Bo Ta Compara Bo Mes cu Otro Hende?

CUA di nos no a yega di topa un persona cu ta mas nechi cu nos, ta parce di ta mas popular, ta capta cos mas lihe of ta haya miho punto na scol? Kisas otro hende tin miho salu of un trabou cu ta duna nan mas satisfaccion, of nan tin mas exito of ta parce di tin mas amigo. Podise nan tin mas propiedad, mas placa, un auto mas nobo, of kisas gewoon nan ta parce mas felis. Ora nos tuma nota di e cosnan ei, nos ta compara nos mes cu otro hende? Compara bo mes cu otro hende ta un cos inevitabel? Dicon un cristian lo kier evita di haci esei? Y con nos por ta satisfecho sin compara nos mes cu un otro hende?

Dicon y Ki Ora Nos Sa Compara Nos Mes

Un teoria di e motibo pakico hende lo ta compara nan mes cu otro ta cu esei ta sirbi pa mantene of mehora nan balor propio. Hende hopi bes ta sinti nan satisfecho ora nan descubri cu nan ta mesun exitoso cu nan pareunan. Un otro idea ta cu nos ta compara nos mes cu otro hende den un intento pa reduci nos propio insiguridad, pa compronde kico ta nos capasidad y kico ta nos limite. Nos ta observa loke otro hende a logra. Si den hopi aspecto nan ta mescos cu nos y nan a alcansa cierto obhetivonan, nos lo por sinti cu nos tambe por alcansa metanan similar.

Mayoria biaha comparacion ta ser haci entre hende cu parce otro—hende di mesun sexo, di mesun edad y di mesun nivel social y cu conoce otro. Nos ta menos inclina na compara nos mes cu un otro persona si nos ta pensa cu tin un diferencia grandi entre nos y e otro persona. Cu otro palabra, un mucha mohe teenager comun y coriente ta compara su mes mas lihe cu su compañeranan di scol cu e ta compara su mes cu un modelo profesional. Y lo ta improbabel cu e modelo ta compara su mes cu e teenager.

Riba ki tereno hende ta compara nan mes cu otronan? Cualkier pertenencia of caracteristica cu ta ser considera balioso den un comunidad—sea ta inteligencia, beyesa, rikesa, paña—por ta e base pa haci tal comparacion. Sinembargo, nos tin e tendencia di haci comparacion den asuntonan cu ta interesa nos. Por ehempel, nos lo no envidia e tamaño di e coleccion di stampia di un di nos conocinan, a menos cu nos ta particularmente interesa den colecciona stampia.

 Compara nos mes cu otro hende ta causa un escala grandi di reaccion, cu ta varia for di satisfaccion te depresion, for di admiracion y un deseo di imita te na incomodidad of antipatia. Algun di e emocionnan aki ta perhudicial, y nan no ta compatibel cu cualidadnan cristian.

Comparacionnan Competitivo

Hopi hende cu ta lucha pa sali e “ganado” ora nan compara nan mes cu otro hende, ta desplega un spirito competitivo. Nan kier ta miho cu otro hende, y nan no ta keda satisfecho sino te ora cu nan ta miho. No ta dushi pa ta den compania di personanan asina. Nos amistad cu nan of nan relacion cu otro hende, semper ta yen di tension. Personanan asina no solamente falta humildad sino cu por lo general nan no ta aplica Bijbel su conseho di stima nan prohimo, ya cu nan actitud facilmente ta laga otro hende sinti nan mes inferior y humilia.—Mateo 18:1-5; Huan 13:34, 35.

Den un sentido nos ta perhudica hende door di laga nan sinti cu nan ta un “fracaso.” Segun un escritor, “nos fracasonan ta mas doloroso ainda ora ta parce cu hende den e mesun situacion cu nos, si a logra obtene e pocesionnan cu nos kier.” Pues anto, un spirito competitivo ta proboca envidia, rencor y malcontento pa cu un persona debi na su pertenencianan, su prosperidad, posicion, reputacion, bentahanan, etcetera. Y esaki ta hiba na mas competencia, pues, e ta un circulo vicioso. Bijbel ta condena ‘instigamento di competencia.’—Galationan 5:26, NW.

Hende envidioso ta sinti nan balor propio herida ora otronan logra algo. Anto nan ta purba recupera nan balor propio door di rebaha e logronan di nan rivalnan. Tal reaccion lo por parce algo insignificante, pero si no reconoce nan pa loke nan ta y frena nan, nan por hiba na malecho malicioso. Considera dos relato biblico caminda envidia tawata un factor.

Tempo cu Isaak tawata biba meimei di e Filisteonan, el a ser bendiciona cu “crianan di bestia chikito y crianan di baca y gran cantidad di sirbido, asina cu e Filisteonan tawata envidi’e.” Nan a reacciona door di dempel e posnan cu Isaak su tata, Abraham, a coba, y nan rei a pidi Isaak bai for di e area. (Genesis 26:1-3, 12-16) Nan envidia tawata malicioso y destructivo. Simplemente nan no por a soporta pa Isaak sigui gosa di prosperidad meimei di nan.

Siglonan despues, David a destaca riba campo di bataya. E mohenan di Israel a aclama su hazañanan cantando: “Saul a mata su milnan, y David su dies milnan.” Aunke Saul a haya un grado di elogio, el a considera e echo cu nan a compar’e cu David un humiliacion, y envidia a lanta den su curason. For di e momento ei en adelante, el a keda cu un rabia riba David. Poco despues el a haci e prome di varios intento pa mata David. Pues, envidia por hiba na maldadnan grandi!—1 Samuel 18:6-11.

Pesei si ora nos compara nos mes cu otronan—cu nan hazañanan of bentahanan—anto esei lanta sintimentonan di envidia of di competencia, nos mester tene cuidou! Esakinan ta emocionnan perhudicial, cu no ta compatibel cu Dios su manera di pensa. Pero prome cu nos analisa con por resisti e actitudnan ei, laga nos considera un otro cos cu ta pone hende compara nan mes cu otronan.

Evaluacion Propio y Contentamento

‘Mi ta inteligente, atractivo, competente, den bon condicion fisico, autoritativo, amabel? Te na ki grado?’ Masha poco biaha nos ta para dilanti spiel y puntra nos mes e cosnan aki. Sinembargo, segun un escritor, “indirectamente, tal preguntanan hopi bes ta bin den nos mente y silenciosamente nan ta produci contesta cu ta duna nos mas o menos un satisfaccion.” Un persona cu no ta sigur di loke e  por logra, kisas ta reflexiona riba e cosnan aki sin ningun inclinacion pa competi of sin un sintimento di envidia. Simplemente e ta evaluando su mes. Esaki no ta necesariamente malo. Sinembargo, e manera corecto di hacie no ta door di compara nos mes cu otro hende.

Nos cada un tin diferente habilidad cu ta depende di varios factor. Semper lo tin hende cu ta parce di ta mas miho cu nos. Pesei, en bes di observa nan cu envidia, nos mester midi nos actividad en relacion cu Dios su normanan husto, locual ta un guia sigur di loke ta bon y loke ta malo. Yehova ta interesa den loke nos ta individualmente. E no tin nodi compara nos cu ningun hende. Apostel Pablo ta conseha nos: “Laga cada un samina su mes obra, y e ora ei e lo tin motibo pa gaba solamente encuanto su mes, y no encuanto un otro.”—Galationan 6:4.

Con pa Resisti Envidia

Como cu tur hende ta imperfecto, nos lo tin cu haci esfuerso vigoroso y continuo pa resisti envidia. Ta facil pa sa loke e Scritura ta bisa nos: “Den mustra honor na otro hiba delantera.” Pero ta mas dificil pa aplic’e. Pablo a reconoce su propio inclinacion pa haci pica. Pa lucha contra esei, e tawatin cu ‘golpia su curpa y hacie su esclabo.’ (Romanonan 12:10, NW; 1 Corintionan 9:27) Pa nos, kisas esei ta nifica cu nos tin cu resisti pensamentonan competitivo, y remplasa nan cu pensamentonan positivo. Nos tin cu haci oracion, y pidi Yehova yuda nos pa nos “no pensa mas halto di [nos] mes cu [nos] mester pensa.”—Romanonan 12:3.

Studia Bijbel y medita riba dje tambe ta yuda. Por ehempel, pensa riba e futuro Paradijs cu Dios ta priminti. E tempo ei tur hende lo tin pas, bon salu, cuminda na abundancia, cas comodo y trabou cu ta duna satisfaccion. (Salmo 46:8, 9; 72:7, 8, 16; Isaias 65:21-23) Acaso un hende lo sinti e necesidad di competi? No. Lo no tin ningun motibo pa haci esei. Ta berdad cu Yehova no a percura tur detaye di e manera cu bida lo ta e tempo ei, pero nos por supone rasonablemente cu tur hende lo por ocupa nan mes cu interesnan y habilidadnan cu nan gusta. Un persona kisas ta studia astronomia, un otro ta diseña bunita tela. Pakico nan lo tin cu envidia otro? E actividadnan di nos prohimo lo ta un estimulo, no un motibo pa sinti rencor. Tal sintimentonan lo ta cos di pasado.

Si esei ta e tipo di bida cu nos ta desea, anto nos lo no tin cu cultiva e mesun actitud for di awor? Ya caba nos ta gosa di un paradijs spiritual, liber di e tantisimo problemanan di e mundo rondo di nos. Siendo cu lo no tin un spirito competitivo den Dios su mundo nobo, nos tin realmente bon motibo pa evit’e for di awor.

Kiermen anto cu ta malo pa compara nos mes cu otro hende? Of tin biaha cu esei por ta apropiado?

Comparacion Apropiado

Ora cu hende ta compara nan mes cu otronan esei hopi biaha tin como consecuencia cu nan ta sinti nan amarga of depresivo, pero no ta semper mester ta asina. En conexion cu esaki, tuma nota di e conseho di apostel Pablo: “[Sea] imitadonan di esnan cu pa medio di fe y pasenshi ta hereda e promesanan.” (Hebreonan 6:12) Haciendo esfuerso pa cultiva e mesun  cualidadnan cu Yehova su sirbidonan di tempo antiguo tawatin, por ta productivo. Ta berdad cu pa logra esei nos lo tin cu compara nos mes cu algun persona. Sinembargo, esei por yuda nos mira ehempelnan cu nos por imita y areanan caminda nos por mehora.

Considera Yonatan. Den un sentido, e tawatin motibo pa ta envidioso. Como yiu mayo di Rei Saul di Israel, Yonatan kisas un tempo tawatin e speransa cu ta e lo bira rei, pero Yehova a scohe e hoben David, un homber cu tawata 30 aña mas jong cu ne. En bes di carga rencor, Yonatan a destaca pa motibo di su amistad sin egoismo y su sosten pa David como Yehova su rei designa. Yonatan tawata realmente un homber spiritual. (1 Samuel 19:1-4) Distinto for di su tata, kende a mira David como un rival, Yonatan a reconoce Yehova su man den e asunto y a somete na Su boluntad; e no a compara su mes cu David, puntrando: “Dicon David y no ami?”

Entre nos rumannan cristian, nunca nos no mester sinti nos menasa, como si fuera otro rumannan ta purba supera nos of tuma nos luga. Rivalidad ta inapropiado. Cristiannan maduro ta ser caracterisa pa cooperacion, union y amor, no pa competencia. Sociologo Francesco Alberoni a bisa: “Amor ta e gran enemigo di envidia. Si nos ta stima un persona, nos kier loke ta bon p’e, y nos ta felis ora e tin exito y ta felis.” Si un otro ruman den e congregacion cristian keda scohi pa un cierto privilegio, e cos amoroso lo ta pa keda contento cu esei. Asina Yonatan tawata. Mescos cu ne, nos tambe lo ser bendiciona si fielmente nos ta apoya e rumannan cu ta sirbi den puesto di responsabilidad den Yehova su organisacion.

Ta un bon cos pa nos admira e excelente ehempel di otro rumannan cristian. Comparando nos mes na un manera balansa cu nan, por stimula nos pa imita nan fe na un manera sano. (Hebreonan 13:7) Pero si nos no tene cuidou, imitacion por bira competencia. Si nos ta sinti cu un persona cu nos ta admira tin hopi mas exito cu nos y nos ta purba rebah’e of critic’e, e ora ei nos intento di imit’e a para bira envidia.

Ningun hende imperfecto por ta un modelo ideal. Pesei e Scritura ta bisa: “Sea imitadonan di Dios, manera yiunan stima.” Tambe e ta bisa: “Cristo . . . a sufri pa boso, lagando un ehempel pa boso, pa boso sigui den su pasonan.” (Efesionan 5:1, 2; 1 Pedro 2:21) E cualidadnan di Yehova y Hesus—nan amor, cariño, empatia y humildad—mester ta loke nos ta haci esfuerso pa imita. Nos mester tuma tempo pa compara nos mes cu nan cualidadnan, propositonan y manera di haci cos. Comparando nos mes cu nan por enrikece nos bida, y duna nos guia confiabel, stabilidad y siguridad. Tambe esei por yuda nos alcansa e estatura di hende homber y mohe cristian madura. (Efesionan 4:13) Si nos consentra riba haci nos best pa imita nan ehempel perfecto, definitivamente nos lo ta menos inclina na compara nos mes cu otro hende.

[Plachi na pagina 29]

Rei Saul a cuminsa envidia David

[Plachi na pagina 31]

Yonatan nunca a mira David, cu tawata mas jong cu ne, como un rival