ta bisa: “Esaki tawata afin di demostra [Dios] su mes husticia.” (Romanonan 3:24-26, NW) Un otro traduccion di Romanonan 3:25 ta bisa: “Esaki a mustra cu Dios semper ta haci loke ta corecto y husto.” (New Century Version) Si, e echo cu Yehova tawata dispuesto pa bai asina leu pa percura e rescate ta mustra cu e tin sumo respet pa “loke ta corecto y husto.”

⁷ Pues anto, si nos lesa algo den Bijbel cu ta pone algun hende puntra nan mes si Dios a actua na un manera husto of corecto, nos mester corda esaki: Yehova ta asina fiel na su normanan di husticia y rectitud cu e no a spar ni su propio Yiu di un morto doloroso. Acaso lo e compromete e normanan ei den otro asunto? Echo ta cu Yehova nunca ta viola su normanan husto y recto. Pues nos tin motibo amplio pa ta combenci cu semper e ta haci loke ta corecto y husto.—Job 37:23.

8. Dicon lo no ta cuadra pa hende imagina cu di un manera of otro Yehova falta husticia y rectitud?

⁸ Considera un di cuater motibo pakico nos tin cu acepta e huicionan di Yehova: Yehova a traha hende den Su imagen. (Genesis 1:27) Pues hende a ser crea cu atributonan mescos cu esnan di Dios, entre nan, un sentido di husticia y rectitud. Pues anto, lo no ta cuadra si nos sentido di husticia y rectitud ta laga nos imagina cu di un manera of otro Yehova si falta e cualidadnan ei. Si un cierto relato biblico ta perturba nos, nos tin cu corda cu debi na nos pica hereda, nos sentido di loke ta husto y corecto ta imperfecto. Yehova Dios, den kende su imagen nos a ser crea, ta perfecto den husticia y rectitud. (Deuteronomio 32:4) Lo ta ridiculo pa asta imagina cu hende lo por ta mas husto y recto cu Dios!—Romanonan 3:4, 5; 9:14.

9, 10. Dicon Yehova no ta obliga na splica of hustifica su accionnan na hende?

⁹ Un di cinco motibo pa acepta e huicionan di Yehova ta cu e ta “e Haltisimo riba henter tera.” (Salmo 83:18) Como tal, e no ta obliga na splica of hustifica su accionnan na hende. E ta e Gran Alfarero, y nos ta manera klei cu a ser forma den pochi, pa e trata manera e kier. (Romanonan 9:19-21) Ken nos ta—pochi cu el a traha—pa cuestiona su decisionnan of accionnan? Ora cu e patriarca Job tawatin e idea robes di Dios su trato cu humanidad, Yehova a corigie, puntrando: “Di berdad bo kier anula mi huicio? Bo kier condena mi pa abo por ta hustifica?” Despues Job a repenti ora el a realisa cu el a papia sin comprondemento. (Job 40:8; 42:6) Laga nos nunca haci e fout di critica Dios!

¹⁰ Ta bisto anto cu nos tin motibonan solido pa kere cu Yehova semper ta haci loke ta corecto. Awor cu nos tin e fundeshi aki pa compronde Yehova su manera di actua, laga nos analisa dos relato biblico cu tin hende kisas ta haya straño y incomprendibel. E prome tin di aber cu e accionnan di un adorado di Dios, y e otro ta un huicio cu Dios mes a ehecuta.

 Dicon Lot A Ofrece Su Yiunan Mohe na un Multitud Rabia?

11, 12. (a) Conta kico a sosode ora cu Dios a manda dos angel cu a bisti curpa humano na Sodoma. (b) Ki preguntanan e relato aki a lanta den mente di algun hende?

¹¹ Den Genesis capitulo 19, nos ta haya e relato di loke a sosode ora cu Dios a manda dos angel cu a bisti curpa humano na Sodoma. Lot a insisti pa e bishitantenan keda na su cas. Sinembargo, e anochi ei un multitud di homber di e stad a rondona e cas y a exigi Lot saca e bishitantenan pafo pa propositonan inmoral. Lot a purba rasona cu e multitud, pero sin exito. Den un intento pa proteha su huespetnan, Lot a bisa: “Pa fabor, mi rumannan, no actua cu maldad. Mira aki, mi tin dos yiu mohe cu nunca a yega di tin relacion cu homber; pa fabor, laga mi saca nan pafo pa boso y haci cu nan manera boso haya ta bon; solamente, no haci e hombernan aki nada, pasobra ta esaki ta e motibo cu nan a bin bou di e sombra di mi dak.” E multitud no kier a tende y casi a kibra e porta. Finalmente, e angelnan cu tawata di bishita a dal e multitud enlokeci cu cieguedad.—Genesis 19:1-11.

¹² Ta di compronde cu e relato aki a lanta pregunta den mente di algun hende. Nan ta puntra nan mes: ‘Con Lot por a purba proteha su huespetnan door di ofrece su yiu mohenan na un multitud yen di mal deseo? Acaso e no a actua robes, asta di un manera cobarde?’ En bista di e relato aki, dicon Dios lo a inspira Pedro pa yama Lot un “homber husto”? Lot a actua cu Dios su aprobacion? (2 Pedro 2:7, 8) Laga nos rasona riba e asunto aki pa nos no saca conclusion robes.

13, 14. (a) Kico nos mester tuma nota di dje den e relato biblico tocante e accionnan di Lot? (b) Kico ta mustra cu Lot no a actua na un manera cobarde?

¹³ Pa cuminsa, nos tin cu reconoce cu Bijbel no ta expresa aprobacion ni condenacion pa loke Lot a haci, simplemente e ta informa loke a tuma luga. Tampoco Bijbel no ta bisa nos kico Lot tawata pensa ni kico a motiv’e pa actua asina. Ora cu e bin bek den e “resureccion di ... e hustonan”, kisas lo e revela e detayenan.—Echonan 24:15.

¹⁴ Pero Lot no tawata un cobarde. El a hay’e den un situacion dificil. Door di bisa cu e bishitantenan a “bin bou di e sombra” di su dak, el a indica cu el a sintie obliga na duna nan proteccion y refugio. Pero esaki lo no tawata facil. E historiado Hudiu Yosefo ta informa cu e sodomitanan tawata “inhusto pa cu hende, y malbado pa cu Dios ... Nan a odia hende stranhero, y a abusa di nan mes cu practicanan di sodomia.” Sinembargo, Lot no  a cobardia pa e multitud yen di odio. Al contrario, el a sali bai pafo y a rasona cu e hombernan rabia ei. El a asta “sera e porta su tras.”—Genesis 19:6.

15. Dicon nos por bisa cu por ta masha bon cu Lot a actua a base di fe?

¹⁵ Kisas tin hende ta puntra: ‘Pero dicon Lot a ofrece su dos yiu mohenan na e multitud?’ En bes di asumi cu Lot tawatin mal intencion, pakico no considera algun posibilidad? Na prome luga, por ta masha bon cu Lot a actua a base di fe. Con asina? Lot sin duda tawata sa con Yehova a proteha Sara, casa di Abraham, omo di Lot. Corda cu como cu Sara tawata hopi bunita, Abraham a pidie pa bisa cu e tawata su ruman, pa evita cu nan lo a mata Abraham pa keda cu Sara. * Despues di esei nan a coi Sara hib’e den cas di Farao. Sinembargo, Yehova a interveni y a stroba e Farao di viola Sara. (Genesis 12:11-20) Ta posibel cu Lot tawatin fe cu su yiu mohenan tambe lo por a ser proteha di un manera similar. Un punto importante ta cu Yehova pa medio di su angelnan a interveni, y e mucha mohenan a ser proteha.

16, 17. (a) Den ki manera Lot kisas a purba shock of confundi e hombernan di Sodoma? (b) Sea cual sea tawata Lot su rasonamento, di kico nos por ta sigur?

¹⁶ Considera un otro posibilidad. Por ta tambe cu Lot a purba shock of confundi e hombernan. Kisas el a pensa cu e multitud lo no a desea su yiu mohenan debi na e pasion homosexual di e sodomitanan. (Hudas 7) Ademas, e mucha mohenan tawata comprometi pa casa cu hombernan di e stad, pues por ta masha bon cu den e multitud tawatin famia, amigo of socio di negoshi di Lot su prospectivo yernonan. (Genesis 19:14) Kisas Lot a spera cu pa motibo di tal laso, algun homber den e multitud lo por a sali na defensa di su yiu mohenan. Y un multitud dividi lo no ta dje peligroso ei. *

¹⁷ Sea cual sea tawata Lot su rasonamento y motibo, nos por tin sigur di esaki: Siendo cu Yehova semper ta haci loke ta corecto, lo e mester tawatin bon motibo pa considera Lot como un “homber husto.” Y si nos wak e accionnan di e multitud enlokeci di sodomita, por tin algun duda cu Yehova tawata plenamente hustifica pa ehecuta huicio riba e habitantenan di e stad malbado ei?—Genesis 19:23-25.

Dicon Yehova A Dal Uza Mata?

18. (a) Kico a sosode ora cu David a purba trece e Arca na Herusalem? (b) Ki pregunta e relato aki ta lanta?

¹⁸ Un otro relato cu kisas ta parce straño y incomprendibel pa algun hende ta trata David su intento pa trece e arca di pacto na Herusalem. Nan a pone e Arca riba un garoshi guia pa Uza y su ruman homber. Bijbel ta declara: “Ora nan a yega na e plenchi-di-bati-maishi di Nacon, Uza a saca su man na e arca di Dios y a coh’e tene, pasobra e bueynan a trompica. Y e rabia di SEÑOR a kima contra Uza, y Dios a dal e mata ayanan pa motibo di su ireverencia; y el a muri ayanan banda di e arca di Dios.” Algun luna despues, un di dos intento si tawatin exito ora cu nan a transporta e Arca den e manera cu Dios a spesifica, riba scouder di Levitanan Coatita. (2 Samuel 6:6, 7; Numbernan 4:15; 7:9; 1 Cronicanan 15:1-14) Podise tin hende ta puntra: ‘Dicon Yehova a reacciona asina duro? Uza solamente kier a scapa e Arca.’ Pa nos no saca conclusion robes, ta bon pa nos tuma nota di algun detaye util.

19. Dicon ta imposibel pa Yehova actua inhusto?

¹⁹ Nos tin cu corda cu ta imposibel pa Yehova actua inhusto. (Job 34:10) Pa e haci un cos inhusto lo ta un falta di amor di su parti, y nos sa for di nos estudio di Bijbel den su totalidad  cu “Dios ta amor.” (1 Huan 4:8) Ademas, e Scritura ta bisa nos cu “husticia y huicio ta e fundeshi di [Dios su] trono.” (Salmo 89:14) Pues anto, con Yehova hamas lo por actua inhusto? Si e mester haci esei, lo e debilita e fundeshi di su gobernacion supremo.

20. Pa ki motibo Uza lo mester tawata sa di e reglanan relaciona cu e Arca?

²⁰ Tene na mente cu Uza lo mester tawata sa miho. E Arca a representa Yehova su presencia. E Lei a bisa spesificamente pa ningun persona no autorisa no mishi cu ne, spiertando bon cla cu esnan cu viola e lei ei lo ser castiga cu morto. (Numbernan 4:18-20; 7:89) Pesei, no mester a trata e mudansa di e caha sagrado ei como algo di menos importancia. Uza evidentemente tawata un Levita, (aunke no un sacerdote), pues e mester tawata conoce e Lei. Ademas, añanan prome e Arca a keda transferi pa e cas di su tata pa ward’e na un luga sigur. (1 Samuel 6:20–7:1) El a keda einan pa un 70 aña, te ora cu David a dicidi di kit’e. Pues for di infancia Uza probablemente tawata sa di e leinan relaciona cu e Arca.

21. Den caso di Uza, dicon ta importante pa corda cu Yehova ta mira e motivacionnan di curason?

²¹ Manera nos a menciona anteriormente, Yehova por lesa curason. Siendo cu su Palabra ta yama loke Uza a haci un acto di “ireverencia”, esta, un falta di respet, Yehova kisas a mira un of otro motivacion egoista cu e relato no ta revela spesificamente. Por ta cu Uza tawata un homber orguyoso, inclina na bai mas aya di loke ta permiti? (Proverbionan 11:2) Acaso e echo cu el a guia e Arca publicamente—e Arca cu su famia a proteha den priva—a lag’e kere cu e ta masha cos? (Proverbionan 8:13) Uza tawatin asina tiki fe cu el a pensa cu Yehova su man ta mucho cortico pa wanta e caha sagrado cu a simbolisa Su presencia? Sea cual sea e caso, nos por tin sigur cu Yehova a haci loke tawata corecto. Probablemente el a mira algo den Uza su curason cu a pon’e ehecuta huicio rapido.—Proverbionan 21:2.

Un Base Solido pa Confiansa

22. Con nos por mira Yehova su sabiduria den e echo cu de bes en cuando su Palabra ta laga cierto detayenan afo?

²² Nos por mira Yehova su sabiduria incomparabel den e echo cu su Palabra de bes en cuando ta laga cierto detayenan afo. Di e manera ei Yehova ta duna nos chens pa demostra cu nos ta confi’e. A base di loke nos a considera, no ta bisto cu nos tin motibonan solido pa acepta e huicionan di Yehova? Si, ora nos ta studia e Palabra di Dios cu un curason sinsero y un mente habri, nos ta siña mas cu suficiente tocante Yehova pa keda combenci cu semper e ta haci loke ta husto y corecto. Pues anto, si algun relato biblico ta lanta preguntanan pa cua nos no por haya contestanan bon cla mesora, laga nos tin pleno confiansa cu Yehova a haci loke tawata corecto.

23. Ki confiansa nos por tin relaciona cu loke Yehova ta bai haci den futuro?

²³ Nos por tin mesun confiansa relaciona cu loke Yehova ta bai haci den futuro. Pues anto, nos por keda trankil cu ora e bin pa ehecuta huicio durante e benidero gran tribulacion, lo e no “destrui e husto hunto cu e malbado.” (Genesis 18:23) Su amor pa husticia y rectitud nunca lo no permitie haci esei. Nos por tin pleno confiansa tambe cu den e benidero mundo nobo, lo e satisface tur nos necesidadnan na e miho manera posibel.—Salmo 145:16.

[Nota]

Bo Ta Corda?

• Pa ki motibonan nos mester acepta e huicionan di Yehova?

• Kico por yuda nos pa no saca e conclusion robes tocante e echo cu Lot a ofrece su yiu mohenan na e multitud rabia?

• Ki factornan por yuda nos compronde dicon Yehova a dal Uza mata?

• Ki confiansa nos por tin relaciona cu loke Yehova ta bai haci den futuro?

[Preguntanan di Estudio]