Con pa Proteha Nos Identidad Cristian

“‘Boso ta mi testigonan’, SEÑOR ta declara.”—ISAIAS 43:10.

1. Ki clase di hende Yehova ta hala na su mes?

ORA bo ta na Salon di Reino, wak bon rond di bo. Ken bo ta mira na e luga di adoracion aki? Kisas bo ta mira hobennan sinsero kendenan cu atencion ta absorba sabiduria biblico. (Salmo 148:12, 13) Probablemente lo bo observa cabesnan di famia cu ta haci esfuerso pa agrada Dios mientras nan ta biba den un mundo cu ta baha e nivel di bida di famia. Podise lo bo mira rumannan stima di edad, cu firmemente ta cumpli cu nan dedicacion na Yehova apesar di e dolor- y malesanan di edad avansa. (Proverbionan 16:31) Nan tur stima Yehova profundamente. Y Yehova gustosamente a forma un relacion cu nan. E Yiu di Dios a confirma: “Ni un hende no por bin serca mi, si no ta e Tata cu a manda mi a hal’e.”—Huan 6:37, 44, 65.

2, 3. Dicon por ta dificil pa keda cu un bista bon cla di nos identidad cristian?

² Nos no ta contento di ta parti di un pueblo cu tin Yehova su aprobacion y bendicion? Sinembargo, por ta dificil pa mantene un bista bon cla di nos identidad como cristian den e “temponan trabahoso” aki. (2 Timoteo 3:1) Vooral pa hobennan cu ta lanta den famianan cristian esaki no ta facil. Un hoben asina a admiti: “Aunke mi tawata asisti na reunionnan  cristian, mi no tawatin ningun meta spiritual bon defini y francamente, mi no a desaroya un deseo personal di sirbi Yehova.”

³ Otro cristiannan, apesar di tin e deseo sinsero di sirbi Yehova, kisas ta ser distrai door di presion intenso di nan pareunan, door di influencia mundano y door di tendencianan pecaminoso. Ora nos ta bou di hopi presion, esei pocopoco por pone nos perde nos identidad cristian. Por ehempel, hopi hende den e mundo djawe ta considera e normanan di Bijbel encuanto moralidad como ouderwets of irealistico pa nos mundo moderno. (1 Pedro 4:4) Tin hende ta haya cu no ta importante pa adora Dios den e manera cu e ta manda. (Huan 4:24) Den su carta na e Efesionan, Pablo ta papia di e “spirito” di mundo, esta, mundo su actitud dominante. (Efesionan 2:2) E spirito ei ta pone presion riba hende pa adapta na e manera di pensa di un sosiedad cu no conoce Yehova.

4. Con Hesus a enfatisa e necesidad pa nos proteha e identificacion cla cu nos tin como cristian?

⁴ Sinembargo, como sirbidonan dedica di Yehova, nos ta realisa cu lo ta un tragedia pa un di nos—hoben of bieu—si nos perde nos identificacion cristian. Un punto di bista sano di e identidad cristian por ta basa solamente riba e normanan di Yehova y riba loke e ta spera di nos. Esaki ta rasonabel, ya cu nos ta crea den su imagen. (Genesis 1:26; Mikeas 6:8) Bijbel ta compara e identificacion cla cu nos tin como cristian cu paña cu nos ta bisti pa tur hende mira. Relaciona cu nos tempo, Hesus a spierta: “Mira, mi ta bin manera ladron. Bendiciona ta esun cu keda lanta y keda cu su pañanan bisti, pa e no cana sunu y hende mira su berguensa.” * (Revelacion 16:15) Nos no kier kita nos cualidadnan y normanan di conducta cristian y permiti e mundo di Satanas moldea nos. Si esei mester sosode, nos lo perde e “pañanan” aki. Un situacion asina lo ta lamentabel y bergonsoso.

5, 6. Dicon stabilidad spiritual ta importante?

⁵ Un bista bon cla di nos identidad cristian tin un influencia grandi riba e manera cu nos ta hiba nos bida. Con asina? Si un adorado di Yehova mester perde su sentido di identidad, lo e por resulta distrai, sin un rumbo of metanan bon defini. Bijbel bes tras bes ta spierta pa tene cuidou cu un estado indeciso asina. Disipel Santiago a adverti: “Esun cu duda ta manera un ola di lama cu ta wordo lastra y tira door di biento. Pasobra no laga e hende ei spera cu e lo ricibi algo di Señor, siendo un hende di curason dobel [indeciso], inconstante den tur su camindanan.”—Santiago 1:6-8; Efesionan 4:14; Hebreonan 13:9.

⁶ Con nos por proteha nos identidad cristian? Kico por haci nos mas conciente di nos gran privilegio di ta adoradonan di e Haltisimo? Considera e siguiente maneranan.

 Establece Bo Identidad Cristian Firmemente

7. Dicon ta bon pa nos roga Yehova pa samina nos?

⁷ Continuamente fortifica bo relacion cu Yehova. E cos mas balioso cu un cristian tin ta su relacion personal cu Dios. (Salmo 25:14; Proverbionan 3:32) Si nos cuminsa duda di nos identidad cristian, ta tempo pa nos samina cuidadosamente e calidad y profundidad di e relacion aki. E salmista apropiadamente a roga Yehova: “Scudriña mi, o SEÑOR, y pone mi na prueba; samina mi mente y mi curason.” (Salmo 26:2) Pakico tal examinacion ta importante? Pasobra nos no por confia cu nos mes lo por haci un bon evaluacion di nos propio motivacionnan y inclinacionnan di mas intimo. Ta Yehova so por compronde e persona cu nos ta di paden—nos motivacionnan, pensamentonan y emocionnan.—Yeremias 17:9, 10.

8. (a) Con nos por beneficia ora Yehova ta laga nos pasa door di prueba? (b) Kico a yuda abo haci progreso como cristian?

⁸ Door di pidi Yehova pa samina nos, nos ta invit’e pa pone nos na prueba. E por permiti situacionnan desaroya cu ta revela nos berdadero motivacion y e condicion di nos curason. (Hebreonan 4:12, 13; Santiago 1:22-25) Nos mester acepta tal prueba di buena gana pasobra nan ta duna nos un oportunidad di demostra con profundo nos lealtad na Yehova ta. E pruebanan ei por mustra si nos ta “completo, sin falta di nada.” (Santiago 1:2-4) Anto ora nos ta bou di prueba, nos por crece spiritualmente.—Efesionan 4:22-24.

9. Pakico ta necesario pa combence nos mes cu loke Bijbel ta siña ta berdad?

⁹ Studia pa bo combence bo mes di berdad biblico. Nos sentido di identidad como sirbido di Yehova por debilita si e no ta solidamente basa riba conocemento di e Scritura. (Filipensenan 1:9, 10) Cada cristian—hoben y bieu—tin cu combence su mes te ora cu e ta satisfecho cu loke e ta kere realmente ta e berdad cu bo ta haya den Bijbel. Pablo a urgi su rumannan den fe: “Samina tur cos; tene duro na loke ta bon.” (1 Tesalonicensenan 5:21) Cristiannan hoben cu ta pertenece na famianan temeroso di Dios tin cu realisa cu nan no por ta cristiannan berdadero simplemente a base di e fe di nan mayornan. Salomon su propio tata, David, a anim’e pa “conoce e Dios di bo tata, y sirbie cu henter bo curason.” (1 Cronicanan 28:9) Lo no tawata basta pa e hoben Salomon djis wak con su propio tata a cultiva fe den Yehova. Salomon mes mester a siña conoce Yehova, y el a hacie. El a suplica Dios: “Duna mi sabiduria y conocemento, pa mi por sali y drenta dilanti di e pueblo aki.”—2 Cronicanan 1:10.

10. Dicon no tin nada malo den haci preguntanan honesto cu e motivacion corecto?

¹⁰ Fe firme ta funda riba conocemento. Pablo a declara: “Fe ta bin for di tendemento.” (Romanonan 10:17) Kico e tawata kiermen cu esei? E tawata kiermen cu door di alimenta nos mes cu e Palabra di Dios, nos ta fortalece nos fe y confiansa den Yehova, den su promesanan y den su organisacion. Haciendo preguntanan honesto tocante Bijbel por hiba na contestanan cu ta trankilisa nos mente. Ademas, na Romanonan 12:2, nos ta haya e conseho aki di Pablo: “Comproba kico ta e bon y agradabel y perfecto boluntad di Dios.” Pero con nos por logra esei? Door di adkiri “e conocemento [“exacto”, NW] di e berdad.” (Tito 1:1) E spirito di Yehova por yuda nos compronde asta topiconan dificil. (1 Corintionan 2:11, 12) Nos tin cu pidi Dios su yudansa den oracion ora nos tin problema pa compronde algo. (Salmo 119:10, 11, 27) Yehova kier pa nos compronde su Palabra, ker’e y obedec’e. Gustosamente Yehova ta acepta preguntanan honesto, haci cu e motivacion corecto.

Sea Determina pa Agrada Dios

11. (a) Cua deseo normal por bira un trampa pa nos? (b) Con nos por tuma un curashi pa resisti presion di nos pareunan?

¹¹ Trata na agrada Dios, no hende. Ta masha normal pa establece nos identidad te na cierto grado door di pertenece na un grupo.  Tur hende tin mester di amigo of amiga, y nos ta sinti bon ora nos ta ser acepta. Durante adolecencia—y tambe mas despues den bida—presion di pareunan por ta hopi fuerte, y por lanta un deseo desespera pa imita of agrada otro hende. Pero no ta semper amigo- y pareunan tin nos bienestar na pecho. Tin biaha e unico cos cu nan kier ta pa un hende compaña nan den haci malo. (Proverbionan 1:11-19) Ora un cristian sucumbi na e presion negativo di su pareunan, por lo general e ta purba sconde su identidad. (Salmo 26:4) Apostel Pablo a spierta: “No laga e manera di pensa di e mundo aki forma boso.” (Romanonan 12:2, BPK) Yehova ta duna nos e fortalesa interno necesario pa nos por resisti cualkier presion di pafo.—Hebreonan 13:6.

12. Ki principio y ki ehempel por fortifica nos pa keda firme ora ta trata di nos confiansa den Dios?

¹² Ora cu presion di pafo ta menasa di daña nos sentido di identidad cristian, ta bon pa nos corda cu nos lealtad na Dios ta hopi mas importante cu opinion publico of cu e tendencianan di e mayoria. E palabranan di Exodo 23:2 ta sirbi como un principio safe: “No sigui e mayoria den hacimento di maldad.” Ora cu mayoria di e Israelitanan a duda di Yehova su habilidad di cumpli cu Su promesa, Caleb a nenga firmemente di bai tras di e mayoria. E tawatin sigur cu e promesanan di Dios tawata digno di confiansa, y el a ser recompensa ricamente pa su posicion. (Numbernan 13:30; Hosue 14:6-11) Abo tambe ta dispuesto pa resisti e presion di opinion popular afin di proteha bo relacion cu Dios?

13. Dicon e proceder sabi ta pa laga hende sa cu nos ta cristian?

¹³ Laga hende sa cu bo ta un cristian. E dicho cu un bon ofensivo ta e miho defensa ta cierto ora nos ta defende nos identidad cristian. Den tempo di Esdras, ora cu e Israelitanan fiel a haya oposicion contra nan esfuerso pa haci e boluntad di Yehova, nan a declara: “Nos ta e sirbidonan di e Dios di shelo y tera.” (Esdras 5:11) Si e reaccion y critica di hende hostil afecta nos, nos por paralisa di miedo. Si semper nos kier purba agrada tur hende, esei lo debilita nos efectividad. Pues no sea intimida. Semper ta bon pa laga hende sa bon cla cu bo ta un Testigo di Yehova. Den un manera respetuoso pero firme, bo por splica otro hende tocante bo norma- y balornan, bo creencianan y bo posicion como un cristian. Laga hende sa cu bo ta determina pa mantene Yehova su normanan halto relaciona cu asuntonan di moralidad. Splica bon cla cu lo bo no compromete bo integridad cristian. Mustra cu bo ta orguyoso di bo normanan moral. (Salmo 64:10) E echo cu bo ta destaca como un cristian firme por fortifica bo, proteha bo y asta motiva algun hende pa busca informacion tocante Yehova y su pueblo.

14. Dicon bofon y oposicion no mester desanima nos?

¹⁴ Si, algun hende kisas lo haci bofon di bo of  opone bo. (Hudas 18) Si otro hende no ta reacciona faborabel riba bo esfuerso pa splica nan tocante bo norma- y balornan, no desanima. (Ezekiel 3:7, 8) Sin importa con determina bo ta, nunca lo bo no combence hende cu no kier ser combenci. Corda riba Farao. Ningun plaga ni milager—ni sikiera e morto di su yiu primogenito—no por a combence Farao cu Moises tawata papia na nomber di Yehova. Pesei no laga miedo di hende paralisa bo. Confiansa y fe den Dios por yuda nos vence miedo.—Proverbionan 3:5, 6; 29:25.

Siña for di Pasado, Traha pa Futuro

15, 16. (a) Kico ta nos herencia spiritual? (b) Con nos por beneficia door di medita cu yudansa di e Palabra di Dios riba nos herencia spiritual?

¹⁵ Aprecia bo herencia spiritual. Cu yudansa di e Palabra di Dios, cristiannan lo beneficia si nan medita riba nan herencia spiritual rico. E herencia aki ta encera e berdad di e Palabra di Yehova, e speransa di bida eterno y e honor di representa Dios como proclamado di e bon nobo. Abo por mira e papel cu bo tin meimei di Yehova su Testigonan, den e grupo privilegia di hende cu a ser encarga cu e trabou di predica e Reino, un trabou cu ta salba bida? Corda cu ta Yehova ta esun cu ta afirma: “Boso ta mi testigonan.”—Isaias 43:10.

¹⁶ Bo por haci bo mes preguntanan manera: ‘Con balioso e herencia spiritual aki ta pa mi? Mi ta balor’e lo suficiente pa pone hacimento di e boluntad di Dios na prome luga den mi bida? Mi aprecio ta suficiente grandi pa duna  mi forsa pa resisti cualkier tentacion cu lo por pone mi perde e herencia aki?’ Tambe nos herencia spiritual por yena nos cu un sentido profundo di siguridad spiritual cu nos por tin solamente den e organisacion di Yehova. (Salmo 91:1, 2) Un repaso di susesonan remarcabel den e historia di Yehova su organisacion moderno por graba den nos mente cu ningun persona ni cos por elimina e pueblo di Yehova for di riba tera.—Isaias 54:17; Yeremias 1:19.

17. Kico mas ta necesario fuera di simplemente depende riba nos herencia spiritual?

¹⁷ Claro cu nos no por depende solamente di nos herencia spiritual. Cada un di nos tin cu cultiva un relacion intimo cu Dios. Despues cu Pablo a traha duro pa edifica e fe di e cristiannan na Filipos, el a skirbi nan: “Asina anto, mi stimanan, mescos cu semper boso a obedece, no manera den mi presencia solamente, ma awor mucho mas den mi ausencia, traha riba boso salbacion cu temor y temblamento.” (Filipensenan 2:12) Nos no por steun riba un otro persona pa nos salbacion.

18. Con actividadnan cristian por profundisa nos sentido di identidad cristian?

¹⁸ Participa plenamente den actividadnan cristian. Un hende a yega di bisa cu “trabou ta loke ta forma identidad personal.” Cristiannan djawe a keda encarga cu e trabou importante di predica e bon nobo di Dios su Reino estableci. Pablo a declara: “Como cu mi ta apostel di e paganonan, mi ta gloria den mi ministerio.” (Romanonan 11:13) Nos trabou di predica ta distingui nos for di mundo, y nos participacion den dje ta duna realse na nos identidad cristian. Ademas, nos por profundisa nos sentido di identidad como cristian door di participa plenamente den otro actividadnan teocratico, manera reunionnan cristian, programanan pa construi luganan di adoracion, obranan pa yuda rumannan den necesidad, y cosnan por el estilo.—Galationan 6:9, 10; Hebreonan 10:23, 24.

Un Identidad Cristian Bon Cla Ta Trece Berdadero Bendicion

19, 20. (a) Ki beneficionan abo personalmente a ricibi door cu bo ta un cristian? (b) Kico ta duna nos e base pa nos berdadero identidad?

¹⁹ Tuma un momento pa reflexiona riba e tantisimo beneficio- y bentahanan cu nos tin pasobra nos ta cristiannan berdadero. Nos tin e privilegio cu Yehova ta reconoce nos personalmente. Profeta Malakias a bisa: “Esnan cu a teme SEÑOR a papia cu otro, y SEÑOR a presta atencion y a tende esaki, y un buki di memoria a wordo skirbi su dilanti pa esnan cu ta teme SEÑOR y cu ta honra su nomber.” (Malakias 3:16) Dios por considera nos como su amigo. (Santiago 2:23) Nos bida ta bira mas dushi door cu e tin un proposito bon cla y nificacion profundo, y tambe metanan sano y productivo. Mas ainda, nos a ricibi e speransa di un futuro eterno.—Salmo 37:9.

²⁰ Corda cu bo berdadero identidad y balor como persona ta ser determina door di Dios, no door di loke otro hende lo por pensa di bo. Hende kisas ta evalua nos a base di normanan humano inadecuado. Pero Dios su amor y interes personal ta duna nos e berdadero base di nos balor—nos ta pertenece na dje. (Mateo 10:29-31) Na nos turno, nos propio amor pa Dios por duna nos e sentido mas grandi di identidad y e guia mas cla den nos bida. “Si un hende ta stima Dios, e ta conoci pa Dios.”—1 Corintionan 8:3.

[Nota]

Bo Ta Corda?

• Dicon ta importante pa cristiannan proteha nan identidad spiritual?

• Con nos por establece nos identidad cristian firmemente?

• Ora nos ta confronta e pregunta ken nos mester agrada, ki factornan por yuda nos tuma e decision corecto?

• Con un sentido bon cla di identidad por influencia nos futuro como cristian?

[Preguntanan di Estudio]

[Plachi na pagina 21]

Participando plenamente den actividadnan cristian por duna realse na nos identidad cristian