‘Si un Hende Ta Obliga Bo Rindi Sirbishi’

“EI ABO! Laga e cos cu bo ta haci ei para, anto bin aki bin carga e paki aki pa mi.” Con bo ta kere un Hudiu hopi ocupa lo a reacciona si un solda Romano a bis’e esei den prome siglo? Den Hesus su Sermon Riba Sero, el a recomenda: “Si un hende bou di autoridad ta obliga bo bai un miya di sirbishi, bai dos miya cu ne.” (Mateo 5:41, NW) Con Hesus su oyentenan lo a interpreta e conseho ei? Y kico lo e mester nifica pa nos awe?

Pa haya e contesta, nos tin cu compronde e asunto tocante sirbishi obligatorio den tempo di antiguedad. E practica ei tawata masha conoci pa e habitantenan di Israel den tempo di Hesus.

Sirbishi Obligatorio

Evidencia di sirbishi obligatorio (of, corvée) den Medio Oriente ta data for di siglo 18 prome cu nos era. Textonan administrativo di e antiguo ciudad Sirio Alalakh ta menciona gruponan di corvée recluta door di gobierno pa rindi servicio personal. Den e stad Ugarit, na costa Sirio, cunukeronan cu tawata huur tereno pa plantacion tambe a ser recluta pa servicionan similar a menos cu rei a duna nan despensacion.

Claro cu pueblonan conkista of domina cu frecuencia tawata ser asigna pa haci trabou forsa. Capatasnan Egipcio a obliga e Israelitanan traha como catibo pa nan den trahamento di baksteen. Mas despues, e Israelitanan a pone habitantenan Cananeo di e Tera Priminti haci trabou di catibo, y David y Salomon a sigui cu practicanan similar.—Exodo 1:13, 14; 2 Samuel 12:31; 1 Reinan 9:20, 21.

Ora cu e Israelitanan a pidi pa haya un rei, Samuel a splica nan kico e derechonan legitimo di e rei lo ta. Lo el a uza su ciudadanonan pa fungi como comandante di garoshi y como coredo di cabai, pa ara y cosecha, pa traha arma, etcetera. (1 Samuel 8:4-17) Sinembargo, durante construccion di e tempel di Yehova, aunke hende stranhero a ser someti na trabou forsa como catibo, “Salomon no a haci ningun di e yiunan di Israel esclabo, pasobra nan tawata hombernan di guera, su sirbidonan, su prinsnan, su capitannan, su comandantenan di garoshi y su coredonan di cabai.”—1 Reinan 9:22.

Pa loke ta e Israelitanan uza den proyectonan di construccion, 1 Reinan 5:13 y 14 ta bisa: “Rei Salomon a lanta for di henter Israel un grupo di trahado pa haci trabou forsa; y e trahadonan pa haci trabou forsa tawata trinta mil homber. Y e tawata manda nan Libano, dies mil cada luna pa turno; nan tawata un luna na Libano y dos luna na cas.” Segun un comentarista biblico: “No tin duda cu e reinan di Israel y Hudea a uza corvée como un medio pa obtene trahado no paga pa nan actividadnan di construccion y tambe pa traha riba terenonan di e rei.”

Bou di Salomon e carga tawata pisa. De echo, e tawata asina pisa cu ora Roboam a menasa di aumenta e carga ei, henter Israel a rebela y a  piedra e funcionario encarga riba e personanan recluta pa trabou forsa. (1 Reinan 12:12-18) Sinembargo, e areglo di trabou forsa no a ser aboli. Asa, nieto di Roboam, a manda yama e pueblo di Huda pa construi e stadnan di Geba y Mizpa, “sin excepcion di ningun hende.”—1 Reinan 15:22.

Bou di Dominacion Romano

E Sermon Riba Sero ta mustra cu e Hudiunan di prome siglo tawata conoce e posibilidad di ser ‘obliga pa rindi sirbishi.’ E expresion ei ta un traduccion di e palabra Griego ag·ga·reú·o, cu originalmente tawata conecta cu e actividad di mensaheronan di Persia. Nan tawatin e autoridad di obliga hende, cabai, barco of cualkier otro cos di rindi sirbishi pa acelera negoshi publico.

Den tempo di Hesus, Israel tawata bou di ocupacion di e Romanonan, kendenan tambe a adopta un sistema paresido. Den e provincianan oriental, fuera di belasting normal, autoridadnan por a exigi trabou obligatorio for di e poblacion riba un base regular of den un situacion excepcional. Tal servicio definitivamente lo tawata impopular. Ademas, tawata masha comun pa sin autorisacion soldanan pone beslag riba bestia, chauffeur of garoshi pa wordo uza como transporte di Estado. Segun historiado Michael Rostovtzeff, administradonan “a purba regula y sistematisa [e areglo], pero sin exito, pasobra tanten cu e practica a existi, sigur lo el a produci mal efecto. Decreto tras decreto a keda emiti door di prefectonan, kendenan honestamente a purba stop e actonan arbitrario y e opresion cu tawatin integra den e sistema ... Pero e areglo a keda opresivo.”

Segun experto den asuntonan Griego, “ken cu ta por a ser obliga na carga ekipahe di e ehersito pa cierto distancia”, y “ken cu ta por a ser obliga na efectua cualkier servicio cu e [Romanonan] a impone riba dje.” Esei ta loke a sosode cu Simon di Sirene, kende e soldanan Romano a ‘obliga’ pa carga Hesus su staca di tormento.—Mateo 27:32.

Textonan rabinico tambe ta referi na e areglo impopular aki. Por ehempel, soldanan a obliga un rabi transporta palo di mirto pa un palacio.  Nan por a kita trahado for di nan dunado di trabou y asigna nan otro tarea, mientras cu e dunado di trabou si mester a sigui paga e trahadonan. Nan por a tuma control di bestianan di carga of di buey. Si acaso mes cu nan a debolbe nan, muy probablemente e bestianan lo no a sirbi pa traha mas. Bo por compronde dicon ora soldanan tuma control di algo esei tawata sinonimo cu confisca algo. Pues, un proverbio Hudiu a confirma: “Angareia ta manera morto.” Segun un historiado: “Un pueblito por a keda ruina si den nomber di angareia nan a tuma control di e bueynan di ara en bes di e bestianan di hala carga cu tawata autorisa.”

Bo por imagina con impopular e sirbishi obligatorio ei tawata, specialmente door cu hopi bes el a ser imponi na un manera arogante y inhusto. Tumando na cuenta e odio cu e Hudiunan tawatin pa e podernan pagano cu a domina nan, nan a sinti hopi rabia pa e humiliacion di ser obliga na haci tal trabounan ferfelo. No tin ningun lei existente cu ta indica te con leu por a obliga un ciudadano pa hiba un carga. Probablemente hopi ciudadano lo no tawata dispuesto pa bai ni un stap mas leu di loke lei a rekeri.

Sinembargo, ta na e areglo aki Hesus a referi ora el a bisa: “Si un hende bou di autoridad ta obliga bo bai un miya di sirbishi, bai dos miya cu ne.” (Mateo 5:41, NW) Ora su oyentenan a tende esei, algun di nan lo mester a pensa cu Hesus tawata irasonabel. Kico precis e tawata kiermen?

Con Cristiannan Mester Reacciona

Simplemente bisa, Hesus a indica na su oyentenan cu si un autoridad obliga nan na rindi un of otro tipo di sirbishi legitimo, nan mester a hacie di buena gana y sin cunsumi. Pues, nan mester a “duna Cesar loke ta di Cesar” pero sin pasa por halto di e obligacion di duna “Dios loke ta di Dios.”—Marco 12:17. *

Ademas, apostel Pablo a anima cristiannan: “Laga tur hende somete nan mes na e autoridadnan cu ta goberna. Pasobra no tin autoridad cu no ta di Dios, y esnan cu ta existi, ta Dios a establece nan. Pesei, esun cu resisti autoridad a opone e ordenansa di Dios ... Si bo haci loke ta malo, tene miedo; pasobra e no ta carga spada pornada.”—Romanonan 13:1-4.

Pues tanto Hesus como Pablo a reconoce cu un rei of un gobierno tin derecho di administra castigo na esnan cu a viola nan demandanan. Ki clase di castigo? Filosofo Griego Epicteto, di siglo 1 y 2 di nos era, ta duna un contesta: “Si un peticion imprevisto surgi y un solda kita bo burico hoben for di bo, lag’e bai. No resisti, no murmura, pa bo no haya golpi anto riba dje perde bo burico.”

Sinembargo, de bes en cuando, tanto den tempo antiguo como moderno, cristiannan a  sinti cu nan consenshi no a permiti nan cumpli cu demandanan gubernamental. Tawatin biaha cu e consecuencianan tawata serio. Algun cristian a keda sentencia na morto. Otronan a pasa hopi aña den prizon door cu nan a nenga di participa den actividadnan cu nan a considera di no ta neutral. (Isaias 2:4; Huan 17:16; 18:36) Na otro ocasionnan, cristiannan a sinti cu nan por a cumpli cu loke a ser pidi di nan. Por ehempel, algun cristian ta sinti cu nan por rindi servicio—cu un consenshi trankil—bou di un administracion civil relaciona cu trabou no militar cu ta util pa comunidad. Kisas esei ta nifica yuda hende di edad of hende incapasita, sirbi como bombero, limpia beachnan, traha den parke, selva of biblioteca, etcetera.

Claro cu e situacion ta varia di pais pa pais. Pesei, pa por dicidi si lo e cumpli cu cierto demandanan of no, cada cristian mester sigui su consenshi biblicamente entrena.

Con pa Bai e di Dos Miya

E principio cu Hesus a siña, esta, di ta dispuesto pa cumpli cu peticionnan legitimo, no ta conta solamente pa rekisitonan gubernamental sino tambe den relacionnan humano di bida diario. Por ehempel, por sosode cu un persona cu tin autoridad riba bo ta pidi bo haci algo cu bo ta prefera di no haci, pero cu no ta contra e lei di Dios. Con lo bo reacciona? Podise bo ta haya cu e ta haci demandanan irasonabel riba bo tempo y energia, y kisas pesei bo ta reacciona indigna. E resultado por ta rencor. Di otro banda, si bo cumpli pero cu mala gana, bo por perde bo pas interno. E solucion? Haci manera Hesus a recomenda—bai e di dos miya. No haci solamente loke hende ta pidi bo, sino haci mas di loke nan ta pidi. Hacie di buena gana. Cu e actitud ei, lo bo no keda sinti cu hende ta probechando di bo, y sinembargo lo bo tin control riba bo accionnan.

Un autor a comenta: “Hopi hende ta pasa henter nan bida haciendo solamente e cosnan cu nan ta obliga di haci. Pa nan, bida ta un experencia duro y nan ta cansa constantemente. Otro hende ta bai mas aya di nan deber y ta duna libremente di nan mes.” De echo, den hopi situacion un persona por scohe entre bai precis un miya obliga, of bai dos miya. Den e prome caso, un persona kisas ta interesa den exigi su derecho. Den e segundo caso, kisas e ta disfruta di experencianan sumamente recompensador. Ki clase di persona abo ta? Probablemente lo bo ta hopi mas felis y mas productivo si bo por mira bo actividadnan, no simplemente como deber of cos cu bo mester haci, sino como cos cu bo kier haci.

Y kico si bo ta un persona cu autoridad? Ta mas cu claro, no ta muestra di amor ni ta un cos cristian pa uza bo autoridad pa forsa hende haci di mala gana loke bo ta pidi nan. Hesus a bisa: “E gobernantenan di e paganonan tin dominio riba nan, y nan shon grandinan ta eherce autoridad riba nan.” Pero esei no ta e manera cristian. (Mateo 20:25, 26) Aunke un actitud autoritario kisas ta duna resultado, cuanto mas miho relacionnan lo ta entre tur esnan envolvi si esnan cu haya peticionnan bondadoso y apropiado cumpli cu nan cu un actitud respetuoso y alegre! Si, ser dispuesto pa bai dos miya en bes di uno so, realmente por enrikece bo bida.

[Nota]

[Cuadro na pagina 25]

MAL UZO DI SIRBISHI OBLIGATORIO DEN PASADO

Cu hende tawata uza sirbishi obligatorio como un pretexto pa forsa otronan rindi sirbishi, ta bisto na e regulacionnan cu tawatin pa frena tal abuso. Na aña 118 prome cu nos era, Tolomeo Euergetes II di Egipto a decreta cu su oficialnan “no mag obliga ningun di e habitantenan di e pais pa rindi sirbishi priva, ni pone beslag (aggareuein) riba nan bacanan pa ningun proposito personal.” Ademas: “Ningun hende lo pone beslag riba ... botonan pa nan propio uzo bou di ningun pretexto.” Den un inscripcion cu ta data di aña 49 di nos era, den e Tempel di e Gran Oasis, Egipto, e prefecto Romano Virgilio Capito a reconoce cu soldanan a pone beslag ilegal, y el a decreta cu “ningun hende no mag tuma ni pone beslag riba ... nada, a menos cu e tin un autorisacion firma di mi.”

[Plachi na pagina 24]

Simon di Sirene a keda obliga na rindi sirbishi

[Plachi na pagina 26]

Hopi Testigo tawata sera den prizon pasobra nan a mantene nan posicion cristian