Cristiannan, Sea Orguyoso di Boso Identidad!

“Laga esun cu ta gaba, gaba den SEÑOR.”—1 CORINTIONAN 1:31.

1. Ki tendencia ta bisto den e actitud di hende pa cu religion?

“APATEISMO.” Resientemente un comentarista di asuntonan religioso a uza e palabra ei pa describi e actitud cu hopi hende tin pa cu nan religion. El a splica: “E desaroyo mas grandi den religion moderno ni un ora so no ta un religion; e ta un actitud aptamente describi como ‘apateismo.’” Elaborando riba esei, el a duna un definicion di apateismo [un combinacion di e palabra “apatia” y “teismo”]: “No tin gana di ta mucho envolvi cu bo propio religion.” El a declara cu hopi hende “ta kere den Dios ...; simplemente nan no ta worry mucho cu ne.”

2. (a) Dicon no ta un sorpresa cu hende a bira spiritualmente indiferente? (b) Ki peliger indiferencia ta forma pa cristiannan berdadero?

² E tendencia aki den direccion di apatia of indiferencia no ta sorprende studiantenan di Bijbel. (Lucas 18:8) Y relaciona cu religion en general, nos por spera tal falta di interes. Religion falso a gaña y decepciona humanidad pa hopi tempo. (Revelacion 17:15, 16) Sinembargo, pa cristiannan berdadero e actitud indiferente y falta di celo cu ta reina ta forma un peliger. Nos no por afford pa bira indiferente tocante nos fe y perde nos celo di sirbi Dios y pa berdad biblico. Hesus a adverti contra tal actitud lou ora el spierta cristiannan di prome siglo cu tawata biba na Laodicea: “Bo no ta ni friu ni cayente; mara bo tawata friu of cayente ... Bo ta lou.”—Revelacion 3:15-18.

Realisa Ken Nos Ta

3. Cristiannan por ta orguyoso di ki aspectonan di nan identidad?

³ Pa lucha contra indiferencia spiritual, cristiannan mester tin un bista bon cla di ken nan ta, nan mester ta rasonablemente orguyoso di nan identidad distintivo. Como sirbido di Yehova y disipel di Cristo, nos por haya den Bijbel descripcionnan cu ta indica ken nos ta. Nos ta “testigonan” di Yehova, “Dios su colaboradonan”, segun cu nos ta comparti activamente e “evangelio” of bon nobo cu otro hende. (Isaias 43:10; 1 Corintionan 3:9; Mateo 24:14) Nos ta hende cu “stima otro.” (Huan 13:34) Cristiannan berdadero ta personanan cu “pa motibo di practica, tin nan mente entrena pa discerni loke ta bon y loke ta malo.” (Hebreonan 5:14) Nos ta “lusnan den mundo.” (Filipensenan 2:15) Nos ta haci esfuerso pa nos “conducta ta excelente meimei di e paganonan.”—1 Pedro 2:12; 2 Pedro 3:11, 14.

4. Con un adorado di Yehova por determina loke e no ta?

⁴ Berdadero adoradonan di Yehova sa tambe loke nan no ta. ‘Nan no ta parti di mundo’, mescos cu nan Lider, Hesucristo, no tawata parti di mundo. (Huan 17:16) Nan ta keda separa for di e nacionnan cu ta “tapa cu scuridad den nan comprondemento, exclui di e  bida di Dios.” (Efesionan 4:17, 18) Como resultado, Hesus su siguidonan ta “renuncia impiedad [of, maldad] y deseonan mundano y [ta] biba huicioso, husto y santo den e siglo presente.”—Tito 2:12.

5. Kico e conseho pa ‘gaba den Yehova’ ta indica?

⁵ E bista cla cu nos tin di nos identidad y nos relacion cu e Gobernante Soberano di universo ta motiva nos pa ‘gaba den Yehova.’ (1 Corintionan 1:31) Ki clase di gabamento esei ta? Como cristiannan berdadero, nos ta orguyoso di tin Yehova como nos Dios. Nos ta sigui e conseho: “Laga esun cu ta gaba, gaba den esaki, cu e ta compronde y conoce mi, cu ami ta SEÑOR, Kende ta mustra misericordia, huicio y husticia riba tera.” (Yeremias 9:24) Nos ta “gaba” cu nos tin e privilegio di conoce Dios y di ser uza door di dje pa yuda otro hende.

E Reto

6. Dicon ta dificil pa algun cristian mantene un bista cla di nan identidad como cristian?

⁶ Ta berdad cu no ta semper facil pa mantene un bista skerpi di nos identidad distintivo como cristian. Un yoncuman cu a lanta como un cristian ta corda con pa un tempo e tawata den un estado spiritualmente debil: “Tawatin biaha cu mi a sinti cu mi no sa dicon mi ta un Testigo di Yehova. Mi a siña e berdad for di tempo mi ta chikito. Tin biaha mi a sinti cu esaki tawata simplemente un otro religion bon conoci y acepta.” Otro hende kisas a laga e mundo di farandula, medionan di comunicacion y e punto di bista actual di bida cu no ta na harmonia cu Dios influencia nan sentido di ken nan ta. (Efesionan 2:2, 3) De bes en cuando algun cristian kisas ta pasa door di periodonan den cua nan ta insigur di nan mes y ta reevalua nan normanan y metanan.

7. (a) Ki clase di examinacion propio ta apropiado pa sirbidonan di Dios? (b) Unda e peliger ta sinta?

⁷ Ta malo pa de bes en cuando nos samina nos mes cuidadosamente? No. Podise bo ta corda cu apostel Pablo a anima cristiannan pa sigui samina nan mes: “Samina boso mes pa wak si boso ta den e fe; samina boso mes!” (2 Corintionan 13:5) Aki e apostel tawata anima cristiannan pa haci esfuerso na un manera balansa y sano pa detecta cualkier debilidad spiritual cu lo por a desaroya. Anto e meta mester tawata pa dal e pasonan necesario pa rectifica nan. Ora un cristian ta samina su mes pa wak si e ta den e fe, e mester determina si su palabranan y accionnan ta cuadra cu loke supuestamente e ta kere aden. Sinembargo, si e examinacion propio ta mal dirigi y e ta motiva nos pa busca nos “identidad” individual of pa busca contestanan cu no tin nada di aber cu nos relacion cu Yehova of cu e congregacion cristian, esei lo resulta en vano y por ta spiritualmente fatal. * Nunca nos lo kier ‘naufraga encuanto nos fe’!—1 Timoteo 1:19.

Nos No Ta Liber di Dificultad

8, 9. (a) Con Moises a expresa su sintimento di insiguridad? (b) Con Yehova a reacciona riba Moises su sintimento di incapasidad? (c) Ki efecto Yehova su palabranan di garantia tin riba bo?

⁸ Cristiannan cu de bes en cuando ta insigur di nan mes mester sinti cu nan a fracasa? Claro cu no! De echo, un cos cu por consola nan ta di corda cu tal sintimento no ta algo nobo. Testigonan fiel di Dios den pasado tambe a sinti asina. Tuma por ehempel Moises kende a desplega fe, lealtad y debocion extraordinario. Ora Moises a ricibi un asignacion aparentemente abrumador, el a puntra cu timides: “Ta ken mi ta?” (Exodo 3:11) Parce cu e contesta cu e tawatin na mente tawata: ‘Mi ta un don nadie!’ of ‘mi no ta capasita!’ Varios aspecto di Moises su background kisas a pon’e sinti inadecuado: El a pertenece  na un nacion di catibo. E Israelitanan a rechas’e. E no tawata un bon orado. (Exodo 1:13, 14; 2:11-14; 4:10) E tawata un wardado di carne, un ofishi cu e Egipcionan a desprecia. (Genesis 46:34) No ta nada straño anto cu el a sinti cu e no ta apto pa bira e libertado di Dios su pueblo esclabisa!

⁹ Yehova a trankilisa Moises door di dun’e dos promesa poderoso: “Lo mi ta cu bo y esaki lo ta e señal pa bo, cu ta ami a manda bo: ora bo a caba di saca e pueblo for di Egipto, boso lo sirbi Dios riba e sero aki.” (Exodo 3:12) Cu e palabranan aki Dios a bisa su sirbido cu tawata yen di duda, cu lo E ta constantemente cu ne. Ademas, Yehova a indica cu sin falta lo e libra su pueblo. Atrabes di siglonan, Dios a duna promesanan similar di sosten. Por ehempel, mediante Moises el a bisa e nacion di Israel ora nan tawata serca di drenta e Tera Priminti: “Sea fuerte y tene curashi. ... SEÑOR bo Dios ta esun cu ta bai cu bo. E lo no faya bo ni bandona bo.” (Deuteronomio 31:6) Yehova a sigura Hosue tambe: “Ningun hende lo no por para bo dilanti tur e dianan di bo bida ... Lo mi ta cu bo; lo mi no faya bo ni bandona bo.” (Hosue 1:5) Y Yehova ta priminti cristiannan: “Nunca lo mi no bandona bo, y nunca lo mi no laga bo desampara.” (Hebreonan 13:5) Siendo cu nos tin tal sosten fuerte, nos mester sinti nos orguyoso di ta cristian!

10, 11. Kico a yuda e Levita Asaf mantene e actitud corecto pa cu e balor di su sirbishi na Yehova?

¹⁰ Rond di cinco siglo despues di Moises, un fiel Levita cu yama Asaf a skirbi francamente tocante e dudanan cu e tawatin di e balor di sigui un bida di rectitud cu empeño. Mientras cu Asaf tawata lucha pa sirbi Dios apesar di prueba y tentacion, el a mira con algun hende cu tawata haci bofon di Dios a bira mas poderoso y prospero. Con esei a afecta Asaf? El a admiti: “Ma pa loke t’ami, mi pia a hera di trompica; parumpinga mi pasonan a slip. Pasobra mi tawata envidioso di e arogantenan, ora mi a mira e prosperidad di e malbadonan.” El a cuminsa duda di e balor di ser un adorado di Yehova. Asaf a pensa: “Siguramente ta en vano mi a tene mi curason puro, y a laba mi mannan den inocencia; pasobra henter dia mi a wordo afligi.”—Salmo 73:2, 3, 13, 14.

¹¹ Con Asaf a trata cu e emocionnan inkietante aki? El a nenga cu e tin nan? No. El a expresa nan den oracion na Dios, manera nos por lesa na Salmo 73. Un bishita na e santuario di e tempel a causa un cambio grandi den Asaf su actitud. Mientras e tawata einan, el a realisa cu apesar di tur cos, debocion na Dios toch ta e miho proceder. Unabes el a renoba su aprecio spiritual, el a compronde cu Yehova ta odia maldad y cu na e debido tempo e malbadonan lo ser castiga. (Salmo 73:17-19) Den e proceso, Asaf a fortalece su sentido di identidad como un sirbido privilegia di Yehova. El a bisa Dios: “Mi ta constantemente serca bo; bo a cohe mi man drechi  tene. Cu bo conseho lo bo guia mi, y despues ricibi mi den gloria.” (Salmo 73:23, 24) Asaf, tawata orguyoso atrobe di su Dios.—Salmo 34:2.

Nan Tawata Bon Conciente di Nan Identidad

12, 13. Duna algun ehempel di personahenan biblico cu tawata orguyoso di nan relacion cu Dios.

¹² Un manera pa fortalece nos sentido di identidad cristian ta di samina y imita e fe di fiel adoradonan kendenan apesar di contratiempo tawata realmente orguyoso di nan relacion cu Dios. Tuma por ehempel Yosef [Hose], e yiu homber di Yacob. Na un edad jong, nan a bend’e como catibo den un manera traicionero y el a ser hiba Egipto, cientos di kilometer leu for di su tata temeroso di Dios y hopi leu for di e calor y apoyo di su hendenan di cas. Den Egipto, Yosef no tawatin ningun hende pa acudi na dje pa haya conseho cu tin Dios su aprobacion. Tambe e tawatin cu confronta situacionnan dificil cu a test su normanan moral y cuanto el a depende riba Dios. Sinembargo, ta bisto cu el a haci un esfuerso delibera pa keda bon conciente di su identidad como un sirbido di Dios, y el a keda fiel na loke e tawata sa cu ta corecto. E tawata orguyoso di ta un adorado di Yehova asta den un ambiente hostil, y e no a basila pa expresa kico e tawata pensa.—Genesis 39:7-10.

¹³ Ocho siglo despues, un mucha mohe Israelita preso cu a bira catibo di e general Sirio Naaman, no a lubida su identidad como un adorado di Yehova. Ora e oportunidad a presenta, cu curashi el a duna un bon testimonio di Yehova door di identifica Eliseo como un  profeta di e Dios berdadero. (2 Reinan 5:1-19) Añanan despues di esei, e hoben Rei Yosias, apesar di tawata den un ambiente corupto, a bin cu reformanan religioso cu a perdura riba plaso largo, el a drecha Dios su tempel y a yuda e nacion bolbe adora Yehova. E tawata orguyoso di su fe y adoracion. (2 Cronicanan, capitulo 34 y 35) Daniel y su tres compañeronan Hebreo na Babilonia nunca a lubida nan identidad como sirbido di Yehova, y asta bou di presion y tentacion, nan a mantene nan integridad. Ta bisto cu nan tawata orguyoso di ta sirbidonan di Yehova.—Daniel 1:8-20.

Sea Orguyoso di Bo Identidad Cristian

14, 15. Kico ser orguyoso di nos identidad cristian ta encera?

¹⁴ E sirbidonan di Dios aki tawatin exito pasobra nan a cultiva un orguyo sano di nan posicion dilanti Dios. Kico di nos awe? Kico ser orguyoso di nos identidad cristian ta encera?

¹⁵ Esaki ta encera principalmente un aprecio profundo pa e echo cu nos ta forma parti di e pueblo cu ta carga Yehova su nomber, cu tin su bendicion y aprobacion. Dios no tin duda tocante ken ta pertenece na dje. Apostel Pablo, kende a biba den un era di bastante confusion religioso, a skirbi: “Señor conoce esnan cu ta di dje.” (2 Timoteo 2:19; Numbernan 16:5) Yehova ta orguyoso di esnan “cu ta di dje.” E ta declara: “Esun cu ta mishi cu boso ta mishi cu mi popch’i wowo.” (Zacarias 2:8, NW) Ta bisto anto cu Yehova stima nos. Na nos turno, nos relacion cu ne mester ta basa riba amor profundo p’e. Pablo a comenta: “Si un hende ta stima Dios, e ta conoci pa Dios.”—1 Corintionan 8:3.

16, 17. Dicon cristiannan, hoben y bieu, por ta orguyoso di nan herencia spiritual?

¹⁶ Hobennan cu a lanta como Testigo di Yehova ta haci bon di samina si nan identidad cristian ta birando mas fuerte a base di nan relacion personal cu Dios. Nan no por depende djis riba e fe di nan mayornan. Relaciona cu cada sirbido di Dios, Pablo a skirbi: “Pa su mes shon e ta keda para of e ta cai.” Pesei Pablo a sigui bisa: “Cada un di nos lo duna cuenta di su mes na Dios.” (Romanonan 14:4, 12) Pues ta bisto anto cu djis acepta e adoracion di bo mayornan sin ningun berdadero interes, lo no yuda bo mantene un relacion intimo y duradero cu Yehova.

¹⁷ Atrabes di historia, tawatin un lista largo di testigo di Yehova. E lista ta cuminsa for di e homber fiel Abel—rond di 60 siglo pasa—te na e “multitud grandi” di Testigonan moderno y e ta sigui cu cantidad di adorado di Yehova cu lo disfruta di un futuro eterno. (Revelacion 7:9; Hebreonan 11:4) Nos ta e grupo mas resien riba e lista largo aki di adoradonan fiel. En berdad nos tin un herencia spiritual maraviyoso!

18. Con nos norma- y balornan ta distingui nos for di mundo?

¹⁸ Nos identidad cristian ta encera tambe e conhunto di norma-, balor-, cualidad- y caracteristicanan cu ta identifica nos como cristian. E ta “E Caminda”, e unico caminda di bida cu ta resulta den exito y cu ta agrada Dios. (Echonan 9:2; Efesionan 4:22-24) Cristiannan ta “samina tur cos” y ta “tene duro na loke ta bon”! (1 Tesalonicensenan 5:21) Nos ta compronde bon cla e diferencia grandi cu tin entre cristianismo y e mundo aleha for di Dios. Yehova no ta laga luga pa ningun duda entre adoracion berdadero y falso. Mediante  profeta Malakias, el a declara: “Boso lo distingui atrobe entre e husto y e malbado, entre un cu ta sirbi Dios y un cu no ta sirbie.”—Malakias 3:18.

19. Kico nunca lo pasa cu cristiannan berdadero?

¹⁹ Siendo cu den e mundo confundi y desorienta aki ta asina importante pa gaba den Yehova, kico por yuda nos keda cu un orguyo sano di nos Dios y mantene un bista bon cla di nos identidad cristian? Den e siguiente articulo nos ta haya sugerencianan util. Mientras bo ta considera esakinan, un cos bo por ta sigur di dje: Cristiannan berdadero nunca lo bira victima di “apateismo.”

[Nota]

Bo Ta Corda?

• Con cristiannan por ‘gaba den Yehova’?

• Kico bo a siña di e ehempel di Moises y Asaf?

• Cua personahenan biblico tawata orguyoso di nan sirbishi na Dios?

• Kico ser orguyoso di nos identidad cristian ta encera?

[Preguntanan di Estudio]

[Plachi na pagina 14]

Pa un tempo, Moises tawata insigur di su mes

[Plachinan na pagina 15]

Hopi sirbido di Yehova di pasado tawata orguyoso di nan identidad distintivo