Milagernan Cu Bo A Mira!

E DI dos nificacion di e palabra “milager” ta “un suseso, cos of logro sumamente remarcabel of extraordinario.” Nos tur a mira e tipo di milager aki, realisa sin intervencion di Dios.

Mas conocemento di e leinan fisico di naturalesa a permiti hende logra cosnan cu un tempo nan tawata considera como imposibel. Por ehempel, shen aña pasa, mayoria hende probablemente lo a pensa cu loke computer, television, tecnologia espacial y otro desaroyonan moderno por haci awor y cu ta asina normal, lo tawata imposibel e tempo ei.

Algun cientifico cu ta reconoce cu nan tin solamente conocemento limita di e milagernan cientifico cu tin den creacion di Dios, ta admiti cu nan no por bisa cu tur siguridad mas cu algo ta imposibel. A lo sumo, nan ta  dispuesto pa bisa cu e ta improbabel. Di e manera ei nan ta laga caminda habri pa “milagernan” den futuro.

Asta si nos uza e nificacion basico di e palabra “milager”, pues referiendo na cosnan “atribui na un poder dibino”, nos por bisa cu cada un di nos a mira milager. Por ehempel, nos por mira solo, luna y streya, y nan tur ta obra di “un poder dibino”, e Creador mes. Ademas, ken por splica detayadamente con e curpa di hende ta funciona, con e mente ta traha of con un embryo humano ta desaroya? E buki The Body Machine ta indica: “E organismo humano cu ta wordo controla y cordina door di un sistema central di nervio, ta un censor sofistica, un motor mobil cu ta funciona di su mes, un computer cu ta reproduci su mes—un creacion maraviyoso y den hopi sentido misterioso.” No cabe duda cu e Dios cu a crea “e organismo humano” a haci un milager, uno cu ta sigui impresiona nos. Tin tambe otro tipo di milager cu bo a mira, aunke kisas bo no a reconoce nan como tal.

Un Buki Por Ta un Milager?

No tin ningun otro buki cu tin un distribucion mes amplio cu Bijbel. Bo ta considera esei un milager? Nos por atribui su existencia na “un poder dibino”? Ta berdad cu ta hende a skirbi Bijbel, pero e escritornan a bisa cu nan a skirbi e pensamentonan di Dios y no di nan mes. (2 Samuel 23:1, 2; 2 Pedro 1:20, 21) Pensa un rato riba lo siguiente: Nan tawata mas o menos 40 escritor cu a biba den un lapso di 1.600 aña. Nan a bin di varios antecedente. Tin di nan tawata wardado di carne, militar, piscado, funcionario publico, docter, sacerdote y rei. Sinembargo, nan a logra transmiti un mensahe di speransa cu ta na harmonia cu otro y cu ta autentico y exacto.

Basa riba e estudio di Bijbel cuidadoso cu Testigonan di Yehova a haci, nan ta acept’e manera apostel Pablo a skirbi “no como palabra di hende, ma pa loke e ta berdaderamente, e palabra di Dios.” (1 Tesalonicensenan 2:13) Atrabes di añanan nan publicacionnan a aclara supuesto contradiccionnan den Bijbel y a mustra con esakinan ta harmonisa cu su mensahe general. E harmonia interno aki riba su mes ta un prueba cu Dios ta autor di e Scritura. *

Ta solamente den caso di Bijbel hende a haci un intento asina grandi pa destru’e. Toch, e t’ei keto bai, anto, por lo menos en parti, den mas cu 2.000 idioma. Tanto e echo cu e buki mes a keda preserva, como e harmonia interno cu tin den dje ta proba cu Dios su man mester tawata den e asunto. No cabe duda, Bijbel ta un berdadero milager!

Un Milager Cu Ta “Bibo y Poderoso”

Milagernan di antes aya, manera curacion milagroso y resureccion, no ta sosode mas. Pero nos tin motibo pa tin confiansa cu den Dios su benidero mundo nobo tal milager lo sosode atrobe, anto e biaha aki na un escala mundial. E milagernan lo trece alivio permanente y lo surpasa nos capasidad di comprondemento actual.

Asta awe, e Bijbel cu a bin serca nos di un manera milagroso por, na moda di papia,  haci milager door di motiva hende pa cambia y bira un miho persona. (Wak un ehempel den e cuadro “E Poder di e Palabra di Dios”, na pagina 8.) Hebreonan 4:12, BPK, ta bisa: “[E] Palabra di Dios ta bibo y poderoso. E ta corta mas skerpi cu un spada cu ta corta tur dos banda. E ta penetra te na e punta caminda alma y spirito, manteca di weso y weso ta mishi cu otro. E ta analisa deseo y pensamento di hende.” Si, Bijbel a hunga un rol masha importante den transforma bida di mas cu seis miyon hende cu ta biba rond mundo, yenando nan bida cu proposito y ofreciendo nan un maraviyoso speransa pa futuro.

Pakico no laga Bijbel haci milager den bo bida?

[Nota]

[Cuadro/Plachi na pagina 7]

MORTO CABA OF NA BIDA AINDA?

Segun Huan 19:33 y 34, Hesus tawata morto caba ora “un di e soldanan a traspasa su custia cu un lansa y mesora a sali sanger y awa.” Sinembargo, den algun traduccion di Bijbel, Mateo 27:49 y 50 ta indica cu Hesus tawata na bida ainda ora esaki a tuma luga. Dicon tin un diferencia?

Segun e Lei di Moises tawata prohibi pa laga un criminal keda colga henter anochi na e palo. (Deuteronomio 21:22, 23) Pesei, den tempo di Hesus, si atardi laat un criminal claba na palo tawata na bida ainda, tawata e custumber pa kibra su pianan pa e muri mas lihe. Di e manera ei lo e no por a stret su curpa mas pa e hala rosea bon. E echo cu e soldanan a kibra pia di e dos malechornan claba na palo banda di Hesus y cu nan no a kibra su pianan ta indica cu pa nan e tawata morto. Kisas e solda a hinc’e den su custia simplemente pa kita tur duda y pa elimina cualkier chens cu lo e por a bin bei y duna motibo pa kere cu tawata trata di un resureccion.

Mateo 27:49 y 50, NW, ta relata loke a tuma luga den un otro secuencia. E ta bisa: “Un otro homber a tuma un lansa y a bora su custia, y sanger y awa a sali. Atrobe Hesus a sclama cu bos fuerte, y a entrega su spirito.” Sinembargo, e frase schuin no ta aparece den tur manuscrito antiguo di Bijbel. Hopi experto ta kere cu e frase aki a wordo tuma over for di e Evangelio di Huan pero cu no a pon’e na e luga corecto. Pesei hopi traduccion ta sea pone e frase aki den parentesis of haknan vierkant, duna un splicacion via un nota of simplemente laga henter e frase afo.

E texto standard di Westcott y Hort, uza extensamente como base pa e Traduccion di Mundo Nobo, ta pone e frase den haknan vierkant dobel. E obra ta remarca cu “tin sospecho fuerte cu ta e escribanan a introduci” e frase aki.

E cantidad di evidencia ta indica anto cu Huan 19:33 y 34 ta veridico y cu Hesus tawata morto caba ora e solda Romano a hinc’e den su custia cu un lansa.

 [Cuadro/Plachi na pagina 8]

E PODER DI E PALABRA DI DIOS

Como teenager y victima di un famia kibra, Detlef a bin cai den e mundo di droga, alcohol y heavy metal. * El a bira un asina yama skinhead, y no a tarda hopi cu el a hay’e den problema cu polis pa motibo di su comportacion violento.

Na 1992, 60 skinhead a haya nan den un bringamento formal cu mas o menos 35 punk den un bar-restaurant na nortost Alemania. Thomas, un di e punknan, a come asina tanto sla cu el a muri di su heridanan. Algun di e lidernan di gang, entre otro Detlef, a bai sera despues di un caso den corte cu a haya cobertura amplio den medionan di comunicacion.

Un poco despues cu Detlef a sali for di prizon, un Testigo di Yehova a dun’e e panfleta: “Pakico Bida Tin Asina Tanto Problema?” Mesora Detlef a reconoce cu loke tin skirbi den dje ta berdad, y el a cuminsa studia Bijbel cu e Testigonan. Esaki a cambia su bida totalmente. Desde 1996, e ta un Testigo di Yehova celoso.

Siegfried, un expunk, tawata un bon amigo di Thomas, e yoncuman cu a ser mata; e tambe a bira un Testigo despues y awor e ta un anciano di congregacion. Ora Siegfried a bishita Detlef su congregacion pa duna un discurso biblico (pa casualidad, Thomas su mama tambe sa asisti na reunion einan), Detlef a invit’e pa come. Un dies aña pasa lo tawata dificil pa nan domina nan odio. Awe, nan amor fraternal pa otro ta bisto.

Detlef y Siegfried ta anhela e dia cu nan lo por ricibi Thomas bek den un paradijs terenal. Detlef ta bisa: “Si mi djis pensa riba esei, mi wowo ta yena cu awa. Mi ta sinti hopi duele di loke mi a haci.” Nan tur dos ta desea pa yuda Thomas na e tempo ei, mescos cu nan ta yudando otro hende awe pa siña conoce Yehova y alegra den e speransa biblico.

E Palabra di Dios si tin poder!

[Nota]

[Plachi na pagina 6]

Curpa di hende ta un creacion maraviyoso

[Reconocemento]

Anatomy Improved and Illustrated, London, 1723, Bernardino Genga