Milagernan​—Realidad of Fantasia?

MESORA e lema di e sticker riba bumper di e auto cu tawata pasando a hala atencion di e homber, “Milagernan Ta Sosode, Djis Puntra e Angelnan.” Maske e mes tawata un hende religioso, e no tawatin sigur ta kico e lema aki a nifica. E ta nifica cu e chauffeur ta kere den milager? Of mas bien e tawata un manera sarcastico pa mustra cu e no ta kere ni den milager ni den angel?

Kisas lo bo kier sa kico e autor Aleman Manfred Barthel a comenta: “Milager ta un palabra cu ta dividi lesadonan mesora den dos grupo opuesto.” Esnan cu ta kere den milager ta combenci cu nan ta sosode y kisas cu frecuencia. * Por ehempel, segun un informe na Grecia durante e ultimo añanan creyentenan a pretende cu milagernan a tuma luga mas o menos un bes pa luna. Pesei un obispo di e Iglesia Griego Ortodox a adverti: “Creyentenan tin tendencia di mira Dios, Maria y e santonan como si fuera ta hende nan ta. Creyentenan no mester bai asina leu.”

Den algun otro pais no tin mucho hende ta kere den milager. Segun un encuesta publica na Alemania na aña 2002, 71 porshento di e poblacion ta haya cu milager no ta existi. Sinembargo, entre e menos cu un tercera parti cu si ta kere den milager tin tres señora cu ta pretende cu nan a ricibi un mensahe for di Birgen Maria. Un par di luna despues cu Maria supuestamente a aparece na nan acompaña pa angelnan y un paloma, e corant Aleman Westfalenpost a informa: “Te aworaki alrededor di 50.000 peregrino, tanto hende cu ta buscando curacion como hende curioso, a mustra interes den e visionnan cu e señoranan aki a mira.” Y nan tawata spera cu un 10.000 hende mas lo a drenta na gran cantidad den e pueblo pa mira otro aparicionnan. Nan ta bisa cu na aña 1858, un aparicion similar di Birgen Maria a tuma luga na Lourdes, Francia, y na aña 1917, na Fátima, Portugal.

Kico Religionnan No Cristian Ta Pensa?

Den casi tur religion tin hende ta kere den milager. The Encyclopedia of Religion ta splica cu e fundadonan di Budismo, Cristianismo y Islam tawatin diferente punto di bista encuanto milager, pero e ta bisa: “Historia posterior di e religionnan aki ta mustra claramente cu milager y relatonan tocante milagernan semper tawata un parti integral di creencianan religioso di humanidad.” E enciclopedia aki ta bisa cu “na cierto ocasion Buda mes a yega di haci milager.” Despues di tempo, ora cu “misioneronan a introduci Budismo na China, hopi bes nan a uza nan podernan milagroso.”

Despues di referi na e diferente supuesto milagernan ei, e enciclopedia ta conclui bisando: “Por ta dificil pa acepta cu tur e relatonan cu biografnan a conta encuanto  susesonan milagroso a sosode, pero no cabe duda cu a compila nan cu bon intencion, esta, pa glorifica Buda, kende por a dota su siguidonan ferviente cu tal podernan milagroso.” E mesun fuente di informacion ta bisa di Islam: “Mayoria di comunidad Islam nunca no a stop di spera den milager. Segun tradicion (hadīths), na varios ocasion Mohammed a haci milager publicamente. . . . Hende ta kere cu asta despues cu e santonan muri nan ta sigui haci milager na nan graf na fabor di esnan fiel, y cu fervor hende ta pidi e santonan intercede pa nan.”

Kico di Milagernan den Cristianismo?

Hopi hende cu ta pertenece na cristianismo tin opinionnan completamente diferente. Tin di nan ta acepta como realidad loke Bijbel ta bisa di e milagernan cu Hesucristo of otro sirbidonan di Dios di e era precristian a haci. Sinembargo, hopi hende ta di acuerdo cu e reformista Protestant Martin Luther. The Encyclopedia of Religion ta bisa di dje: “Tanto Luther como Calvijn a skirbi cu e era di milager a pasa y cu nan lo no sosode mas.” Iglesia Catolico ta sigui kere den milager “sin purba splica con nan a sosode”, segun e mesun enciclopedia aki. Sinembargo, “e comunidad Protestant intelectual ta kere cu cristianismo ta mas tanto un asunto di moralidad y cu ni Dios ni e mundo spiritual a comunica cu bida humano of influenci’e na gran escala.”

Otro personanan cu ta bisa cu nan ta cristian, entre otro algun clero, ta duda cu e milagernan menciona den Bijbel a sosode di berdad. Considera por ehempel e relato na Exodo 3:1-5 di e mata na candela. E buki What the Bible Really Says (Loke Bijbel Realmente Ta Bisa) ta splica cu hopi teologo Aleman no ta considera e relato di milager aki  como algo literal. Mas bien, nan ta interpret’e como “un simbolo di e lucha interno cu Moises tawatin pa motibo di remordimento di consenshi y angustia mental.” E buki ta sigui bisa: “Tambe por mira e candela como flornan cu ta habri den rayonan di solo den presencia dibino.”

Kisas bo no ta haya e splicacion ei satisfactorio. Pues, kico bo mester kere? Ta realistico pa kere cu milagernan a yega di sosode? Y kico di milagernan di awendia? Door cu nos no por puntra e angelnan, ta ken nos por puntra anto?

E Punto di Bista Biblico

Ningun hende por nenga cu Bijbel ta papia di ocasionnan den pasado den cua Dios a interveni pa haci algun acto cu ta imposibel pa hende haci. Bijbel ta bisa di dje: “Cu milagernan tremendo y gran despliegue di poder bo a saca Israel, bo pueblo, for di Egipto y esei a yena tur hende cu temor pa bo.” (Yeremias 32:21, BPK) Figura bo, Dios a manda dies plaga pa humilia e nacion mas poderoso di e tempo ei, cu a inclui morto di nan primogenito. No tin duda, nan tawata milagernan!—Exodo, capitulo 7 pa 14.

Siglonan despues, e cuater escritornan di Evangelio a describi alrededor di 35 milager cu Hesus a haci. De echo, nan palabranan ta indica cu probablemente el a haci asta mas milager pero cu no a ser registra. E informenan aki ta realidad of fantasia? *—Mateo 9:35; Lucas 9:11.

Si Bijbel ta loke e ta afirma di ta, esta Dios su Palabra di berdad, e ora ei bo tin un base solido pa kere den e milagernan cu e ta papia di dje. Bijbel ta mustra bon cla cu milagernan a sosode den pasado, manera por ehempel curacion milagroso y resureccion. Pero e ta splica bon cla tambe cu tal milagernan no ta tuma luga mas. (Wak e cuadro na pagina 4, “Dicon Cierto Milager No Ta Sosode Mas.”) Esei ta nifica cu asta hendenan cu ta acepta Bijbel como realidad no ta kere den e milagernan di awendia? Laga e siguiente articulo contesta e pregunta ei.

[Nota]

[Cuadro na pagina 4]

DICON CIERTO MILAGER NO TA SOSODE MAS

Bijbel ta menciona diferente tipo di milager. (Exodo 7:19-21; 1 Reinan 17:1-7; 18:22-38; 2 Reinan 5:1-14; Mateo 8:24-27; Lucas 17:11-19; Huan 2:1-11; 9:1-7) Hopi di e milagernan aki a yuda identifica Hesus como Mesias, y nan a proba cu e tawatin Dios su apoyo. Hesus su prome siguidonan a mustra cu nan tawatin e don di milager, manera e don di papia den lenga y profetisa. (Echonan 2:5-12; 1 Corintionan 12:28-31) E donnan milagroso ei tawata util pa e congregacion cristian ora el a cuminsa. Dicon?

Pa cuminsa, no tawatin hopi copia di e Scritura. Por lo general ta solamente e riconan tawatin rol of buki. Den e paisnan pagano, hende no tawata conoce ni Bijbel ni su Autor Yehova. Siñansanan cristian mester a wordo pasa pa otro hende oralmente. E donnan di milager tawata util pa proba cu Dios tawata uzando e congregacion cristian.

Pero Pablo a splica cu e donnan aki lo a caba ora nan no tawata necesario mas. “Pa loke ta donnan di profecia, nan lo wordo kita; pa loke ta lenganan, eseinan lo stop; pa loke ta conocemento, esei lo wordo kita. Pasobra nos ta compronde pa un parti, y nos ta profetisa pa un parti; ma ora loke ta perfecto bin, loke ta pa un parti lo wordo kita.”—1 Corintionan 13:8-10.

Awendia ta facil pa hende haya tanto Bijbel como concordancia- y enciclopedianan. Mas cu seis miyon cristian entrena ta yudando otro hende pa haya conocemento tocante Dios basa riba Bijbel. Pues, milager no ta necesario mas pa proba cu Hesucristo ta e Libertado nombra di Dios ni pa duna prueba cu Yehova ta apoya su sirbidonan.